Read S'gaw Karen လံာ်နီၢ်ရူၤသး 2 Bible Online

လံာ်နီၢ်ရူၤသး 2 - S'gaw Karen bible

လံာ်နီၢ်ရူၤသး 2

¹နီၢ်နၤဧမံအိၣ်ဒီးအဘူးအတံၢ်လၢအမံၤမ့ၢ်စီၤဘိၤဧး, ပှၤဘၣ်ထွဲဒီးအဝၤစီၤအလံၤမ့လ့းအဒူၣ်ဖိထၢဖိတဂၤန့ၣ်လီၤ. အဝဲမ့ၢ်ပှၤထူးပှၤတီၤလၢအအိၣ်ဒီးအစိအကမီၤန့ၣ်လီၤ.

²ပှၤမိၤအးမုၣ်ဖိနီၢ်ရူၤသးစံးဘၣ်နီၢ်နၤဧမံ, “ပျဲယလဲၤဆူစံာ်ပျီတဖၣ်အပူၤဒ်သိးယကထၢဖှိၣ်ဘုအစဲၤတဖၣ် လၢပှၤကူးဘုတဖၣ်ပာ်လီၤတဲာ်န့ၣ်တက့ၢ်. ယနာ်လၢယကထံၣ်န့ၢ်ပှၤတဂၤဂၤလၢအကပျဲ ယမၤတၢ်အံၤန့ၣ်လီၤ.” ဒီးနီၢ်နၤဧမံစံးဆၢဝဲ, “ယဖိမုၣ်ဧၢ, လဲၤတက့ၢ်.”

³တုၤနုၤတစု, နီၢ်ရူၤသးလဲၤဆူစံာ်ပျီတဖၣ်အပူၤဒီးဟးဝဲ လၢပှၤကူးဘုတဖၣ်အလီၢ်ခံ, ဒီးထၢထီၣ်ဝဲဘုအစဲၤတဖၣ်လၢအဝဲ သ့ၣ်ပာ်လီၤတဲာ်န့ၣ်လီၤ. ဒီးတၢ်မၤအသးလၢအဝဲလဲၤဘၣ်ဆူ စီၤဘိၤဧးအစံာ်ပျီပူၤန့ၣ်လီၤ.

⁴တယံာ်ဘၣ်ဒီး, စီၤဘိၤဧးအနီၢ်ကစၢ်ဒၣ်ဝဲဟဲတုၤဝဲ, လၢဝ့ၢ်ဘ့ၤသလ့ဃ့ၣ်ဒီးကတိၤဆၢဂ့ၤဆၢဝါပှၤကူးဘုဖိတဖၣ် ဒီးစံးဝဲ, “မ်ယွၤအိၣ်ဒီးသုတက့ၢ်.” ဒီးအဝဲသ့ၣ်စံးဆၢဝဲ, “မ်ယွၤဆိၣ်ဂ့ၤနၤတက့ၢ်.”

⁵ဒီးစီၤဘိၤဧးသံကွၢ်ပှၤကဲခိၣ်ကဲနၢ်လၢအခ့အပှၤ, ပှၤကူးဘုဖိတဖၣ်အကျါဒီးစံးဝဲ, “ပိာ်မုၣ်သးစၢ်တဂၤန့ၣ် မ့ၢ်မတၤတဂၤလဲၣ်.”

⁶ပှၤတဂၤန့ၣ်စံးဆၢအီၤ, “အဝဲမ့ၢ်ပှၤမိၤအးမုၣ်ဖိတဂၤလၢအဟဲက့ၤဒီး နီၢ်နၤဧမံလၢကီၢ်မိၤအးန့ၣ်လီၤ.

⁷အဝဲဃ့တၢ်လၢယၤဒ်သိးယကပျဲအထၢဖှိၣ်ဘုစဲၤလၢအအိၣ်လီၤတဲာ် လၢပှၤကူးဘုဖိတဖၣ်အလီၢ်ခံန့ၣ်လီၤ. မ့တမ့ၢ်ဘၣ်လၢအအိၣ်ဘှံးဝဲတစိၢ်ဖိလၢဒဲပူၤဘၣ်န့ၣ်ဒီးအဝဲ မၤတၢ်စးထီၣ်လၢမုၢ်ဂီၤလံၤလံၤတုၤခဲကနံၣ်အံၤလီၤ.”

⁸တုၤနုၤတစုစီၤဘိၤဧးစံးဘၣ်နီၢ်ရူၤသး, “ပိာ်မုၣ်သးစၢ်ဧၢ, ပျဲယဟ့ၣ်ကူၣ်နၤဒ်အံၤ, လဲၤထၢဖှိၣ်ဘုစဲၤလၢစံာ်ပျီအဂၤအပူၤန့ၣ်တဂ့ၤ. မ့မ့ၢ်မၤဒၣ်တၢ်ဒီးပိာ်မုၣ်ဖဲအံၤတဖၣ်န့ၣ်တက့ၢ်.

⁹ကွၢ်အဝဲသ့ၣ်လဲၤကူးဘုအလီၢ်ဒီးပိာ်အခံန့ၣ်တက့ၢ်. ယမၤလိာ်တ့ၢ်လံယခ့ယပှၤပိာ်ခွါတဖၣ်လၢအသုတမၤတံာ်တာ်နၤတဂ့ၤ န့ၣ်လီၤ. ဒီးဖဲတၢ်သူနသးလၢထံတဘျီလၢ်လၢ်န့ၣ်, လဲၤဒီးအီထံလၢသပၢၤလၢပှၤမၤတၢ်ဖိတဖၣ်ဒၢၣ်ပှဲၤတ့ၢ်န့ၣ်တက့ၢ်.”

¹⁰တုၤနုၤတစု, နီၢ်ရူၤသးထိၣ်လီၤပှီၤအသးဒီးကျးလီၤအမဲာ် ပၢၢ်တုၤလၢဟီၣ်ခိၣ်ဒီးစံးဘၣ်စီၤဘိၤဧး, “ဘၣ်မနုၤအဃိန သူၣ်အိၣ်သးအိၣ်ယၤလၢအမ့ၢ်ဒၣ် ပှၤတခီဘီမုၢ်ဖိအံၤန့ၣ်လဲၣ်.”

¹¹ဒီးစီၤဘိၤဧးစံးဆၢဝဲဒၣ်, “ယနၢ်ဟူတ့ၢ်တၢ်ဂ့ၢ်လၢလၢပှဲၤပှဲၤဘၣ်ဃးနမၤဘၣ်နမံၤပှၢ်ပိာ်မုၣ် စးထီၣ်လၢနဝၤသံသဒၣ်နၤလံၤလံၤန့ၣ်လီၤ. ဒီးယသ့ၣ်ညါလၢနပာ်တ့ၢ်နမိၢ်နပၢ်, နထံနကီၢ်ဒီးဟဲဒ်လဲၣ်လၢနကအိၣ်ဆိးလၢပှၤတကလုာ်လၢနတ သ့ၣ်ညါတ့ၢ်အဂ့ၢ်နီတဘျီအကျါန့ၣ်လီၤ.

¹²မ်ယွၤဟ့ၣ်ဘျုးက့ၤနၤလၢတၢ်လၢနမၤတ့ၢ်တဖၣ်အဃိန့ၣ်တက့ၢ်. မ်အံၣ်စရ့လးအကစၢ်ယွၤလၢနဟဲဃုတၢ်အိၣ်သဒၢလၢအဒံးဆ့ဖီလာ် တဂၤန့ၣ်ဟ့ၣ်ဘျုးက့ၤနၤလၢလၢပှဲၤပှဲၤတက့ၢ်.”

¹³တုၤနုၤတစု, နီၢ်ရူၤသးစံးဆၢဝဲဒၣ်, “ယကစၢ်ဧၢ, နမ့ၢ်ပှၤလၢအမၤဘျုးမၤဖှိၣ်ယၤဒိၣ်မးလီၤ. အဂ့ၢ်ဒ်အံၤ, ယမ့တမ့ၢ်ဘၣ်ဒ်ပှၤဒ်သိးဒီးနကုၢ်ပိာ်မုၣ်အကျါတဂၤ ဘၣ်ဆၣ်နမၤသးမုာ်ယၤလၢနတၢ်ကတိၤတၢ်မုာ်မုာ်ခုၣ်ခုၣ် တဖၣ်န့ၣ်လီၤ.”

¹⁴ဒီးဖဲတၢ်အီၣ်အကတီၢ်န့ၣ်, စီၤဘိၤဧးစံးဘၣ်နီၢ်ရူၤသး, “ဟဲဒီးဟံးန့ၢ်ကိၣ်, ဒီးဘျၢလီၤလၢစပံးထံအဆံၣ်အပူၤန့ၣ် တက့ၢ်.” အန့ၣ်ဒီးနီၢ်ရူၤသးဆ့ၣ်နီၤဃုာ်ဒီးပှၤကူးဘုဖိတ ဖၣ်, ဒီးစီၤဘိၤဧးဟ့ၣ်ဃီၤဘုဝဲာ်ဆူအအိၣ်လီၤ. ဒီးအဝဲဒၣ်အီၣ်တၢ်, ဒီးဘျဲးအီၣ်, ဒီးအိၣ်ဘျဲၣ်ဒံးဝဲလီၤ.

¹⁵တုၤအဝဲဂဲၤထၢၣ်ဒီးလဲၤဝဲဒ်သိးအကထၢဖှိၣ်ဘုစဲၤတဖၣ်န့ၣ်, စီၤဘိၤဧးမၤလိာ်အခ့အပှၤတဖၣ်ဒီးစံးဝဲ, “ပျဲအထၢဖှိၣ်ဘု အစဲၤတဖၣ်လၢဘုကဒိၣ်အကျါဒၣ်လဲာ်ဒီးဒုၣ်ဒွဲၣ်အီၤတဂ့ၤ.

¹⁶ထုးထီၣ်န့ၢ်အီၤဘုစဲၤတနီၤလၢဘုအကဒိၣ်အပူၤ, ဒီးပာ်လီၤတဲာ်န့ၢ်အီၤလၢအကထၢဖှိၣ်ဝဲအဂီၢ်န့ၣ်တက့ၢ်. ဒူအလိၤဒီးတြီအီၤတဂ့ၤ.”

¹⁷ဒီးနီၢ်ရူၤသးထၢဖှိၣ်တၢ်လၢစံာ်ပျီပူၤတုၤမုၢ်ဟါလီၤ, ဒီးဖဲအတီၢ်လီၤဝဲဝံၤန့ၣ်အိၣ်ဝဲဘုမုယီၤနီၣ်ဃီၣ်သၢဖျၢၣ် ဃၣ်ဃၣ်လီၤ.

¹⁸အဝဲဟံးထီၣ်အဘုဒီးက့ၤစိာ်ဝဲဆူဝ့ၢ်ပူၤ, ဒီးဒုးနဲၣ်အမံၤပှၢ်ပိာ်မုၣ်လၢတၢ်လၢအထၢဖှိၣ်ဝဲအိၣ်ဆံးအါ ဆံးအါလဲၣ်န့ၣ်လီၤ. အဝဲဟဲက့ၤစိာ်ဒီးဟ့ၣ်စ့ၢ်ကီးအမံၤပှၢ်ပိာ်မုၣ်, တၢ်အီၣ်လၢအဝဲအီၣ်ဘျဲးအီၣ်ဒီးအိၣ်ဘျဲၣ်ဝဲန့ၣ်လီၤ.

¹⁹ဒီးနီၢ်နၤဧမံသံကွၢ်အီၤ, “တနံၤညါအံၤနလဲၤထၢဘုဖဲလဲၣ်. နလဲၤမၤတၢ်လၢမတၤအစံာ်ပျီပူၤလဲၣ်. မ်ယွၤဆိၣ်ဂ့ၤပှၤတဂၤလၢ အသူၣ်အိၣ်သးအိၣ်နၤန့ၣ်တက့ၢ်.” ဒီးနီၢ်ရူၤသးစံးဘၣ်အမံၤပှၢ်ပိာ်မုၣ်လၢတနံၤညါအံၤအဝဲလဲၤ မၤတၢ်လၢပှၤတဂၤအမံၤမ့ၢ်စီၤဘိၤဧးအစံာ်ပျီပူၤန့ၣ်လီၤ.

²⁰ဒီးနီၢ်နၤဧမံစံးဘၣ်အဒဲၣ်, “မ်ယွၤလၢအဟံးဃာ်အတၢ်အၢၣ်လီၤအီလီၤထီဘိ ဆူပှၤသံဒီးပှၤမူတဂၤန့ၣ်ဆိၣ်ဂ့ၤစီၤဘိၤဧးတက့ၢ်.” ဒီးစံးကဒီးဝဲ, “ပှၤအံၤမ့ၢ်ပဘူးပတံၢ်အကျါတဂၤ, ဒီးအိၣ်ဒီးအမူအဒါလၢကဘၣ်အံးထွဲကွၢ်ထွဲပှၤန့ၣ်လီၤ.”

²¹ဒီးနီၢ်ရူၤသးစံးဝဲဒၣ်, “အဝဲစံးဘၣ်စ့ၢ်ကီးယၤလၢယကဘၣ် ထၢဖှိၣ်ဘုလီၤတဲာ်ဃုာ်ဒီးအခ့အပှၤတဖၣ်တုၤကူးဘုဝံၤအက တီၢ်န့ၣ်လီၤ.”

²²အန့ၣ်တစုနီၢ်နၤဧမံစံးဘၣ်အဒဲၣ်မုၣ်နီၢ်ရူၤသး, “ယဖိမုၣ်ဧၢ, နလဲၤထၢဖှိၣ်တၢ်ဃုာ်ဒီးစီၤဘိၤဧးအခ့အပှၤပိာ်မုၣ်တဖၣ်လၢအ စံာ်ပျီပူၤဂ့ၤဒိၣ်တက့ၢ်လီၤ. နမ့ၢ်လဲၤဆူပှၤဂၤအစံာ်ပျီပူၤ န့ၣ်ဒီး, နကဘၣ်တၢ်မၤတံာ်တာ်နၤလီၤ.”

²³လၢတၢ်န့ၣ်အဃိ, နီၢ်ရူၤသးလဲၤမၤတၢ်ဃုာ်ဒီးအဝဲသ့ၣ်, ဒီးထၢဖှိၣ်ဘုစဲၤအိၣ်လီၤတဲာ်တဖၣ်တုၤဘုမုယီၤဒီးဘုကၠူၣ် ဘၣ်တၢ်ကူးအီၤဝံၤဝဲခဲလၢာ်တစုန့ၣ်လီၤ. ဒီးအဝဲအိၣ်ဆိးဒံးဝဲဒီးအမံၤပှၢ်ပိာ်မုၣ်န့ၣ်လီၤ.