Read S'gaw Karen လံာ်နီၢ်ရူၤသး 3 Bible Online

လံာ်နီၢ်ရူၤသး 3 - S'gaw Karen bible

လံာ်နီၢ်ရူၤသး 3

¹ဒီးနီၢ်နၤဧမံစံးဘၣ်နီၢ်ရူၤသး, “ယဖိမုၣ်ဧၢ, ယကဘၣ်ဃုန့ၢ်ဟံၣ်လၢနဂီၢ်ဒ်သိးတၢ်မုာ်ကအိၣ်ဒီးနၤအဂီၢ်လီၤ.

²သ့ၣ်နီၣ်ထီၣ်က့ၤစီၤဘိၤဧးလၢနလဲၤမၤတၢ်ဃုာ်ဒီးအပှၤမၤတၢ် ဖိပိာ်မုၣ်တဖၣ်န့ၣ်, မ့ၢ်ပဘူးပတံၢ်တဂၤန့ၣ်တက့ၢ်. ခဲကနံၣ်အံၤ, ဒိကနၣ်တၢ်တက့ၢ်. မုၢ်တဟါအံၤအဝဲကပ ညၢဘုမုယီၤလၢကြဲၢ်ပူၤန့ၣ်လီၤ.

³လၢတၢ်န့ၣ်အဃိ, သ့စီနသး, ဖှူနသးဒီးတၢ်နၢမူ, ဒီးကူသိးထီၣ်တၢ်ကူတၢ်သိးလၢအဂ့ၤကတၢၢ်န့ၣ်တက့ၢ်. ဒီးလဲၤလီၤဆူကြဲၢ်ပူၤဖဲအဝဲပညၢဘုအလီၢ်န့ၣ်တက့ၢ်. ဘၣ်ဆၣ်, ဒုးသ့ၣ်ညါနသးလၢအီၤတုၤအဝဲအီၣ်တၢ်ဒီးအီတၢ်ဝံၤအကတီၢ်န့ၣ်တဂ့ၤ.

⁴တုၤအမံလီၤန့ၣ်, ကွၢ်နီၣ်တၢ်လီၢ်ဖဲအမံလီၤတက့ၢ်. ဒီးဖဲအမံဘၣ်အသးလံန့ၣ်, လဲၤဒီးအိးထီၣ်တၢ်လၢအမၤဘၢအခီၣ် ဒီးမံလီၤလၢအခီၣ်ထံးန့ၣ်တက့ၢ်. ဒီးအဝဲကတဲဖျါထီၣ်နၤတၢ်လၢနကဘၣ်မၤအီၤဒ်လဲၣ်အဂ့ၢ်န့ၣ်လီၤ.”

⁵နီၢ်ရူၤသးစံးဆၢဝဲ, “ကယဲၢ်တၢ်လၢနစံးဘၣ်ယၤခဲလၢာ်န့ၣ်, ယကမၤယဲလီၤ.”

⁶မၤသးဒ်န့ၣ်ဒီး, နီၢ်ရူၤသးလဲၤလီၤဆူကြဲၢ်ပူၤဒီးမၤဝဲဒ် အမံၤပှၢ်ပိာ်မုၣ်စံးဘၣ်အီၤအသိးန့ၣ်လီၤ.

⁷ဖဲစီၤဘိၤဧးအီၣ်တၢ်ဒီးအီတၢ်ဝံၤဝဲန့ၣ်, အသူၣ်ဖှံအသးညီဝဲလီၤ. ဒီးလဲၤမံလီၤဝဲလၢဘုပူၣ်အကတၢၢ်န့ၣ်လီၤ. အန့ၣ်ဒီး, နီၢ်ရူၤသးဟဲဝဲကယီကယီ, အိးထီၣ်တၢ်လၢအမၤဘၢအခီၣ်ဒီးမံလီၤဝဲလီၤ.

⁸လၢဖးဖီမုၢ်အကတီၢ်, ဖဲအဖုးပၢၢ်ထီၣ်ဝဲဒီးဃၣ်အသးန့ၣ်, ကမၢကမၣ်ဝဲလၢအထံၣ်ဘၣ်ပိာ်မုၣ်တဂၤမံလီၤလၢအခီၣ်ထံးန့ၣ်လီၤ.

⁹ဒီးစံးဝဲဒၣ်, “နမ့ၢ်မတၤလဲၣ်.” ပိာ်မုၣ်န့ၣ်စံးဆၢဝဲ, “ယမ့ၢ်နကုၢ်ပိာ်မုၣ်နီၢ်ရူၤသးလီၤ. ဒုးလုးစ့ၢ်ကီးယၤလၢ နယၣ်လုးတက့ၢ်. အဂ့ၢ်ဒ်အံၤ, နမ့ၢ်ပှၤလၢအဘူးအတံၢ်တဂၤ, ပှၤလၢအမူအဒါအိၣ်လၢကအံးထွဲကွၢ်ထွဲက့ၤယၤအဂီၢ်န့ၣ်လီၤ.”

¹⁰ဒီးအဝဲစံးဝဲ, “မ်ယွၤဆိၣ်ဂ့ၤနၤတက့ၢ်. နပာ်ဖျါထီၣ်ဟံၣ်ဖိ ဃီဖိအတၢ်သးတီလၢနမၤတၢ်အံၤအဂီၢ်န့ၣ်, ဒိၣ်န့ၢ်တၢ်လၢနမၤတ့ၢ်ဘၣ်နမံၤပှၢ်ပိာ်မုၣ် အဂီၢ်တက့ၢ်ဒၣ်လဲာ်လီၤ. နတဃုန့ၢ်ပိာ်ခွါသးစၢ်လၢအထူးအတီၤမ့ၢ်ဂ့ၤ, အဖှီၣ်မ့ၢ်ဂ့ၤန့ၣ်ဘၣ်.

¹¹ခဲကနံၣ်အံၤနီၢ်ရူၤသးဧၢ, ဘၣ်ယိၣ်တၢ်တဂ့ၤ. ကယဲၢ်တၢ်လၢနစံးဘၣ်ယၤခဲလၢာ်န့ၣ်ယကမၤယဲလီၤ. အဂ့ၢ်ဒ်အံၤ, ပှၤဝ့ၢ်ဖိကိးဂၤသ့ၣ်ညါလၢနမ့ၢ်ပိာ်မုၣ်လၢအဂ့ၤအဝါတဂၤလီၤ.

¹²ယမ့ၢ်ပှၤလၢအဘူးအတံၢ်တဂၤနီၢ်နီၢ်လၢမူဒါအိၣ်ဝဲလၢနဂီၢ် လီၤ. ဘၣ်ဆၣ်ပှၤလၢအဘူးဒိၣ်န့ၢ်ယၤတက့ၢ်န့ၣ်, အိၣ်ဝဲတဂၤလီၤ.

¹³အိၣ်ဒၣ်ကလိာ်ဖဲအံၤသီတနၤကျၢၤ, ဒီးလၢမုၢ်ဆ့ၣ်ထီၣ်န့ၣ်, ပကဃုသ့ၣ်ညါတၢ်လၢမ့ၢ်ပှၤတဂၤန့ၣ်ကဟံးန့ၢ်မူဒါလၢနဂီၢ်ဧါ န့ၣ်လီၤ. မ့ၢ်မၤဒ်န့ၣ်ဒီးဂ့ၤလီၤ. မ့ၢ်တမၤဒ်န့ၣ်ဘၣ်ဒီး, ယအၢၣ်လီၤယသးလၢယွၤလၢအမူဝဲတဂၤအမဲာ်ညါလၢယက ဟံးန့ၢ်မူဒါလၢနဂီၢ်န့ၣ်လီၤ. ခဲအံၤ, မံလီၤတုၤမုၢ်ဆ့ၣ် ထီၣ်န့ၣ်တက့ၢ်.”

¹⁴လၢတၢ်န့ၣ်အဃိ, နီၢ်ရူၤသးမံလီၤဝဲလၢအခီၣ်ထံးတုၤမုၢ်ဆ့ၣ် ထီၣ်လီၤ. ဘၣ်ဆၣ်ဂဲၤဆၢထၢၣ်ဝဲတချူးလၢပှၤသ့ၣ်ညါလိာ်အသးသ့ဒံးဘၣ် အကတီၢ်န့ၣ်လီၤ. အဂ့ၢ်မ့ၢ်လၢစီၤဘိၤဧးတ အဲၣ်ဒိးဝဲလၢပှၤသ့ၣ်ညါဘၣ်ပိာ်မုၣ်တဂၤဟဲနုာ်လၢကြဲၢ်ပူၤ အဂ့ၢ်အဃိန့ၣ်လီၤ.

¹⁵ဒီးစီၤဘိၤဧးစံးဘၣ်အီၤ, “ဟဲစိာ်နဆ့ကၤဖီခိၣ်လၢနကၤ အီၤန့ၣ်ဒီးသလၣ်လီၤအီၤဖဲအံၤတက့ၢ်.” နီၢ်ရူၤသးမၤဝဲဒ်န့ၣ်အသိး, ဒီးအဝဲဃီၣ်ထီၣ်ဘုမုယီၤဃုနီၣ်ဃီၣ်, ဒီးပာ်လီၤဝဲလၢအလိၤလီၤ. အန့ၣ်ဝံၤဒီးနီၢ်ရူၤသးဟဲက့ၤဆူဝ့ၢ်ပူၤလီၤ.

¹⁶တုၤအဟဲက့ၤတုၤဆူဟံၣ်န့ၣ်, အမံၤပှၢ်ပိာ်မုၣ်သံကွၢ်အီၤဒီး စံး, “ယဖိမုၣ်ဧၢ, တၢ်မၤအသးဒီးနၤဒ်လဲၣ်.” နီၢ်ရူၤသးစံးဘၣ်တဲဘၣ်အီၤကယဲၢ်တၢ်လၢစီၤဘိၤဧးမၤတၢ်လၢ အဂီၢ်ခဲလၢာ်န့ၣ်လီၤ.

¹⁷ဒီးစံးအါထီၣ်ဝဲ, “အဝဲစံးဘၣ်ယၤလၢယတဘၣ်က့ၤကလီဆူ နအိၣ်ဘၣ်အဃိ, ဟ့ၣ်လီၤစ့ၢ်ကီးယၤဘုမုယီၤဃုနီၣ်ဃီၣ်အံၤ န့ၣ်လီၤ.”

¹⁸နီၢ်နၤဧမံစံးဘၣ်အီၤ, “ယဖိမုၣ်ဧၢ, အိၣ်ခိးလၢတၢ်သးစူၤအ ပူၤ, တုၤနထံၣ်ဘၣ်တၢ်ခဲလၢာ်အံၤကမၤအသးဒ်လဲၣ်ဒ်လဲၣ်န့ၣ်တ က့ၢ်. စီၤဘိၤဧးတအိၣ်ဘှံးဝဲတုၤအမၤဝံၤတၢ်တမံၤအံၤလၢမုၢ်မဆါတနံၤအံၤန့ၣ်ဘၣ်လီၤ.”