Read S'gaw Karen လံာ်နီၢ်ရူၤသး 4 Bible Online

လံာ်နီၢ်ရူၤသး 4 - S'gaw Karen bible

လံာ်နီၢ်ရူၤသး 4

¹စီၤဘိၤဧးလဲၤဆူတၢ်အိၣ်ဖှိၣ်ရိဖှိၣ်အလီၢ်ဖဲဝ့ၢ်အပဲတရီ, ဒီးဆ့ၣ်နီၤဝဲဖဲန့ၣ်လီၤ. တုၤနုၤတစု, တုၤစီၤအလံၤမ့လ့း အဘူးအတံၢ်နီၢ်နီၢ်, လၢစီၤဘိၤဧးစံးကတိၤတ့ၢ်ဝဲလၢအဂ့ၢ်တဂၤ, ဟဲဝဲန့ၣ်ဒီး, စီၤဘိၤဧးကိးအီၤဒီးစံးဘၣ်အီၤ, “ယတံၤသကိးဧၢ, ဟဲဆ့ၣ်နီၤဖဲအံၤတက့ၢ်.” ဒီးဟဲဆ့ၣ်နီၤဝဲဒၣ်န့ၣ်လီၤ.

²အန့ၣ်ဝံၤဒီး, စီၤဘိၤဧးကိးန့ၢ်ဝ့ၢ်အခိၣ်အနၢ်ဆံဆဲၣ်ဂၤဒီး ဃ့ကညးအဝဲသ့ၣ်လၢကဆ့ၣ်နီၤစ့ၢ်ကီးဖဲန့ၣ်လီၤ. တုၤအဝဲသ့ၣ်ဆ့ၣ်နီၤလံန့ၣ်ဒီး,

³စီၤဘိၤဧးစံးဘၣ်အဘူးအတံၢ်တဂၤန့ၣ်, “ခဲကနံၣ်အံၤ, နီၢ်နၤဧမံလၢအဟဲက့ၤတ့ၢ်လံလၢကီၢ်မိၤဧးန့ၣ်အဲၣ်ဒိးဆါ လီၤကွံာ်ဟီၣ်ခိၣ်တကဝီၤလၢအမ့ၢ်ပဘူးပတံၢ်စီၤအလံၤမ့လ့းအ တၢ်န့ၣ်လီၤ.

⁴ဒီးယဆိကမိၣ်လၢနကြၢးသ့ၣ်ညါတၢ်ဂ့ၢ်အံၤလီၤ. ခဲကနံၣ်အံၤနမ့ၢ်သးလီတၢ်လီၢ်အံၤန့ၣ်ဒီး, ပှ့ၤအီၤလၢပှၤလၢအဆ့ၣ်နီၤဖဲအံၤတဖၣ်အမဲာ်ညါန့ၣ်တက့ၢ်. နမ့ၢ်တသးလီဘၣ်န့ၣ်ဒီးစံးဘၣ်ယၤတက့ၢ်. အဂ့ၢ်ဒ်အံၤ, နမ့ၢ်ပှၤလၢအကြၢးဒိးန့ၢ်ဘၣ်တၢ်အဆိကတၢၢ်တဂၤ, ဒီးယဲယမ့ၢ်ဒၣ်ပှၤခံဂၤတဂၤန့ၣ်လီၤ.” ဒီးပှၤတဂၤန့ၣ်စံး, “ယကပှ့ၤက့ၤအီၤလီၤ.”

⁵အန့ၣ်ဒီးစီၤဘိၤဧးစံး, “မုၢ်တနံၤလၢနပှ့ၤဟီၣ်ခိၣ်တကဝီၤ လၢနီၢ်နၤဧမံအစုပူၤန့ၣ်, နမၤန့ၢ်စ့ၢ်ကီးပှၤမိၤဧးမုၣ်ကမဲနီၢ်ရူၤသး, ဒ်သိးနကဒုးအိၣ်ထီၣ်က့ၤတၢ်န့ၢ်သါလၢပှၤသံတဂၤအဒူၣ်ဖိ ထၢဖိအဂီၢ်န့ၣ်လီၤ.”

⁶ပှၤတဂၤန့ၣ်စံးဆၢဝဲ, “မ့မ့ၢ်ဒ်န့ၣ်ဒီး, ယတပှ့ၤက့ၤအီၤလၢယ ဂီၢ်ဒၣ်ယဲဘၣ်. ယဖိယလံၤဒၣ်ယဲတမ့ၢ်ကန့ၢ်သါဘၣ်အီၤဘၣ်. ဟံးန့ၢ်ယလီၢ်လၢနဂီၢ်ဒၣ်နဲဒီးပှ့ၤက့ၤအီၤတက့ၢ်. ယတပှ့ၤက့ၤအီၤလၢၤဘၣ်.”

⁷ပှၤအံၣ်စရ့လးဖိအလုၢ်အလၢ်လၢအမၤညီနုၢ်ဝဲဖဲအကမၤဂၢၢ်မၤ ကျၢၤတၢ်ဆါတၢ်ပှ့ၤအဂီၢ်မ့ၢ်ဂ့ၤ, တၢ်ခီလဲလိာ်တၢ်စု လီၢ်ခီၣ်ခိၣ်အဂီၢ်မ့ၢ်ဂ့ၤန့ၣ်, မ့ၢ်ပှၤဆါတၢ်တဂၤဘ့ၣ်လီၤအခီၣ် ဖံးတခီဒီးဟ့ၣ်လီၤဝဲဆူပှၤပှ့ၤတၢ်တဂၤအစုပူၤန့ၣ်လီၤ. တၢ်မၤဒ်သိးအံၤန့ၣ်, ဒုးနဲၣ်ဖျါထီၣ်တၢ်ပာ်ဂၢၢ်ပာ်ကျၢၤလံ တၢ်ဂ့ၢ်န့ၣ်လီၤ.

⁸လၢတၢ်အံၤအဃိဖဲပှၤတဂၤန့ၣ်စံးဘၣ်စီၤဘိၤဧး, “ပှ့ၤတၢ်အံၤလၢနဂီၢ်ဒၣ်နဲတက့ၢ်” န့ၣ်ဒီး, အဝဲဘ့ၣ်လီၤကွံာ်ခီၣ်ဖံးတခီန့ၣ်လီၤ.

⁹အန့ၣ်ဝံၤဒီးစီၤဘိၤဧးတဲဘၣ်ပှၤအခိၣ်အနၢ်တဖၣ်ဒီးပှၤအဂၤလၢ အအိၣ်ဖဲန့ၣ်ခဲလၢာ်ဒီးစံးဝဲ, “သုမ့ၢ်ပှၤအုၣ်အသးတဖၣ်လၢမုၢ်တနံၤအံၤလၢယမ့ၢ်တ့ၢ်လံပှၤ ပှ့ၤက့ၤကယဲၢ်တၢ်ဘၣ်ဃးဒီးစီၤအလံၤမ့လ့း, စီၤကံးလယိၣ်ဒီးစီၤမၤဃလိၣ်လၢနီၢ်နၤဧမံအစုပူၤန့ၣ်လီၤ.

¹⁰ဒီးယမၤန့ၢ်စ့ၢ်ကီးလံပှၤမိၤအးမုၣ်ဖိနီၢ်ရူၤသးလၢအမ့ၢ် စီၤမၤဃလိၣ်အမုၣ်ကမဲတဂၤလၢအကကဲထီၣ်ယမါ, ဒ်သိးယကဒုးအိၣ်ထီၣ်က့ၤ တၢ်န့ၢ်သါလၢပှၤသံတဂၤအဒူၣ်ဖိထၢဖိအဂီၢ်န့ၣ်လီၤ. ဒီးအစၢၤအသွဲၣ်ကအိၣ်ဒံးဝဲဆူညါလၢအပှၤကလုာ်အကျါဒီးလၢ အဝ့ၢ်ဒၣ်ဝဲအပူၤန့ၣ်လီၤ. သုမ့ၢ်ပှၤအုၣ်အသးတဖၣ်လၢမုၢ်တနံၤအံၤန့ၣ်လီၤ.”

¹¹တုၤနုၤတစု, ပှၤအခိၣ်အနၢ်တဖၣ်ဒီးပှၤအဂၤလၢအအိၣ်ဖဲ ဝ့ၢ်အပဲတရီခဲလၢာ်န့ၣ်စံးဝဲ, “ပမ့ၢ်ပှၤအုၣ်အသးတဖၣ်လီၤ. မ်ယွၤဒုးကဲထီၣ်ပိာ်မုၣ်လၢအကဟဲနုာ်လၢနဟံၣ်ပူၤတဂၤအံၤဒ် သိးအကလီၤဂာ်ဒီးနီၢ်ရၤဃ့လးဒီးနီၢ်လ့အၤခံဂၤလၢအဆံးစၢ် န့ၢ်ဖိလံၤအါဂၤလၢစီၤယၤကိာ်အဂီၢ်န့ၣ်တက့ၢ်. မ်နကဘီၣ်ထီၣ်ညီထီၣ်လၢအ့ဖရးသးအဒူၣ်အထၢပူၤဒီးနမံၤဟူ ထီၣ်သါလီၤလၢဝ့ၢ်ဘ့ၤသလ့ဃ့ၣ်အပူၤန့ၣ်တက့ၢ်.

¹²မ်နဖိနလံၤလၢယွၤကဟ့ၣ်သါနၤခီဖျိပိာ်မုၣ်အံၤန့ၣ်, ဒုးကဲထီၣ်နဒူၣ်ဖိထၢဖိလီၤဂာ်ဒ်စီၤဖ့ရ့းလၢအမ့ၢ်စီၤယူ ဒၤဒီးနီၢ်တၤမၢ်အဒူၣ်ဖိထၢဖိအသိးန့ၣ်တက့ၢ်.”

¹³မၤသးဒ်န့ၣ်ဒီး, စီၤဘိၤဧးဆီဟံၣ်ဆီဃီဒီးနီၢ်ရူၤသးန့ၣ် လီၤ. ယွၤဆိၣ်ဂ့ၤနီၢ်ရူၤသးဒီးအဝဲဒၣ်ဒၢထီၣ်ဝဲ, ဒီးဆံးစၢ်န့ၢ်ဖိခွါတဂၤလီၤ.

¹⁴ပှၤပိာ်မုၣ်တဖၣ်စံးဘၣ်နီၢ်နၤဧမံ, “စံးထီၣ်ပတြၢၤယွၤတ က့ၢ်. အဝဲဟ့ၣ်လံနၤလၢနလံၤပိာ်ခွါတဂၤလၢမုၢ်မဆါတနံၤအံၤဒ်သိး အကအံးထွဲကွၢ်ထွဲနၤအဂီၢ်န့ၣ်လီၤ. မ်ဖိသၣ်ပိာ်ခွါအံၤအမံၤဟူ ထီၣ်သါလီၤလၢပှၤအံၣ်စရ့လးဖိတဖၣ်အကျါန့ၣ်တက့ၢ်.

¹⁵နဒဲၣ်မုၣ်အဲၣ်နၤဒီးမၤတ့ၢ်လံတၢ်လၢနဂီၢ်အါန့ၢ်ဒံးဖိခွါ နွံဂၤန့ၣ်လီၤ. ဒီးခဲအံၤအဝဲဟ့ၣ်လံနၤနလံၤခွါတဂၤလၢ အကဟဲစိာ်န့ၢ်နၤတၢ်အိၣ်မူအသီဒီးဟ့ၣ်နၤတၢ်ဘံၣ်တၢ်ဘၢ နသးပှၢ်အကတီၢ်န့ၣ်လီၤ.”

¹⁶အန့ၣ်ဒီးနီၢ်နၤဧမံစိာ်ထီၣ်ဖိသၣ်, ဒီးဖိးဟုဃာ်အီၤလၢအသး နါပှၢ်, ဒီးအံးထွဲကွၢ်ထွဲအီၤန့ၣ်လီၤ.

¹⁷ဒီးပိာ်မုၣ်လၢအခိၣ်အဃၢၤတဖၣ်ယုၢ်န့ၢ်ဖိသၣ်အမံၤလၢစီၤဧိၤဘ့းလီၤ. ဒီးစံးဝဲ, “ဖိခွါတဂၤအိၣ်ဖျဲၣ်ထီၣ်လၢနီၢ်နၤဧမံအဂီၢ်လံ.” ဒီးလၢခံန့ၣ်စီၤဧိၤဘ့းကဲထီၣ်စီၤယံးၡဲအပၢ်, စီၤယံးၡဲကဲထီၣ်စီၤဒၤဝံးအပၢ်လီၤ.

¹⁸ဒီးအအံၤမ့ၢ်စီၤဖ့ရ့းအစၢၤအသွဲၣ်တဖၣ်လီၤ.

¹⁹စီၤဖ့ရ့းထီၣ်ဖိစီၤဃ့ၤစရိၣ်, စီၤဃ့ၤစရိၣ်ထီၣ်ဖိစီၤရၣ်, ဒီးစီၤရၣ်ထီၣ်ဖိစီၤဧးမံၤနဒး,

²⁰စီၤဧးမံၤနဒးထီၣ်ဖိစီၤနးၡိၣ်, ဒီးစီၤနးၡိၣ်ထီၣ်ဖိစီၤစၤလမိၣ်,

²¹စီၤစၤလမိၣ်ထီၣ်ဖိစီၤဘိၤဧး, ဒီးစီၤဘိၤဧးထီၣ်ဖိစီၤဧိၤဘ့း,

²²စီၤဧိၤဘ့းထီၣ်ဖိစီၤယံးၡဲ, ဒီးစီၤယံးၡဲထီၣ်ဖိစီၤဒၤဝံးလီၤ.