Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 10 Bible Online

လံာ်စီၤၡမူၤအ့လးအခီၣ်ထံးတဘ့ၣ် 10 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 10

¹တုၤနုၤတစုစီၤၡမူၤအ့လးဟံးန့ၢ်သ့ၣ်စၤယံးအသိတကိဒီးလူ လီၤအီၤလၢစီၤစီလူးအခိၣ်လိၤဒီးနၢမူအီၤလီၤ. ဒီးစံးဝဲဒၣ်, “ယွၤဖှူနၤဒ်အပှၤဂီၢ်မုၢ်ကီၢ်အံၣ်စရ့လးအပှၤပၢတၢ်တဂၤ အသိးန့ၣ်လီၤ. နကဘၣ်ပၢအဝဲအပှၤဂီၢ်မုၢ်ဒီးဒီဒၣ်အိၣ်ပှိၤအီၤလၢ ကယဲၢ်အဒုၣ်အဒါတဖၣ်ခဲလၢာ်လီၤ. ဒီးအဝဲအံၤမ့ၢ်တၢ်အုၣ်အသးတမံၤလၢယွၤဃုထၢတ့ၢ်နၤ, လၢနကကဲထီၣ်ပှၤပၢဘၣ်အပှၤဂီၢ်မုၢ်န့ၣ်လီၤ.

²တုၤနဟးထီၣ်လၢယအိၣ်တနံၤအံၤန့ၣ်, နကထံၣ်လိာ်နသးဒီးပှၤပိာ်ခွါခံဂၤ ဖဲနီၢ်ရၤဃ့လးအသွၣ်ခိၣ်အကပၤလၢဝ့ၢ်စ့လစၤလၢ ဘံၣ်ယၤမံၣ်အလီၢ်ကဝီၤအပူၤန့ၣ်လီၤ. အဝဲသ့ၣ်ကတဲဘၣ်နၤလၢကသ့ၣ်ယီၤတဖၣ်လၢနဃုအီၤန့ၣ်ဘၣ်တၢ်ထံၣ် န့ၣ်က့ၤအီၤလံ, အဃိနပၢ်တသူၣ်ကိၢ်သးဂီၤလၢအဝဲသ့ၣ်အဃိလၢၤဘၣ်. မ့မ့ၢ်အသးကိၢ်တၢ်လၢနဂီၢ်ဒီးသံကွၢ်တၢ်တထံၣ်ဃီ, တၢ်လၢယဖိခွါအဂ့ၢ်န့ၣ်ယကဘၣ်မၤတၢ်ဒ်လဲၣ်.

³နကလဲၤတၢ်ဖဲန့ၣ်တုၤလၢနဟဲတုၤဆူသ့ၣ်စီဆှံလၢဝ့ၢ်တၤဘိၣ် ဖဲနကဘၣ်သဂၢၢ်ဒီးပှၤသၢဂၤလၢအလဲၤတၢ်ဒ်သိးကလုၢ်ထီၣ်တၢ်လုၢ်တၢ်ပာ်တမံၤ ဆူယွၤအအိၣ်လၢဝ့ၢ်ဘ့ၤသ့လးန့ၣ်လီၤ. လၢအကျါတဂၤန့ၣ်ကဆှၢမဲာ်တဲးလဲးသးစၢ်ဖိသၢဒု, အဂၤတဂၤန့ၣ်ကစိာ်ကိၣ်သၢဖျၢၣ်ဒီးသၢဂၤတဂၤန့ၣ်ကအိၣ်ဒီးထၢၣ် တၢ်ဖံးပှဲၤဒီးစပံးထံတထၢၣ်လီၤ.

⁴အဝဲသ့ၣ်ကဟံးစုကွၢ်မဲာ်နၤဒီးဟ့ၣ်နၤလၢကိၣ်ခံလိၣ်လၢနကဘၣ် တူၢ်လိာ်အီၤန့ၣ်လီၤ.

⁵အန့ၣ်ဝံၤဒီးနကလဲၤဆူကစၢ်ယွၤအကစၢၢ်အအိၣ်လၢဝ့ၢ်ကံးဘဧးအပူၤ ဖဲပှၤဖလ့ၡသးဖိတဖၣ်သူၣ်ဒဲအလီၢ်အိၣ်ဝဲတတီၤန့ၣ်လီၤ. ဖဲတၢ်လဲၤနုာ်လီၤဆူဝ့ၢ်အကျဲစၢၤန့ၣ်နကထံၣ်လိာ်ဒီးဝံတဖု ဟဲလီၤလၢတၢ်လုၢ်လီၢ်အိၣ်လၢကစၢၢ်လိၤန့ၣ်ဒ့ဒီးသီတူၢ်တဖၣ်, ပှီၢ်ဒၢတဖၣ်, အူပံတဖၣ်ဒီးမၤသီၣ်စှၢၢ်စှံးတဖၣ်န့ၣ်လီၤ. အဝဲသ့ၣ်ကဂဲၤကလံာ်ဒီးကိးပသူဝဲလီၤ.

⁶သတူၢ်ကလာ်န့ၣ်ယွၤအသးကဟဲလီၤလၢနလိၤဒီးပၢၤနၤဒီးနကဂဲၤ ကလံာ်ဃုာ်လၢအဝဲသ့ၣ်အတၢ်ဘူၣ်တၢ်ဘါအတၢ်ဂဲၤကလံာ်အပူၤဒီးကိး ပသူထီၣ်ဒီးနကကဲထီၣ်ပှၤလီၤဆီတဂၤန့ၣ်လီၤ.

⁷ဖဲတၢ်တဖၣ်အံၤမၤအသးန့ၣ်, မၤဒ်ကယဲၢ်တၢ်လၢကစၢ်ယွၤဆှၢနၤလၢ နကမၤအီၤန့ၣ်တက့ၢ်.

⁸နကလဲၤဆိလၢယမဲာ်ညါဆူဝ့ၢ်ကံးလကၤလးဖဲယကထံၣ်လိာ်နၤဒီး လုၢ်ထီၣ်တၢ်လုၢ်မ့ၣ်အူတဖၣ်ဒီးတၢ်လုၢ်မၤဃူမၤဖိးတၢ်တဖၣ်န့ၣ် လီၤ. အိၣ်ခိးဖဲန့ၣ်နွံသီတုၤလၢယဟဲဒီးတဲနၤတၢ်လၢနကဘၣ်မၤတဖၣ် န့ၣ်တက့ၢ်.”

⁹ဖဲစီၤစီလူးဃၣ်အသးလၢကဟးထီၣ်လၢစီၤၡမူၤအ့လးအအိၣ်ဒီး ကစၢ်ယွၤဟ့ၣ်စီၤစီလူးအသးအသီတကလုာ်လီၤ. ဒီးတၢ်ကိးမံၤဒဲးလၢစီၤၡမူၤအ့လးစံးတ့ၢ်အီၤန့ၣ်မၤအသး လၢမုၢ်တနံၤန့ၣ်လီၤ.

¹⁰ဖဲစီၤစီလူးဒီးအကုၢ်လဲၤတုၤဆူဝ့ၢ်ကံးဘဧၤန့ၣ်, ဝံတဖုဟဲသဂၢၢ်အီၤန့ၣ်လီၤ. သတူၢ်ကလာ်န့ၣ်ကစၢ်ယွၤအသးပၢၤဃာ် အီၤဒီးအဝဲနုာ်လီၤဆူဝံတဖၣ်အတၢ်ဘူၣ်တၢ်ဘါအတၢ်ဂဲၤကလံာ်ဒီး တၢ်ကိးပသူန့ၣ်လီၤ.

¹¹ပှၤဂီၢ်မုၢ်လၢအသ့ၣ်ညါတ့ၢ်အီၤလၢညါတဖၣ်ထံၣ်အမၤတၢ်အံၤဒီး သံကွၢ်လိာ်အသးတဂၤဒီးတဂၤ, “တၢ်မၤအသးဒီးစီၤကံၣ်အဖိခွါဒ်လဲၣ်. မ့ၢ်စီၤစီလူးကဲထီၣ်ဝံတဂၤလံဧါ.”

¹²ပှၤအိၣ်ဖဲန့ၣ်တဂၤသံကွၢ်ဝဲ, “ဝံအဂၤတဖၣ်အံၤမ့ၢ်တၢ်ဒ်လဲၣ်. သုဆိကမိၣ်အဝဲသ့ၣ်အပၢ်မ့ၢ်မတၤတဖၣ်န့ၣ်ဒ်လဲၣ်.” တၢ်အံၤန့ၣ်မ့ၢ်တၢ်ကတိၤ, “စီၤစီလူးဒၣ်လဲာ်ကဲထီၣ်ဝံတဂၤ လံဧါ,” အိၣ်ထီၣ်အခီၣ်ထံးန့ၣ်လီၤ.

¹³ဖဲစီၤစီလူးအတၢ်ဂဲၤကလံာ်ဒီးတၢ်ကိးပသူလၢတၢ်သူၣ်ဂဲၤသး ဂဲၤဖးဒိၣ်အပူၤဝံၤန့ၣ်အဝဲလဲၤဆူတၢ်လုၢ်လီၢ်လၢတၢ်လူၢ်ဖီ ခိၣ်လီၤ.

¹⁴စီၤစီလူးအဖါတံၢ်ထံၣ်အီၤဒီးအကုၢ်ဒီးသံကွၢ်အဝဲသ့ၣ်, “သုလဲၤတုၤဆူလဲၣ်.” ဒီးစီၤစီလူးစံးဆၢဝဲ, “ပဟးဃုကသ့ၣ်ယီၤတဖၣ်လီၤ. တုၤမ့ၢ်ပတထံၣ်အီၤဘၣ်ဒီးပလဲၤထံၣ်လိာ်စီၤၡမူၤအ့လးလီၤ.”

¹⁵စီၤစီလူးအဖါတံၢ်သံကွၢ်အီၤ, “ဒီးအဝဲတဲနၤတၢ်မနုၤ လဲၣ်.”

¹⁶စီၤစီလူးစံးဆၢဝဲ, “အဝဲတဲပှၤလၢဆၣ်ဖိကီၢ်ဖိတဖၣ်န့ၣ် ဘၣ်တၢ်ထံၣ်က့ၤအီၤလံန့ၣ်လီၤ.” ဘၣ်ဆၣ်ဒီးအဝဲတတဲဘၣ်အဖါတံၢ်လၢစီၤၡမူၤအ့လးတဲ တၢ်ဘၣ်ဃးအဝဲကကဲထီၣ်စီၤပၤအဂ့ၢ်န့ၣ်ဘၣ်.

¹⁷စီၤၡမူၤအ့လးကိးပှၤဂီၢ်မုၢ်လၢကပာ်ဖှိၣ်ထီၣ်အသးလၢတၢ်ဘူၣ် တၢ်ဘါအတၢ်ရ့လိာ်မုာ်လိာ်တမံၤအဂီၢ်ဖဲဝ့ၢ်မံးစပၤ,

¹⁸ဒီးစံးဘၣ်အဝဲသ့ၣ်, “ယွၤ, ကီၢ်အံၣ်စရ့လးအကစၢ်ယွၤစံးဝဲ ဒၣ်, ယထုးထီၣ်တ့ၢ်သုလၢကီၢ်အဲၤကူပတူးဒီးအုၣ်က့ၤခီၣ်က့ၤသုလၢ ပှၤအဲၤကူပတူးဖိတဖၣ်အစုပူၤဒီးလၢကယဲၢ်ပှၤဂီၢ်မုၢ်အဂၤတဖၣ် လၢအမၤနးမၤဖှီၣ်သုန့ၣ်လီၤ.

¹⁹ယမ့ၢ်သုကစၢ်ယွၤ, ပှၤတဂၤလၢအအုၣ်က့ၤခီၣ်က့ၤသုလၢကယဲၢ်သုတၢ်ကိၢ်တၢ်ဂီၤဒီး တၢ်ကီတၢ်ခဲတဖၣ်အပူၤန့ၣ်လီၤ. ဘၣ်ဆၣ်တနံၤအံၤသုညိကွံာ်ယၤဒီးဃ့တ့ၢ်ယၤလၢယကဟ့ၣ်သု စီၤပၤတဂၤလီၤ. ဂ့ၤလံ. မ့မ့ၢ်ဒ်န့ၣ်ဒီး, ပာ်ဖှိၣ်ထီၣ်သုသး လၢယွၤအမဲာ်ညါဒ်ဒူၣ်, တဒူၣ်ဘၣ်တဒူၣ်ဒီးဒူၣ်ထၢတဒူၣ်တထၢဘၣ် တဒူၣ်တထၢအသိးတက့ၢ်.”

²⁰အန့ၣ်ဝံၤဒီးစီၤၡမူၤအ့လးမၢဒူၣ်တဒူၣ်ဘၣ်တဒူၣ်ဟဲထီၣ်ဆူတၢ်မဲာ်ညါ ဒီးယွၤဃုထၢထီၣ်စီၤဘံၣ်ယၤမံၣ်အဒူၣ်လီၤ.

²¹ဒီးစီၤၡမူၤအ့လးမၢဟံၣ်ဖိဃီဖိတဖၣ်လၢစီၤဘံၣ်ယၤမံၣ် အဒူၣ်အပူၤဟဲထီၣ်ဆူညါဒီးစီၤမၤတြံၤအဟံၣ်ဖိဃီဖိတဖၣ်ဘၣ် တၢ်ဃုထၢထီၣ်အီၤလီၤ. ဝံၤဒီးပိာ်ခွါတဖၣ်လၢစီၤမၤတြံၤအဟံၣ်ဖိဃီဖိအပူၤဟဲထီၣ်ဆူညါ ဒီးစီၤကံၣ်အဖိခွါစီၤစီလူးဘၣ်တၢ်ဃုထၢထီၣ်အီၤလီၤ. အဝဲသ့ၣ်ဃုဝဲအီၤဘၣ်ဆၣ်ဒီးဖဲအဝဲ သ့ၣ်ဃုအီၤတဘၣ်ဘၣ်န့ၣ်,

²²အဝဲသ့ၣ်သံကွၢ်ယွၤ, “မ့ၢ်ပှၤအဂၤအိၣ်တဂၤဂၤဒံးဧါ.” ယွၤစံးဆၢဝဲဒၣ်, “စီၤစီလူးအိၣ်ဖဲန့ၣ်ဒီးအိၣ်ခူသူၣ်လၢ တၢ်ဖိတၢ်လံၤအကျါလီၤ.”

²³မၤသးဒ်န့ၣ်ဒီး, အဝဲသ့ၣ်လဲၤဃ့ၢ်ဒီးဟဲကိးထီၣ်စီၤစီလူးလၢ ပှၤဂီၢ်မုၢ်အမဲာ်ညါ, ဒီးအဝဲသ့ၣ်ထံၣ်ဘၣ်ဝဲလၢအဝဲဒၣ်အဂီၤထီ န့ၣ်ပှၤအဂၤကိးဂၤဒဲးခိၣ်တဖျၢၣ်န့ၣ်လီၤ.

²⁴စီၤၡမူၤအ့လးစံးဘၣ်ပှၤဂီၢ်မုၢ်, “အဝဲအံၤ, မ့ၢ်ပှၤတဂၤလၢယွၤဃုထၢထီၣ်အီၤန့ၣ်လီၤ. လၢပဝဲဒၣ်ခဲလၢာ်အကျါပှၤလီၤဂာ်ဒီးအီၤတအိၣ်ဘၣ်နီတဂၤဘၣ်.” ဒီးကယဲၢ်ပှၤဂီၢ်မုၢ်ခဲလၢာ်ကိးထီၣ်ဝဲ, “မ်ပကစၢ်စီၤပၤအိၣ်ကၢအိၣ်ခိးတက့ၢ်.”

²⁵စီၤၡမူၤအ့လးတဲနၢ်ပၢၢ်ပှၤဂီၢ်မုၢ်လၢ စီၤပၤတဂၤအခွဲးအယာ်တဖၣ်ဒီးအမူအဒါတဖၣ်, ဝံၤဒီးကွဲးလီၤအီၤလၢလံာ်တဘ့ၣ်အပူၤ, လံာ်လၢအဘၣ်တၢ်ပာ်အီၤလၢတၢ်လီၢ်စီဆှံတတီၤန့ၣ်လီၤ. အန့ၣ်ဝံၤဒီးအဝဲမၢပှၤကိးဂၤဒဲးက့ၤဆူအဟံၣ်လီၤ.

²⁶စီၤစီလူးစ့ၢ်ကီးက့ၤဆူအဟံၣ်လၢဝ့ၢ်ကံးဘဧၤအပူၤလီၤ. ပှၤပိာ်ခွါတနီၤလၢအဂံၢ်ဆူၣ်ဘါဆူၣ်လၢကစၢ်ယွၤထိးဘၣ်အသးန့ၣ် က့ၤဃုာ်ဒီးအီၤလီၤ.

²⁷ဘၣ်ဆၣ်ဒီးပှၤကလီကလီတနီၤစံးဝဲဒၣ်, ပှၤတဂၤအံၤမၤတၢ်ဂ့ၤလၢ ပဂီၢ်တမံၤမံၤကသ့ဝဲမနုၤလဲၣ်. အဝဲသ့ၣ်တကနၣ်ဃုာ်စီၤစီလူးဒီးတဟဲစိာ်န့ၢ်အီၤလၢ တၢ်ဟ့ၣ်ကနၢၤနီတမံၤဘၣ်.