Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 12 Bible Online

လံာ်စီၤၡမူၤအ့လးအခီၣ်ထံးတဘ့ၣ် 12 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 12

¹ဒီးစီၤၡမူၤအ့လးစံးဘၣ်ကီၢ်အံၣ်စရ့လးအပှၤဂီၢ်မုၢ်, “တၢ်လၢသုဃ့တ့ၢ်လၢယကမၤအီၤန့ၣ်ယမၤဝံၤလံ. ယဟ့ၣ်သုလၢစီၤပၤတဂၤလၢအကပၢသုလီၤ.

²ဒီးခဲအံၤသုအိၣ်ဒီးအီၤလၢကပၢဆှၢသုလီၤ. မ့မ့ၢ်ယဲဒၣ်တခီ, ယသးပှၢ်ခိၣ်ဝါလံဒီးယဖိခွါတဖၣ်အိၣ်ဒီးသုလီၤ. ယမ့ၢ်တ့ၢ်သုခိၣ်သုနၢ်စးထီၣ်လၢယသးစၢ်တုၤခဲကနံၣ်အံၤလီၤ.

³ကွၢ်ကွၢ်, ယၤလီၤ. ယမ့ၢ်မၤတ့ၢ်တၢ်ကမၣ်တမံၤမံၤဒီး, ဆှိးထီၣ်ယၤခဲအံၤလၢယွၤဒီးစီၤပၤလၢအဝဲဃုထီၣ်အီၤအမဲာ် ညါတက့ၢ်. မ့ၢ်ယဟံးန့ၣ်ပှၤတဂၤဂၤအဂီၤဖံးမိၢ်ဒီးပှၤတဂၤဂၤအကသ့ၣ်ယီၤဧါ. မ့ၢ်ယလီတၢ်ဒီးမၤနးမၤဖှီၣ်ပှၤတဂၤဂၤဧါ. မ့ၢ်ယတူၢ်လိာ်ခိၣ်ဖးလာ်ဆှိးလၢပှၤတဂၤဂၤအအိၣ်ဧါ. ယမ့ၢ်မၤတ့ၢ်တၢ်တမံၤမံၤလၢတၢ်တဖၣ်အံၤအကျါန့ၣ်ယကလိးက့ၤတၢ် လၢယဟံးန့ၢ်တ့ၢ်အီၤန့ၣ်လီၤ.”

⁴ပှၤဂီၢ်မုၢ်စံးဆၢဝဲဒၣ်, “တမ့ၢ်ဘၣ်. နတလီတ့ၢ်ပှၤမ့ၢ်ဂ့ၤ, မၤနးမၤဖှီၣ်တ့ၢ်ပှၤမ့ၢ်ဂ့ၤ, နတဟံးန့ၢ်တ့ၢ်တၢ်တမံၤမံၤလၢ ပှၤနီတဂၤအအိၣ်မ့ၢ်ဂ့ၤန့ၣ်ဘၣ်.”

⁵စီၤၡမူၤအ့လးစံးဆၢဝဲ, “ယွၤဒီးစီၤပၤလၢအဝဲဃုထၢ ထီၣ်ဝဲန့ၣ်မ့ၢ်ပှၤအုၣ်အသးတနံၤအံၤလၢသုထံၣ်ယၤလၢယမ့ၢ်ပှၤအိၣ်မူ တီတီလိၤလိၤလၢလၢပှဲၤပှဲၤန့ၣ်လီၤ.” ဒီးပဝဲသ့ၣ်စံးဆၢဝဲဒၣ်, “မ့ၢ်လီၤ. ယွၤမ့ၢ်ပှၤအုၣ်အသးလၢ ပဂီၢ်လီၤ.”

⁶စီၤၡမူၤအ့လးကတိၤဒံးတၢ်ဆူညါ, “ယွၤမ့ၢ်ပှၤတဂၤလၢအဃု ထၢထီၣ်စီၤမိၤၡ့စီၤအၤဟရိၣ်ဒီးမ့ၢ်ပှၤထုးထီၣ်သုမိၢ်ပၢ်ဖံဖု လၢပျၢၤတဖၣ်လၢကီၢ်အဲၤကူပတူးအပူၤန့ၣ်လီၤ.

⁷ခဲအံၤဆၢထၢၣ်ဖဲသုအိၣ်အလီၢ်ဒီး ယကဆှိးသုလၢယွၤအမဲာ်ညါခီဖျိတၢ်မၤသ့ၣ်နီၣ်သုလၢ ကယဲၢ်တၢ်မၤအဒိၣ်အဆူၣ်လၢယွၤမၤတ့ၢ် လၢကအုၣ်က့ၤခီၣ်က့ၤသုဒီးသုမိၢ်ပၢ်ဖံဖုလၢပျၢၤတဖၣ်န့ၣ်လီၤ.

⁸ဖဲစီၤယၤကိာ်ဒီးအဟံၣ်ဖိဃီဖိလဲၤတ့ၢ်ဆူကီၢ်အဲၤကူပတူး ဒီးပှၤအဲၤကူပတူးဖိတဖၣ်မၤနးမၤဖှိၣ်အဝဲသ့ၣ်န့ၣ်, သုမိၢ်ပၢ်ဖံဖုလၢပျၢၤတဖၣ်ကိးထီၣ်ဆူယွၤအအိၣ်ဒီးအဝဲဆှၢ လီၤစီၤမိၤၡ့ဒီးစီၤအၤဟရိၣ်လၢအထုးထီၣ်ကွံာ်အဝဲသ့ၣ်လၢ ကီၢ်အဲၤကူပတူးအပူၤဒီးပာ်လီၤန့ၢ်အလီၢ်အိၣ်လီၢ်ဆိးဖဲကီၢ် အံၤအပူၤလီၤ.

⁹ဘၣ်ဆၣ်ဒီးပှၤဂီၢ်မုၢ်သးပ့ၤနီၣ်ယွၤ, အဝဲသ့ၣ်အကစၢ်ယွၤလီၤ. မၤသးဒ်န့ၣ်ဒီးအဝဲပျဲပှၤဖလ့ၡသးဖိတဖၣ် ဒီးကီၢ်မိၤအးအစီၤပၤဒီးဝ့ၢ်ဃါစိၢ် အသုးမုၢ်အခိၣ်စီၤစံစရၤလၢကဒုးတၢ်ထီဒါ သုမိၢ်ပၢ်ဖံဖုလၢပျၢၤတဖၣ်ဒီးမၤနၢၤအဝဲသ့ၣ်လီၤ.

¹⁰အန့ၣ်တစု, အဝဲသ့ၣ်ကိးထီၣ်ဆူယွၤအအိၣ်လၢတၢ်မၤစၢၤအဂီၢ်ဒီး စံးဝဲ, “ပမၤတ့ၢ်တၢ်ဒဲးဘးလံ. အဂ့ၢ်ဒ်အံၤ, ပဃၣ်ကွံာ်ပသးလၢနအိၣ်ယွၤဧၢ, ဒီးဘူၣ်ထီၣ်ဘါထီၣ်ဘဧၤလးဒီးအၤၡတြိးတဖၣ်အတၢ်ဂီၤသိအသး န့ၣ်လီၤ. အုၣ်က့ၤခီၣ်က့ၤပှၤလၢပဒုၣ်ပဒါတဖၣ်အစုပူၤ, ဒီးပကဘူၣ်ထီၣ်ဘါထီၣ်နၤလီၤ.

¹¹ဒီးယွၤဆှၢလီၤစီၤကံးဒဧိၣ်, ဝံၤဒီးစီၤဘါရးဝံၤဒီးစီၤ ယံးဖသၤဒီးလီၢ်ခံကတၢၢ်မ့ၢ်ယၤန့ၣ်လီၤ. ပဝဲတဂၤစုာ်စုာ်ပအုၣ်က့ၤခီၣ်က့ၤသုလၢသုဒုၣ်သုဒါတဖၣ်အစု ပူၤဒီးသုအိၣ်မူလၢတၢ်ဘံၣ်တၢ်ဘၢတၢ်ပူၤဖျဲးအပူၤလီၤ.

¹²ဘၣ်ဆၣ်ဒီးဖဲသုထံၣ်လၢပှၤဧၣ်မိၣ်အစီၤပၤစီၤနၤဃၣ်ဘူးတ့ၢ်က ဟဲဒုးသုန့ၣ်သုညိကွံာ်ယွၤဒ်သုစီၤပၤအသိးဒီးစံးဘၣ်ယၤ, (ပအဲၣ်ဒိးဘၣ်စီၤပၤတဂၤလၢကပၢပှၤလီၤ.)

¹³ခဲအံၤ, အဝဲအံၤမ့ၢ်စီၤပၤလၢသုဃုထၢအီၤ, သုဃ့န့ၢ်အီၤ, ဒီးခဲအံၤယွၤဟ့ၣ်လီၤအီၤဆူသုအိၣ်လီၤ.

¹⁴သုမ့ၢ်မၤလၤကပီၤယွၤသုကစၢ်ယွၤ, မၤအတၢ်, ဒိကနၣ်အီၤ, ဒီးစူၢ်အတၢ်မၤလိာ်တဖၣ်ဒီးသုဝဲဒီးသုစီၤပၤမ့ၢ်ပိာ်အခံ ဒီး, တၢ်ကိးမံၤကလဲၤအသးဂ့ၤဂ့ၤဘၣ်ဘၣ်ဒီးသုန့ၣ်လီၤ.

¹⁵ဘၣ်ဆၣ်ဒီးသုမ့ၢ်တဒိကနၣ်ယွၤဒီး, သုမ့ၢ်တစူၢ်ဘၣ်အတၢ်မၤလိာ် တဖၣ်န့ၣ်အဝဲကထီဒါသုဒီးသုစီၤပၤလီၤ.

¹⁶မၤသးဒ်န့ၣ်ဒီး, ဆၢထၢၣ်ဖဲသုအိၣ်အလီၢ်, ဒီးသုကထံၣ်တၢ်အဒိၣ်အမုၢ်လၢ ယွၤကမၤအီၤန့ၣ်လီၤ.

¹⁷ခဲအံၤမ့ၢ်ဝဲတၢ်ယီၤခါအဆၢကတီၢ်, တမ့ၢ်ဘၣ်ဧါ. ဘၣ်ဆၣ်ဒီးယကဘါထုကဖၣ်တၢ်ဒီးယွၤကဆှၢလီၤလီ သီၣ်လီသဲဒီးတၢ်စူၤလီၤ. တုၤတၢ်အံၤမၤအသးဒီးသုကနၢ်ပၢၢ်လီၤတံၢ်လၢ သုမၤတ့ၢ်တၢ်ဒဲးဘးဖးဒိၣ်တမံၤထီဒါယွၤ ဖဲသုဃ့တ့ၢ်အီၤလၢစီၤပၤတဂၤန့ၣ် လီၤ.”

¹⁸မၤသးဒ်န့ၣ်ဒီးစီၤၡမူၤအ့လးဘါထုကဖၣ်တၢ်, ဒီးလၢတနံၤဃီန့ၣ်ယွၤဆှၢလီၤလီသီၣ်လီသဲဒီးတၢ်စူၤလီၤ. တုၤနုၤတစု, ပှၤဂီၢ်မုၢ်ခဲလၢာ်ပျံၤယွၤဒီးစီၤၡမူၤအ့လးလီၤ.

¹⁹ဒီးအဝဲသ့ၣ်စံးဘၣ်စီၤၡမူၤအ့လး, “တၢ်ဒိၣ်ဧၢ, ဝံသးစူၤဘါထုကဖၣ်ဆူယွၤ, နကစၢ်ယွၤအအိၣ်လၢပဂီၢ်ဒ်သိးပသု တသံတဂ့ၤန့ၣ်တက့ၢ်. ခဲအံၤပသ့ၣ်ညါလီၤတံၢ်လၢ, ပတၢ်ဒဲးဘးအဂၤခဲလၢာ်အမဲာ်ညါန့ၣ်ပမၤတ့ၢ်တၢ်ဒဲးဘးခီဖျိ ပဃ့န့ၢ်စီၤပၤတဂၤအဃိလီၤ.”

²⁰စီၤၡမူၤအ့လးစံးဝဲဒၣ်, “ပျံၤတၢ်တဂ့ၤ, သုမ့ၢ်မၤတ့ၢ်တၢ်အၢတၢ်သီဒ်န့ၣ်အသိးဘၣ်ဆၣ်, ဃၣ်ကွံာ်သုသးလၢယွၤအအိၣ်တဂ့ၤ, မ့မ့ၢ်မၤအတၢ်မၤလၢသုသး ဒီဖျၢၣ်ညါတက့ၢ်.

²¹ပိာ်ထွဲကစၢ်အကဘျံးကဘျၣ်တဖၣ်အခံတဂ့ၤ. အဝဲသ့ၣ်မၤစၢၤသုမ့ၢ်ဂ့ၤ, အုၣ်က့ၤခီၣ်က့ၤသုမ့ၢ်ဂ့ၤတသ့ဘၣ်. အဂ့ၢ်ဒ်အံၤ, အဝဲသ့ၣ်တမ့ၢ်တၢ်နီၢ်နီၢ်ဘၣ်.

²²ယွၤမၤတ့ၢ်တၢ်အၢၣ်လီၤသညူးသပှၢ်တမံၤဒီးအဝဲဒၣ်တညိ ကွံာ်ဘၣ်သုဘၣ်. အဂ့ၢ်ဒ်အံၤ, အဝဲပာ်လီၤတ့ၢ်အသးလၢကဒုးကဲ ထီၣ်သုလၢအပှၤဂီၢ်မုၢ်ဒၣ်ဝဲန့ၣ်လီၤ.

²³မ့မ့ၢ်ယၤန့ၣ်, ယွၤတြီတၢ်လၢယကမၤတၢ်ဒဲးဘးထီဒါအီၤခီဖျိ ယတဘၣ်ဘါထုကဖၣ်လၢၤလၢသုဂီၢ်နီတစုဘၣ်န့ၣ်လီၤ. အခိၣ်တလိာ်, ယကသိၣ်လိသုလၢတၢ်မနုၤဂ့ၤဝဲဒီးဘၣ်ဝဲ လၢသုဂီၢ်လၢသုကမၤအီၤအဂီၢ်န့ၣ်လီၤ.

²⁴စူၢ်ယွၤဒီးမၤအတၢ်မၤလၢတၢ်သူၣ်တီသးလိၤအပူၤလၢသုသးဒီဖျၢၣ်ညါတက့ၢ်. သ့ၣ်နီၣ်တၢ်မၤဖးဒိၣ်လၢအဝဲမၤတ့ၢ်ဝဲလၢသုဂီၢ်တက့ၢ်.

²⁵ဘၣ်ဆၣ်ဒီးသုမ့ၢ်မၤတၢ်ဒဲးဘးဆူညါဒီး, သုဝဲဒၣ်ဒီးသုစီၤပၤန့ၣ် ကဘၣ်တၢ်မၤဟးဂီၤကွံာ်အီၤန့ၣ်လီၤ.”