Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 18 Bible Online

လံာ်စီၤၡမူၤအ့လးအခီၣ်ထံးတဘ့ၣ် 18 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 18

¹စီၤစီလူးဒီးစီၤဒၤဝံးမၤဝံၤအတၢ်ကတိၤသကိးန့ၣ်လီၤ. တၢ်န့ၣ်အလီၢ်ခံစီၤစီလူးအဖိခွါစီၤယိၤနသၣ်ဘၣ်သူၣ်ဘၣ်သး လၢစီၤဒၤဝံးဒိၣ်မးဒီးအဲၣ်ဘၣ်အီၤဒ်အအဲၣ်လီၤအသးဒၣ်ဝဲ အသိးန့ၣ်လီၤ.

²စးထီၣ်လၢမုၢ်တနံၤန့ၣ်စီၤစီလူးကိးဃာ်စီၤဒၤဝံး ဒီးတပျဲ အက့ၤကဒါက့ၤဆူအဟံၣ်ဘၣ်.

³စီၤယိနၤသၣ်မၤတၢ်ရ့လိာ်မုာ်လိာ်အထူအယိာ်အတၢ်ဆိၣ်ဒီးစီၤဒၤဝံး လၢအအဲၣ်ဘၣ်အီၤဒိၣ်နီၢ်မးအဃိန့ၣ်လီၤ.

⁴အဝဲဘ့ၣ်လီၤအဆ့ကၤဖးထီလၢအသိးဃာ်ဝဲဒီးဟ့ၣ်လီၤအီၤဆူ စီၤဒၤဝံး, ဃုာ်ဒီးအသဃိးဒီးအနး, အချံၣ်, ဒီးအယီၢ်တကိးစ့ၢ်ကီးလီၤ.

⁵စီၤဒၤဝံးမၤန့ၢ်မၤနၢၤတၢ်လၢကယဲၢ်တၢ်ဖံးတၢ်မၤတဖၣ်လၢစီၤစီလူး မၢလီၤအီၤန့ၣ်လီၤ. မၤသးဒ်န့ၣ်ဒီး, စီၤစီလူးဒုးကဲထီၣ်အီၤလၢသုးခိၣ်တဂၤလၢ သုးမုၢ်အပူၤန့ၣ်လီၤ. တၢ်အံၤဘၣ်သူၣ်ဘၣ်သးကယဲၢ်စီၤစီလူးအသုးခိၣ်သုးနၢ်တဖၣ်ဒီး ပှၤသုးဖိတဖၣ်န့ၣ်လီၤ.

⁶ဖဲစီၤဒၤဝံးဟဲက့ၤလၢအတၢ်မၤသံစီၤကၤလယးဝံၤဒီး, ဒီးပှၤသုးဖိတဖၣ်ဟဲက့ၤဆူဟံၣ်န့ၣ်, ပိာ်မုၣ်တဖၣ်လၢဝ့ၢ်ကိးဝ့ၢ်ဒဲး အိၣ်လၢကီၢ်အံၣ်စရ့လးအပူၤဟဲထီၣ်ဒ်သိးကသဂၢၢ်စီၤပၤ စီၤစီလူးလီၤ. အဝဲသ့ၣ်သူၣ်ဝံၣ်သးဆၢတၢ်သးခု အတၢ်သးဝံၣ်တဖၣ်, ဂဲၤကလံာ်ဝဲဒီးဆ့လ့, ဒီးသီတူၢ်တဖၣ်လီၤ.

⁷လၢတၢ်သဂၢၢ်မၤလၤကပီၤအမူးန့ၣ်ပိာ်မုၣ်တဖၣ်သးဝံၣ်ထီၣ်ဝဲ, “စီၤစီလူးမၤသံတ့ၢ်ပှၤအကထိတဖၣ်, မ့မ့ၢ်စီၤဒၤဝံးမၤသံ ပှၤအကလးတဖၣ်လီၤ.”

⁸စီၤစီလူးတဘၣ်အသးလၢတၢ်အံၤဘၣ်. ဒီးအသးဒိၣ်ထီၣ်ဝဲဖးဒိၣ်လီၤ. အဝဲဒၣ်စံး, “လၢစီၤဒၤဝံးအဂီၢ်န့ၣ်အဝဲသ့ၣ်ကိးထီၣ်ဝဲပှၤ အကလးဘၣ်ဆၣ်ဒီးလၢယဂီၢ်န့ၣ်ပှၤအကထိတဖၣ်ဧိၤလီၤ. လၢခံန့ၣ်အဝဲသ့ၣ်ကဒုးကဲထီၣ်အီၤလၢစီၤပၤလီၤ.”

⁹မၤသးဒ်န့ၣ်ဒီး, စးထီၣ်လၢမုၢ်တနံၤန့ၣ်, အဝဲဒၣ်အသးက့ၣ်သးကါဒီးသးဒ့ဒီလၢစီၤဒၤဝံးအဖီခိၣ်န့ၣ်လီၤ.

¹⁰လၢမုၢ်ဆ့ၣ်ထီၣ်တနံၤန့ၣ်, သးအအၢအသီတဖျၢၣ်လၢအဟဲလၢကစၢ်ယွၤ ဟဲလီၤဒီးပၢၤဃာ်စီၤစီလူးသတူၢ်ကလာ်လီၤ. ဒီးအဝဲဒၣ်ကတိၤကလီကလီတၢ်ဒ်တၢ်ပျုၢ်တဂၤအသိးလၢအဟံၣ်ပူၤ န့ၣ်လီၤ. စီၤဒၤဝံးတခီဒ့တနၢ်ဒ်ညီနုၢ်မၤဝဲကိးမုၢ်နံၤအသိးန့ၣ် လီၤ. စီၤစီလူးဟံးဃးဘီတဘ့ၣ်လၢအစုပူၤ,

¹¹ဒီးစံးလီၤအသး, “ယကဆဲးတ့ၢ်အီၤလၢဂီၤပၤအလိၤလီၤ.” ဒီးကွံာ်ဝဲဘီန့ၣ်ဆူစီၤဒၤဝံးအအိၣ်ခံဘျီဘၣ်ဆၣ်ဒီးစီၤ ဒၤဝံးပဒ့ၣ်အသးပူၤတဘျီဘၣ်တဘျီလီၤ.

¹²စီၤစီလူးပျံၤဘၣ်စီၤဒၤဝံးလီၤ. အဂ့ၢ်ဒ်အံၤ, ယွၤအိၣ်ဒီးစီၤဒၤဝံးဘၣ်ဆၣ်ဒီးမ့မ့ၢ်အဝဲဒၣ်တခီယွၤညိ ကွံာ်တ့ၢ်အီၤအဃိလီၤ.

¹³မၤသးဒ်န့ၣ်ဒီး, စီၤစီလူးသုးကွံာ်အီၤဆူတၢ်လီၢ်အယံၤဒီး ပာ်အီၤလၢပှၤတကထိအသုးခိၣ်အလီၢ်လီၤ. စီၤဒၤဝံးပၢဆှၢအပှၤတဖၣ်လၢတၢ်ဒုးတၢ်ယၤအပူၤ

¹⁴ဒီးအဝဲမၤနၢၤတၢ်လၢကယဲၢ်အတၢ်မၤခဲလၢာ်အပူၤလီၤ. အဂ့ၢ်ဒ်အံၤ, ယွၤအိၣ်ဒီးအီၤလီၤ.

¹⁵စီၤစီလူးပာ်သူၣ်ပာ်သးလၢစီၤဒၤဝံးအတၢ်မၤနၢၤဒီးကဲထီၣ် ပှၤပျံၤဘၣ်အီၤဒိၣ်န့ၢ်အလီၢ်တက့ၢ်လီၤ.

¹⁶ဘၣ်ဆၣ်ဒီးပှၤကိးဂၤဒဲးလၢကီၢ်အံၣ်စရ့လးဒီးကီၢ်ယူဒၤအပူၤ န့ၣ်အဲၣ်စီၤဒၤဝံးလီၤ. အဂ့ၢ်ဒ်အံၤ, အဝဲမ့ၢ်ခိၣ်နၢ်လၢအမၤန့ၢ်မၤနၢၤတၢ်ဒ်န့ၣ်တဂၤအဃိ န့ၣ်လီၤ.

¹⁷တုၤနုၤတစု, စီၤစီလူးစံးဘၣ်စီၤဒၤဝံး, “အဝဲအံၤမ့ၢ်ယဖိမုၣ်အဒိၣ်ကတၢၢ်နီၢ်မ့ရ့ာ်လီၤ. ယကဟ့ၣ်အီၤလၢနၤဒ်နမါလၢနမ့ၢ်ယခ့ယပှၤလၢအဒူဒီးပှၤသုးဖိ လၢအသးတီဒီးယၤဒီးဒုးယွၤအတၢ်ဒုးတဖၣ်အဃိန့ၣ်လီၤ.” (စီၤစီလူးဆိကမိၣ်ဝဲလၢ, လၢကျဲဒ်အံၤန့ၣ်ပှၤဖလ့ၡသးဖိတဖၣ် ကမၤသံစီၤဒၤဝံးဒီးအလီၢ်တအိၣ်ဘၣ်လၢအဝဲအနီၢ်ကစၢ်ဒၣ်ဝဲ ကမၤသံဘၣ်စီၤဒၤဝံးဘၣ်န့ၣ်လီၤ.)

¹⁸စီၤဒၤဝံးစံးဆၢဝဲဒၣ်, “ယမ့ၢ်မတၤတဂၤဒီးယဟံၣ်ဖိဃီဖိ မ့ၢ်မတၤလၢယကဘၣ်ကဲထီၣ်စီၤပၤအမာ်တဂၤန့ၣ်လဲၣ်.”

¹⁹ဘၣ်ဆၣ်ဒီးဖဲတၢ်ဆၢကတီၢ်တုၤဃီၤဝဲန့ၣ်လၢနီၢ်မ့ရ့ာ်ကဘၣ်တၢ် ဟ့ၣ်လီၤအီၤဆူစီၤဒၤဝံးအလီၢ်န့ၣ်, အဝဲဘၣ်တၢ်ဟ့ၣ်လီၤအီၤဆူပှၤတဂၤအမံၤမ့ၢ်ဝဲစီၤဧ့ဒြၤအ့လး အိၣ်လၢဝ့ၢ်အဃိလၤန့ၣ်လီၤ.

²⁰မ့ၢ်နာ်သက့ဒ်န့ၣ်ဒီး, စီၤစီလူးအဖိမုၣ်နီၢ်မံကၤလးအဲၣ်လိာ် သးဒီးစီၤဒၤဝံးလီၤ. တုၤစီၤစီလူးနၢ်ဟူတၢ်ဂ့ၢ်အံၤန့ၣ်အသးခုဝဲလီၤ.

²¹အဝဲစံးလီၤအသး, “ယကဟ့ၣ်နီၢ်မံကၤလးဆူစီၤဒၤဝံးဒီး ယကသူအီၤဒ်ထုအသိးလၢစီၤဒၤဝံးကဘၣ်တၢ်မၤသံကွံာ်အီၤလၢပှၤ ဖလ့ၡသးဖိတဖၣ်န့ၣ်လီၤ.” မၤသးဒ်န့ၣ်ဒီးစီၤစီလူးစံးဘၣ်စီၤဒၤဝံးခံစုတစု, “နကဘၣ်ကဲထီၣ်ယမာ်လီၤ.”

²²အဝဲမၤလိာ်အသုးခိၣ်သုးနၢ်တဖၣ်လၢကကတိၤခူသူၣ်တၢ်ဒီးစီၤဒၤ ဝံးဒီးစံးဘၣ်အီၤ, “စီၤပၤန့ၣ်ဘၣ်သူၣ်ဘၣ်သးလၢနၤဒီးကယဲၢ်အသုးခိၣ်သုးနၢ်တဖၣ် ဘၣ်သူၣ်ဘၣ်သးနၤလီၤ. ခဲအံၤမ့ၢ်တၢ်ဆၢကတီၢ်အဂ့ၤအဘၣ်လၢနကဖျီနသးဒီးအဖိမုၣ်လီၤ.”

²³မၤသးဒ်န့ၣ်ဒီး, အဝဲသ့ၣ်တဲဘၣ်စီၤဒၤဝံးလၢတၢ်ဂ့ၢ်အံၤဒီးအဝဲ စံးဆၢဝဲဒၣ်, “တၢ်ကဲထီၣ်ဘၣ်စီၤပၤအမာ်န့ၣ်မ့ၢ်တၢ်လၤကပီၤ ဖးဒိၣ်တမံၤ, မ့ၢ်တၢ်ဒိၣ်ကဲာ်ဆိးလၢပှၤဒ်သိးယၤတဂၤလၢအဖှီၣ်ဒီးတလီၤပာ် ဒိၣ်ပာ်ကဲဘၣ်အဂီၢ်န့ၣ်လီၤ.”

²⁴သုးခိၣ်သုးနၢ်တဖၣ်တဲဘၣ်စီၤစီလူးလၢတၢ်လၢစီၤဒၤဝံးစံး တ့ၢ်အဝဲသ့ၣ်န့ၣ်လီၤ.

²⁵ဒီးစီၤစီလူးမၤလိာ်အဝဲသ့ၣ်လၢကတဲဘၣ်စီၤဒၤဝံး, “ကယဲၢ်တၢ်လၢစီၤပၤသးလီလၢနအိၣ်ဒ်တၢ်အပှ့ၤလၢတလးမူးပိာ် မုၣ်အဂီၢ်န့ၣ်မ့ၢ်ပှၤဖလ့ၡသးဖိအဂၤတကယၤလၢအသံဝဲအတၢ်အခိၣ် ဖံး, လၢတၢ်ဟ့ၣ်ကၣ်က့ၤအဒုၣ်အဒါတဖၣ်အဂီၢ်န့ၣ်လီၤ.” (တၢ်အံၤမ့ၢ်စီၤစီလူးအတၢ်ကူၣ်ကျဲၤလၢစီၤဒၤဝံးကဘၣ်တၢ်မၤ သံအီၤလၢပှၤဖလ့ၡသးဖိတဖၣ်ဒ်လဲၣ်အဂ့ၢ်န့ၣ်လီၤ.)

²⁶စီၤစီလူးအသုးခိၣ်သုးနၢ်တဖၣ်က့ၤတဲဘၣ်စီၤဒၤဝံးတၢ်လၢ စီၤစီလူးစံးတ့ၢ်ဝဲတဖၣ်န့ၣ်လီၤ. ဒီးစီၤဒၤဝံးအသးခုလၢအဆိကမိၣ်ထီၣ်လၢကကဲထီၣ်ဘၣ်စီၤပၤ အမာ်အဃိန့ၣ်လီၤ. တချုးတၢ်သ့ၣ်ပာ်မုၢ်နံၤမုၢ်သီလၢတၢ်တ့တၢ်ဖျီအဂီၢ်န့ၣ်,

²⁷စီၤဒၤဝံးဒီးအပှၤသုးဖိတဖၣ်လဲၤမၤသံပှၤဖလ့ၡသးဖိအဂၤခံ ကယၤလီၤ. အဝဲဟဲက့ၤစိာ်အတၢ်ခိၣ်ဖံးတဖၣ်ဆူစီၤပၤအအိၣ်ဒီးဂံၢ်အီၤခဲ လၢာ်လၢအမဲာ်ညါဒ်သိးကကဲထီၣ်ဝဲအမာ်န့ၣ်လီၤ. မၤသးဒ်န့ၣ်ဒီး, စီၤစီလူးဘၣ်ဟ့ၣ်လီၤအဖိမုၣ်နီၢ်မံကၤလး ဆူစီၤဒၤဝံးအအိၣ်လၢကတ့ကဖျီအသးအဂီၢ်န့ၣ်လီၤ.

²⁸စီၤစီလူးသ့ၣ်ညါလီၤတံၢ်လီၤဆဲးလၢယွၤအိၣ်ဒီးစီၤဒၤဝံး ဒီးအဖိမုၣ်နီၢ်မံကၤလးစ့ၢ်ကီးအဲၣ်အီၤလီၤ.

²⁹မၤသးဒ်န့ၣ်ဒီး, တၢ်ပျံၤတၢ်ဖုးလီၤဘၣ်အါထီၣ်အီၤလၢစီၤဒၤဝံးအဃိ, ဒီးစီၤဒၤဝံးကဲထီၣ်အဒုၣ်အဒါလၢအသးသမူတစိၤဒၣ်အီၤန့ၣ် လီၤ.

³⁰ပှၤဖလ့ၡသးဖိအသုးမုၢ်တဖၣ်ဟဲဒီးဒုးတၢ်, ဘၣ်ဆၣ်ဒီး, လၢတၢ်ဒုးကိးဘျီအပူၤန့ၣ်စီၤဒၤဝံးမၤန့ၢ်မၤနၢၤတၢ်အါန့ၢ်ဒိၣ်န့ၢ်ဒံး စီၤစီလူးအသုးခိၣ်သုးနၢ်အဂၤတဖၣ်တက့ၢ်န့ၣ် လီၤ. လၢတၢ်န့ၣ်အဃိစီၤဒၤဝံးအမံၤဟူထီသါလီၤဒိၣ်ဒိၣ်ကလဲာ်လီၤ.