Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 20 Bible Online

လံာ်စီၤၡမူၤအ့လးအခီၣ်ထံးတဘ့ၣ် 20 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 20

¹တုၤနုၤတစုစီၤဒၤဝံးထွးထီၣ်ဃ့ၢ်လၢနၤဝိးလၢဝ့ၢ်ရၤမါ ဒီးလဲၤဆူစီၤယိနၤသၣ်အအိၣ်လီၤ. စီၤဒၤဝံးသံကွၢ်ဝဲ, “မ့ၢ်ယမၤတ့ၢ်တၢ်မနုၤလဲၣ်. ယမၤတ့ၢ်တၢ်ကမၣ်ခီပတာ်တၢ်သိၣ်တၢ် သီမနုၤလဲၣ်. ယမၤကမၣ်ဘၣ်တ့ၢ်နပၢ်တုၤလၢအကဘၣ်အဲၣ်ဒီးမၤသံယၤန့ၣ်လၢမနုၤ တမံၤလဲၣ်.”

²စီၤယိၤနၤသၣ်စံးဆၢဝဲ, “ကစၢ်ယွၤတြီတၢ်လၢနကဘၣ်သံအဂ့ၢ် လီၤ. ယပၢ်တဲဘၣ်ယၤတၢ်အကါဒိၣ်မ့ၢ်ဂ့ၤတၢ်အကါတဒိၣ်မ့ၢ်ဂ့ၤကိးမံၤ ဒဲးလၢအမၤဝဲဒီးတပာ်ခူသူၣ်ဝဲလၢယၤဘၣ်. တၢ်န့ၣ်တမ့ၢ်ဒ်န့ၣ်အသိးဘၣ်.”

³ဘၣ်ဆၣ်ဒီးစီၤဒၤဝံးဆိၣ်တၢ်ဒီးစံးဝဲဒၣ်, “နပၢ်သ့ၣ်ညါဝဲဂ့ၤဂ့ၤကလဲာ်လၢနအဲၣ်ယၤထဲလဲၣ်ထဲလဲၣ်အဂ့ၢ်လီၤ. ဒီးအဝဲပာ်လီၤအသးလၢအတပျဲဒုးသ့ၣ်ညါနၤအတၢ်တိာ်ကျဲၤလၢ ကမၤဝဲအဂ့ၢ်န့ၣ်ဘၣ်. အဂ့ၢ်ဒ်အံၤ, ကမၤဘၣ်ဒိဘၣ်ထံးနသးဒိၣ်မးအဃိလီၤ. ယဆိၣ်တၢ်လၢနၤလၢယွၤလၢအမူဝဲတဂၤအမဲာ်ညါလၢယပူၤဖျဲးဒီး တၢ်သံထဲခီၣ်ကါတခါဧိၤန့ၣ်လီၤ.”

⁴စီၤယိနၤသၣ်စံးဝဲ, “ယကမၤတၢ်တမံၤဂ့ၤတမံၤဂ့ၤလၢနအဲၣ် ဒိးလီၤ.”

⁵စီၤဒၤဝံးစံးဝဲ, “ခဲမုၢ်ဆ့ၣ်န့ၣ်မ့ၢ်လါထီၣ်သီအမူးဒီး ယကဘၣ်အီၣ်တၢ်ဒီးစီၤပၤလီၤ. ဘၣ်ဆၣ်ဒီးမ့ၢ်ဘၣ်သူၣ်ဘၣ်သးနၤန့ၣ်, ယကလဲၤအိၣ်ခူသူၣ်လၢပျီပူၤတုၤလၢခဲတဆ့ၣ်တနံၤမုၢ်ဟါလီၤန့ၣ်လီၤ.

⁶နပၢ်မ့ၢ်ပာ်သူၣ်ပာ်သးလၢယတအိၣ်လၢစီၢ်နီၤခိၣ်အဃၢၤဘၣ်ဒီးတဲ ဘၣ်အီၤလၢယဃ့နၤတၢ်ပျဲဒ်သိးယကက့ၤဆူဟံၣ်ချ့ချ့လၢ ဝ့ၢ်ဘ့ၤသလ့ဃ့ၣ် န့ၣ်တက့ၢ်. မ့ၢ်ဝဲတၢ်ဆၢကတီၢ်လၢတနံၣ်တဘျီ တၢ်လုၢ်တၢ်ပာ်အကတီၢ်လၢပဝဲဒူၣ်ဖိထၢဖိဒီဒူၣ်ညါအဂီၢ်န့ၣ်လီၤ.

⁷အဝဲမ့ၢ်စံးဝဲလၢဂ့ၤလံဒီးယကပူၤဖျဲးလီၤ. အဝဲမ့ၢ်သးဒိၣ်ထီၣ်ဒီးနကသ့ၣ်ညါလၢအဝဲပာ်လီၤအသးလီၤတံၢ်လီၤဆဲး လၢကမၤဆါယၤလီၤ.

⁸ဝံသးစူၤမၤဘျုးယၤလၢတၢ်တမံၤအံၤဒီးဟံးဃာ်တၢ်အၢၣ်လီၤစီဆှံလၢနမၤအီၤဒီးယၤတက့ၢ်. ဘၣ်ဆၣ်ဒီး, ယတၢ်ကမၣ်မ့ၢ်အိၣ်န့ၣ်မၤသံကွံာ်ယၤလၢနနီၢ်ကစၢ်ဒၣ်နဲတက့ၢ်. ဘၣ်မနုၤနကဘၣ်လဲၤကိးယၤဆူနပၢ်အအိၣ်ဒ်သိးကမၤသံယၤန့ၣ် လဲၣ်.”

⁹စီၤယိနၤသၣ်စံးဆၢဝဲ, “ဆိကမိၣ်ဒၣ်လဲာ်တၢ်ဒ်န့ၣ်အသိးတမံၤန့ၣ်တဂ့ၤ. ယမ့ၢ်သ့ၣ်ညါလီၤတံၢ်လၢယပၢ်ပာ်လီၤအသးလၢကမၤဆါနၤဒီး, ယတတဲဘၣ်နၤဘၣ်ဧါ.”

¹⁰တုၤနုၤတစုစီၤဒၤဝံးသံကွၢ်ဝဲ, “မတၤကဒုးသ့ၣ်ညါယၤဘၣ် ဃးဒီးနပၢ်အတၢ်စံးဆၢနၤလၢတၢ်သးဒိၣ်အပူၤန့ၣ်လဲၣ်.”

¹¹စီၤယိနၤသၣ်စံးဆၢဝဲ, “မ်ပလဲၤသကိးဆူပျီပူၤတက့ၢ်.” ဒီးအဝဲသ့ၣ်လဲၤဝဲလီၤ.

¹²စီၤယိနၤသၣ်စံးဘၣ်စီၤဒၤဝံး, “မ်ယွၤ, ကစၢ်ယွၤကဲထီၣ်နၤဒီးယၤအပှၤအုၣ်အသးတက့ၢ်. ခဲမုၢ်ဆ့ၣ်, အဆၢကတီၢ်ဒ်အံၤဒီးပိာ်ထီၣ်အခံလၢခံတနံၤန့ၣ်, ယကသံကွၢ်ယပၢ်လီၤ. အတၢ်ပာ်သူၣ်ပာ်သးလၢနဖီခိၣ်မ့ၢ်ဂ့ၤဝဲ ဒီးယကဆှၢလီၤတၢ်ကတိၤလီၤ.

¹³အဝဲမ့ၢ်တိာ်သူၣ်ပာ်သးလၢကမၤဆါနၤဒီး, ယမ့ၢ်တဒုးသ့ၣ်ညါနၤလၢတၢ်ဂ့ၢ်အံၤဒီးမၤပူၤဖျဲးနၤန့ၣ်, မ်ယွၤတီၢ်သံကွံာ်ယၤတက့ၢ်. မ်ယွၤအိၣ်ဒီးနၤဒ်အအိၣ်တ့ၢ် လံဒီးယပၢ်အသိးန့ၣ်တက့ၢ်.

¹⁴ဒီးယမ့ၢ်အိၣ်မူဘၣ်ဒံးယဲဒီးဝံသးစူၤဟံးဃာ်နတၢ်အၢၣ်လီၤ စီဆှံဒီးတီဒီးယၤတက့ၢ်. ဘၣ်ဆၣ်ဒီးယမ့ၢ်သံန့ၣ်,

¹⁵ဒုးနဲၣ်နတၢ်သးအိၣ်တၢ်ပာ်ကဲဒီးနတၢ်သူၣ်တီသးလိၤတမံၤဃီ ဆူယဟံၣ်ဖိဃီဖိအအိၣ်တဘိယူၢ်ဃီတက့ၢ်. ဒီးဖဲယွၤမၤဟးဂီၤကွံာ်ကယဲၢ်နဒုၣ်နဒါလၢလၢပှဲၤပှဲၤန့ၣ်,

¹⁶မ်ပတၢ်အၢၣ်လီၤလိာ်ပသးတဂၤဒီးတဂၤကကျၢၤဒံးဒၣ်ဝဲတက့ၢ်. တၢ်န့ၣ်မ့ၢ်ဟးဂီၤကွံာ်ဒီးယွၤကစံၣ်ညီၣ်နၤလီၤ.”

¹⁷မၤကဒီးတစု, စီၤယိနၤသၣ်မၢစီၤဒၤဝံးမၤတၢ်အၢၣ်လီၤအီ လီၤလၢကအဲၣ်အီၤလီၤ. အဂ့ၢ်ဒ်အံၤစီၤယိနၤသးအဲၣ်စီၤဒၤဝံးဒ်အအဲၣ်လီၤအသးဒၣ်ဝဲ အသိးလီၤ.

¹⁸အန့ၣ်ဝံၤဒီးစီၤယိနၤသၣ်စံးဘၣ်အီၤ, “ခဲမုၢ်ဆ့ၣ်တနံၤန့ၣ် ဒ်အမ့ၢ်လါထီၣ်သီအမူးအသိးန့ၣ် နမ့ၢ်တအိၣ်ဘၣ်လၢတၢ်အီၣ်သကိး အီသကိးအပူၤဘၣ်န့ၣ်တၢ်ကပာ်သူၣ်ပာ်သးအီၤန့ၣ်လီၤ.

¹⁹ခဲတဆ့ၣ်တနံၤန့ၣ်ကဘၣ်တၢ်ပာ်သူၣ်ပာ်သးအီၤဒိၣ်န့ၢ်အန့ၣ်တက့ၢ်လီၤ. မၤသးဒ်န့ၣ်ဒီး, လဲၤဆူတၢ်လီၢ်ဖဲနအိၣ်ခူသူၣ်လၢညါတဘျီ အလီၢ်န့ၣ်ဒီးပာ်ခူသူၣ်နသးလၢလၢၢ်အၤစ့းန့ၣ်တက့ၢ်.

²⁰ဒီးယကခးဃီၤပျၢ်သၢဘ့ၣ်ဆူန့ၣ်ဒ်တၢ်ပညိၣ်အလီၢ်အသိးန့ၣ်လီၤ.

²¹အန့ၣ်ဝံၤဒီးယကမၢယခ့ယပှၤလဲၤဃုန့ၢ်က့ၤအီၤန့ၣ်လီၤ. ဒီးယမ့ၢ်တဲအီၤ, ကွၢ်, ပျၢ်တဖၣ်န့ၣ်အိၣ်လၢနကပၤလၢအံၤတခီ, ဟံးန့ၣ်အီၤတက့ၢ်, န့ၣ်ဒီးအခီပညီမ့ၢ်ဝဲနပူၤဖျဲးဒီးနဟဲ က့ၤဟးထီၣ်သ့ဝဲလီၤ. ယဆိၣ်တၢ်လၢယွၤအမူဝဲတဂၤအမံၤအပူၤလၢတၢ်ပျံၤတၢ်ဖုးအလီၢ် တအိၣ်ဘၣ်နီတမံၤဘၣ်လီၤ.

²²ဘၣ်ဆၣ်ဒီးယမ့ၢ်တဲအီၤ, ပျၢ်တဖၣ်န့ၣ်အိၣ်လၢနအိၣ်လၢဘးခီ တခီလီၤန့ၣ်ဒီး, အန့ၣ်တစုဟးထီၣ်ကွံာ်ဖဲန့ၣ်တက့ၢ်. အဂ့ၢ်ဒ်အံၤ, ယွၤဆှၢနၤဆူအယံၤလီၤ.

²³ဘၣ်ဃးလၢတၢ်အၢၣ်လီၤလၢပမၤတ့ၢ်အီၤတဂၤဒီးတဂၤအံၤန့ၣ်ယွၤ ကမၤလီၤတံၢ်အီၤလၢပကဟံးဃာ်အီၤအထူအယိာ်အဂီၢ်န့ၣ်လီၤ.”

²⁴မၤသးဒ်န့ၣ်ဒီး, စီၤဒၤဝံးလဲၤအိၣ်ခူသူၣ်လၢပျီပူၤလီၤ. လၢလါထီၣ်သီအမူးန့ၣ်စီၤပၤစီၤစီလူးဟဲဆူတၢ်အီၣ်အလီၢ်လီၤ.

²⁵ဒီးဆ့ၣ်နီၤဝဲဖဲအဆ့ၣ်နီၤညီနုၢ်ဝဲအလီၢ်လၢဂီၤပၤအကပၤန့ၣ် လီၤ. စီၤအဘံန့ၢ်ဆ့ၣ်နီၤဘူးဒီးအီၤဒီးစီၤယိနၤသၣ်ဆ့ၣ်နီၤလၢ စီၢ်နီၤခိၣ်အဘးခီတကပၤသဃီၤဒီးအီၤန့ၣ်လီၤ. စီၤဒၤဝံးအလီၢ်န့ၣ်လီၤဟိဝဲ,

²⁶ဘၣ်ဆၣ်ဒီးအနံၤဝဲန့ၣ်စီၤစီလူးတတဲတၢ်နီတမံၤဘၣ်. အဂ့ၢ်ဒ်အံၤဆိကမိၣ်ဝဲ, “တၢ်မၤအသးဒီးအီၤတမံၤမံၤဒီး တကဆှီဝဲဒ်တၢ်ဘူၣ်တၢ်ဘါအလုၢ်အလၢ်အသိးဘၣ်အဃိလီၤ.”

²⁷လၢခံတနံၤ, ဖဲလါထီၣ်သီအမူးဝံၤဝဲန့ၣ်, စီၤဒၤဝံးအလီၢ်လီၤဟိဒံးဝဲဒီးစီၤစီလူးသံကွၢ်စီၤယိ နၤသၣ်, “ဘၣ်မနုၤလၢစီၤဒၤဝံးတဟဲဘၣ်ဆူတၢ်အီၣ်သကိးလၢမဟါတနံၤ ဒီးတနံၤညါအံၤန့ၣ်လဲၣ်.”

²⁸စီၤယိနၤသၣ်စံးဆၢအီၤ, “အဝဲဃ့ကညးယၤလၢယကပျဲအီၤဒ်သိးအကက့ၤဆူဝ့ၢ်ဘ့ၤသလ့ဃ့ၣ်လီၤ.

²⁹အဝဲစံးဝဲ, ဝံသးစူၤပျဲယလဲၤတက့ၢ်. အဂ့ၢ်ဒ်အံၤ, ပဒူၣ်ဖိထၢဖိမၤတၢ်လုၢ်တၢ်ပာ်, ဘူၣ်တၢ်ဘါတၢ်လၢဝ့ၢ်ပူၤဒီးယဝဲၢ်မၤလိာ်ယၤလၢယကဘၣ်အိၣ်ဖဲန့ၣ်လီၤ. လၢတၢ်န့ၣ်အဃိဒီးနမ့မ့ၢ်ယတံၤသကိးဒီးပျဲယလဲၤဒီးထံၣ်ဘၣ် ယဘူးယတံၢ်တဖၣ်တက့ၢ်. မၤသးဒ်န့ၣ်ဒီး, အဝဲတအိၣ်ဘၣ်လၢအလီၢ်လၢနစီၢ်နီၤခိၣ်ဘၣ်န့ၣ်လီၤ.”

³⁰စီၤစီလူးသးဒိၣ်ထီၣ်လၢစီၤယိနၤသၣ်အဖီခိၣ်နးနးကလဲာ်ဒီး စံးဘၣ်အီၤ, “နဲဒၣ်ပှၤလၢအဘိးကဒါကွံာ်တၢ်မ့ၢ်တၢ်တီဒီးပူထီၣ်တၢ်တဂၤဧၢ, ခဲအံၤယသ့ၣ်ညါလၢနအိၣ်လၢစီၤဒၤဝံးအအိၣ်တခီဒီးနမၤဟးဂီၤ နသူးနသ့ၣ်ဒီးနမိၢ်ဒၣ်နဲအလၤကပီၤလီၤ.”

³¹စီၤယိနၤသၣ်စံးဝဲ,

³²“ဘၣ်မနုၤအဃိအဝဲကဘၣ်သံန့ၣ်လဲၣ်. အဝဲမၤတ့ၢ်တၢ်မနုၤလဲၣ်.”

³³အန့ၣ်ဒီး, စီၤစီလူးကွံာ်ဆဲးအဘီလၢစီၤယိနၤသၣ်ဒ်သိးအကမၤသံကွံာ်အီၤလီၤ. ဒီးစီၤယိနၤသၣ်သ့ၣ်ညါနၢ်ပၢၢ်ဝဲလၢအပၢ်န့ၣ် ပာ်လီၤအသးသပှၢ်ကတၢၢ်လၢကမၤသံစီၤဒၤဝံးန့ၣ်လီၤ.

³⁴စီၤယိနၤသၣ်ဆၢထၢၣ်လၢစီၢ်နီၤခိၣ်လၢတၢ်သးဒိၣ်အပူၤဒီး တအီၣ်တၢ်နီတမံၤဘၣ်လၢမုၢ်နံၤအဝဲန့ၣ်လၢလါထီၣ်သီအမူး ခံသီတသီအနံၤန့ၣ်လီၤ. အဝဲအသးဘၣ်ဒိဘၣ်ထံးဒိၣ်မးလၢစီၤဒၤဝံးအဂီၢ်လီၤ. အဂ့ၢ်ဒ်အံၤ, စီၤစီလူးမၤမဲာ်ဆှးအီၤန့ၣ်လီၤ.

³⁵မုၢ်ဆ့ၣ်ထီၣ်တနံၤန့ၣ်, စီၤယိနၤသၣ်လဲၤဆူပျီပူၤလၢကထံၣ် လိာ်ဒီးစီၤဒၤဝံးအဂီၢ်ဒ်အဝဲသ့ၣ်အၢၣ်လီၤလိာ်အသးယၢ်ခီယၢ်ခီ အသိးန့ၣ်လီၤ. အဝဲလဲၤကိးဃုာ်သးစၢ်ဖိတဂၤဃုာ်ဒီးအီၤလီၤ.

³⁶ဒီးစံးဘၣ်အီၤ, “ဃ့ၢ်ဒီးဃုထံၣ်က့ၤယပျၢ်လၢယကခးအီၤန့ၣ်တက့ၢ်.” ပှၤသးစၢ်ဖိဃ့ၢ်ဒီးစီၤယိနၤသၣ်ခးထီၣ်အပျၢ်တဘ့ၣ်ပူၤကွံာ် အီၤန့ၣ်လီၤ.

³⁷ဖဲပှၤသးစၢ်ဖိတုၤတၢ်လီၢ်ဖဲပျၢ်လီၤတဲာ်ဝဲအလီၢ်န့ၣ်, စီၤယိနၤသၣ်ကိးတဲဘၣ်အီၤ, “ပျၢ်န့ၣ်အိၣ်လၢမဲာ်ညါတစဲးလီၤ.

³⁸အိၣ်ဆၢထၢၣ်ဖဲန့ၣ်တဂ့ၤ. မၤချ့ချ့တက့ၢ်.” ပှၤသးစၢ်ဖိထၢထီၣ်ပျၢ်ဒီးဟဲက့ၤဆူအကစၢ်အိၣ်လီၤ.

³⁹တသ့ၣ်ညါဝဲတၢ်န့ၣ်အခီပညီဘၣ်. ထဲစီၤယိၤနၤသၣ်ဒီးစီၤဒၤ ဝံးတဖၣ်ဧိၤသ့ၣ်ညါဝဲလီၤ.

⁴⁰စီၤယိနၤသၣ်ဟ့ၣ်လီၤအစုကဝဲၤတဖၣ်ဆူပှၤသးစၢ်ဖိအအိၣ်ဒီးတဲ အီၤလၢကက့ၤစိာ်ဆူဝ့ၢ်ပူၤလီၤ.

⁴¹ဖဲပှၤသးစၢ်ဖိက့ၤဝဲန့ၣ်, စီၤဒၤဝံးဂဲၤဆၢထၢၣ်လၢလၢၢ်အၤစ့းဒီးတီၤလီၤဝဲလၢအခီၣ်လ့ၢ်ခိၣ်ဒီးပိာ်လီၤအမဲာ်သၣ်လၢ ဟီၣ်ခိၣ်သၢစုလီၤ. စီၤဒၤဝံးဒီးစီၤယိနၤသၣ်ခံဂၤလိာ်ဟီၣ်ဝဲဖဲအနၢမူလိာ် အသးအခါန့ၣ်လီၤ. စီၤဒၤဝံးအတၢ်သးအုးဒိၣ်န့ၢ်ဒံးစီၤယိနၤသၣ်တက့ၢ်န့ၣ်လီၤ.

⁴²အန့ၣ်ဝံၤဒီးစီၤယိနၤသၣ်စံးဘၣ်စီၤဒၤဝံး, “ကစၢ်ယွၤအိၣ်ဒီးနၤလီၤ. ယွၤကမၤလီၤတံၢ်ဝဲလၢနၤဒီးယၤ, ဒီးနစၢၤနသွဲၣ်ဒီး, ယစၢၤယသွဲၣ်တဖၣ်ကဟံးဃာ်အတၢ်အၢၣ်လီၤစီ ဆှံလၢပမၤတ့ၢ်အီၤယၢ်ခီယၢ်ခီန့ၣ်လီၤ.” အန့ၣ်ဝံၤဒီးစီၤဒၤဝံးဟးထီၣ်ဝဲဒီး စီၤယိနၤသၣ်က့ၤကဒါက့ၤဆူဝ့ၢ်ပူၤန့ၣ်လီၤ.