Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 26 Bible Online

လံာ်စီၤၡမူၤအ့လးအခီၣ်ထံးတဘ့ၣ် 26 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 26

¹ပှၤတနီၤလၢဝ့ၢ်စံဖးဟဲဆူစီၤစီလူးအအိၣ်လၢဝ့ၢ်ကံဘဧၤဒီး တဲဘၣ်အီၤလၢစီၤဒၤဝံးအိၣ်ခူသူၣ်လၢကစၢၢ်ဃကံလၤအလိၤဖဲ ကီၢ်ယူဒၤအပှၢ်မုၢ်ကနၢအထိးနါန့ၣ်လီၤ.

²စီၤစီလူးလဲၤတဘျီဃီဃုာ်ဒီးပှၤသုးဖိအဂ့ၤကတၢၢ်လၢကီၢ် အံၣ်စရ့လးအပူၤအဂၤသၢကထိဆူဝ့ၢ်စံဖးအပှၢ်မုၢ်ကနၢဒ်သိးကဃု စီၤဒၤဝံးအဂီၢ်န့ၣ်လီၤ.

³ဒီးသူၣ်ထီၣ်အဒဲဖဲကျဲကပၤလၢကစၢၢ်ဃကံလၤအဖီခိၣ်န့ၣ်လီၤ. စီၤဒၤဝံးအိၣ်ဒံးလၢပှၢ်မုၢ်ကနၢပူၤအဖၢမုၢ်ဒီးဖဲအသ့ၣ်ညါ ဝဲလၢစီၤစီလူးဟဲဝဲလၢကလူၤဃုအီၤန့ၣ်,

⁴အဝဲဆှၢလီၤပှၤကွၢ်ဟုၣ်ကွၢ်စုးတၢ်တဖၣ်ဒီးသ့ၣ်ညါဝဲလၢ စီၤစီလူးအိၣ်ဖဲန့ၣ်သပှၢ်တၢၢ်န့ၣ်လီၤ.

⁵အဝဲလဲၤတဘျီဃီဒီးကွၢ်တၢ်လီၢ်ဖဲစီၤစီလူးဒီးစီၤန့ၢ်အဖိခွါ စီၤအဘံန့ၢ်လၢအမ့ၢ်သုးခိၣ်ကျၢၢ်လၢစီၤစီလူးအသုးမုၢ်အပူၤ, မံဝဲအလီၢ်လီၤတံၢ်လီၤဆဲးန့ၣ်လီၤ. စီၤစီလူးမံလၢဒဲအအိပူၤဒီးအပှၤတဖၣ်သူၣ်ဒဲဝးတရံးအီၤန့ၣ်လီၤ.

⁶အန့ၣ်ဝံၤဒီးစီၤဒၤဝံးသံကွၢ်ပှၤဃ့ၤသးဖိစီၤအဃံၤမ့လ့း, ဒီးစီၤယိၤအာ်အဒီပုၢ်ဝဲၢ်စီၤအဘံၡဲၤ (အဝဲသ့ၣ်အမိၢ်မ့ၢ်နီၢ်စရူၤယၤလီၤ), “သုဝဲခံဂၤအကျါမ့ၢ်မတၤကလဲၤဃုာ်ဒီးယၤဆူစီၤစီလူးအဒဲ လဲၣ်.” စီၤအဘံၡဲၤစံးဆၢဝဲ, “ယကလဲၤလီၤ.”

⁷မၤသးဒ်န့ၣ်ဒီး, လၢမုၢ်နၤအဝဲန့ၣ်စီၤဒၤဝံးဒီးစီၤအဘံၡဲၤ လဲၤနုာ်ဆူစီၤစီလူးအဒဲပူၤဒီးထံၣ်ဘၣ်စီၤစီလူးမံလၢတၢ်သူၣ်ဒဲ အလီၢ်အခၢၣ်သးဒီးဃုာ်ဒီးအဘီအိၣ်ဆဲးလီၤအသးလၢဟီၣ်ခိၣ်လိၤ ဘူးဒီးအခိၣ်န့ၣ်လီၤ. စီၤအဘံန့ၢ်ဒီးသုးဖိတဖၣ်မံဝးတရံးအီၤန့ၣ်လီၤ.

⁸စီၤအဘံၡဲၤစံးဘၣ်စီၤဒၤဝံး, “တနၤအံၤကစၢ်ယွၤပာ်လီၤ နဒုၣ်နဒါလၢနစိကမီၤအဖီလာ်လီၤ. ခဲအံၤပျဲယဆဲးအကစၢ်ဒၣ်ဝဲဒီးအဘီဖျိကွံာ်အီၤဒီးဆဲးတံၢ် အီၤဖဲဟီၣ်ခိၣ်လိၤထဲတဘီဧိၤတက့ၢ်. ယတဆဲးဘၣ်ခံဘီဘၣ်.”

⁹ဘၣ်ဆၣ်ဒီးစီၤဒၤဝံးစံးဝဲ, “နတဘၣ်မၤဆါအီၤဘၣ်. ပှၤတဂၤလၢ်လၢ်လၢအမၤဆါယွၤအပှၤဃုထၢဖိစီၤပၤန့ၣ်ယွၤကစံၣ် ညီၣ်အီၤသပှၢ်ကတၢၢ်လီၤ.”

¹⁰စီၤဒၤဝံးစံးကဒီးဝဲဆူညါ, “ခီဖျီယွၤလၢအမူဝဲတဂၤ န့ၣ်, ယသ့ၣ်ညါလၢယွၤအနီၢ်ကစၢ်ဒၣ်ဝဲကမၤသံစီၤစီလူးဖဲအမုၢ်နံၤ တုၤဃီၤဝဲလၢကဘၣ်သံဒ်ပှၤဟီၣ်ခိၣ်ဖိအန့ဆၢၣ်မ့ၢ်ဂ့ၤ, ကဘၣ်သံဝဲလၢတၢ်ဒုးတၢ်ယၤအဃိမ့ၢ်ဂ့ၤန့ၣ်လီၤ.

¹¹ယွၤတြီယၤလၢယကကျဲးစၢးမၤဆါပှၤတဂၤလၢယွၤဒုးကဲထီၣ်အီၤ လၢစီၤပၤန့ၣ်လီၤ. မ်ပဟံးန့ၢ်အဘီ, အထံကိဖိဒီးဟးထီၣ်ကွံာ်တက့ၢ်.”

¹²မၤသးဒ်န့ၣ်ဒီးစီၤဒၤဝံးဟံးန့ၣ်ဘီဒီးထံကိဖိလၢစီၤစီ လူးအခိၣ်အကပၤလၢစုထွဲတခီပၤ, ဒီးအဝဲဒီးစီၤအဘံၡဲၤဟးထီၣ်ကွံာ်ဝဲဒၣ်လီၤ. တၢ်မၤအသးန့ၣ်ပှၤထံၣ်မ့ၢ်ဂ့ၤ, သ့ၣ်ညါမ့ၢ်ဂ့ၤ, ဖုးသံနီၣ်ထီၣ်ဒၣ်လဲာ်မ့ၢ်ဂ့ၤတအိၣ်ဘၣ်နီတဂၤဘၣ်. အဝဲသ့ၣ်ကိးဂၤဒဲးမံဘၣ်အသးလၢတၢ်မံယိာ်အပူၤလီၤ. အဂ့ၢ်ဒ်အံၤ, ယွၤဆှၢလီၤတၢ်မံယိာ်လၢအဝဲသ့ၣ်ကိးဂၤဒဲးအလိၤလီၤ.

¹³အန့ၣ်ဝံၤဒီးစီၤဒၤဝံးခီဂာ်ဆူတၢ်တြီၤဘးခီတကပၤဆူတၢ် လူၢ်ဒီခိၣ်, ဖဲတၢ်ဒ့ၣ်စၢၤအယံၤတစဲးလၢအပူၤဖျဲးအလီၢ်န့ၣ်လီၤ.

¹⁴ဒီးကိးပသူထီၣ်ဝဲဆူစီၤစီလူးအသုးမုၢ်သံၣ်ဘိတဖၣ်အအိၣ် ဒီးဆူစီၤအဘံန့ၢ်အအိၣ်, “စီၤအဘံန့ၢ်ဧၢ, နနၢ်ဟူယၤဧါ.” စီၤအဘံန့ၢ်သံကွၢ်ဝဲ, “မ့ၢ်မတၤကိးပသူဒီးမၤပၢၢ်ထီၣ်စီၤပၤတဂၤလဲၣ်.”

¹⁵စီၤဒၤဝံးစံးဆၢဝဲ, “စီၤအဘံန့ၢ်ဧၢ, နတမ့ၢ်ဘၣ်ပှၤအဒိၣ်ကတၢၢ်လၢကီၢ်အံၣ်စရ့လးအပူၤဘၣ်ဧါ. မ့မ့ၢ်ဒ်န့ၣ်ဒီးဘၣ်မနုၤလၢနတဒီဒၣ်အိၣ်ပှိၤနကစၢ်စီၤပၤန့ၣ်လဲၣ်. ပှၤတဂၤလဲၤနုာ်တ့ၢ်ဆူဒဲပူၤခဲအံၤဖိဒ်သိးအကမၤသံနကစၢ်လီၤ.

¹⁶နတမၤလၢပှဲၤနမူနဒါဘၣ်. စီၤအဘံန့ၢ်ဧၢ, ယဆိၣ်တၢ်ခီဖျိယွၤလၢအမူဝဲတဂၤအမံၤ, လၢသုဝဲခဲလၢာ်ကြၢး သုသံလီၤ. အဂ့ၢ်ဒ်အံၤ, သုတဒီဒၣ်အိၣ်ပှိၤတ့ၢ်သုကစၢ်, လၢယွၤဒုးကဲထီၣ်အီၤလၢစီၤပၤန့ၣ်ဘၣ်. ကွၢ်, စီၤပၤအဘီ အိၣ်ဖဲလဲၣ်. ထံကိဖိအိၣ်လၢအခိၣ်ကပၤန့ၣ်အိၣ်ဖဲလဲၣ်.”

¹⁷စီၤစီလူးတိၢ်နီၣ်စီၤဒၤဝံးအကလုၢ်ဘၣ်ဒီးသံကွၢ်ဝဲ, “စီၤဒၤဝံး, ယဖိခွါဧၢ, မ့ၢ်နၤဧါ.” စီၤဒၤဝံးစံးဆၢဝဲ, “မ့ၢ်, စီၤပၤဖးဒိၣ်ဧၢ.”

¹⁸ဒီးစံးဝဲဆူညါ, “တၢ်ဒိၣ်ဧၢ, ဘၣ်မနုၤလၢနလူၤဖီၣ်န့ၢ်ဒံးယၤ, နခ့နပှၤယၤအံၤအဖၢမုၢ်လဲၣ်. ယမၤတ့ၢ်တၢ်မနုၤလဲၣ်. တၢ်ကမၣ်ထီဒါတၢ်သိၣ်တၢ်သီန့ၣ်ယမၤကမၣ်မနုၤတမံၤလဲၣ်.

¹⁹စီၤပၤဖးဒိၣ်ဧၢ, ဒိကနၣ်တၢ်လၢယဘၣ်ကတိၤအီၤန့ၣ်တက့ၢ်. ယွၤမ့မ့ၢ်ပှၤလၢအဒုးဃၣ်နသးထီဒါယၤဒီးတၢ်လုၢ်မၤဘူၣ်တမံၤ ကဒုးလဲလိာ်ကွံာ်အသးလီၤ. ဘၣ်ဆၣ်ဒီးမ့မ့ၢ်တၢ်လၢပှၤကညီ တဖၣ်မၤတ့ၢ်အီၤဒီးမ်ယွၤအတၢ်ဆိၣ်အၢလီၤလၢအဝဲသ့ၣ်အဖီခိၣ်တက့ၢ်. အဂ့ၢ်ဒ်အံၤ, အဝဲသ့ၣ်နီၣ်ထုးထီၣ်ကွံာ်ယၤလၢယွၤအကီၢ်ပူၤ, ဆူကီၢ်တဘ့ၣ်လၢယဘါထီၣ်သ့ထဲပှၤတခီဘီမုၢ်ဖိအကစၢ်တဖၣ်ဧိၤန့ၣ်လီၤ.

²⁰တဘၣ်ပျဲယဘၣ်တၢ်မၤသံယၤလၢပှၤတခီဘီမုၢ်ဖိအဟီၣ်ခိၣ်လိၤ, ယံၤဒီးယွၤန့ၣ်တဂ့ၤ. ဘၣ်မနုၤလၢကီၢ်အံၣ်စရ့လးအစီၤပၤဟဲဒ်သိး ကမၤသံတၢ်အကျံတဘ့ၣ်ဒ်ယၤအသိးအံၤန့ၣ်လဲၣ်. ဘၣ်မနုၤလၢအဝဲဘၣ်လူၤခးယၤဒ်ထိၣ်မံၤအသိးန့ၣ်လဲၣ်.”

²¹စီၤစီလူးစံးဆၢဝဲဒၣ်, “ယမၤကမၣ်တ့ၢ်တၢ်လံ. ဟဲက့ၤကဒါက့ၤစီၤဒၤဝံး, ယဖိခွါဧၢ, ယတမၤဆါကဒီးနၤနီတစုလၢၤဘၣ်. အဂ့ၢ်ဒ်အံၤ, နပျဲပူၤဖျဲးယသးသမူလၢတနၤအံၤအဃိလီၤ. ယမ့ၢ်တ့ၢ်ပှၤအမၢးတဂၤလီၤ. ယမၤတ့ၢ်တၢ်အၢတၢ်သီဖးဒိၣ်လီၤ.”

²²စီၤဒၤဝံးစံးဆၢဝဲဒၣ်, “တၢ်ဒိၣ်စီၤပၤဖးဒိၣ်ဧၢ, နဘီအိၣ်လၢအံၤလီၤ. ပျဲနပှၤတဖၣ်အကျါတဂၤဟဲဆူအံၤဒီးဟံးန့ၢ်အီၤတက့ၢ်.

²³ယွၤဟ့ၣ်ဘျုးပှၤတဖၣ်လၢအသူၣ်တီအသးလိၤဒီးတီဝဲလိၤဝဲတဖၣ် န့ၣ်လီၤ. တနံၤအံၤန့ၣ်အဝဲပာ်နၤလၢယတၢ်စိကမီၤအဖီ လာ်လီၤ. ဘၣ်ဆၣ်ဒီးယတမၤဆါဘၣ်နၤ, ပှၤလၢယွၤဒုးကဲထီၣ်အီၤ လၢစီၤပၤတဂၤန့ၣ်ဘၣ်.

²⁴ဒ်ယပျဲပူၤတ့ၢ်နသးသမူတနံၤအံၤအသိး, မ်ယွၤမၤတၢ်တမံၤဃီ လၢယၤဒီးမၤပူၤမၤဖျဲးယၤလၢကယဲၢ်တၢ်ကီတၢ်ခဲတဖၣ်ခဲလၢာ် န့ၣ်တက့ၢ်.”

²⁵စီၤစီလူးစံးဘၣ်စီၤဒၤဝံး, “ကစၢ်ယွၤဆိၣ်ဂ့ၤနၤလီၤ, ယဖိခွါဧၢ. နကမၤနၢၤတၢ်လၢကယဲၢ်တၢ်ကိးမံၤဒဲးလၢနမၤအီၤန့ၣ်လီၤ.” မၤသးဒ်န့ၣ်ဒီးစီၤဒၤဝံးလဲၤဆူညါလၢအကျဲဒၣ်ဝဲဒီးစီၤစီ လူးက့ၤဆူအဟံၣ်လီၤ.