Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 30 Bible Online

လံာ်စီၤၡမူၤအ့လးအခီၣ်ထံးတဘ့ၣ် 30 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 30

¹ခံသီပူၤကွံာ်အလီၢ်ခံစီၤဒၤဝံးဒီးအပှၤတဖၣ် က့ၤတုၤကဒါက့ၤဆူဝ့ၢ်စံကလးလီၤ. ပှၤဧမၤလ့းဖိတဖၣ်ဟဲဂုာ်ဆူၣ်ပျိဆူၣ်ကီၢ်ယူဒၤ ကလံၤထံးဒီးဒုးဝ့ၢ်စံကလးလီၤ. အဝဲသ့ၣ်ဆူးကဲၤထီၣ်ကွံာ်ဝ့ၢ်န့ၣ်လၢမ့ၣ်အူ,

²ဒီးဖီၣ်န့ၢ်ပှၤပိာ်မုၣ်ပိာ်မၢၤတဖၣ်လီၤ. တမၤသံကွံာ်ပှၤနီ တဂၤဘၣ်. ဘၣ်ဆၣ်ဒီးအဝဲသ့ၣ်က့ၤကိးပှၤကိးဂၤဒဲးဖဲအက့ၤကဒါက့ၤဝဲအခါန့ၣ်လီၤ.

³ဖဲစီၤဒၤဝံးဒီးအပှၤတဖၣ်ဟဲက့ၤတုၤဝဲဒၣ်န့ၣ်, အဝဲသ့ၣ်ထံၣ်လၢဝ့ၢ်န့ၣ်ဘၣ်တၢ်ဆူးကဲၤထီၣ်ကွံာ်အီၤဒီးအမါတဖၣ် ဒီးအဖိခွါတဖၣ်ဒီးအဖိမုၣ်တဖၣ်န့ၣ်ဘၣ်တၢ်က့ၤကိးကွံာ်အီၤန့ၣ်လီၤ.

⁴စီၤဒၤဝံးဒီးအပှၤတဖၣ်ဟီၣ်ဝဲယၢၤဝဲဒီး တုၤလၢအလီၤဘှံးလီၤဘှါလၢာ်လၢာ်ဆ့ဆ့တစုန့ၣ်တဆိကတီၢ်ဘၣ်ဝဲဘၣ်.

⁵စီၤဒၤဝံးအမါခံဂၤ, နီၢ်အဃံနိၣ်ဒီးနီၢ်အဘံၤကါယံးလးဒၣ်လဲာ်ဘၣ်တၢ်စိာ်ကွံာ်အီၤန့ၣ်လီၤ.

⁶ခဲအံၤစီၤဒၤဝံးန့ၣ်အိၣ်လၢတၢ်ကီတၢ်ခဲဖးဒိၣ်အပူၤလီၤ. အဂ့ၢ်ဒ်အံၤ, အပှၤခဲလၢာ်အသးဆါခၣ်ဒိၣ်ဒိၣ်ကလဲာ်လၢအဖိအမါတဖၣ် လီၤမၢ်ကွံာ်အဃိန့ၣ်လီၤ. ဒီးအဝဲသ့ၣ်မၤပျံၤမၤဖုးစီၤဒၤဝံးလၢကကွံာ်သံအီၤလၢလၢၢ်လီၤ. ဘၣ်ဆၣ်ဒီးယွၤ, အကစၢ်ယွၤဟ့ၣ်အီၤလၢတၢ်သူၣ်ဒူသးဒူန့ၣ်လီၤ.

⁷စီၤဒၤဝံးစံးဘၣ်ပှၤလုၢ်တၢ်အခိၣ်, စီၤအဃံၤမ့လ့းအဖိခွါ စီၤအ့ဘယၤသၢ်, “ဟဲစိာ်န့ၢ်ယၤအ့ဖိးတက့ၢ်.” ဒီးစီၤအ့ဘယၤသၢ်ဟဲစိာ်တၢ်န့ၣ်ဆူအအိၣ်န့ၣ်လီၤ.

⁸စီၤဒၤဝံးသံကွၢ်ကစၢ်ယွၤ, “မ့ၢ်ယဘၣ်လဲၤလူၤပှၤဂုာ်ဆူၣ်တၢ်တဖၣ်ဒီးမ့ၢ်ယကဘၣ်ဖီၣ်န့ၣ်အဝဲသ့ၣ်ဧါ.” ယွၤစံးဆၢဝဲဒၣ်, “လဲၤလူၤအဝဲသ့ၣ်ဒီးမၤပူၤမၤဖျဲးပှၤဘၣ်တၢ်စိာ်မၢကဲကုၢ်အီၤတဖၣ်တက့ၢ်.”

⁹မၤသးဒ်န့ၣ်ဒီး, စီၤဒၤဝံးဒီးအပှၤဃုကယၤဂၤဟးထီၣ်လဲၤတၢ် ဒီးဖဲအဝဲသ့ၣ်တုၤဃီၤထံကျိဖိအကၢၢ်နံၤန့ၣ် ပှၤတနီၤအိၣ်တ့ၢ်ဖဲန့ၣ်လီၤ.

¹⁰စီၤဒၤဝံးလဲၤဆူညါဃုာ်ဒီးပှၤအဂၤလွံၢ်ကယၤလီၤ. ပှၤအဂၤခံကယၤန့ၣ်လီၤဘှံးတုၤဒၣ်လဲာ်ခီတကဲလၢၤခီထံကျိဖိသတးဒီး အိၣ်တ့ၢ်ဝဲလၢတၢ်လီၢ်ခံန့ၣ်လီၤ.

¹¹ပှၤလၢအလဲၤဃုာ်ဒီးစီၤဒၤဝံးတဖၣ်ထံၣ်န့ၢ်ပှၤကီၢ်အဲၤကူပတူး ဖိသၣ်ပိာ်ခွါတဂၤလၢဝ့ၢ်အချၢဒီး ဟဲက့ၤကိးအီၤဆူ စီၤဒၤဝံးအအိၣ်လီၤ. အဝဲသ့ၣ်ဟ့ၣ်အီၤလၢကိၣ်တနီၤဒီးထံ,

¹²ဒီးချၢၣ်ဒၢသၣ်အဃ့တနီၤ, ဒီးစပံးသၣ်အခ့ခံကဒိၣ်န့ၣ်လီၤ. ဖဲအဝဲအီၣ်တၢ်ဝံၤန့ၣ်အဂံၢ်ဟဲက့ၤထီၣ်က့ၤဝဲလီၤ. အဝဲတအီၣ်တအီတ့ၢ်တၢ်သၢသီညါလီၤ.

¹³စီၤဒၤဝံးသံကွၢ်အီၤ, “နကစၢ်မ့ၢ်မတၤလဲၣ်. ဒီးနဟဲလၢလဲၣ်ခီလဲၣ်.” အဝဲစံးဆၢဝဲဒၣ်, “ယမ့ၢ်ပှၤကီၢ်အဲၤကူပတူးဖိတဂၤလီၤ. ဒီးယမ့ၢ်ပှၤဧမၤလ့းဖိတဂၤအကုၢ်လီၤ. မ့ၢ်လၢယဆူးယဆါထီၣ်အဃိအပူၤကွံာ်သၢသီန့ၣ်ယကစၢ်ပာ်တီၢ်ကွံာ်ယၤလီၤ.

¹⁴ပလဲၤဂုာ်ဆူၣ်ပှၤကရံးသးဖိအလီၢ်ကဝီၤလၢကီၢ်ယူဒၤအကလံၤထံး ဒီးစီၤကၤလ့းအဒူၣ်ထၢတဖၣ်အလီၢ်ကဝီၤဒီးပဆူးကဲၤထီၣ်ကွံာ် ဝ့ၢ်စံကလးလီၤ.”

¹⁵စီၤဒၤဝံးသံကွၢ်အီၤ, “နကဆှၢပှၤဆူပှၤဂုာ်ဆူၣ်ပျိဆူၣ်တၢ်တဖၣ်န့ၣ်အအိၣ်ဧါ.” ဒီးအဝဲဒၣ်စံးဆၢဝဲ, “နမ့ၢ်အၢၣ်လီၤလၢကစၢ်ယွၤအမံၤအပူၤ လၢနတမၤသံယၤဘၣ်မ့ၢ်ဂ့ၤဟ့ၣ်လီၤကဒါက့ၤယၤဆူယကစၢ်အစုပူၤ မ့ၢ်ဂ့ၤဘၣ်ဒီးယကဆှၢနၤလီၤ.”

¹⁶ဒီးအဝဲဆှၢစီၤဒၤဝံးဆူအဝဲသ့ၣ်အအိၣ်လီၤ. ပှၤဂုာ်ဆူၣ်ပျိဆူၣ်တၢ်တဖၣ်ရၤလီၤအသးသကုၤတၢ်လီၢ်ကိးပူၤဒဲး, အီၣ်တၢ်အီတၢ်ဒီးမၤမူးလၢအဂုာ်န့ၢ်တၢ်အါအါကလဲာ်လၢကီၢ်ဖလ့ၡသး ဒီးကီၢ်ယူဒၤအဃိန့ၣ်လီၤ.

¹⁷လၢမုၢ်ဆ့ၣ်ထီၣ်ဂီၤဂီၤန့ၣ်, စီၤဒၤဝံးဒုးအဝဲသ့ၣ်တုၤလၢ မုၢ်ဟါလီၤတစုန့ၣ်လီၤ. မ့တမ့ၢ်ဘၣ်လၢပှၤသးစၢ်အဂၤလွံၢ်ကယၤဒိးထီၣ်ကီၤလၤအူးဒီး ဃ့ၢ်ကွံာ်အဃိန့ၣ်ပှၤပူၤဖျဲးတအိၣ်ဘၣ်နီတဂၤဘၣ်.

¹⁸စီၤဒၤဝံးမၤပူၤမၤဖျဲးက့ၤပှၤကိးဂၤဒဲးဒီးတၢ်ကိးမံၤဒဲးလၢ ပှၤဧမၤလ့းဖိတဖၣ်စိာ်ကွံာ်ဝဲ, ဃုာ်ဒီးအမါခံဂၤန့ၣ်လီၤ.

¹⁹တၢ်လီၤမၢ်တအိၣ်ဘၣ်နီတမံၤဘၣ်. စီၤဒၤဝံးမၤန့ၢ်က့ၤကယဲၢ်အပှၤတဖၣ်အဖိခွါအဖိမုၣ်တဖၣ်ခဲလၢာ် ဒီးကယဲၢ်တၢ်လၢပှၤဧမၤလ့းဖိဂုာ်ဆူၣ် ပျိဆူၣ်တ့ၢ်ဝဲတဖၣ်န့ၣ်လီၤ.

²⁰အဝဲမၤန့ၢ်ကဒါက့ၤစ့ၢ်ကီး, သိအဖုတဖၣ်, ဂီၤဘုၣ်ဂီၤဖံးတဖၣ်လီၤ. အပှၤတဖၣ်နီၣ်ထီၣ်ဆၣ်ဖိကီၢ်ဖိအဒၢတဖၣ်လၢအဝဲသ့ၣ်အမဲာ်ညါဒီးစံးဝဲ, “အဝဲအံၤဘၣ်ဃးဒီးစီၤဒၤဝံးလီၤ.”

²¹အန့ၣ်ဝံၤဒီး, စီၤဒၤဝံးက့ၤကဒါက့ၤဆူပှၤအဂၤခံကယၤလၢ အဂံၢ်အဘါစၢ်ဒိၣ်မးလၢအကလဲၤပိာ်အခံအဂီၢ်အဃိ, အိၣ်လီၤတဲာ်လၢထံကျိဖိအကၢၢ်ခိၣ်တဖၣ်အအိၣ်န့ၣ်လီၤ. အဝဲသ့ၣ်ဟဲထီၣ်ဆူညါဒ်သိးကသဂၢၢ်စီၤဒၤဝံးဒီးအပှၤတဖၣ်ဒီး စီၤဒၤဝံးလဲၤဆူအဝဲသ့ၣ်အအိၣ်ဒီးဆၢဂ့ၤဆၢဝါအဝဲသ့ၣ် ပှဲၤဒီးတၢ်သူၣ်အိၣ်သးအိၣ်န့ၣ်လီၤ.

²²ဘၣ်ဆၣ်ဒီးပှၤအအၢအသီဒီးပှၤအလုၢ်အပှ့ၤတအိၣ်တဖၣ် လၢအလဲၤပိာ်တ့ၢ်စီၤဒၤဝံးအခံန့ၣ်စံးဝဲ, “အဝဲသ့ၣ်တလဲၤဃုာ်ဒီးပှၤဘၣ်. အဃိဒီးပတဟ့ၣ်အဝဲသ့ၣ်တၢ်ဂုာ်ဆူၣ်ပျိဆူၣ်တဖၣ်လၢပဒိးန့ၢ်အီၤန့ၣ်ဘၣ်. အဝဲသ့ၣ်ဟံးန့ၢ်က့ၤအဖိအမါတဖၣ်ဒီးဟးထီၣ်ကွံာ်ဝဲသ့လီၤ.”

²³ဘၣ်ဆၣ်ဒီးစီၤဒၤဝံးစံးဝဲဒၣ်, “ယဒီပုၢ်ဝဲၢ်သ့ၣ်ဧၢ, တၢ်လၢယွၤဟ့ၣ်ပှၤန့ၣ်သုမၤအီၤဒ်အံၤတသ့ဘၣ်. အဝဲကဟုဘံၣ်ကယာ်ဘၢပှၤဒီးဟ့ၣ်ပှၤတၢ်မၤနၢၤလၢ ပှၤဂုာ်ဆူၣ်ပျိဆူၣ်တၢ်တဖၣ်အဖီခိၣ်လီၤ.

²⁴တၢ်လၢသုစံးတ့ၢ်တဖၣ်န့ၣ်ပှၤဘၣ်သူၣ်ဘၣ်သးတသ့နီတဂၤဘၣ်. ပှၤကိးဂၤဒဲးကဘၣ်ဒိးန့ၢ်အတၢ်နီၤဖးဒ်သိးသိးလီၤ. ပှၤတဂၤလၢ်လၢ်လၢအိၣ်လီၤတဲာ်ဃုာ်ဒီးတၢ်အီၣ်တၢ်အီ, တဖၣ်န့ၣ်, ကဘၣ်မၤန့ၢ်တၢ်ဒ်သိးသိးဒီးပှၤလၢအလဲၤဆူ တၢ်ဒုးတၢ်ယၤအပူၤတဖၣ်န့ၣ်လီၤ.”

²⁵စီၤဒၤဝံးဒုးကဲထီၣ်တၢ်အံၤလၢတၢ်သိၣ်တၢ်ဘျၢတခါ, ဒီးတၢ်န့ၣ်ဘၣ်တၢ်မၤထွဲအီၤလၢကီၢ်အံၣ်စရ့လးအပူၤ စးထီၣ်ဖဲတနံၤန့ၣ်လံၤလံၤလီၤ.

²⁶ဖဲစီၤဒၤဝံးဟဲက့ၤဆူဝ့ၢ်စံကလးန့ၣ်အဝဲဆှၢလီၤ, တၢ်ဂုာ်န့ၢ်တနီၤဆူအတံၤသကိးပှၤခိၣ်ပှၤနၢ်တဖၣ်လၢကီၢ်ယူဒၤ အအိၣ်ဃုာ်ဒီးတၢ်ကစီၣ်စံးဝဲ, “အအံၤမ့ၢ်တၢ်ဟ့ၣ်တမံၤလၢသုဂီၢ်လၢပဟဲက့ၤစိာ်အီၤလၢ ယွၤအဒုၣ်အဒါတဖၣ်အအိၣ်န့ၣ်လီၤ.”

²⁷အဝဲဆှၢလီၤတၢ်န့ၣ်ဆူပှၤဂီၢ်မုၢ်အိၣ်လၢဝ့ၢ်ဘ့ၤသ့လး, ဆူပှၤဂီၢ်မုၢ်လၢဝ့ၢ်ရၤမါ, ဆူပှၤဂီၢ်မုၢ်လၢအအိၣ်လၢကီၢ်ယူဒၤအကလံၤထံးတခီ, ဒီးဆူပှၤဂီၢ်မုၢ်လၢကီၢ်ယးတံၢ်အဝ့ၢ်တဖၣ်အပူၤ,

²⁸လၢအမ့ၢ်ဝ့ၢ်ဧရိၤဧ့ၢ်, ဝ့ၢ်စံးဖမိးဒီးဝ့ၢ်လအ့ၡကမိး

²⁹ဒီးဝ့ၢ်ရၤဃ့လးအအိၣ်, ဒီးဆူစီၤယရၤဃမအ့လးအဒူၣ်, ဒီးဆူပှၤဂီၢ်မုၢ်လၢဝ့ၢ်က့ၣ်,

³⁰ဒီးဆူပှၤဂီၢ်မုၢ်လၢဝ့ၢ်ဃိၢ်မါ, ဒီးဆူဝ့ၢ်ဘီၣ်ရၤၡၣ်ဒီး ဝ့ၢ်ဧၤသး,

³¹ဒီးဆူဝ့ၢ်ဃ့ဘြိၣ်လီၤ. အဝဲဆှၢလီၤတၢ်န့ၣ်ဆူကယဲၢ်တၢ်လီၢ်ကိးပူၤဒဲးဖဲအဝဲဒီးအတံၤသကိးတဖၣ်လဲၤဟးညီနူၢ်တ့ၢ်ဝဲ န့ၣ်လီၤ.