Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 6 Bible Online

လံာ်စီၤၡမူၤအ့လးအခီၣ်ထံးတဘ့ၣ် 6 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 6

¹ဖဲယွၤအတၢ်အၢၣ်လီၤအီလီၤအတလါစီဆှံအိၣ်လၢ ကီၢ်ဖလ့ၡသးအပူၤနွံလါဝံၤအလီၢ်ခံန့ၣ်,

²ပှၤဂီၢ်မုၢ်ကိးထီၣ်ပှၤလုၢ်တၢ်အခိၣ်တဖၣ်ဒီးပှၤမၤကဒါမဲာ်တဖၣ် ဒီးသံကွၢ်ဝဲ, “မ့ၢ်ပကဘၣ်မၤယွၤအတၢ်အၢၣ်လီၤအီလီအတလါဒ်လဲၣ်. ပမ့ၢ်ဆှၢကဒါက့ၤအီၤဆူတၢ်ဘၣ်ဃးဒီးအီၤအလီၢ်န့ၣ် ပကဘၣ်ဆှၢအီၤလၢတၢ်မနုၤတမံၤလဲၣ်.”

³အဝဲသ့ၣ်စံးဆၢဝဲဒၣ်, “သုမ့ၢ်ဆှၢက့ၤကီၢ်အံၣ်စရ့လးအကစၢ် ယွၤအတလါစီဆှံဒီးအလီၢ်အိၣ်ဝဲလၢသုကဘၣ်ဟ့ၣ်ဃုာ်ဒီး တၢ်ဟ့ၣ်ကနၢၤတမံၤဆူအအိၣ်သပှၢ်ကတၢၢ်လၢ တၢ်လိးက့ၤသုတၢ်ဒဲးဘးအဂီၢ် လီၤ. ယွၤအတၢ်အၢၣ်လီၤအီလီၤအတလါစီဆှံန့ၣ်တၢ်ဟ့ၣ်ကနၢၤမ့ၢ် တအိၣ်နီတမံၤဒီး တဘၣ်က့ၤကဒါက့ၤဝဲဘၣ်. လၢကျဲဒ်အံၤန့ၣ်သု ကဘၣ်တၢ်မၤဘျါက့ၤသုဒီးသုကနၢ်ပၢၢ်လၢဘၣ်မနုၤအဃိအဝဲစံၣ်ညီၣ် သုတဘိယူာ်ဃီလဲၣ်အဂ့ၢ်န့ၣ်လီၤ.”

⁴ပှၤဂီၢ်မုၢ်သံကွၢ်ဝဲ, “ပကဘၣ်ဆှၢလီၤတၢ်ဟ့ၣ်ကနၢၤမနုၤလဲၣ်.” ဒီးအဝဲသ့ၣ်စံးဆၢဝဲဒၣ်, “တၢ်အချံထီၣ်ဒီးညိးအဂီၤသိအသး လၢထူယဲၢ်ခါဒီးယုၢ်ဖိသိအသးလၢထူအဂီၤယဲၢ်ဒု, တခါစုာ်စုာ်န့ၣ်လၢပှၤဖလ့ၡသးဖိအစီၤပၤတဂၤစုာ်စုာ်အဂီၢ်လီၤ. တၢ်ဆါသံသတြိာ်တမံၤဃီန့ၣ်ဘၣ်တၢ်ဒုးလီၤဘၣ်အီၤလၢစီၤပၤ ယဲၢ်ဂၤအလိၤလီၤ.

⁵သုကဘၣ်မၤတၢ်ဂီၤသိအသးတၢ်အချံထီၣ်ဒီးညိးဒီးယုၢ်ဖိ လၢအမၤဟးဂီၤသုကီၢ်ဒီးသုကဘၣ်ဟ့ၣ်တၢ်လၤကပီၤဆူ ကီၢ်အံၣ်စရ့လးအကစၢ်ယွၤအအိၣ်န့ၣ်လီၤ. ဘၣ်သ့ၣ်သ့ၣ်အဝဲကဆိကတီၢ်တၢ်စံၣ်ညီၣ်သု, သုကစၢ်တဖၣ်ဒီးသုကီၢ်လီၤ.

⁶သုဘၣ်မၤကိၤသုခိၣ်ဒ်ကီၢ်အဲၤကူပတူးအစီၤပၤဒီးပှၤအဲၤကူပတူးဖိတဖၣ်အသိးန့ၣ် ဘၣ်မနုၤလဲၣ်. ကစၢ်ယွၤမၤပျုၢ်တ့ၢ်အဝဲ သ့ၣ်တုၤဒၣ်လဲာ်အဝဲသ့ၣ်ပျဲပှၤအံၣ်စရ့လးဖိတဖၣ်ဟးထီၣ်ကွံာ် လၢကီၢ်အဲၤကူပတူးဒ်လဲၣ်န့ၣ်သးပ့ၤနီၣ်တဂ့ၤ.

⁷မၤသးဒ်န့ၣ်ဒီး, ကတဲာ်ကတီၤလ့ၣ်ကဟၣ်အသီတဆိဒီးဂီၤဖံးမိၢ်လၢ တၢ်တပာ်ထီၣ်ဘၣ်နီၣ်ယိးဘိလၢအဖီခိၣ်နီတစုဘၣ်ခံဒုတက့ၢ်. စၢတံၢ်အီၤလၢလ့ၣ်ကဟၣ်ဒီးနီၣ်က့ၤအဖိသးစၢ်တဖၣ်ဆူဘုဖီအိၣ်တက့ၢ်.

⁸ဟံးန့ၢ်ယွၤအတၢ်အၢၣ်လီၤအီလီၤအတလါ, ပာ်ထီၣ်အီၤလၢလ့ၣ်ကဟၣ်ဖီခိၣ်ဒီး လၢအကပၤန့ၣ်ပာ်တလါတဖျၢၣ်လၢတၢ်ဒၢနုာ်တၢ်ဂီၤသိအသးလၢထူတဖၣ် လၢနကဆှၢလီၤဒ်တၢ်ဟ့ၣ်ကနၢၤတမံၤအသိးဆူအအိၣ် လၢတၢ်လိးက့ၤသုတၢ်ဒဲးဘးတဖၣ်အဂီၢ်တက့ၢ်. နီၣ်ထီၣ်လ့ၣ်ကဟၣ်န့ၣ်လၢကျဲဖီခိၣ်ဝံၤဒီးပျဲအလဲၤဒၣ်တၢ်တက့ၢ်.

⁹တုၤနုၤတစုကွၢ်ထွဲအတၢ်လဲၤတက့ၢ်. ဒီးမ့ၢ်လဲၤတၢ်လိၤလိၤဆူ ဝ့ၢ်ဘ့ၤသၡ့မ့ၣ်န့ၣ်, တၢ်အံၤအခီပညီမ့ၢ်ဝဲကီၢ်အံၣ်စရ့လးအကစၢ်ယွၤဆှၢလီၤတၢ်နးတၢ်ဖှီၣ်အၢအၢသီသီလၢပဖီခိၣ်လီၤ. ဘၣ်ဆၣ်ဒီးမ့တမ့ၢ်ဒ်န့ၣ်ဘၣ်န့ၣ်, ပကသ့ၣ်ညါလၢအဝဲတဆှၢလီၤတၢ်သံသတြိာ်ဘၣ်. မ့ၢ်ဒၣ်တၢ်ဘၣ်ဆၢၣ်ဘၣ်တီၤတမံၤန့ၣ်လီၤ.”

¹⁰အဝဲသ့ၣ်မၤဝဲဒ်တၢ်စံးဘၣ်တဲဘၣ်တ့ၢ်အီၤအသိးန့ၣ်လီၤ. အဝဲသ့ၣ်ဟံးန့ၢ်ဂီၤဖံးမိၢ်ခံဒုဒီးစၢထီၣ်အီၤလၢလ့ၣ်ကဟၣ် ဒီးကးတံာ်ဂီၤဖံးသးစၢ်ဖိတဖၣ်လၢဘုဖီပူၤန့ၣ်လီၤ.

¹¹အဝဲသ့ၣ်ပာ်ထီၣ်တၢ်အၢၣ်လီၤအီလီၤအတလါစီဆှံလၢလ့ၣ်ကဟၣ်အပူၤ ဃုာ်ဒီးတလါလၢတၢ်ဒၢနုာ်တၢ်ဂီၤသိအသးလၢထူတဖၣ်, ယုၢ်ဖိဒီးတၢ်ချံညိးထီၣ်တဖၣ်န့ၣ်လီၤ.

¹²ဂီၤဖံးမိၢ်တဖၣ်စးထီၣ်လဲၤတၢ်လၢကျဲမုၢ်ခိၣ်ဆူဝ့ၢ်ဘ့ၤသၡ့ မ့ၣ်ဒီးလဲၤလိၤလိၤဆူန့ၣ်လီၤ. ဒီးတလဲၤလီၤဆူကျဲကပၤဘၣ်. ဖဲအလဲၤတၢ်လၢကျဲမုၢ်ခိၣ်အလိၤန့ၣ်အဝဲသ့ၣ်ကိးတၢ်ဒီးလဲၤဝဲလီၤ. ပှၤဖလ့ၡသးဖိအစီၤပၤယဲၢ်ဂၤပိာ်ထွဲလ့ၣ်ကဟၣ်အခံ တုၤလၢဝ့ၢ်ဘ့ၤသၡ့မ့ၣ်အဆၢန့ၣ်လီၤ.

¹³ဝ့ၢ်ဘ့ၤသၡ့မ့ၣ်အပှၤဂီၢ်မုၢ်တဖၣ်ကူးက့ၤဘုကၠူၣ်လၢတၢ်တြီၤအပျီပူၤဒီးသတူၢ်ကလာ်ဖဲအကွၢ်ထီၣ်တၢ် ဒီးထံၣ်ဘၣ်ဝဲတၢ်အၢၣ်လီၤအီလီၤအတလါစီဆှံန့ၣ်လီၤ. တုၤအဝဲသ့ၣ်ထံၣ်ဘၣ်ဝဲဒီးအသးခုဒိၣ်ဒိၣ်ကလဲာ်လီၤ.

¹⁴လ့ၣ်ကဟၣ်န့ၣ်ဟဲတုၤဆူပျီတပျီလၢအဘၣ်ဃးဒီးပှၤတဂၤလၢအမံၤ မ့ၢ်စီၤယိၤၡူလၢအအိၣ်လၢဝ့ၢ်ဘ့ၤသၡ့မ့ၣ်န့ၣ်, ဒီးလ့ၣ်န့ၣ်အိၣ်ကတီၢ်ဝဲဖဲလ့ဖးဒိၣ်တဖျၢၣ်အဃၢၤန့ၣ်လီၤ. ပှၤဂီၢ်မုၢ်ကျီလီၤကလဲကွံာ်လ့ၣ်လၢတၢ်ဘှီအီၤဒီးသ့ၣ်ဒီးမၤသံ ဂီၤဖံးမိၢ်တဖၣ်ဒီးဆူးကဲၤထီၣ်အီၤဒ်တၢ်လုၢ်မ့ၣ်အူတမံၤ ဆူယွၤအအိၣ်န့ၣ်လီၤ.

¹⁵ပှၤလ့ၤဝံဖိတဖၣ်စိာ်ထီၣ်ယွၤအတၢ်အၢၣ်လီၤအီလီၤအတလါစီဆှံ ဃုာ်ဒီးတၢ်ဂီၤသိအသးလၢထူတဖၣ်အတလါဒီး ပာ်ထီၣ်အီၤလၢလ့ဖးဒိၣ်န့ၣ်အဖီခိၣ်လီၤ. ဝံၤဒီးဝ့ၢ်ဘ့ၤသၡ့မ့ၣ်အပှၤဂီၢ်မုၢ် လုၢ်ထီၣ်တၢ်လုၢ်မ့ၣ်အူတဖၣ်ဒီး တၢ်လုၢ်တၢ်ပာ်အဂၤတဖၣ်ဆူယွၤ အအိၣ်န့ၣ်လီၤ.

¹⁶ပှၤဖလ့ၡသးဖိအစီၤပၤယဲၢ်ဂၤကွၢ်အဝဲသ့ၣ်မၤတၢ်အံၤဝံၤဒီး က့ၤကဒါက့ၤဝဲဆူဝ့ၢ်ဧ့ကြိၣ်တနံၤဃီန့ၣ်လီၤ.

¹⁷ပှၤဖလ့ၡသးဖိတဖၣ်ဆှၢလီၤတၢ်အချံထီၣ်ဒီးညိးအဂီၤထူယဲၢ်ခါ ဆူယွၤအအိၣ်ဒ်တၢ်ဟ့ၣ်ကနၢၤအသိး လၢတၢ်လိးက့ၤတၢ်လၢအတၢ်ဒဲးဘးတဖၣ်အဂီၢ်, လၢဝ့ၢ်အၤစဒိး, ဝ့ၢ်ဂါစၤ, ဝ့ၢ်အၤၡကလိၣ်, ဝ့ၢ်ကၤသးဒီးဝ့ၢ်ဧ့ကြိၣ်အဂီၢ်တခါစုာ်စုာ်န့ၣ်လီၤ.

¹⁸အဝဲသ့ၣ်ဆှၢလီၤစ့ၢ်ကီးယုၢ်အဂီၤသိအသးလၢထူလၢဝ့ၢ်တဖၣ်လၢ အဘၣ်တၢ်ပၢအီၤလၢပှၤဖလ့ၡသးဖိအစီၤပၤယဲၢ်ဂၤအဂီၢ်, တဒုစုာ်စုာ်န့ၣ်, လၢဝ့ၢ်အိၣ်ဒီးအခိၣ်ဒူတဖၣ်အဂီၢ်ဒီးဒူသဝီ လၢတအိၣ်ဒီးအခိၣ်ဒူတဖၣ်အဂီၢ်စ့ၢ်ကီးလီၤ. လ့ဖးဒိၣ်လၢအအိၣ်လၢစီၤယိၤၡူအစံာ်ပျီပူၤလၢဝ့ၢ်ဘ့ၤသၡ့မ့ၣ်, လၢတၢ်ပာ်ထီၣ်ယွၤအတၢ်အၢၣ်လီၤအီလီၤအတလါန့ၣ်အိၣ်ဒံးဝဲဖဲန့ၣ် ဒ်တၢ်အုၣ်အသးတမံၤလၢတၢ်မၤတ့ၢ်အသးအဂီၢ်န့ၣ်လီၤ.

¹⁹ယွၤမၤသံတ့ၢ်ပှၤအဂၤနွံဆံလၢဝ့ၢ်ဘ့ၤသၡ့မ့ၣ်အပူၤလီၤ. အဂ့ၢ်ဒ်အံၤ, အဝဲသ့ၣ်အိးထီၣ်ကွၢ်နုာ်ဝဲဒၣ်ဆူတၢ်အၢၣ်လီၤအီ လီၤအတလါစီဆှံအပူၤအဃိလီၤ. ဒီးပှၤဂီၢ်မုၢ်ဟီၣ်ဝဲယၢၤဝဲလၢယွၤဒုးအိၣ်ထီၣ် တၢ်မၤသံမၤဝီလၢအဝဲသ့ၣ်အကျါဒ်န့ၣ်အဃိလီၤ.

²⁰မၤသးဒ်န့ၣ်ဒီး, ပှၤဝ့ၢ်ဘ့ၤသၡ့မ့ၣ်ဖိတဖၣ်စံးဝဲ, “မ့ၢ်မတၤဆၢထၢၣ်လၢယွၤ, ကစၢ်ယွၤလၢအစီဆှံ တဂၤအံၤအမဲာ်ညါသ့ဝဲန့ၣ်လဲၣ်. လၢတၢ်သုးကွံာ်အီၤလၢပအိၣ်အဂီၢ် မ့ၢ်ပကဆှၢအီၤဆူတၢ်လီၢ်မတၤလဲၣ်.”

²¹အဝဲသ့ၣ်ဆှၢလီၤပှၤစိာ်တၢ်ကစီၣ်တဖၣ် ဆူပှၤဂီၢ်မုၢ်အိၣ်လၢဝ့ၢ်ကံးရယးယဧၤရံၣ်အပူၤလၢအကစံးဝဲ, “ပှၤဖလ့ၡသးဖိတဖၣ်ဆှၢကဒါက့ၤ ယွၤအတၢ်အၢၣ်လီၤအီလီၤအတလါစီဆှံလံ. ဟဲဒီးဟံးန့ၢ်အီၤတက့ၢ်.”