Read S'gaw Karen လံာ်စီၤၡမူၤအ့လးအခီၣ်ထံးတဘ့ၣ် 7 Bible Online

လံာ်စီၤၡမူၤအ့လးအခီၣ်ထံးတဘ့ၣ် 7 - S'gaw Karen bible

လံာ်စီၤၡမူၤအ့လးအခီၣ်ထံးတဘ့ၣ် 7

¹မၤသးဒ်န့ၣ်ဒီး, ပှၤဂီၢ်မုၢ်လၢဝ့ၢ်ကံးရယးယဧၤရံၣ်မၤန့ၢ်ယွၤ အတၢ်အၢၣ်လီၤအီလီၤအတလါစီဆှံ ဒီးလဲၤစိာ်ဝဲဆူပှၤတဂၤလၢ အမံၤမ့ၢ်စီၤအဘံနဒာ် အဟံၣ်လၢအအိၣ်လၢကစၢၢ်ကလိတဖျၢၣ်အဖီခိၣ်န့ၣ်လီၤ. အဝဲသ့ၣ်ပာ်စီဆှံထီၣ်စီၤအဘံနဒာ်အဖိခွါစီၤအလၤဧၤစၢ်လၢ အကကဲထီၣ်ပှၤအံးထွဲကွၢ်ထွဲတလါစီဆှံန့ၣ်လီၤ.

²ယွၤအတၢ်အၢၣ်လီၤအီလီၤအတလါစီဆှံအိၣ်ဝဲလၢဝ့ၢ်ကံးရယးယဧၤ ရံၣ်ဖးယံာ်ညါတုၤလၢအနံၣ်ခံဆံန့ၣ်လီၤ. လၢအကတီၢ်ဖဲအံၤအပူၤအတ့ၤန့ၣ်ပှၤအံၣ်စရ့လးဖိတဖၣ် ကိးပသူထီၣ်ဆူယွၤအအိၣ်လၢတၢ်မၤစၢၤအဂီၢ်လီၤ.

³စီၤၡမူၤအ့လးစံးဘၣ်ပှၤဂီၢ်မုၢ်, “သုမ့ၢ်ဃၣ်က့ၤသုသးဆူ ယွၤအအိၣ်လၢသူၣ်လၢသးဒီဖျၢၣ်ညါန့ၣ် သုကဘၣ်တၢၤကွံာ်ကယဲၢ်ပှၤ တခီဘီမုၢ်ဖိအကစၢ်တဖၣ်ဒီးကစၢ်မုၣ်ဧၤၡတြိးအဂီၤတဖၣ်လီၤ. ပာ်စီဆှံထီၣ်သုသးလၢာ်လၢာ်ဆ့ဆ့ဆူယွၤအအိၣ်ဒီး ဘူၣ်ထီၣ်ဘါထီၣ်ထဲအဝဲတဂၤဧိၤန့ၣ်တက့ၢ်. ဒီးအဝဲကအုၣ်က့ၤခီၣ်က့ၤသုလၢပှၤဖလ့ၡသးဖိတဖၣ်အစိကမီၤအ ဖီလာ်လီၤ.”

⁴မၤသးဒ်န့ၣ်ဒီး, ပှၤအံၣ်စရ့လးဖိတဖၣ်တၢၤကွံာ်ဘဧၤလးဒီးဧၤၡတြိးအတၢ်ဂီၤတၢ်ဖီၣ်စိးပျၤအသးတဖၣ်ဒီးဘူၣ်ထီၣ်ဘါထီၣ်ထဲ ယွၤတဂၤဧိၤန့ၣ်လီၤ.

⁵တုၤနုၤတစုစီၤၡမူၤအ့လးမၤလိာ်ကယဲၢ်ပှၤအံၣ်စရ့လးဖိတဖၣ် လၢကထံၣ်လိာ်သးဖဲဝ့ၢ်မံးစပၤန့ၣ်, ဒီးစံးဘၣ်အဝဲသ့ၣ်, “ယကဘါထုကဖၣ်တၢ်ဆူယွၤအအိၣ်လၢသုဂီၢ်ဖဲန့ၣ်လီၤ.”

⁶လၢတၢ်န့ၣ်အဃိအဝဲသ့ၣ်ပာ်ဖှိၣ်ထီၣ်အသးဖဲဝ့ၢ်မံးစပၤလီၤ. အဝဲသ့ၣ်ဒၢၣ်န့ၢ်ထံတနီၤဒီးလူလီၤအီၤဒ်တၢ်လုၢ်မၤဘူၣ်တမံၤ ဆူယွၤအအိၣ်ဒီးဒုၣ်တၢ်အီၣ်သ့တနံၤကျၢၤလီၤ. အဝဲသ့ၣ်စံး, “ပမၤတ့ၢ်တၢ်ဒဲးဘးထီဒါယွၤလီၤ.” (ဝ့ၢ်မံးစပၤန့ၣ်မ့ၢ်တၢ်လီၢ်လၢစီၤၡမူၤအ့လးမၤလိၤမၤဘၣ် တၢ်ဂ့ၢ်လိာ်ဘှီလိာ်တဖၣ်လၢပှၤအံၣ်စရ့လးဖိတဖၣ်အဘၢၣ်စၢၤန့ၣ်လီၤ.)

⁷ဖဲပှၤဖလ့ၡသးဖိတဖၣ်နၢ်ဟူလၢ ပှၤအံၣ်စရ့လးဖိတဖၣ်ပာ်ဖှိၣ်ထီၣ်အသးလၢဝ့ၢ်မံးစပၤန့ၣ်, ပှၤဖလ့ၡသးဖိအစီၤပၤယဲၢ်ဂၤစးထီၣ်ပာ်ဖှိၣ်အသးဒီးအပှၤတဖၣ် ဒ်သိးအကဒုးအဝဲသ့ၣ်အဂီၢ်န့ၣ်လီၤ. ပှၤအံၣ်စရ့လးဖိတဖၣ်နၢ်ဟူတၢ်ဂ့ၢ်န့ၣ်ဒီးပျံၤတၢ်ဖုးတၢ်လီၤ.

⁸ဒီးအဝဲသ့ၣ်စံးဘၣ်စီၤၡမူၤအ့လး, “ဘါထုကဖၣ်တၢ်တထံၣ်ဃီဆူကစၢ်ယွၤ အအိၣ်လၢအကအုၣ်က့ၤခီၣ်က့ၤပှၤလၢပှၤဖလ့ၡသးဖိအစုပူၤတက့ၢ်.”

⁹စီၤၡမူၤအ့လးမၤသံသိဖိတဒုဒီးဆူးကဲၤထီၣ်အီၤဒီဒု ဒ်တၢ်လုၢ်တၢ်ပာ်တမံၤဆူယွၤအအိၣ်လီၤ. အန့ၣ်ဝံၤဒီးအဝဲဘါထုကဖၣ်တၢ်ဆူယွၤအအိၣ်ဒ်သိးအကမၤစၢၤကီၢ်အံၣ်စရ့လး, ဒီးယွၤစံးဆၢအဝဲအတၢ်ထုကဖၣ်လီၤ.

¹⁰ဖဲစီၤၡမူၤအ့လးလုၢ်ထီၣ်တၢ်လုၢ်မၤဘူၣ်ဆူယွၤအအိၣ်အခါန့ၣ်, ပှၤဖလ့ၡသးဖိတဖၣ်ဟဲထီၣ်ဆူညါလၢကဒုးတၢ်အဂီၢ်လီၤ. ဖဲန့ၣ်တကီၢ်ခါယွၤမၤလီသီၣ်လီသဲထီဒါအဝဲသ့ၣ်လီၤ. အဝဲသ့ၣ်အသးကဒံကဒါကွံာ်ဝဲလၢာ်လၢာ်ဆ့ဆ့ဒီးဃ့ၢ်ကွံာ်လၢ တၢ်ပျံၤတၢ်ဖုးဖးဒိၣ်အပူၤလီၤ.

¹¹ပှၤအံၣ်စရ့လးဖိတဖၣ်ဟးထီၣ်လၢဝ့ၢ်မံးစပၤဒီးလူၤဃီၤပှၤဖလ့ၡသးဖိတဖၣ် တုၤလၢဝ့ၢ်ဘ့ၤသကၢ်ဒီးမၤသံကွံာ်အဝဲသ့ၣ်လၢ ကျဲဒီဘိညါန့ၣ်လီၤ.

¹²အန့ၣ်တစုစီၤၡမူအ့လးဟံးန့ၢ်လၢၢ်တဖျၢၣ်ဒီးပာ်လီၤအီၤဖဲ ဝ့ၢ်မံးစပၤဒီးဝ့ၢ်ၡ့ၣ်အဘၢၣ်စၢၤဒီးစံးဝဲ, “ယွၤမၤစၢၤတ့ၢ်ပှၤကျဲဒီဘိညါလီၤ.” ဒီးယုၢ်ဝဲအမံၤလၢ “အ့ဘ့ၤန့စၢ်” လီၤ.

¹³မၤသးဒ်န့ၣ်ဒီး, ပှၤဖလ့ၡသးဖိတဖၣ်ဘၣ်တၢ်မၤနၢၤကွံာ်အီၤဒီး ယွၤတြီဃာ်အဝဲသ့ၣ်လၢတၢ်နုာ်လီၤဒုးကီၢ်အံၣ်စရ့လးအလီၢ် ကဝီၤန့ၣ်တစိၤဒၣ်စီၤၡမူအ့လးအိၣ်မူဝဲအဖၢမုၢ်န့ၣ်လီၤ.

¹⁴ဝ့ၢ်ကိးဝ့ၢ်ဒဲးလၢပှၤဖလ့ၡသးဖိတဖၣ်ဒုးန့ၢ်တ့ၢ်ဝဲလၢဝ့ၢ် ဧ့ကြိၣ်ဒီးဝ့ၢ်ကၤသးအဘၢၣ်စၢၤတဖၣ်ဘၣ်တၢ်ဟ့ၣ်က့ၤအီၤဆူကီၢ် အံၣ်စရ့လး, ဒီးလၢတၢ်န့ၣ်အဃိကီၢ်အံၣ်စရ့လးမၤန့ၢ်က့ၤကယဲၢ်အထံအကီၢ်အလီၢ်အကျဲလီၤ. ဒီးတၢ်ဃူတၢ်ဖိးအိၣ်ဝဲစ့ၢ်ကီးလၢပှၤ အံၣ်စရ့လးဖိတဖၣ်ဒီးပှၤကနၤဧၣ်ဖိတဖၣ်အဘၢၣ်စၢၤန့ၣ်လီၤ.

¹⁵စီၤၡမူၤအ့လးပၢတ့ၢ်ကီၢ်အံၣ်စရ့လးယံာ်ဝဲလၢအသးသမူ ဒီစိၤညါန့ၣ်လီၤ.

¹⁶ကိးနံၣ်ဒဲးန့ၣ်အဝဲလဲၤဟးတရံးဝဲဆူဝ့ၢ်ဘ့ၤသ့လး, ဝ့ၢ်ကံးလကၤလးဒီးဝ့ၢ်မံၣ်စပၤလီၤ. ဒီးလၢတၢ်လီၢ်ကိးပူၤဒဲးအံၤန့ၣ် စီၤၡမူၤအ့လးမၤလိၤမၤဘၣ်တၢ်ဂ့ၢ်လိာ်ဘှီလိာ် တဖၣ်န့ၣ်လီၤ.

¹⁷အန့ၣ်ဝံၤဒီးအဝဲက့ၤကဒါက့ၤဝဲဆူအဟံၣ်လၢဝ့ၢ်ရၤမါအပူၤ, ဖဲအဝဲမၤစ့ၢ်ကီးတၢ်ဒ်ပှၤစံၣ်ညီၣ်ကွီၢ်အသိးန့ၣ်လီၤ. လၢဝ့ၢ်ရၤမါအပူၤန့ၣ်အဝဲသူၣ်ထီၣ်တၢ်လုၢ်လီၢ်တခါဆူယွၤအအိၣ်လီၤ.