Read САҤА КЭС ТЫЛ 2-е Фессалоникийцам 1 Bible Online

2-е Фессалоникийцам 1 - САҤА КЭС ТЫЛ bible

2-е Фессалоникийцам 1

¹Аҕа Таҥарабытын уонна Айыы Тойон Иисус Христоһу итэҕэйээччилэр Фессалоникатааҕы церковтарыгар – Павелтан, Силуантан уонна Тимофейтан.

²Эһиэхэ Аҕа Таҥарабытыттан уонна Айыы Тойон Иисус Христостан бары илгэлээх үтүөнү кытта эйэ-ил тосхойо туруохтун!

³Бырааттарбыт, эһиги итэҕэлгит үүнэн, хас биирдиигит бэйэ-бэйэҕитигэр таптала күүһүрэн иһэрин иһин, биһиги кырдьыгы көрөр дьон сиэринэн өрүү Таҥараҕа махтана сылдьыахтаахпыт.

⁴Дьэ ол иһин биһиги Таҥара церковтарыгар эһиги хайдах тулуурдааххытын, хайдах бары сойуолааһыны, эрэйи-муҥу уйан туран итэҕэйэргитин киэн туттан кэпсиибит.

⁵Ити барыта Таҥара Дьүүлэ кырдьыктааҕын эрэ көрдөрөр: эһиги эрэйи-муҥу көрөр дьон Таҥара Саарыстыбатыгар киирэргэ сөптөөх буолан тахсыаххыт.

⁶Кырдьыктаах Таҥара атаҕастааччыларга эрэйинэн-муҥунан төлүөҕэ,

⁷оттон эһигини, атаҕастаммыттары, биһигини кытта бииргэ сынньатыаҕа. Бу барыта Айыы Тойон Иисус Халлаантан күүстээх Аанньалларын кытта кэлэн,

⁸Таҥараны билбэттэри уонна Айыы Тойоммут Иисус Христос Евангелиетыгар бас бэриммэттэри суостаах уот ортотугар иэстиирин саҕана, буолуоҕа.

⁹Оччоҕо кинилэр бүтэһиктээх өлүүнэн накаастананнар, Айыы Тойонтон, Кини килбиэннээх күүһүттэн букатыннаахтыы тэйитиллиэхтэрэ.

¹⁰Бу Кини Бэйэтин сибэтиэйдэригэр [#468] албан аатыраары, бары Кинини итэҕэйээччилэргэ чиэстэнээри кэлбит күнүгэр буолуоҕа; эһиги эмиэ, биһиги туоһулаабыппытын итэҕэйбит дьон, кинилэри кытта бииргэ буолуоххут.

¹¹Ол иһин биһиги өрүү эһиги тускутугар үҥэбит, эһигини Бэйэтин ыҥырыытыгар толору эппиэттиир дьоһун олохтоох дьон оҥорорун, Бэйэтин сүдү күүһүнэн бары үтүө баҕаҕытын толорон, итэҕэлгит дьыалатын ситэрэрин туһугар, Таҥарабытыттан көрдөһөбүт.

¹²Оччоҕо Таҥарабыт уонна Айыы Тойоммут Иисус Христос илгэлээх үтүөлэринэн, эһиги Айыы Тойоммут Иисус Христоһу албан аатырдыаххыт, бэйэҕит эмиэ Кини албан аатын үллэстиэххит.