Read Sharanahua Marcos 13 Bible Online

Marcos 13 - Sharanahua bible

Marcos 13

¹Ascano Jesús Dios fu tsainti pushu murannoashu caiton afu rafumisifo futsan yoini, —Ifon, oinpon. Nocon Dios fu tsainti pushu fasi sharashtacoin. Toquiri cunu putsamuashu cunuacua uhuapacoin fasi sharashtaran, —ishon yoiaiton.

²—¡Ai! ¡Oincapon! Natian Dios fu tsainti pushu toquiri putsamuashu cunuacua sharashtacoin. Ascafiashu na man oiain chipo paon ishquin. Afanancai toquirifo putsamua ishquima. Ratoshtacain putsamua tushuimaran, —ishon Jesús ato yoini. Jesús oti chaima ahuarafo ahuuscarashquiai cuscan ato yoini

³Ascano machi ahuun anu Olivo ano mapufaintan Jesús tsaoni nanno ishon Dios fu tsainti pushu ointiro ini. Tsoa futsacai ano inima Pedro non Santiago non Juan non Andrés non afo aqui funifo.

⁴—¿Nan min yoiai cuscan ahuutian ishquimun? ¿Ahuuscashomun non tapitiroquin? ¿Icataima non ahua ointiromun tapishquin? Noco tapimahuu, —huaifoan.

⁵—Oinfain mato paranonfoma.

⁶Yora ichapafoan. “Un Cristoran,” ishon mato parapaishcani. Ascashon ichapafori parashcani.

⁷Mani futsafo ya futsafo rutunainfoan man nicashquin. Icataimari anori man nicaiyoicai. Anori nicai ratuyamacahuun. Un mato yoimisi cuscan nanscacoin aiquin. Ascafia Jerusalén cuyoataima.

⁸Mai futsan fu yorafo mai futsari ya rutunainfono mai futsafo anori fasi mai naiyanaiyaishqui icaifono mai futsanoafori yora tushuomafo icaino. Nanscai taushcani. Ascafiashu chipo omitsiscai finacaishcani.

⁹Ascan itisharacahuun. Mato achishon mato niaifofoan maton ichananti pushu muranshon mato fasi coshashcaniquin. Niaifofoan aton ointaifi mato iquimashcani. Mato asca huacani. Uhuunshon man ato yoishquin.

¹⁰Ahuun unutani nan omitsiscacoinshquiai cuscan icataima uhuun tsain shara uhuunoa atirifiton nicataicanima. Uhuun tsain shara manifotiton nicacoiainfono un afanan ooshquin. Nantianri ua icoinra huaafo afanan omitsiscashquima.

¹¹Ascano chipo mato achimashquin matohuunoa tsain chaca yoishcaquin. Nantianri, “¿Raquiri non huaimun?” ishon shinanyamacahuun. Nan nocoaiton un mato tapimashquin man cumasharanon. Mafincai man cumaima. Diospan Yoshin Sharahuunshon ahuun tsain maton nomuran nanumashquin man niaifofo cayacafi cumasharanon.

¹²Nantianri iyoaton chipocuqui tsain chaca huashquin achinonfo rutushcaquin. Nanscarifi aqui chipocuton ahuun ochiqui tsain chaca huashquin achinonfo rutushcaquin. Nanscarifiai facufoan aton apa yafi ahua afanan nicacasmashcani niaifofo yoishcani ato rutunonfo.

¹³Uhuunshon mato noicasmacani man ua tanasharaiton, manifotifoan mato noicasmashcani. Ascashon mato omitsiscahuafiainfoanno tsoan uhuunoashu omitsiscafiaquin tunucoin uhuun tsain tanasharaqui unupacunacama. Nanfo un cushusharatiro uhuun Upa Dios icano nipasharanon.

¹⁴Ascacun Diosin ahuun yorafo fu imisi ano futsafoan ahuara fasi chaca huai. Nan un mato yoiai cuscan tapicahuun. Nanfo oin man ratoran futsa Judea mai anoashu machi ano ichotacahuun.

¹⁵Tsoan pushu osa futsa niashu afanan pushu muran iquiyotiroma ahuara fipai.

¹⁶Tsoan aton mau ano yonoi afanan pushu ano nasoyotiroma ahuun sahuuti fipai.

¹⁷¡Ohua! Ainfon facu nanuafo yafi aton facu yomumishtifo omitsiscaashcani.

¹⁸Natian yorafo omitsiscai cuscan tsoan ascara oinyomisima. Fasi finacaia yora omitsiscaiquin. Diosin yora tau huaquin onihuani chain cai tsoan ascaran omitsiscai oinyomisima. Tsoaricai afanan ascai omitsiscanacama. Ascan Upa Dios cuficahuun oipacutian ascanonma.

²⁰Nan omitsiscaifotian yorafoti cuyocuancani. Diosin yonoyamaino nan yorafoti cuyocuanafo. Ahuun yorafo nan catoanfo atohuun ramapaiqui omitsiscaitian shaturiscamashquin.

²¹Ua nicasharacahuun. Omitsiscashquiaitian nocoataima un mato yoiyoi. Man omitsiscaitian fuparapaimitsamisifocoin matoqui oshon. Mato yoitiro isca huaquin, “Unfin Cristoquin,” ishon yoiyamaraquin, “Unfin Diospan tsain yoimisiquin,” ishon mato yoishcani. Satanashuunshon yora atiroma cuscan mato ismai. Mato parapaishcaquin. Diosin nan catoanfo cushuyamaino atorifi nan fuparapaimitsamisifo icoinra huacuana. Ascano nantian tsoan mato yoiquin isca huai, “¡Oincapon! Naafin nocon Cristoquin. Cristo nocoqui oaran,” ishon yoiaifoan ato icoinra huayamacahuun. Jesús nan Diospan Furun afanan mai ano fotoshquin

²²Ascan nan omitsiscai cuyocoiainno fari faquishcoin ishquin oshuri faquishcoin icaino fishifo nai ariashu pacui futsushquin. Nantifi nai murannoafo naiyanaiyainqui futsushquin.

²⁶Nantianri un nai ariashu fuufoya camaqui mai ano fotoaino uhuun Upa Diosin ahuun yonohuunoashu un afanan matoqui fotoshquin. Nantififain ua oinshcani unfin Diospan facuquin. Un oaino fasi chashapacucahuanshquin.

²⁷Nantianri uhuun oinmatifo ufu nai muran icafo un nichishquin uhuun yorafo manifoti uqui ihuunonfo.

²⁸Ascatan nii ohuamisifohuunoa ahuara un mato tapimanon. Ua nicasharacahuun. Casho pui risquisi futsuaiton man tapitiro faritian.

²⁹Nanscarifiai nanfo un mato yoiai cuscain futsuaiton man onantiro mun oti chaima nuno mai anoa niaifocoin iishquin.

³⁰Un mato icon yoi. Ahuarafo un mato yoia cuscan a mai anoafoan naiyocashoma oinshcaniquin.

³¹Nocon nai yafi mai cuyoai cuscan fianananain futsuin. Uhuun tsain ascatamarocon cayacaficoin. Iconcoin. Uhuun tsain un mato yoiai cuscan nanscacoin aiquin. Fianannanpacunacama. Ahuutiaran Jesús afanan nai murannoashu mai ano fotoi tsoancai tapiama

³²Ascafia ahuutiaran un nai murannoashu afanan fotoicain tsoancai tapiama. Diosin oinmati afu nai muran icafoanricai tapiafoma. Urifi un Upa Diosin facufiashocai un tapiama. Nan uhuun Upa Diosin fustitofin tapiaquin.

³³Un afanan oaitian tsoan tapiama. Ascacufin oinfain. Itisharacahuun.

³⁴Shinancapon. Nocofunu mai futsa ari caquin iquisi ahuun oinmatifo yoitiro, “Un mato yoiai cuscan uhuun pushu cushusharacahuun. Yonosharacahuun. Futsan uhuun pushu anoshon cushutiro un afanan nasoaitian un oinnon,” ishon ato yoitiro.

³⁵Nanscarifiai marifi itisharacahuun. Ahuutiaran un afanan matoqui nasoshquin tsoan tapiama. Fari caino iyamarai yamu nacucahuanaino iyamarai tacaranun acaino iyamarai shafaino un nocoriscatiro.

³⁶Oinfain. Un nocoaitian oshacaquima ua yonosharashocahuun.

³⁷Un mato yoiai cuscan un nantifi yorafo yoi, “Itisharacahuun,” —ishon Jesús ato yoini.