Read Sharanahua Marcos 9 Bible Online

Marcos 9 - Sharanahua bible

Marcos 9

¹Afanan ato yoiquin isca huani, —Icon un mato yoinon. Man futsan nuno ufu niaton nayoshoma Diosin ahuamamishti atiro cuscan man oincain. A icano ahuu cuscaramainquin man oincain, —ishon ato Jesús yoini. Jesús ahuun yora mumacoin ahuun sahuutifoya fianananriscatanaino chashatani

²Asca huatan seis osha finontan Jesús Pedro non Santiago non Juanri machi cuya pochinin iyoni. Nanfo fusti nanno ini. Nannoashu aton ointaifi Jesús ahuun caya mumacoin sahuutifoya fianananriscatanaino ahuun sahuuti oshopacoin chashacoinni yoa rama furoamua ointsa iriscatani. Tsoacai sahuuti ya ascatiroma.

⁴Ascaino Moisés yafi Elías nitariscatan Jesús fu tsainnifo.

⁵Ascaiton Pedron yoini, —Tapimamisiton, nuno non isharatiro. Non pushu facu rafu non fusti mato huashotiro. Mina futsa non Moisésna futsa non Elisna futsa. Santiago futan Juanpan non mato ashotiroran, —ishon Pedron yoini.

⁶Raquirira huapaifiacani ratucoinnifo.

⁷Ascatanaino naicoin atoqui cuyopacuni. Naicoin murannoa ahuun oi nicanifo, —Nanfin uhuun Facuquin. Un ahuun noi. A nicacoincahuun, —Upa Diosin huani.

⁸Asca huatan nan rafu non fusti samamashta oinnifo Moisés yafi Elías yamariscatani Jesús fusti atofu nia ini.

⁹Ascano machi cuya pochininnoashu fotoshon Jesús ato yoini, —Man rama oian cuscan tsoashta yoiyoyamacahuun. Nan naashu un afanan funiano rama man oian cuscan man yorafo yoitiroquin, —ishon ato yoini.

¹⁰Ato yoia cuscan tsoa futsa yoiyonifoma. Tapiamafiashu yoinannifo, —Ahuacon Jesús noco yoiamun naashu afanan funishquiran. Noco huaa cuscan non tapiamaran, —icashu yoinannifo.

¹¹Ascatan Jesús yocanifo, —¿Ahuuscaquimun Moisés tsain tapimamisifoan yoimisiquin isca huaquin? “Nocon Numamisi Cristo Diosin catonni nocoqui oataima Elías rufofo nocoqui oshquiran,” —ishon noco yoinifo.

¹²—Icon. Elías rucun oitautiro. Oshon nantifi isharamapai aton chaca shatunonfo. Ascafia tsoan onannima. Juanfiacun tsoan onannima. Nan chaca huapaiyai cuscan chaca huanifo. Nannori ahuunoa cununi cuscan. Nanscarifi aquin unfin Dios ariashu un nocofunucoin cainfianicun ua omitsiscamacani. Nannori Diosin tsain yoimisifoan uhuunoa cununiforan, —ishon ato yoini. Jesús furonanfacu ahuun yoshin chaca nua caya huani

¹⁴Ascatan machi tununman fotocatan yorahuanrasi nastui Jesús fu rafumisifo yafi Moisés tsain tapimamisifo fu fochishmanantanannifo.

¹⁵Ascano yorafoan Jesús fuchishon, —¡Oincapon! Jesús afanan oi. Tsoa futsacai a cuscarama. Ahuamamishti huatiroran, —icashu yoinannifo. Yoitan aqui ichonifo.

¹⁶—¿Ahuuscain Moisés tsain tapimamisifo fu man fochishmanantanainmun? —ishon ato yocani.

¹⁷Ato yocaiton nocofunu futsa cumani, —Tapimamisiton, uhuun furonanfacushta un mia ihuushona. Yoshin chaca ahuun nuucun tsaintiroma.

¹⁸Achitan mipuani ahuun ashfapan facoshurasi atsispomumisi. Shucurushui futsutan charishi futsua. Uhuun facushta mifu rafuafo ano un ihuufia ua tsoa caya huamashotiromaran, —ishon nocofunun Jesús yoini.

¹⁹Ascaiton Jesús, —¡Ohua! Mancai ua icoinra huaima. Man fasi amaquiri shinanmisi. ¿Ahuutia un matofu ipamun ua man nicayamacaiquin? —Jesús ato huani. —Min facu ua ihuushonhuun, —Jesús apa huani.

²⁰Ihuuafono yoshin chacanun furonanfacu musta mustaimani. Ascatan taramuacucaini facosh atsispomutan pacuni.

²¹Ascashon Jesús apa yocani, —¿Ahuutiamun iscamisiquin? —ishon yocaiton. —Nan facuaitian tauniran, —huani.

²²—Yoshin chacanun uhuun facu chi muran potafain unu muran man potamisi rutupaiquin. Min uhuun facu ua caya huashotiromainquin nocohuun ramapaihuu, —huaiton.

²³—¿Ahuuscain mian anori huaimun? Tsoan ua icoinra huacoian un ato ahuamamishti ashotiro, —Jesús huaiton.

²⁴—Un mia icoinra huai. Ua paratama icoinra huamahuu, —ishon apa yoiaiton.

²⁵Ascano yorahuanrasi oinpai atoqui ichonifo Jesús yoshin chaca curushcain yoini, —Minfin yoshin chacaquin. Nan facu min pastomafain tsaintiroma. Amaquinoashu catahuun. Mincai afanan a muran ipanacamaran, —ishon Jesús yoshin chaca curushcain yoini.

²⁶Asca huaino yoshin fiisicaini cani. Facu musta mustaimafaini amurannoashu cani. Ascaino oianfo furonanfacu naa shinantsacun yoinifo, —Man facu naaran, —ishon yoinifo.

²⁷Ascafia Jesús furonanfacu mutsoinifoannaino funininacahuani.

²⁸Ascashu Jesús pushu muran iquini. Iquiano afu rafuafo aqui funifo. Ascashon yocanifo, —¿Ahuuscashomun nofi non yoshin chaca facumaquinoa potatiromaquin? —huaifoan.

²⁹—Na cuscara yoshin chaca man Upa Diosin cufinyamaquicai man potatiromaran, —ishon Jesús ato yoini. Afanan Jesús ato yoini, —Ua rutushquicaniran, —ishon yoini

³⁰Ascatan anoashu Jesús yafi afu rafuafo Galilea mai finonfaini. Nantian afu rafuafosi tapimani. Ascashon tsoa futsan tapimayopainima. Ato yoini, —Un mato yoimisi cuscan un Dios ariashu mai ano fotoni nocofunucoin cainshquin. Ascafiacun futsan ua achimashquin ua rutunonfo. Ua rutufiafo osha rafu non fusti finontan un afanan mai murannoashu funishquiran, —ishon Jesús ato yoini.

³²Ato yoifiaiton tapinifoma. Ratucaquin tsoancai afanan yocanima. ¿Ratocaimun fasi shara finacoianquin?

³³Ascatan Capernaum ano noconifo. Pushu muran iquicashon Jesús afu rafumisifo yocani, —¿Ahuuscai fai anoashu man fochishmanantanainmun? —ishon ato yocaino.

³⁴Fuaifoan yocani, Ratocaimun fasi shara finacaiaquin fochishmanantanancanashu rafinifo tsoancai Jesús cumanima. Puusinifoma.

³⁵Puusiyamaifoan Jesús ato onanni. Ascashon tsaoshon ato yoini, —Nicasharacahuun un mato cayacafi yoinon. Tsoan ahuun yorafo fasi finonpaiquin nantifi yorafo aton oinmati itiroran, —ishon ato yoiniquin.

³⁶Ascatan aton ointaifi ato nushmancayan facu nichipacufoanni. Ascatan chishto inifoantan ato yoini.

³⁷—Tsoan uhuunshon facu cushusharaifin nanscarifi ua huaiquin. Nanscarifiai tsoan ua shara huaquin uhuun Upa Diosiri nanscari huairan, —ishon ato yoini. Tsoan noco chaca huapaitama noco shara huai

³⁸Ascano Juanpan Jesús yoini, —Tapimamisiton, non oian nocofunun min anuhuunshon yoshin chacafo atomaquinoa potaiton. Nancai no fu rafumisima. Ascacun non yoiquin isca huai, “Mincai no fu rafumisima. Asca min yoshin chaca yorafomaquinoa potatiromaran,” ishon non yoiaran, —ishon Juanpan Jesús yoini.

³⁹Ascaiton Jesús cumani, —Na nocofunu shutiyamacahuun. Tsoancai uhuun anuhuunshon ahuamamishti yorafoan atiroma cuscan huaitocai uhuunoari tsain chaca huatiroma.

⁴⁰Tsoan noco nicacasmaquima noco futan aqui.

⁴¹Un mato icon yoi. Tsoan ahuun nomuran matohuunoa shinanquin isca huaiquin, “Afin Cristo ahuun yoraquin. Ascacun un shara huairan,” ishon yoitirofo man nomiaiton mato unu ayamatiro. Mato ascara shara huacun Diosin inanpaiyai cuscan funotiroma. Futsafoan noco chaca huamatiro

⁴²Ua rama futsa icoinra huafiacun futsan chaca huamaiton nancairocofin toquiri uhuapa tuhuumashon unuhuan noa muran potanon.

⁴³Asca huatan min mucuman ahuara chaca huai mifiri min mushatumua shara icuana. Mucu rafuya omitsiscapanacafo muran catama mucu fusti ya Upa ari min nocotiro nipashquin. Nan shara. Omitsiscapanacafo muran a chicai nocanacama. Nanscasi apanaca. Acai sharama.

⁴⁴Nanscarifi aquin min tau rafu yashon min raquira capai ahuara chaca huapai mifiri oshatumua shara icuana. Min tau rafu ya omitsiscapanacafo muran catama min tau fusti ya Upa ari nocotiro nipashquin. Nanscara shara itiro.

⁴⁵Nanscarifi aquin ahuara chaca oinquin min ahuara chaca huaiton mifiri min futsucumua shara icuana. Min furo rafu ya omitsiscapanacafo muran catama min furo fusti ya Upa ari min nocotiro nipashquin. Nanscarafin shara itiro. Nan chi uru muran caashu fasi min omitsiscacointiroquin. Nanscasi apanaca. Nan chiicai nocanacama.

⁴⁹Tsoancai anori capanacama.

⁵⁰Ascan sao fasi shara itiro. Nami saomua funa payocotiroma. Ascan saomui chacano nami payocotiro. Nanscarifiai tsoa ufu rafushocai chaca huatiroma. Futsafori ua icoinra huamatiro. Ascafiaino tsoa ufu rafuyamaino afanan chacacoin itiro. Ua futsafori afanan icoinra huamatiroma. Ascacun ufu rafupacucahuun. Fochishmanantanacaquima. Isharacahuun, —ishon Jesús ato yoini.