Read Sharanahua Lucas 24 Bible Online

Lucas 24 - Sharanahua bible

Lucas 24

¹Israelifoan tunutitian iyoco futsaino funamanrishta aton ininti rafu ya Jesús maia ano fonifo. Iquisi ininti ati shara huafaincani.

²Nococaquin oianfo quini ahuun fupoita toquirininhuan tocoro man fupucua ini.

³Ascaino iquifainpaiquin oianfo aton Ifo Jesús ahuun cayacai ano inima.

⁴Ascaiton oinquin aton nomuran shinannifo, —¿Raquimun ahuun caya foafoquin? —ishon shinanpaiyaifoanno nocofunu rafu ato sahuutifoya chashatanaino atoqui niriscatanifo.

⁵Ascaino ainfofo fasi ratucoincani fuoi futsunifo. Ascaifoan Diospan oinmati rafutan ato yoini, —¿Ahuuscaquimun yora nia man funaicain nan yora naacun mai huamisifo murannoa?

⁶Afanancai nunomafinquin. Manfin funiaquin.

⁷¿Galilea ano matofu iyoshon mato yoimisimun man shinainmacai? Mato yoimisi isca huaquin, “Chacafoan ua achishon ua mastafo un naafiashu osha rafu non fusti finontan un afanan funishquiran,” mato huamisi nanmun man shinainmacai, —ishon ato yoinifo.

⁸Ascaiton nan Jesús ato yoimisi cuscan shinanriscatanifo.

⁹Ascatan ainfofo nasofaincani nan once nocofunufo Jesús fu rafumisifoquin chanitoshinifo. Nannoa futsaforifi nan rama oinfainafo cuscacoin ato yoinifo.

¹⁰Nanfofin María Magdalena non Juana non Santiago ahua María non ainfo futsafori nanfo atoqui chanitoshinifo.

¹¹Ascafiaifoancai ato icoinra huanifoma. —Icon yoicanimaran, —ato huanifo.

¹²Ascaiton nicafaini Pedro ichoni toquirinin huaa quini muran oincai. Nocotan tucupacucahuan quini naisquin oian ahuun racoita fusti nanno mania ini. Ascaino Pedro —¿Ahuuscamun aaquin? —icaini cani. Jesús Emaús fain cani cuscan

¹³Nan shafatanri Jesús tanamisi rafu pushurasi Emaús ano fonifo. Emaús Jerusalén chaima ini.

¹⁴Nan rafu focaquin Jesús aquitafo cuscan afi rafu yoinanfonifo.

¹⁵Ascaifoanno Jesuscoin afanan atoqui nocotan.

¹⁶Ato fu cafiaitocai tsoan onannima. Diosin ato onantima huaino.

¹⁷Ascaiton Jesús afincoin ato yocani, —¿Nocofunu rafutan, raquiri man yoinanfoi caimun? —ato huaino. Pusitama nituriscatanifo.

¹⁸Ascaiton naan Cleofas fustiton cumani, —Mirus fusti Jerusalén ano min icatoracafin min tapiamaquin na rama iquitan cuscan, —huaiton.

¹⁹—¿Ahua ahuuscaitamun? —ishon ato yocaiton. —Jesús Nazaret anoaya non tsainquin. Nanfin Diosin tsain yoimisiquin. Diosin ahuun curushhuunshon noco yoimisi. Dioshuunshon ahuamamishti noco huashomisi. Ahuun tsainman yora caya huafain ahuara sharafo noco huashomisi. Nan acai cuscan nantifi man non oian. Diosin yafi nantifi man non oian. Nocofunu sharacoinfin non oinmisi.

²⁰Ascafiaiton nocon yorafohuunshon Dios cufimisi niaifofo non nocon niaifofoan achicashon mastaitafo.

²¹“Nancairocon nocon caifo Israelifo nocon Numamisi ipainonran,” non huamisi. Asca natian man naita shafa rafu non fusti man finoan.

²²Na funamanri ainfofoan no fu focashon man funatanafo ahuun caya quini muran yamaiton.

²³Ascashon naso furan noco yoiafo ahuun caya anocuma. “Ahuun oinmati afu nai muran ica rafutan yoiafo Jesús man afanan niaran,” noco huafo. Ascacun non shinan “¿Ahuuscamun aaquin?” ishon.

²⁴Ascaino nocomaquinoashu rafu ichocashon oiancai ano Jesús ahuun caya icama. Naan ainfofoan yoiafo cuscan iconcoinran, —ishon non yoia.

²⁵Ascaifoan ato yoiqui isca huani, —¡Ohua! Manfin tatimacoinfoquin. Diosin tsain yoimisifoan yoinifo cuscan mancai icoinra huacuanama.

²⁶Man cununi isca huaquin, “Diosin yonoa nan catoan Cristo omitsiscayotan. Apa Dios fu niaifocoin iishquiran,” icashon ahuunoa cununiran, —ishon Jesús ato yoini.

²⁷Ascacun tau huaquin ahuunoa Moisés cununi cuscan yoifain Diosin tsain yoimisifoanri ahuunoa cununifo yoifain nantifi Diosin tsain ahuunoa cununi cuscan atofu cafoquin shafacafi ato yoifoni.

²⁸Ascano Emaús ano man nocoti chaima nan rafutan shinannifo, —Noco finonfaini cairan, —ishon shinannifo.

²⁹Ascatan nan rafutan yoinifo —Cayamahuu. Man fari caiquin. No fu iyopun, —huariaifoanno atofu caani.

³⁰Ascatan piaifoanno Jesús misi finifoantan Apa Dios yoiqui isca huani, —¡Aicho! Upan, non yopai cuscan min noco inanmisiran, —huatan. Misi torupacushon aton inanni.

³¹Ato inainton Dioshuunshon Jesús onanriscatanifo. Onantapaiyaifoanno atomaquinoashu yamariscatani. Afanancai tsoan oinnima.

³²Ascano afi rafu yoinannifo, —Noco fu fain oquin Diosin tsainhuunoa cununi cuscan noco yoi fuaino non mua nocon ointi fupuisharatanaiton. Ahuun tsain sharacoinran, —icashu yoinancatan.

³³Ascashu Jerusalén ano nasoriscafuranifo nan Jesús fu rafuafo once funashcaquin. Ascashon ato fuchinifo ichananshu nan once yoinainfoanno, —Icon, nocon Ifo funia. Pedro man oinmanaran, —ishon yoinifo.

³⁵Ascaifoanno nan rafu Emaús anoashu fua rafutari yoinifo, —Noficoinri Jesús man non oian Emaús fain non caino noco ahuunoa Diosin tsain yoia. Ascatan noco misi torupacushonaiton man non onanriscatanaran, —ishon nan rafutari ato yoinifo. A fu rafuafoqui Jesús niriscatani

³⁶Nan yoiriaifo muran Jesús afanan atoqui niriscatani. Ascashon ato yoini, —Maton ointi unimacain isharacoincahuun, —ato huani.

³⁷Ascaino —Yoshiran, —icashon shinannifo. Fasi mustairitan ratucoinnifo.

³⁸Ascaifoan Jesús ato yoini, —¿Ahuuscai man ratuain? ¿Ahuuscai maton nomuran man icoinra huaimamun?

³⁹Ua oincahuun. Uhuun mucun yafi uhuun tau oincoincahuun. Pirico tohua. Nan uncoinfinquin. Yoshincai ua cuscara namiyacain shaoyamafinquin. Man manfin oincain shao yacain un nami yaran, —ishon ato yoini. Ato yoiquin asca huatan ahuun mucun tohua yafi ahuun tau ato ismani.

⁴¹Ascaiton oincaquin ato nomuran shinannifo, —Namaparaca non oincatin, —ishon shinannifo. Icoinra huacuatama fasi aqui unimacoinnifo. Ascaiton nan iconcainran huacaicainonfo ato tushu yocani.

⁴²Ascaiton shiman shoi inannifo.

⁴³Ascano aton ointaifi pini.

⁴⁴Ascashon afanan ato yoini, —Munfin mato yoiyomisiquin. Uhuunoa Moisés non Diosin tsain yoimisifoan non fanainti uhuunoa cununifo cuscan nanscacoinfin un aiquin, —ishon Jesús ato yoini.

⁴⁵Ahuun shinanpan aton nomuran nanumana aqui cununifo cuscan tapisharanonfo.

⁴⁶Ato yoini, —Diospan tsain cununi isca huaquin, “Cristo nan Diosin catoan naafiashu afanan osha rafu non fusti finontan funishquin.” Ascacun uhuunshon ato yoifoanfafaintacahuun aton chaca shatucashon shinansharaifoan un ato chaca soashonon. Jerusalén ano ato yoiqui tau huatacahuun. Ascashon nan manifoati ato yoifoanfafaishcaquin.

⁴⁸Ascashon un mato yoiaiton man oian cuscan yafi man nica cuscan futsafori yoipacushacahuun.

⁴⁹Ascafia nuno Jerusalén ano oinyocaquin. Upa Diosin yoiyotiani cuscan un ahuun Yoshin Shara matoqui nichishqui. Ascano matoqui nocoshon ahuun curush mato inain. Nantian un mato yonoa cuscan man futsafo uhuunoa ato yoitiro, —ishon Jesús yoini. Jesús nai muran cani cuscan

⁵⁰Ascashon Jesús Jerusalén anoshon Betania pasoato ato iyoni. Betania pasoato nococashon Jesús mushainacahuan yoini, —Upa Diosin, fasi uhuunshon tapimisifo cushusharapacuhuun,

⁵¹—huatan atomaquinoashu Jesús nuinacahuan Apa Dios icano ari cani.

⁵²Ascaino nanno amaquinoashu naso furanifo. Yoinifo, —Jesús, min nocon Ifo fasi sharacoin. Non minhuun noiran, —ishon yoinifo. Yoicatan Jerusalén ano naso furancatan fasi unimacoinnifo.

⁵³Dios fu tsainti pushu muranshon Dios yoisharariapaonifo. Nanti.