Read Sharanahua Juan 12 Bible Online

Juan 12 - Sharanahua bible

Juan 12

¹Ascano seis osha fusitin nocoti chaima Jesús no fu Betania ano cayoni. Nanno Lázaro ica ini. Nan Lázaro naacun Jesús funimani.

²Naannoshon Jesús pimapaiquin tushu pichashonifo. Ascan Lázarorifi nanno atofu ini. Marta ato pimani.

³Piaifono María Jesusqui oano ahuun ininti shara moticaquinoa Jesús ahuun tau pumancaya ocani. Ocashon ahuun foon otucurani. Asca huaiton nan pushu murannoafoan nan ininti sharacoin shutunifo.

⁴Ascan Jesús afu rafumisi futsan nan Judas Iscariote nan Simonpan facu nanton chipo Jesús achimashquin yoini,

⁵—¡Cuu! ¿Ahuuscaquimun na ainfoan ininti shara potaquin? Ahuun rafanan pui ichapa fishon noco inancun ahuuomafo non inancuana. Ascan shara icuanaran, —ishon Judaspan yoini.

⁶Anori shinanfiaquicai ahuuomafo shinancoinnima. Afi yomutso iniquin. Nocon pui nanuti cushupaoni. Cushucoinpaonima. Ahuara fipaiquin nannoa pui onupaoni.

⁷Ascano Jesús Judas yoini, —María fucash huayamahuu. Un samamashta nai tapishon uqui ininti ocaquin.

⁸Nan yora ahuuomafo matofu ipanaca. Ascacufin ato afanan inansharatiroquin. Ucai matofu nuno mai ano ipanacama. Ascaiton María natian ua shara huaran, —ishon Jesús yoini. Nocon caifo nocon niaifofoan Lázaro rutupainifo

⁹Ascano Jesús nicafuracani nocon caifo Israelifo ichapa aqui funifo. Lázaro funia nicacani yora ichapa aqui funifo. Jesús fusti oinpaicanimaquian Lázaro nacoinfiacun Jesús funimana oinpaicani funifo.

¹⁰Lázarohuunoa nicacaquin nocon caifo ichapafoan afanan nocon yorafohuunshon Dios cufimisi niaifofo tanatama Jesús fusti icoinra huanifo. Ascaino nocon niaifofo yoinannifo, —Nan rafu non rutunon. Jesús fustimaquian. Lázarori non rutunon, —icashu yoinannifo. Jesús Jerusalén ano nocotoshiniquin

¹²Man ascano iyoconaino nocon caifofo nocon fusititian yorahuanrasi Jerusalén ano inifo. Jesusrifi nocoaiton nicacani aqui funifo.

¹³Upufo ya aqui fucaquin oi ashcafinin isca huanifo, ¡Aicho! Nocon Numamisi oiquin. Nonfin Israelifoquin. Minfin nocon niaifoquin. Nocon Ifo Diosin mia nocoqui nichini. Min fasi sharacoin. Upa Diosin mia shara huapapainonran ishon yoinifoquin.

¹⁴Nannori yoiaifono Jesús burro cahuashara camaqui tsaoinacahuatan cani. Diosin tsain yoini cuscain iscani, “Jerusalén ano icafoan ratuyamacahuun. Maton Niaifo matoqui oshquiquin. Burro cahuashara camaqui matoqui oshquiran,” ishon cunuyoni cuscan.

¹⁶Nantian nanfohuunoa oinfiaquicai icai cuscan non tapiyonima. Chipo Jesús afanan Apa ari nai muran cani afu niaifocoin iquicai non shinanni isca huaquin, —Jesús mai anoshon amisi cuscan nannoricoin Diosin tsain ahuunoa cunuyonifo. Nocon shunifoan Jesús caiantaima inonpacoai cuscan aqui cunuyoniforan, —ishon nocon nomuran non Jesús shinanni.

¹⁷Jesús Jerusalén ano nocoaiton nicacaquin nantianri yorahuanrasifoan a mananifo oinpaicaquin. Atirifoan Jesús Lázaro naafiacun funimanaiton oinnifo. Oincanifin futsafoqui chaninifoquin arifi oinnonfo.

¹⁸Nocofunu man nacoinfiacun funimana nicacaquin nanfoanri oinpainifo. Ascashon fai anoshon Jesús mananifo.

¹⁹Ascano Fariseofo aqui yoinannifo, —¡Cuu! ¡Shinancapon! Noncai ahuusca huatiroma Jesús isca huanonma. Tsoancai noco nicapaicanima. Nantifi yorafoan Jesús nicapaicaniran, —icanashu yoinannifo. Jesús inon pacoai cuscan yoiyoni isca huaquin, —Ua rutushquicaniran, —ishon yoini

²⁰Nantianri Jerusalén ano yorahuanrasi muran nocon caifomafori nocon yora futsafo fusitin ano funifo.

²¹Nococatan Felipe ano fonifo yocain focani. Nan Felipe Galilea mai ano nan pushurasi ahuun anu Betsaida anoashu cainni. —Non Jesús fu tsainpai. Noco ihuushohuun non afu tsainon, —ishon Felipe yoinifo.

²²Nicashon yoiafo cuscan Andrés tapimani. Ascan nan rafutan Jesús yoinifo.

²³Nicaquin Jesús ato yoini, —Unfin samamashta uhuun Upa Diosin nai muran icano un caicain afu niaifo iqui cai. Ascanfia uhuun Upa ari cataima un yorafotihuunoashu un nayoshqui. Isca huaquin un mato tapimashquin man tapinon. Shuqui furo fusti non fanayamacai foatiroma. Ascatamarocon nan shuqui furo fusti fanano ahuunoashu furo shara ranan caintiro. Nanscarifiai un matohuunoashu nayamacai tsoa futsa un nimapacutiroma. Urus fusti un nipatiro.

²⁵Tsoan iscatiro “Diosin ua imapaiyai cuscacai un apaima. Ufi apaiyai cuscan fustifin un shinaincani,” ishon anori shinanshu funocointiro. Ascafia tsoan isca huaquin shinain, “Un nuno mai ano niyoshon ufi apaiyai cuscan un shinanpaitamarocon Diosin ua imapaiyai cuscan fusti un shinanpairan,” ishon yoitan Upa Dios fu ipasharatiro.

²⁶Ascan tsoa uhuunoa yonomisi ipaiqui uhuun tsain nicacointan un yoia cuscan huatiro. Ua tanashu un icano arifi nannori ufu ipatiroquin. Uhuun yonomisi un yonoa cuscan ua ashoinquin Uhuun Upa Diosin futsafo aton ointaifi ahuunoa yoishquin isca huaquin, “¡Aicho! Min uhuun Facu Jesús nicamisi sharacoin. Min shara huamisiran,” ishon Upa Diosin ahuunoa yoisharatiro. Jesús rutushquiaifo cuscan yoini

²⁷¡Ohua! Natian uhuun nomuran un fasi omitsiscai. ¿Un raquiri huatiromun? Ucai yoitiroma isca huaquin, “Upan, ua numahuu un natian omitsiscanonma,” ishoncai un anori yoitiroma. Upa Diosin ua nichini un natian ato omitsiscashonon.

²⁸Upan, Uhuunshon ato oinmahuu min fasi shara, —ishon Jesús yoini. Yoiaiton nai muranshon oi ashcafinin Apa Diosin cumani, —Un minhuunshon un ato ismafafaini un shara. Nanscarifi un afanan huai, —ishon yoini.

²⁹Nan yorahuanrasi nannoshon nicacani atirifoan yoinifo, —Man turuicaran, —inifo. Atirifoanri yoinifo, —Upan Diosin ahuun oinmati afu nai muran icaton Jesús yoiaran, —ishon yoinifo.

³⁰Ascan Jesús ato yoini, —Nan oi nai murannoa man rama nicaicain ua tapimanama matofin nicamapaiaquin.

³¹Natian nan icoinra huamafoti Diosin ato onaintimaicoinni. Aton ifonri nan yoshin chaca Satanás arifi nantiantari Diosin potashquin afanan aton niaifo inonma.

³²Ascafiatan ihui coyan iquinanqui ua mastashon uaya finifoanshcani. Nanhuunshon un nantifi yorafo uqui omashquin, —ishon ato yoini.

³³Nannori ato yoini ahuuscashumain nashquicai tapinonfo.

³⁴Nicacashon yorahuanrasifoan nanno nishon yoinifo, —Diosin tsain cununi cuscan noco yoimisi isca huaquin, “Cristo, nan Diosin catoanfin nipanacaquin. Nanacamaran. Ascacufin ahuuscashomain, Diospan Facu ihui coyan iquinanqui uaya finifoanshcanicain,” min noco huaran. Tsohuunnoamun min yoicain, —ishon yoinifo.

³⁵Jesús ato yoiquin, —Uncai mato chashamashoriaima. Un mato yoia cuscan nicasharacahuun funoshcaquima. Chashamati yamaino faquish itiro yora funonon. Tsoa faquish muran caquin fai funomatiro. Rani caimancai tapitiroma.

³⁶Un matofu icano ua icoinra huacahuun funoshcaquima. Man ua icoinra huacun un mato chashamashotiro man shafacafi inon. Unfin chashamati cuscaraquin. Ua tanashon manrifi futsafo chashamashotiro matohuunshon uari tananonfo, —ishon Jesús ato yoini. Ahuun tsain yoiqui anaititan atomaquinoashu cani. Ascaitocai afanan oinnifoma. Israelifoan Jesús icoinra huanifoma

³⁷Jesús aton ointaifi yoran atiroma cuscan ato oinmafiacun tsoan icoinra huanifoma nan Diospan Facucoinfiacun.

³⁸Nannori Isaías atohuunoa inonpacoai cuscan yoiyoni isca huaquin, “Ifon, non min tsain ato yoifiainocai tsoan noco icoinra huama. Yoran atiroma cuscan min ato ismafiacun tsoamun mia icoinra huaiquin,” ishon Isaías inonpacoai cuscan cunuyoniquin.

³⁹Diosin ato yoipaoni cuscan nicacasmanifo. Ascashon icoinra huapainifoma. Ascacufin afanan atohuunoa inonpacoai cuscan cunuyoni isca huaquin.

⁴⁰“Icoinra huayamaifoan Upa Diosin fusho ointsa ato imapacushquin. Diosin tsain iconcoin oinfiacashon icoinra huaiyamaifoan Diosin aton shinantimahuatani shinansharanonfoma. Diosin tsain oinfiacaquin oianma shinantsacani. Nicafiacanashon shinansharatirofoma tapishcaquin. ‘Muafo aton chaca shatucasmacani uqui funonfo un ato cainmasharanon,’ ishon Diosin yoini.” Nannori Jesushuunoa Isaías inaca cuscan cunushoni.

⁴¹Jesús fasi sharacoin inon pacoai cuscan Isaías oinquin tau huani. Ascacufin nannori ahuunoa yoiyoni.

⁴²Nocon caifo Israeli niaifofo atirifoan Jesús icoinra huayamafiaino atirifoan icoinra huanifo. Icoinra huafiacani Fariseofoqui musunifo. Fariseofoan yoinifo, —Tsoan Jesús icoinra huaicai nocon ichananti pushu muran afanan iquitiromaran, —ishon yoinifo. —¡Ohua! Jesús icoinra huaran non icaiton nocon ichananti pushu muranshon noco potashcani afanan atofu non ichanannonma, —ishon yoinifo. Ratucoinnifo. Ascacuncai non Jesús icoinra huaran inifoma. Upa Dios ato yoishara icai fuchipaitama atohuunoasi fuchipainifo. Jesús ahuun tsainhuunshon yorafoti tapimatiro chaca huayamaraquinmain shara huaquin

⁴⁴Ascatan Jesús oi ashcafinin ato yoiquin isca huani, —Tsoan ua icoinra huaquin nan ua nichiniri man icoinra huatiro.

⁴⁵Nanscarifi aquin ua oinfain nan ua nichiniri man oian.

⁴⁶Nuno mai ano faquishihuan cuscara. Ascacufin Uhuun Upa Dios icanoashu un nuno mai ano oniquin chashamati cuscara iquiyoi. Ascan un mai ano oni afanan yorafoan chaca huafafaintamarocon ua icoinra huashon Upa Dios tanasharanonfo shafacafi icoinsharashcaquin.

⁴⁷Tsoan uhuun tsain nicafiaquicai un yoia cuscan aima uncai ato onaintimaima. Un mai ano oni yorafo onaintimatamarocon ato numaiyoi un oni.

⁴⁸Ascafiacai tsoan ua ifo huapaimisima uhuun tsainri nicacasmacaquin nanscarafo onaintimaitian Upa Diosin ato yoipacushquin isca huaquin, “Min niyoshon uhuun Facun ahuun tsain min nicacasmamisi. Min omitsiscapanacafo muran ipanacaquin,” ishon yoishquin.

⁴⁹Uhuun Upa Diosin ua yonoa cuscan nannoricoin un mato yoimisiquin. Ufi shinanfaincai un mato yoima uhuun Upa Diosin ua shinanmanai cuscan un mato yoimisiquin.

⁵⁰Mun tapian Upa Diosin yonoa cuscan icoinra huashu man nipatiro. Ascacufin un mato yoimisi cuscan uhuun Upa Diosin, “Nannori ato yoihuu,” ua huamisi, —ishon Jesús ato yoini.