Read Sharanahua Los Hechos 1 Bible Online

Los Hechos 1 - Sharanahua bible

Los Hechos 1

¹Unquian, Lucas, un afanan mia cunu fomai min tapinon. Uhuun yora Teófilo, Jesús mai ano iyoshon ani cuscan huafain yosini cuscari Apa Dios ari cainitian nanfohuunoa un mia cunushoni min tapinon. A fu rafuafo catonni ato Diospan Yoshin Sharahuunshon tapimashquin. Apa Dios ari caiyoataima ato tapimaiyofafainpaoni.

³Atohuunoashu nayoaitian cuarenta oshatan Apa ari cani. Cayoataima atofu iyopaoni. Ato ahuamamishti oinmayoni afanan funia cuscan icoinra huanonfo. Nantianri Diosin nantifi ato iquinai cuscan ato tapimani.

⁴Ichanancashon piyaifoan ato yoini, —Un mato yoimisi cuscan uhuun Upa Diosin mato tapimayoni ahuun Yoshin Shara matoqui nichishquin. Nocoataima Jerusalén anoashu foriyamacahuun. Manayocahuun.

⁵Juanpan ato unu muran iquimapacuni aton chaca shatushon oinmanonfo. Ascano samamashta Upa Diosin ahuun Yoshin Shara mato ya imapacunon, —ishon Jesús ato yoini. Jesús Apa ari nai muran cani

⁶Ascatan chipo afanan afu ichanancashon yocanifo, —¿Ifon, min natian yonoimamun nocon caifo Israelifo nocon niaifo fusti inon Romanofoan aton niaifoan afanan noco yonononma? —huaifoan.

⁷—Ahuutian iquimancai mancai tapitiroma. Nocon Upa Diosin fustiton yonotiro ahuutianmain ishquicain.

⁸Ascafia Diospan Yoshin Shara matoqui oshon ahuun curushu mato inanshquin. Ahuun shinanhuunshon uhuunoa man ato yoifoanfafainon. Un amisi cuscan huafain un yoimisi cuscari man man oinmisi man nicamisi cuscan nantifi uhuunoa man ato yoitiro. Nuno Jerusalén anoa yoifain nantio Judea muran yoifain Samaria ano yoifain nantifi manifotiton uhuunoa man yoifoanfafainon, —ishon ato yoini.

⁹Yoiquin anaititan aton ointaifi nuinacahuani. Oiainfono nai coin muran ihuacainaiton afanan oinnifoma.

¹⁰Foiscaquin oianfo nocofunu sahuuti oshopacoin sahuua rafu atoqui niriscatanifo.

¹¹Ascashon ato yoini, —Galilea anoafoan, ahuuscain man nai ari foisain. Jesús man nai muran caa nanscacoin acurani afanan oshquiquin, —ishon Diosin oinmati afu imisiton rafutan Jesús fu rafuafo yoinifo. Matías catonni Judas imisi cuscari anon

¹²Ascatan machi Olivo anoashu Jerusalén ano nasofainifo. Nan machi Olivo Jerusalén chaimashta ini.

¹³Nococatan pushu osa futsa fomancayan inacashon Upa Dios cufinifo. Nanno Pedro non Jacob non Juan non Andrés non Felipe non Tomás non Bartolomé non Mateo non Jacob futsa Alfeopan facu non Simón nanton ahuun caifo futan Romanonfo cachiquiri huapainifo, non Judas Santiagon facu non Jesús chipocufo non ahua María non ainfo futsafori nanno inifo. Ichanancashon shafa rananun Dios cufinifo.

¹⁵Cufiaifono nanno ciento veinte yorafo atofu ichanannifo. Ichananfono Pedronun ato nastui nishon yoini.

¹⁶Isca huaquin, —Uhuun yoramishtichin ua nicacahuun. Judaspan ato tapimaita ahuuscashomain nocon Ifo Jesús achicanicain. Nocon shuni David Diospan Yoshin Sharahuunshon inonpacoai cunuyoni cuscan Judaspan man aca.

¹⁷No fu rafupaoni. Nocon Ifoan noco yonoai cuscarifi huaquin nan Judasri yonopaoni.

¹⁸Nocon Ifo tanayopaonifiashon fasi chaca huani. Nocon Ifo ato achimacun ahuun rafanan pui inannifo. Nan puihuushon mai fitan nanno fomancayan inashu aficoin tunushumutan pacucuranpai ari rononi. Chipo ahuun posto farashutan musiriquicahuan pacuni. Pacuaino ahuun posto toshatani. Ascaino ahuun poco arasiquifutsuni.

¹⁹Nantififain Jerusalén anoshon nicafo. Ahuun imi focun nanno anunifo, “Imi mairan,” huani. Yora futsan aton tsainman Acéldama. Nocon tsainman imi mai.

²⁰Nocon shuni David Judashuunoa inaca cuscan aquin cunuquin isca huani, “Ahuun mai ano tsoa afanan ano inonma, Ahuun yono nocofunu futsan finon cushumisi inon,” ishon David ahuunoa inonpacoai cuscan cununi. Ahuun cunu anunifo Salmos, huanifo.

²¹Ascacun non futsa catononcahuun. Judaspan ahuun yono finon. Nan Juanpan yorafo unu muran iquimapacunitian non Jesús nomaqui Apa ari canitian no fu itiani non catononcahuun. Nan no fu cahuascapaoni non catontiro. Non Jesús nican cuscan huafain non oinyomisi cuscan arifi huamisi ahuunoari yoinon. No futan yorafo yoinon, “Jesús funia mun oincoianran,” ishon ato yoinon, —Pedro huani.

²³Nicacashon nocofunu rafu catonnifo. Nan fusti anu rafu non fusti ya ini. José Barsabás ahuun anu futsa Justoran huashon anunifo. Nocofunu futsa catonnifo ahuun anu Matías.

²⁴Aton catoncashon Upa Dios cufinifo, —Ifon, nantifi nocon nomuran non shinain cuscan min tapicoian. Noco tapimahuun ratocaimain nan nocofunu rafu min catonpaicain mifu rafumisi no fu inon.

²⁵Judas min yononi cuscan man pota faquishihuan muran canon. Nanno ipanon. Ascan futsan ahuun yono fianon mifu rafua inon, —ishon cufishonifo.

²⁶Cuficatan toquiri tocoro rafuhuun anu nutanifo. Ascashon motica muran nanushon napacufoanni. Ascashon oianfo ratocaimain Jesús fu rafumisi iquicain. Ascashon oianfo. Matías ahuun anu nuucun. Nan catonnifo Jesús fu rafumisi atofu inon.