Read Sharanahua Romanos 12 Bible Online

Romanos 12 - Sharanahua bible

Romanos 12

¹Uhuun yoramishtichin un mato yoisharapaiyai cuscan acapun. Upa Diosin matohuun ramapaiquin mato shara huamisi. Ascacun marifi matohuunoa inancahuun mato ifo inon ahuun yonomati ipashcaquin. Man ascaino afanan chaca maton ifo itiroma ahuunacoin man inon. Shinancapon. Man cayacafi shinansharacoinquifin matohuun noiai cuscari marifi man ahuun noitiroquin. Man ascaino Upa Diosin fasi matoqui unimacoin.

²Ahuarafoan Upa Diosimaqui mato imapaiyaifo cuscan atama shinan futsancahuun Diosin mato imapaiyai cuscan aashquin. Man shinanpaoni cuscan afanan shinanyamacahuun. Natian Diosin maton nomuran shinan futsama sharapaiyai cuscan shinancahuun. Man ascaquin man tapitiro Upa Diosin mato imapaiyai cuscan sharacoin. Mato imapaiyai cuscan man aino matoqui unimacointiro. Ahua futsacai man yopatiroma.

³Upa Diosin uhuun ramapaiquin ua maton muran nichini un mato tapimanon. Ascan un nantifi mato yoisharapai. Cacapaimisi iyamacahuun. Diosin mato imapaiyai cuscan fusti shinancahuun. Ahua futsa ipaiyamacahuun. Man Dios icoinra huatiro cuscan afin mato shinanmanaino cayacafi shinansharacahuun. Man icoinra huaa cuscan nan fusti Upa Dios ashocahuun.

⁴Un mato ahuara futsa yoipai isca huaquin. Nocon cayan fustifiano non pashcoi futsua. Afocai ascarafosima.

⁵Nanscarifiai nocon Ifon Jesús fusticoin. Nonfin ahuun yorafoquin. Non ahuun cayan cuscarafoashu non yopanonainquin.

⁶Upa Diosin nocohuun noiqui cashman noco imapaiyai cuscan non ahuunshon futsafo ashosharatiro. Noco imapaiyai cuscacai non ascarafosima. Upa Diosin man atirifi catoan ahuun shinanhuunshon icoinra huaa futsafori ahuun tsain yoinon. Mato catoncun man icoinra huashon mato yoia cuscan futsafori ahuun tsain yoicahuun.

⁷Ratoranfo catoncun ahuun shinanhuunshon futsafori ashosharanon ato shara huashofafaincahuun. Ratoranfo catoncun ahuun shinanhuunshon ahuun tsain ato tapimasharacahuun.

⁸Ratoranfo catoncun ahuunshon futsafo ointi fupi huamafafaincahuun. Ratoranfo catoncun yopaifo inanquin ato unimacain inansharacahuun. Ratoranfo ahuun shinanhuunshon futsafo yononon Diosin shinanma cuscan ato yonosharacahuun. Nan mato catoncun ahuun shinanhuunshon omitsiscaifohuun ramapaiquin unimaquin ato ashosharacahuun. Futsafohuun noicoincahuun

⁹—Un mato noiran, —ifiacatan parayamacahuun. Atoqui shinanchacayamacahuun. Yorafohuun noicoincahuun. Ahuara chacafo noicasmacahuun. Ahuara shara fasi noicahuun. Afo potayamacahuun.

¹⁰Nan man icoinra huafoti noinancahuun. Maton yoracoinfo man noimisi cuscan huafainri futsafo ya noinancahuun. Yoinansharatanancahuun.

¹¹Nocon Ifo yonoshoni shaniyamacahuun. Diospan Yoshin Sharahuunshon unimacain yonoshosharacahuun.

¹²Upa Diosin mato shara huashoshquiai cuscan shinancahuun. Nanfo shinain unimacahuun. Ascan omitsiscafiain funayamacahuun. Upa Dios cufinquin unuyamacahuun.

¹³Diospan yorafo yopai cuscan ato inancahuun. Futsafo pimasharacahuun. Pushu yopaifoan maton pushu muran ato iquimacahuun. Ato cushusharacahuun.

¹⁴Mato omitsiscamaifoan ato copiyamacahuun. Ato roayamacahuun. Asca huatama ato shara huacahuun. —Upa Diosin mia shara huairan, —ishon ato yoicahuun.

¹⁵Unimaifo ya unimacahuun. Uaicaifo ya uaicahuun. Omitsiscaifoan ato shinancahuun.

¹⁶Ahuu iquinan tananquima. Upan Diosin mato shinanmapaiyai cuscan nanorisi shinancahuun. Oinanmitsapaimisi iyamacahuun. Niaifofo yasi rafucaquima. Ahuuomafo yari rafucahuun. —Un tapia cuscacai futsafoan tapiafomaran, —ishon anori shinanyamacahuun. Curafiayamacahuun.

¹⁷Mato chaca huafiainfoan ato copiyamacahuun. Aton ointaifi isharacahuun.

¹⁸Nantifi yorafo ya rafupaisharacahuun. Man asca shara huapaifiaino futsan matofu isharapaiyamainocai matohuun nuama.

¹⁹Uhuun yoramishtichin, futsan mato chaca huafiainton ato copiyamacahuun. Upa Diosin yoini, “Mato chaca huaifofin unfin ato onaintimaicai,” ishon Diosin yoini. Diosifin chacafo ato onaintimashquiquin. Mancai ato onaintimaima.

²⁰“Ato copitama nan mato noicasmaifo fonaincaifoan ato piimacahuun. Nonmaincaifoan ato ayamacahuun. Man ascaiton oincani noco copimaran,” icashu rafipainonfo.

²¹Ascan futsafoan mato chaca huapaiyaifoan marifi copiquiri ato chaca huayamacahuun. Chaca ifo huayamacahuun. Ascatama shara huafafaincahuun. Asca huaquin man chaca potatiro.