Read Sharanahua Romanos 15 Bible Online

Romanos 15 - Sharanahua bible

Romanos 15

¹Non icoinra huaitin Diosin noco yoini non nantifi tushu pitiro. Ascan icoinra huafoma non ato funaiquimashta yositiro atofu fochishmanantanantama. Nofin non apaiyai cuscan fusti non atiroma. Nan icoinra huaa futsafohuuri non ramapaitiro shinansharanon nocon Ifo non ato tanamasharatiro.

³Shinancapon. Nocon Ifon Cristo afin apaiyai cuscan fusti shinanpaonima. Ascano ahuunoa Diospan tsain cunuquin isca huani, —Upan, un mia nicacoin. Ascan mia chaca huapaicaquin uari roacaniran, —ishon cununi.

⁴Nantifi Diosin tsain cunupacuni noco tapimashquin. Cununiri non icoinra huashon ahuara chaca finonfiaquin non tunucoinnon. Ahuun tsainhuunshon nocon ointi non fupi huamashon non tapitiro nocon Ifo fu nai muran chipo afu ipashquin afanan ahuara chaca finonshquima.

⁵Upa Diosin non chaca finoainton noco mutsismatiro nocon ointi unimacain nocon Ifon Jesucristo man tanasharaino mato nannorisi shinanmatiro.

⁶Ascano nannorisi shinanquifin non nocon Ifo Jesucristo ahuun Apa nan oi fusti nicatsa non ahuunoa yoisharatiro. Nan tsain shara Jesucristohuunoa Israelifoma yoini

⁷Criston nocoqui unimaquin noco iquina ahuun yorafo non inon. Ascan marifi futsafo ya yorahuatanancahuun. Man ascaino Diosihuunoa futsafoan shinansharatiro.

⁸Un mato yoicain Jesucristo mai ano oni Israelifoan aton oinmati cuscara iquiyoi. Ascano Upa Diosin nocon shunifo yoini cuscan iconcoincun non tapitiro.

⁹Mani futsafoanri icoinra huashon yoishcani isca huaquin, —¡Aicho! Upa Diosin nocohuun ramapaiquin ahuun Furun nocoqui nichini. Noco numanon. Upa Dios shararan, —ishon mani futsanfoan yoishcani. Nannori Diosin tsain cununi isca huaquin, “ ‘Ascan un mani futsafo mihuunoa un yoisharashquin. ¡Aicho Dios shararan!’ ishon un mihuunoa ato yoishquin. ‘Un mihuunoashu fanainsharashquiran,’ ” ishon cununi.

¹⁰Afanan Diosin tsain cunuquin isca huani, “Mani futsafoan nan Israelifo ya unimatanancahuun. Marifi man atofu Diospan yora iishquicai,” ishon cununi.

¹¹Afanan cununi isca huaquin, “Mani futsanfoan, nocon Ifohuunoa yoisharacahuun. Nantifi manifoti anoashu nanscasi aqui fanain ishocahuun,” ishon cununi.

¹²Isaías arifi isca huaquin cununi, “Nocon shuni Isaí ahuun funapan manifoti ato iquishquin. Shinanquin isca huashquin, ‘Nan fusti nocon Numamisi inonran,’ ishon yoishquicani,” ishon Isaías cununi.

¹³Ascan Upa Diosin fustiton maton nomuran imasharafain mato unimamatiro man afu ipanon icoinra huashu. Ascano ahuun Yoshin Sharapan ahuun curushhuunshon noco yoini cuscan nantifi noco ashonon, ishon man fasi icoinra huapainon.

¹⁴Uhuun yoramishtichin, un icoinra huai un oianfin man noinantanancoianquin. Jesushuunoari tapishara futsafori ato tapimashquin.

¹⁵Ascacun un ranotama afanan afohuunoa un mato shinansharamana. Diosin uhuun ramapaiquin ua catonni Jesucristo ahuun oinmati un inon nan tsain shara ahuunoa un mato tapimanon. Ascan ua nichini un mato Jesús icoinra huamanon. Diospan Yoshin Sharahuunshon maton chaca man shatua a cuscara shara iishquin. Ascano Upa Diosin matoqui unimacoinqui ahuun yorafo mato imai.

¹⁷Ascacun un fasi unimaicai nocon Ifo Jesucristo ua catonni Upa Dios un yonoshonon ahuunoa uhuun caifomafori un ato yoinon.

¹⁸Criston ahuun curushu ua inan uhuun caifomafoan Diosin tsain nicacoinon. Un ato yoimisi cuscan Upa Dios nicacoinmisifo. Un Cristo yonoshona cuscan fusti un tapia. Futsafoan Criston yonoshonahuunoa uncai tapiama.

¹⁹Ahuun Yoshin Sharapan ahuun curushhuunshon tsoan oinyomisima cuscara un ato isma. Ascan un nan maitio Jerusalén anoshon yoifainquin Iliria ano un nantifi nan tsain shara Jesucristohuunoa yoiquin rupian.

²⁰Uncai futsan Jesushuunoa yoimisi anori un capaimisima. Tsoan Jesushuunoa nicayomisima anorifi un capaimisi ato tapimashquin.

²¹Nannori Isaías Diospan tsain cununi isca huaquin, “Tsoan ahuunoa nicayomisima nicacaquin tapinonfo,” ishon cununi. Pablonun Roma ano cashquin shinanni

²²Ascacun un mato ari capaimisi. Ascafia un mato oin capaifiain un camisima. Ahuara futsan finoanshu un nituri niturimisi.

²³Ascafia natian mun cashcu futsa ato Jesushuunoa yoiqui anaitian. Ascan mun itishara mato ari cashquin. Un fari ichapa camisima. Nantishon tapiquin un mato ari capaimisi.

²⁴Un España ari caquin mato ano rutiacashu un matofu tsainshquin. Non yoinonansharanon. Mato anoashu un caiton ua tushu inanshcaquin un España ari nocosharanon.

²⁵Ascafia natian un Jerusalén ano cayoicai. Jesús icoinra huafoan ua nichini icoinra huaa futsafo un ato pui inanon.

²⁶Macedonia yafi Acaya anoafo unimacain icoinra huaa ahuuomafo Jerusalén anoa ato pui inanpainifo.

²⁷Unimacaquin ato inanpaiquin. Yoinifo isca huaquin, —Jerusalén anoa Jesushuunoa yoimisifoan nocoqui nichini. Noco nichiamacun na tsain shara non nicacuanama. Ascacun nan non aya cuscan nofiri non ato inanpai ato shara huaquin, —ishon yoiaifoan.

²⁸Ascan un ato inanfaini un España ari caquin un mato oinfaini cai.

²⁹Mun tapian un mato ano nocoshon nocon Ifohuunshon un mato yoisharashqui maton nomuran man unimanon.

³⁰Tsain futsari un mato yoipai. Man nocon Ifo Jesucristo noishon ahuun Yoshin Sharahuunshon uari noiquin ua Upa Dios cufishocahuun un yonosharashonon ahuaton ua nitun huanonma.

³¹Ua cufishocapun Upa Diosin ua cushunon Judea anoa icoinra huamafoan ua ahuusca huanonfoma. Ua cufishocahuun un icoinra huafo Jerusalén anoafo pui un ato inainno unimacoincai finonfo.

³²Nan ato inanquin anaititan Upa Diosin ua nichiano un unimacoin matoqui nocotiro. Ascashu non yoinonansharatiro nocon ointi non unimatananon.

³³Diosin nocon ointi noco shara huashomisi matofu isharanon. Nanscarari ipainon.