Read Sharanahua 1 Corintios 11 Bible Online

1 Corintios 11 - Sharanahua bible

1 Corintios 11

¹Un Cristo tanai cuscan marifi ufutan tanacahuun. —Ichananshon non Diosquiri shinainno nocofunu yafi ainfomain ahuuscatirofoquin, —ishon Pablon ato yosini

²Man ua shinanfafaimisicun. Un mato aicho huai. Un mato yosimisi cuscan huafain man nicafafaini.

³Natian uhuun yoramishtichin un ahuara futsa mato shinanmapai man tapinon. Cristofin nantifi yorafoan nocon Ifoquin. Ascatari ainfofoan aton ifofin aton funufoquin. Ascan Cristo ahuun Ifofin Upa Diosiquin.

⁴Ascashu man icoinra huafo ichananmisitian ratoran nocofunun Dios cufifain ahuun tsain yoipaiquin iquisi ahuun maiti pucatiro. Ascashon maton fuyamisi cuscan ismashcaquin Diosihuunoa shinansharaquin. Ascacun maiti mapacumutan ismatiro Cristo fusti ahuun Ifocun. Ahuun maiti mapacumuyamacun futsafoan oinquin shinantiro, —Natocai Cristo Ifo huapaima, —ishon shinantirofo.

⁵Ascatari ainfoan Dios cufipai yamaraquin ahuun tsain yoipaiquin iquisi maiti nutatiro ismashquin nocofunu ahuun ifocun. Ascaqui maton fuyamisi cuscarari ismashcaquin aton funuhuunoa shinansharashcaquin. Ahuun maiti nutancasmaquicai funu ifoancoinnama cuscara itiro.

⁶Nan ainfoan Dios cufipaiquin maiti nutancasmacun nocofunu cuscara marucumutiro. Ascafiashu ainfo marucumuashu rafipaitiro. Nan yorafoan oinquin yoitirofo isca huaquin, —Na ainfoan chaca huaran, —ishon yoitirofo. Ascacufin ainfoan Dios cufipaifain ahuun tsainri yoishquin maiti nutantiroquin.

⁷Ascafiashu nocofunun Dios cufifain ahuun tsain yoishquin maiti nutantiroma. Diosin nocofunu onihuani a cuscara inon. Ascacun uhuun yoramishtichin non Dios nicacoianshu ahuun ointi cuscara shara non itiro. Nanscarifiaiyainfofoan aton funu nicacoincanashu Diosin ointi cuscara sharari itirofoquin. Diosifin nocofunu onihuaquin tauhuaniquin. Chipofin ainfo onihuaniquin. Nocofunuhuunoa Diosin ainfo onihuani. Ainfohuunoacai Diosin nocofunu onihuanima. Nocofunuhuunoa nan ainfo onihuani afu rafucain afu yonosharapacunon unimayanan.

¹⁰Ascacun nocofunufoan ainfo iquintiro. Ainfofoanri aton funu nicacointirofo. Ascashu icoinra huafo ichanainno ainfoan ahuun maiti nutatiro ahuun funu nicacoinshon ismashquin. Man asca huaiton Diosin oinmati afu nai muran icafoan oinquin yoitiro isca huaquin, —Diosin yononi cuscan nan na ainfoan ahuun funu nicashara. Nanfin sharacoinquin, —ishon yoitirofo.

¹¹Ascashon Diosin noco onihuani ainfofo yafi nocofunufo yopanonanonfo.

¹²Diosin tau huaquin nocofunun ahuun anu Adán onihuani. Ascashon ahuunoari ainfoan ahuun anu Eva onihuani. Ascatannaino ahuunoashu nocofunufo yafi ainfofo cainpacumisiquin. Ascafia nan ainfofo yafi nocofunufori nantifi Diosin onihuani.

¹³Nanscacun mafin shinancapon iconmainquin. ¿Ainfoan matofu ichananquin Dios cufipaiquin maiti nutashoma Dios cufia ascara sharamun? Ma. Ascaracai sharama. Man ascaquicai ato ifo nocofunufo oinmapaicanima.

¹⁴Man man tapiari nocofunufo aton fo fasi chai huaa chaca itiro. Nannori nantififain non shinanmisi. Nanscaifin rafipaitiroquin.

¹⁵Ascatama ainfofoan aton fo chai huafin maiti sharashta ointsa itiroquin.

¹⁶Un na mato yoiai cuscafin ratoran icoinra huaa futsa ua fochishmapaiyaitocai un ahua futsa yoipaima. Ascashocai non ahua futsa yosimisima. Nan un mato yoimisi cuscari Jesús icoinra huaa futsafo afi ranan ichanancashon nanfori nannori fusti yoimisifoquin. Nocon Ifoan noco nashonihuunoa shinain ichanancashon nantianri Corinto anoafoan ahuarafo chaca huaifo cuscan Pablonun ato yosini afanan ascanonfoma

¹⁷Ascashon ahuara futsari un mato yoipai. Un nica man atirifi ichanansharama. Ascatamarocon man fasi chaca huai.

¹⁸Futsafo mato anoashu uqui fucashon ua yoiafo nan man ichanainticai man futsa chaima man tsaopaitiroma. Man ichananshon nocon Ifo Jesús mato nashoni shinanpaifiain mafi ranan man noinancasmatanain. Ascacufin un matohuunoa nicai cuscan un shinan atirifiracafin iconquin.

¹⁹Man shinanraca, —Nan man fochishmanantananquin man tapitiro ratofoanmain cayacafi shinancanicai, —ishon man shinan. ¡Ohuashta! Anorima. Man fasi amaquiricoin shinan.

²⁰Man ichananshoncai Jesús mato nashoni man shinainma. Nan shinantamarocon man pifain ayafain nan fusti man shinain.

²¹Un nica man ichananshon pifiaquincai a tushuomafori man pashcashomisima. Ato pashcashotama mafi ranancairocon ayafain ahuun man paunmisifo. ¡Ai timafin! Ascafin fasi chacaquin.

²²Pipaiquin ichananti ano man cataima iquisi maton pushu anoshon piyocahuun. Ascatamarocon Dios fu ichananti pushu ano oshon man ichapa pifafainmisi. Tushuomafo man rafimaiquin. ¡Ai timafin! ¿Unmun matohuunoa yoisharaiquin? Ma. Uncai matohuunoa yoisharatiroma. Nan mato futan icoinra huaa futsafo man chaca huacun. Ascaracai sharamafinquin. Jesús noco nashoni cuscan pifain ayaquin non shinantiro

²³Ascatari nocon Ifo Jesús afincoin ua yoini cuscan un afanan mato yoinon. Ua tapimani cuscari un mato tapimai. Nocon Ifon Jesús Judaspan ato achimanataima afu rafumisifo fu ichananni. Ascashon ato futan piquin. Misi finifoantan Apa Diosin yoini isca huaquin, —Upa Diosin min fasi sharacoin. Mirifi min nantifi tapicoian. ¡Aichoran! —huatan misi torupacushon atoti inanni. —Naafin uhuun caya cuscaracoinquin. Unfin matohuunoashu chipo naicain. Nan man ichanaintian man misi piaiti ua shinanfafaicahuun, —ato huatan.

²⁵Ascashon piyaifoan afanan cuchori finifoantan ato ayamapacuquin yoini, —Na ayatihuunoa ahuara funa shara un mato yoiquin isca huai. Uhuun imi foyanan un matohuunoashu nai man ufu Upa Dios ari ipanon. Nan na non acai cuscan chipo nan man ichanainti ua shinanfafaicahuun, —ishon ato yoini.

²⁶Ascashori man ichanancashon Jesús mato nashoni cuscan shinancahuun. Misi pifain ayafain huacashon nanscasi huacaquin, —Nocon Ifoan noco nashoniran, —ishon shinanfafaicahuun. Nan Jesús afanan oaitian nanscasi huafafaincahuun. Ahuuscashomain Jesushuunoa nani cuscan shinantaqui non pitiroquin

²⁷Ascacufin nan man ichanain anoshon misi pifain ayaiti ayafiaquicai maton chaca shatucasmafain manri chaca huaa. Nocon Ifoan noco nashoni ahuun caya fasi omitsiscacain imi foyanan noco nashoni. Nanscarafo man tapifiashocai nocon Ifohuunoa shinantamarocon chaca huaquin man afanan nocon Ifo omitsiscamai.

²⁸Ratoranfoan misi pifain ayafain nocon Ifo omitsiscacain ato nashoni cuscan shinanyamaifoan Upa Diosin ato onaintimashquin. Atirifoan nan na un yoia cuscan asca huacani. Ascashufin nanfo iramannashtafo atirifi isinin icain atirifi onihuanifotifain. Nanscacun man ichanaintian oinfain. Misi pifain man ayataimari ahuara chaca huashon iquisi Upa Dios yoiyocahuun maton chaca soashonon mato onaintimanonma. Jesús icoinra huamafo Diosin ato onaintimai cuscacai noco onaintimaima. Afocai ahuun facufoma. Ascacun nanfo ato omitsiscapanacafo muran potashquin. Ascan nonfin ahuun facufoquin. Nocon Ifoan noco oinmafiaquicai noco omitsiscapanacafo muran potatamarocon noco tapimashquin non afanan chaca huanonma. Nanscacufin man ichanaintian Jesús noco nashoni shinanshquin pifain man ayataimari iquisi maton nomuran shinancahuun manmain chaca man fomaincai. Ahuara chaca huashon shinanquin Upa Dios yoiyocahuun maton chaca mato soashonon. Ascashofin man pifain ayatiro Jesushuunoa shinansharashcaquin.

³³Ascacufin uhuun yoramishtichin man ichananshon Jesús noco nashonihuunoa shinancaquin oinyocaquin atirifi icafofiacun. Ascashon misi torumishti yafi aqui ayaquin man shinantiro Jesús noco nashonihuunoa.

³⁴Ratoran futsa man fonainquin iquisi maton pushu anoshon ichananshoma man piyotiro. Man ascaitocai Diosin mato onaintimaima. Ascacun un matoqui nocoshon ahuara man fucashniaiton un mato shara huashoshquin.