Read Sharanahua 1 Corintios 5 Bible Online

1 Corintios 5 - Sharanahua bible

1 Corintios 5

¹Mun nicamisi mafi ranan man fasi chaca huaa tanancun. Apa ahuin ahua futsafia afu icacaini. Nanscara chacafocai nan icoinra huamafoan tsoa ascamisima.

²¡Ai timafin! Nan tapifiashu man curafiapaimisi. Nan nocofunun mato muranshon chaca huai ahuun rafipaitama, —Non sharacoinran, —man ica. ¿Ahuun rafitama man man tapifiashon nan nocofunun chaca huamisi ahuuscai matofu ichanainton man potamamun?

³Un matofu iyamafiashon un mato fasi shinain. Un anoyamafiano nan nocofunu ahuusca huaimancai mun tapicoian. Un mato anoshon yoiquin isca huacuana, —Afanan ichanainfoanno Jesucristo ahuun shinanhuunshon na nocofunun apa ahuin ahua futsa fu imisi matomaquinoa potacahuun. Ascacucai afanan Diosin cushuima. Satanás a amapaiyai cuscan aashquin. Man asca huaiton Satanás nan nocofunu omitsiscamatiro. Ascashon omitsiscamaiton mui ahuun chaca shatupaitiro Jesusqui nasoshquin afanan omitsiscashquima. Ahuun chaca man shatuano ahuun yoshin Jesús fu ipatiroran, —ishon un matofu ishon un mato yoicuana.

⁶Timafin man iscamisi, —Non shararan, —man ifiamisi mancai na nocofunun chaca huamisi mato murannoa man potataima. ¿Man tapiamamun fustiton maton muranshon chaca huaiton man shatumayamaino nanhuunoashu nantifi man chacai futsutiro?

⁷Ascaiton mato anoshon nan nocofunun chaca huai potacahuun. Ascanofin afanan Jesusqui nasotiroquin tanasharacoinshquin. Cristo Upan Diosin ahuun chashoan cahuashara cuscara noco nashoni non afanan chaca huanonma a cuscara shara non inon.

⁸Ascashon non chaca huapaoni cuscacai afanan non shinantama Cristo ahuun ointi cuscara shara non iishquin. Ahuun tsain shara non shinanon. Futsaqui afanan shinanchacayamafain tsoa afanan parayamafain tsain iconcoin fusti non yoinon.

⁹Ascacun un matoqui cunui tsoa ahuun ahuinma fu icain ainfofo nanscarifiaifono aton funuma fu icaino afanan ascarafo fu rafuyamacahuun.

¹⁰Jesús icoinra huamafohuunoacai un cunuima. Nanfofin Satanás aton ifoquin. Ascashocai aton chaca shatuafoma. Chaca futsa futsatapafo huamisifoquin. Ascashon aton ahuinma fu imisifo. Ainfofo nanscarifiaifoanno aton funuma furi imisifo mafo ichapa fusti fipaifain. Atonama fipaicoinmisifo yomutsofo non nan diosicoinmafofin, —Nocon diosiran, —icafoquin. Noncai atofu pashcanantiroma. Non icoinra huamafo fu pashcananpai nan maitio non cuyofotiro. Icoinra huamafoan acai cuscacai non ato futan atiroma. Ascafiacun non atofu imisiquin.

¹¹No futan icoinra huafohuunoa un mato cunushoni. Tsoan yoiquin isca huai, —Urifi matofu Jesucristo ahuun yoraran, —ishon anori yoifiatan ahuun ahuinma fu icaino ainfofori nanscarifiaifoanno aton funuma fu icaifoanno mafo ichapa fusti fuchipaifain atonama fipaimisifo icain diosicoinma tanapaifain yora futsa chaca huamisi icain paunmisi icain yomutso icain. Ascarafo fu rafuyamacahuun. —Un Jesús icoinra huairan, —ifiacatan ahuara chaca huariaifo fu rafuyamacahuun.

¹²Nan icoinra huamafo non ato yonotiroma aton chaca shatunonfo. Ascarafocai Diospan yorama. Diosifin ato onaintimashquiquin. Ascafiaino Diosin noco yonoa nan icoinra huafo futsan chaca huacun non ato yoitiro aton chaca shatunonfo. Ascashon nan nocofunun mato muranshon chaca huamisicun yoicahuun afanan matofu ichananonma ahuun chaca shatucoiaintian matofu afanan ichanantiro.