Read Sharanahua Efesios 3 Bible Online

Efesios 3 - Sharanahua bible

Efesios 3

¹Uhuun yoramishtichin unquian Pablo un mato yoinon. Mancai uhuun caifo yamafiacun un mato Jesucristohuunoa tapimamisi marifi man Diospan yorafo inon. Ascaiton oinquin Jesús icoinra huamafoan ua cunu muran iquimanifo. Ascan matohuunshon ua iquimanifo.

²Upa Diosin mato shinanfain matohuun ramapaicain mato tapimapai. Ascashon ua catonfain matoqui ua nichini un mato yoinon.

³Upa Diosin ua tapimayoni cuscacain tsoa futsan tapiyomisima. Matohuun noicoinquin ua nichini marifi man ahuun yorafo inon. Ascan nanfohuunoa un mato ichapama cunushoni. Nan man man nicamisi.

⁴Ascan un mato cunushona cuscan oinquin un Cristohuunoa tapia cuscan huafain marifi man tapitiroquin. Tsoashta tapiyopaonima.

⁵Ascacucai Diosin tsoa tapimayonima. Ascan natian Diospan Yoshin Sharahuunshon nan Jesús fu rafumisi sharafo yafi Diospan tsain yoimisi sharafori man ato tapimana.

⁶Ascan nan tsain sharacai tsoan Jesushuunoa tapiyopaonima. Ascan mani futsafori Upa Diosin yorafo itirofo. Ascacun natian matorifi Diosin tapimai. Israelifo yafi mani futsafo Jesushuunoashu Diospan yora fusti cuscarafo. Ascano Upa Diosin uhuun caifo Israelifo yoiyotiani cuscan Jesucristohuunshon manifoti nanscarifi huaquin inantiro.

⁷Upa Diosin uhuun ramapaiquin ua catonni ahuun yonomati un inon ahuun tsain shara Jesushuunoa un ato yoinon. Ascashon ahuun curushu ua inanni manifoti Furunhuunoa un ato yoinon.

⁸Shinancapon. Uncai ahuama. Nantifi Diospan yorafoan ua finoncoianfo. Ascafia Upan Diosin uhuun ramapaiquin ua catonni mani futsafo un tsain shara Cristohuunoa un ato yoinon. Aafi ahuun yorafo inain cuscan fasi sharacapacoin. Tsoancai ascara shara oinyomisima. Cristo noco shara huaquin futsai cuscacai tsoashta tapiyomisifoma.

⁹Upa Diosin nantifi onihuanonpacoai cuscan afin tapiyoni. Tsoashtacai Jesushuunoa tapiataima. Ascacun ua catonni manifoti Furunhuunshon un ato yoinon. Upa Diosin ua tapimani cuscacai atirifi tsoa tapimayoima.

¹⁰Upa Diosin shinanquin tau huani cuscan nocon Ifo Jesucristohuunshon ani. Natian Jesús icoinra huafohuunshon niaifofoan nai muran icafo futan ahuun oinmatifo nan a fu nai muran icafoanri ato tapimashquin. Ascan nicacashon yoishquin isca huaquin, —¡Aicho! Nocon Upa Diosin aca cuscan fasi sharacoin. Arus fusti nantifi tapicoian. Nanton ahuamamishti huatiroran, —ishon yoishcani.

¹²Ascashon non Jesús icoinra huashu non ranotama Diosqui otiro afu tsainshquin. Ascashon non tapitiro non aqui oaitocai noco potaima. Ascano ratutama non Dios fu itiro.

¹³Ascatan un matohuunoashu omitsiscaitian shinanchacayamacahuun. Maton nomuran omitsiscayamahuu. Nan un omitsiscai marifi man afu isharanon. Cristo nocohuun noi

¹⁴Ascan Upa Dios cufishquin un ratoconun mai chachimisi. Ascacun nantifi icoinra huafo nai muran icafo futan mai ano icafoan nocon Upaquin. Nonfin ahuun facufoquin. Ascacufin ahuunoashu nan Jesús icoinra huafoti non anu yai futsutiroquin.

¹⁵Un mato Upa Dios cufishoquin isca huamisi, —Upa Diosin, nan ahuara sharafofin minaquin. Ascan nan mia icoinra huafo Efeso anoafo min Yoshin Sharapan aton nomuran mutsismainifoanhuun min Furun Cristo icoinra huashu mifu rafufafainonfo. Min fasi atohuun noimisi cuscan huafain ato tapimahuun. Ihui tapo sharano fana foaisharatiro cuscan Cristofin Efesofoan aton tapo mutsisipa cuscaraquin. Asca nan min atohuun noia tapicanashu nanforifi isharatirofoquin. Cristofin aton ihui tapo mutsisipacoin cuscaraquin ahuunshon futsafo noicoinonfo. Upa Diosin Efesofo nantifi mia icoinra huafoan aton nomuran ato shinanmasharahuu Cristo atohuun noicoinmisi cuscan tapinonfo. Criston nantifi nocohuun noicoinmisi cuscan non tapifiatiro fasi finacoinquin nocohuun noicoin. Upa Diosin, un mia cufia cuscan nantifi Efesofo tapimahuun. Ascashon min ato imapaiyai cuscan anonfo nantishotapiquin mifu rafucoinonfo, —ishon un mato Upa Dios cufishofafaini.

²⁰Non Upa Dios nocon nomuranshon shinain cuscan non yocafiamisi atofin fasi finonmafain noco ashotiroquin. Ahuun curushhuunshon nocon nomuran mutsismainifoanna cuscan huafain ahuamamishti noco ashotiro.

²¹Ascacun non Upa Dios yoiquin isca huanon, —Upa Diosin, min fasi sharacoin. Min Furun Jesucristohuunshon min noco shara huamisiran, —ishon nantishotapiquin non yoifafainon. Nantifi icoinra huayopaonifo yafi natian icafo non inonpacoaifoanri Dios yoisharapacunonfo. Nanscasi ipanon. Amen.