Read Sharanahua Filipenses 2 Bible Online

Filipenses 2 - Sharanahua bible

Filipenses 2

¹¿Man Cristo fu rafuaiton mato unimamaimun? ¿Matohuun noiquin maton ointi isharamamun? ¿Diospan Yoshin Shara matofu rafuimun? ¿Cristo matohuun shinaincain matohuunri ramapaiyaiton man man mumisimun? Icon nanfo man man mumisi.

²Nanscacun ua unimamaquin finai cuscari Cristo maton nanscarifi huaquin shinanmapaiyai cuscan nannorifosi mato nomuran shinancahuun. Ascashu noinancahuun Jesús mato amapaiyai cuscan fusti aashcaquin.

³—Ufin un apaiyai cuscan fustifin un huaicain. Ascan futsafoan apaiaifo cuscacai un shinanpaima. Ascano un acai cuscamun futsafoan uhuunoa shinansharapainonforan, —icashu cacapaimisi iyamacahuun. Anori itamarocon futsafohuunoa shinansharacahuun. Ascashon atohuunoa yoiquin isca huacahuun, —Nanfoanfin ua finontirofoquin. Ascan uncai ahuama. Jesús fustiton ua imasharatiroran, —ishon futsafo finonmapaiyamacahuun.

⁴Ascashon mafin man apaiyai cuscan fusti shinanyamacahuun. Futsafoan apaiaifo cuscari shinanshocahuun.

⁵Ascashon nocon Ifon Jesucristo shinain cuscan marifi nannori shinancahuun.

⁶Aafin Dioscoinquin. Apa Dios imisi cuscan arifi onihuafiacun. Ascashocai yoiquin isca huapaonima, —Urifi un Diosquin. Nantifi uhuun Upanari uhuuna. Ascano uhuun Upan nai murannoashu ica cuscariai un nuno mai ano itiroquin. Un ascaitocai ahuaton ua chaca huatiromaran, —ishoncai Jesús anori shinanpaonima.

⁷Arifi Dioscoinfiashon nan Apa Diosin ahuun curushu yafi ahuun ahuamamishti potayoni mai ano oshquin. Ascashu nocofunucoin noco cuscara ipaoni. Arifi nocofunu caintiro cuscan cainni yorafoan aton oinmati cuscara iishquin mai ano fotoni.

⁸Ascano nocofunucoin cainfianishaquin nancaifin fasi omitsiscai finacoiniquin. Nanscaiton Apa yoini isca huaquin, —Nantifi yorafohuunoashu min ato nashoshquiran, —ishon Apa yoini. Ascashon Apa nicacoianshu ihui coyan iquinanhuunoashu noco nashoni. Ahuashta chaca huayamafiamisishaquin nai nan chaca huamisi ointsacai omitsiscacaini naani.

⁹Ascafiacun Upan Diosin Furun afanan funimani afu niaifocoin inon. Ascacun tsoa futsacai Jesús finontiroma. Asca Upa Diosin Furun yoiquin isca huani, —Mirus fustifi min ua cuscara. Nantifiton aton Ifo. Ascan minfin uhuun Facu Jesucristoquin. Tsoa futsancai mia finontiromaran, —ishon Apa yoini.

¹⁰Ascanishaquin natian Jesús nantifi finoncoian. Nai muran icafo yafi mai ano icafo non naamisifo non yoshinfoanri. Aqui oshon nantififain ratoconun mai chachishon yoishquicani isca huaquin, —Jesucristo minfin nantifiton noco Ifoquin, —ishon yoishquicani. Nannori Furunhuunoa yoicaquin nantianri Apa Diosihuunoa yoisharashquicani. Jesús icoinra huafoan a icoinra huamafo muranshon ato ismatiro ahuuscashumain isharatiroquin

¹²Ascacufin uhuun yoramishtichin un matofu iyoshon un mato yoiyopaoni cuscan man nanscasi huaquin nicacoinmisi. Natianri un matofu iyamafiashon nan un mato yosipaoni cuscan unutama finacoinquin nicasharafafaincahuun cachiquiri huacaquima. Jesús mato numafain maton chaca soashona man afu nipanon. Ascashon nunori shinancahuun, —Nan ua yonopaiyai cuscan un ayamaifin musuquin. Ascashu un funotiroran, —ishon shinancahuun.

¹³Diosin maton nomuran mato shinansharamafafaini mato amapaiyai cuscan man anon. Afin apaiyai cuscan huafain matorifi nannori shinanmatiro.

¹⁴Ascacun Diosin mato amapaiyai cuscan fusti huacahuun. Nantifi man acai cuscan huaquin tsain chipufain fochishmanantananyamacahuun.

¹⁵Man ascaiton oinquicai Jesús tanamafoan matohuunoa yoitirofoma isca huaquin, —Nan Jesús tanamisifofiashon tsain chaca yoimisiforan, —ishocai matohuunoa yoitirofoma. Man ascaitocai mato tsoan ahuashta rafantiroma. Ascatamarocon man isharaiton ointirofo man Diospan facucoinfoshon. Man ahua chaca huamisima. Nan Jesús icoinra huamafoanfin ahuara chaca huamisifoquin. Ascashon shinanchaca fustimisifo. Ascasi acani man funoafo. Ascashu faquish muran icafo shinantsaafo. Mancai ato cuscarama. Ato cuscara itamarocon Dioshuunoasi ato yoifafaincahuun icoinra huacanashu Jesús fu nipanonfo. Ascan manfin ato muranshon nan chashamatinin chasha huaiquin ato ismashcaquin a chaca huamisifoan mato oinnonfo. Man ascaino Jesús afanan oaitian unfi unimashquicain. Ascashon uncai ipaitsi mato Diosin tsain yoimisimaran, un nantifi yoitiro.

¹⁶Un mato yoisharamisi man Jesús icoinra huacoinnon. Asca Upa Dios un yoitiro isca huaquin, —Upa Diosin, mian yononi cuscan un Filiposofo min Furun Jesushuunoa yoimisi. Nan icoinra huanonfo min ato yoiai cuscan acoinonfo. Un ato mia icoinra huamahuunshon ua rutushquicaniran, —ishon un Upa Dios yoitiro. Ascano ua rutufiafo uhuunshon man Jesús icoinra huano un unimatiro. Ascacun marifi ufu unimacahuun Diosin ua shara huaino un matohuunoashu natiro. Timoteo yafi Epafrodito

¹⁹Jesucristo apaiyaiton un matoqui Timoteo samamashta nichipai. Chipo u ano nasoaitian matohuunoa ua tapimanon. Nocoshon matohuunoa ua yoiaiton nicai un fasi unimacointiro.

²⁰Timoteo mato noicoinquin matohuunoa tapipai man isharacaimain man Jesús tanasharaquin. Asca tsoa futsacai Timoteo cuscarama. Ascashu un matohuun noiai cuscari arifi matohuun noicoin.

²¹Nantififain afin apaiaifo cuscan fusti shinanmisifo. Jesucristo ato yonomapaiyai cuscacai shinanmisifoma.

²²Ascan Timoteocai ascarama. Maficoin man man onan. Nan uhuun facu cuscaracoinshofin. Timoteo u futan Jesushuunoa yoimisiquin.

²³Ascacufin un Timoteo mato ano nichiriscapaicain. Unmain ahuuscaicain un tapiataima. Ascan nan un tapiaintian un mato ari Timoteo nichiriscatiro uhuunoa mato tapimanon.

²⁴Un nocon Ifon icoinra huai uatsi mato ari nichiyamaiton. Ua nichiaino un samamashta un mato ari caicain.

²⁵Ascano manfin uqui Epafrodito nichiniquin un yopai cuscan ua ashonon. Ascacun nanfin uhuun ushto cuscaracoinquin. U futan Diosin tsain yoifafaini. Afin fasi mato shinain. Ascan un shinanracafin afanan un mato ari nichishquin.

²⁶Epafrodito isinincai mato tapimapaiyamafiano man man tapian nicaquin matohuunshon shinanqui ahuun ointi nocoita. Ascashon yoiyamua isca huaquin. —Tapianmapainonforan aton ointisin ihuutirofoquin, —ishon matohuunoa yoiyamua. Ascashu natian matofu fasi ipaicoin.

²⁷Iconfinquin Epafrodito fasi isininqui man naqui rashquiyamua. Ascafia Diosin ahuun ramapaicain uhuunri ramapaiyaino man cayayamua. Ascan naanofin un fasi shinain omitsiscai finacuanitaquin.

²⁸Ascacufin un mato ari nichipaicain. Matoqui nocoaino man aqui unimanon. Man ascaino urifi un unimashquin. Mato ari Epafrodito nocoanocai un afanan shinain omitsiscashquima. Muma sharamain matoqui nocoyamaiton.

²⁹Cristo yonoshoni man naqui rashquiyamua. Ascan man chai icashucai uqui man oyamaino matohuun rafanan Epafrodito uqui oyamua. Ascafia matoqui nocoaiton fasi unimacain nocon Ifohuunshon ihui sharafain ahuun noiquin a ismasharacahuun.