Read Sharanahua Hebreos 7 Bible Online

Hebreos 7 - Sharanahua bible

Hebreos 7

¹Ascatarifi natian un Melquisedechuunoa mato yoinon. Nanfin Salem pushurasi anoafoan aton niaifo iniquin. Nanrifi nantifi yorafohuunshon Dios cufimisi futsafo finoncoian ini. Nanfin Abrahamqui noconiquin. Nan mucu fustiti niaifofo yomutso chacafo ato ichoshon ahuun piaca mafofo yafi futsafoan mafoforifi afanan ato fishotani Abraham oaino nan Melquisedec Abrahamqui fai pochinin noconi ahuun pushu ano naso curani oaino. Ascashon isca huaquin yoisharani, —Abraham, Diosin mia shara huairan, —ishon yoini.

²Nannori yoiaiton Abraham ahuun mafo yafi ahuun tushuforifi atirifi Melquisedec inancoinni. Tsain futsa la décima parte inancoinni. Nan Melquisedec ahuun anu futsafin iconcoin yoifain isharacoinmisiran huanifo. Nan Salem pushurasi murannoa aton niaifocoin ipaoni. Ascano nan Salem onicoinnin tsainmanfin aton nomuran unima sharairan huanifo. Nan Melquisedec ahuun anu futsari nomuran unima sharai niaiforan huanifo.

³Naanfin uhuaomacain upaomari iniquin. Ahuun shunifohuunoacai tsoan tapiyopaonima. Tsoancai cainnitian yafi naitian tapipaonifoma. Aafin Diospan Furun cuscara Dios yorafohuunshon cufinmisi ipanaca.

⁴Uhuun yoramishtichin shinancapon. Nan Melquisedec niaifocoin. Tsoa cuscarama ipaoni. Ascan nan Abrahamfin Israelifoan aton shuni iqui tauniquin. Nocofunu fasi sharacoin. Ascashon Melquisedec ahuun caifoyamafiacun ahuun mafofo yafi ahuun tushu la décima parte inancoinni. Ascacun non tapitiro Melquisedec Abraham finoncoian.

⁵Israeli shoco futsafo Leví ahuun funafo. Nanfofin Upa Diosin catonniquin ahuun yorafohuunoa ato cufishomisi inonfo. Nan Levifoansi aton caifohuunshon Dios cufifafainmisi ipaonifo. Ascafia Dioshuunshon Moisés Israelifo yononi cuscan nantifi ato tushufo non ato ahuarafori futsa futsa huaquin nan Leví ahuun funafo la décima parte inanpacunifo.

⁶Ascano Diosin Abraham yoiyoni ahuun funafo chipo ichapacoin ishquiain. Ascafia Melquisedec Levipan ahuun funayamafiacun Abraham nantifi ahuun ahuara futsa futsa huaquin Melquisedec la décima parte inancoinni. Ascacun Melquisedec Abraham yoini isca huaquin, —Abraham, mia Diosin shara huairan, —ishon yoini.

⁷Icon nantififain man non tapicoian tsoan futsafo finoncoinshon ahuun tsainman ato shara huatiro. Ascacun non tapitiro Melquisedec Abraham finoncoian.

⁸Ascacun ahuun caifo Israeli shoco futsafoan. Nan Leví ahuun funafo ahuarafo futsa futsa huaquin la décima parte ato inanfianifo nanfo man naamisifo. Ascano arifi Melquisedec Abrahamna futsa futsa huaquin la décima parte fiini. Ascacun Diospan tsain cununi cuscan Melquisedec natian nia.

⁹Levipan ahuun funafoan aton shuni Abraham. Ascashon Abraham Melquisedec ahuarafo inaintian nantianrifi Levifoan arifi inain cafisca huanifoquin. Nan Abraham Melquisedec inaintiancai ahuun funa Leví caiantai inima. Chipo Abraham ahuun funa Leví cainni. Ascacun non tapitiro Melquisedec fustiton aton shuni Abraham yafi atorifi finoncoian.

¹¹Uhuun yoramishtichin shinancapon. Upan Diosinhuunshon Moisés noco yononi cuscan yafi Leví funafoan nocohuunshon Dios cufimisifoan noco numatiroanocai Diosin Furun nichicuanima nocohuunshon Apa Dios cufimisi inon. Cristocai Aarón nan Leví ahuun funa cuscarama. Aafin Melquisedec cuscaraquin.

¹²Taui Leví ahuun funa Aarón. Nan Aarónfin yorafohuunshon Diosin cufimisi futsafoan aton niaifo ipaoniquin. Ascan nocon Ifo Jesuscai Leví ahuun funama shoco futsa. Ascashucai Aarón cuscarama. Nocon Ifo Jesusfin Judápan ahuun funaquin. Nan Levipan ahuun chipocu Judá. Ascano Judápan yorafoanri yorafohuunshon Diosin cufimisifo itiroforan ishoncai Moisés yoimisima. Ascacun non tapitiro Upa Diosin Furun nichini afanan ahuun yorafo yoi futsanon. Ascatarifi Moisés yononi cuscan fiananan huashquin. Ascashon yononi Judápan ahuun funa Jesús nocon cufishomisi niaifo inon.

¹⁵Ascacun afanan un mato cayacafi yoisharapai. Natian shafacafi man non tapishara Diosin ahuara futsa yononi cuscan nocon Dios cufishomisi funa Melquisedec cuscara nocoqui noconi.

¹⁶Moisés yononi cuscacoin Leví ahuun funafo fustifin Dios cufimisifo itirofoquin. Ascafia Jesuscai Moisés yononi cuscahuunoashu noco Dios cufishomisi icama. Aafin Diospan curushhuunoashu nipanacaquin. Ascashu noco Dios cufishomisi ica.

¹⁷Nannori David Diospan tsain Jesucristohuunoa cunuquin isca huani, “Min Melquisedec cuscara yorafohuunshon Dios cufimisi ipanacaran,” ishon cununi.

¹⁸Ascacun non tapitiro Moisés yononi cuscacai non afanan tanaima. Nanfoancai noco ahuusca huatiroma noco imasharanon non Dios cuscara isharashquin. Nanfohuunshoncai nocon chaca soashomisima non Dios fu ipanon. Ascan Jesuscai ascarama. Aafin fasi shara finacoian. Upa Diosin nocoqui nichini ahuunshon non tapinon non afu ipatiro.

¹⁹Ascatari Upa Diosin Furun yoini cuscacai Levipan ahuun funafo anori yoimisima. Ascacun Furun Jesús yoiquin isca huani, “Unfi nantifiton aton ifocoinquin. Un mia yonoai cuscan min nantifi yorafo atohuunshon ua cufimisi ipashquin. Ascashon un mia yoia cuscacai un afanan shinan futsapacunacamaran,” ishon Furun yoini.

²²Ascan Apa nannori yoinicun non tapitiro Jesushuunoashu non Upa Dios fu ipatiro. Ascano Leví ahuun funafocai ascarafoma. Nanfohuunoashucai non Diospan yora itiroma. Ascan Upa Diosin Moiséshuunshon Levipan ahuun funafo yononi cuscan sharafiashu nan furun Jesús yononi cuscan fasi shara finacoianquin.

²³Nanfo ichapafofia aton caifohuunshon Dios cufimisifocai ipatirofoma. Nan futsa naitian futsarifi catontirofo arifi aton yorafohuunshon Upa Dios cufimisi inonfo.

²⁴Ascafia Jesuscai ato cuscarama. Aafin nipanacaquin. Nanrifi noco Upa Dios cufishomisi unupacuyamacain nanscasi apanaca.

²⁵Ascan non ahuunoashu Apa Dios fu ipapaiyaiton nocohuunshon Apa Dios yoifafaini isca huaquin, —Upa Diosin, un ato nashoni aton chaca soashohuun. Ascashon mi ano ato imahuu, —ishon nocohuunoa Apa yoishquin. Ascatan nocohuunoa Apa yoia cuscan nanscacoin noco huashoshquin non afu ipanon. Ascaicai non funopacunacama.

²⁶Ascan nan Jesusfin nocohuunoa Dios yoimisiquin. Yoimisi futsafo finoncoian. Aafin Diosin cuscara sharacoinquin. Tsoancai ahuunoa ahuashta chaca yoitiroma. Aatocai ahua chaca shinanyamafain yora chacafo cuscarama. Ascashon Apa Dios icanoafori finoncoian. Ascashon non yopai cuscarifi noco ashotiro.

²⁷Yorafohuunshon Dios cufimisi niaifo futsafofiashucai ascarafoma. Nanfoan shafatifi inafo rutupaonifo Upa Dios ismaquin ato chaca soashonon. Ascashon Upa Diosin aton chaca soashonano futsafohuunoari nanfoan inafo rutushopaonifo Upa Diosin atori chaca soashonon. Ascafia Jesuscai ato cuscarama. Ato fasi finoncoian. Atocai ina rututiroma aton chaca soashonon. Ascatamarocon nancaifin nantifi yorafohuunoashu nashoniquin nocon chaca soashoshquin. Ascano nancai afanan ahua futsa yopaima noco chaca soashoshquin. Ascashon nan fustiton nocon chaca soashonano non Upa Dios fu ipatiroquin.

²⁸Ascan Upa Diosihuunshon Moisés yononi cuscan yorafohuunoa Upa Dios cufimisifo non aton niaifofori catonnifo. Ascan nanfofin noco cuscarafoquin. Ascashon nanfoanri chaca huamisifo. Shara ipaifiacaquin samamashta chaca huapaonifo. Ascacun Diosin ahuun tsain yoiyoni cuscan Furun Jesús chipo catonni nocohuunshon Dios cufishomisi ipanon. Aatocai ahua chaca huamisima. Aafin shara fusti imisiquin.