Read Sharanahua 1 Juan 1 Bible Online

1 Juan 1 - Sharanahua bible

1 Juan 1

¹Unquian, Juan, un mato cunu fomai man tapinon. Jesucristohuunoa un mato tapimani. Un nicafain un oinyanan un mucuman mucoinmisi cuscan un ahuunoa mato yoi man tapinon. Ahuashta oniataima Jesús apa Dios fu iyopaoni. Upa Diosin ahuun tsain noco yoipaiyai cuscan Jesús noco tapimapaoni. Ascashon ahuunshon non Diosin tsain tapitiro noco nimapacuai.

²Apa Dios fu ifiashu nocoqui fotoni. Nanton noco nimapacutiro. Ascashon non oian cuscan un mato yoi.

³Upa Dios futan Furun Jesucristo shinainfo cuscari norifi atohuunshon non shinanmisi. Shinainfo cuscan non huai. Non atofu rafumisi. Ascashon non oian cuscan huafain non nica cuscari un mato yoi marifi nannorifosi man shinanon. Ascashu man no fu rafusharatiro.

⁴Un mato cunu fomai non unimai cuscari marifi man unimanon. Non natian unimayofiai man marifi nannorifosi shinainno non fasi mimacai unimatiroquin. Jesushuunshon chacapan afanan nocon ifo itiroma

⁵Ascan Diospan Furun yoini cuscan nicashon non mato yoi. Noco isca huani, —Farin chashainocai faquishtiroma. Nanscarifiai Diosin shara fustisi icanocai ahua chaca afu itiromaran, —ishon noco yoini.

⁶Ascafia non yoiquin isca hua, —Non Diosin shinain cuscari norifi nannorifosi non shinanmisi. Non afu rafuaran, —ifiashon non chaca huashu non chania. Diosin iconquin yoimisi cuscan non aima.

⁷Ascatamarocon ahuun tsain yoini cuscacoin non aafin fasi sharacoin itiroquin. Nanton shinain cuscan norifi nannorifosi shinanshquin afu rafushquin. Non ascaiton nocon chaca noco soashotiro. Jesús Upa Diospan Furunmun ahuun imi foyanan noco nashoni nantifi nocon chaca noco soashoshquin.

⁸Ascafia non yoiquin isca hua, —Uncai chaca huama, —ifiatan non nofiri paramumisi. Jesús iconquin yoimisi cuscan nocon nomuran non nanucoianma.

⁹Ascatamarocon nocon chaca non yoiaiton Upa Diosin yoini cuscan noco rau huatiro. Non chaca huamisi cuscan afanan Upa Diosin shinantiroma Furumun noco nashoni nocon chaca soashoshquin. Upa Diosin sharacoinshon noco yoini cuscan nanscacoin huai. Nantifi nocon chaca noco soashotiro non chaca huamisima cuscara non inon.

¹⁰—Nantifi yorafoan chaca huamisiforan, —Diosin huani. Ascafia non yoiqui, —Uncai ahua chaca huamisimaran, —ishon non futsafo shinanmatiro —Diosin noco pararan, —ishon anori yoiquicai noncai ahuun tsain icoinra huacoinnama.