Read Sharanahua Apocalipsis 15 Bible Online

Apocalipsis 15 - Sharanahua bible

Apocalipsis 15

¹Ascatan uhuun namapan ointsa un ahuara futsan un oian. Tsoan oinyomisima cuscara nai murannoa un oian. Oin uhuun nomuran, —¡Uru! —un ica. Natian un oian cuscan mato tapimanon. Nicacahuun. Diosin yora yoitimashunifoqui fasi sinaiquin. Ascacun ahuun oinmati siete afu icafo ato yonoa nantifi mai anoafo onaintimai omitsiscanonfo. Nan ahuun unutaqui Upa Diosin ato onaintimai. Afanancai atoqui sinaquin ato onaintimashquima.

²Un oian unuhuan pusiquima raca unuya chi osian ointsa. Nanno yorahuanrasi nia. Na yorafoancai yoina pofu cuscara yafi ahuuna ointsa ramihua ahuun numero atoqui cunu nutanmisima. Nanfoan ato shuhuincoianfo. Nan unuhuan pusiquima raca unuya chi osian ointsa fumancayan maniafo. Upa Diosin atoti manuti inanpacua. Nan manuti guitarra cuscara ahuun anu arpa.

³Aton arpa tsomacashon Diospan oinmati Moisés yafi Jesús nan chashoanun facu cahuanshara cuscara fanainmisi cuscan atorifi nannori fanaincani isca huaquin,“Ifon, mincaifin Diosiquin.Min ahuamamishti atiro.Min amisi cuscan sharacoin.Tsoan futsacai atiroma.Min manifoti nantifi aton niaifocoin ipanaca.Min shinanmisi cuscan cayacafi iconcoin.

⁴Ifon, nantififain miqui musucaquinmia nicasharapainonfo.Min ahuamamishti tsoan oinyomisima min atiroquin.Nantifi yorafoti anori yoipacunonfo.Mirus fusticai min chaca huamisima.Nantifi manfoti miqui funonfo.Min shara fustisi huamisi.Nantififain oinquin isca huashquin, ‘Min sharacoin. Min nocon Ifocoinran,’ ” ishon mia yoishcani.

⁵Ascatan afanan un nai muran Diosin icano oian. Ua fupushona Diosin icanocoin un oinon.

⁶Dios ica murannoashu ahuun nai oinmati siete nantifi chifi ichananfo. Nanfoan mai anoafo onaintimai omitsiscanonfo. Sahuuti oshopa chainipa chashai sahuufain oro cuscara nonushumua sahuuafo.

⁷Nan rafu non rafuri Diosin onihua futsan Diosin oinmati afu nai muran icafo siete atoti oro tutso inancua. Diosin nan nipanacaton icoinra huafoma mai anoafo sinacoinquin nan cuchanfo muran ahuara chacacoin fospihuamua atoqui ocano omitsiscashcani.

⁸Ascatan nantian Diosin chashaiton ahuamamishti atiro cuscan ato ismaino nan ica muran coinmahuan fospia nashfiain. Ascan mai ano nan Dios nicacasmamisifo Diosin oinmatifo afu icafoan ato onaintimai omitsiscanonfo anaitiataimanocai tsoa Dios icano iquiyotirofoma.