Read Sharanahua Apocalipsis 19 Bible Online

Apocalipsis 19 - Sharanahua bible

Apocalipsis 19

¹Ascatan nai muran icafo ichapacoin aton oi un nica. Oi ashcafinin un ato nica isca huaquin, “Tsoan chaca huamisi Upa Diosin ato onaintimai. Iconquin ato onaintimai. ¡Aicho! Nocon Ifon Diosin fasi sharacoin non yoipacunon. Nanton nocon chaca soashona non afu nipanon. Ahuunoa fusti non yoitiro isca huaquin, ‘Min nocon Ifocoin. Tsoa futsacai mia cuscarama. Mirus fusti min sharacoinmisiran,’ ishon nantifishon yoipacunonfo. Ahuun shinanhuunshon ahuamamishti huatiro. Upan Diosin Babilonia anoafo atohuunoa isca huaquin yoia, ‘Nan Babilonia anoafo ainfo furomacoin cuscarafo. Man chaca huamisifohuun manifoti anoafo ato chaca huama. Ascancufin ua Babiloniafoan fasi ua chaca huafo. Uhuun yorafori man omitsiscamacani naanonfo. Ascan un ato omitsiscamapacunacaran,’ ” ishon Upa Diosin yoia.

³Afanan oi ashcafinin nai murannoafoan yoia isca huaquin, “¡Aicho! Nocon Ifon fasi sharacoin non yoisharapacunon. Chaca huamisifo iconquin ato onaintimai. Ato chii urumanhuan muran potai. Nan chiicai nocapacunacamaran,” ishon yoiafo.

⁴Ascanori Upa Diosin tsaoa ano nan Jesús icoinra huafo aton cushumisifo nan veinte cuatro nocofunufo yafi nan Diosin onihuani rafu non rafuri anaman fuoshonpacufoantan isca huaquin yoiafo —¡Aicho! Nanscasi ipanon. Amen. Nocon Ifon Jesús fasi sharacoin, non yoipacunon —ishon yoiafo.

⁵Ascatan Upa Dios tsaoa anoa un oi futsan nica isca huaquin, “Upa Diosin oinmatifo non niaifofoanri man Diosin mato yoia cuscan nicacoinmisi. Marifi Upa Diosihuunoa yoisharacahuun isca huaquin, ‘¡Aicho! Upa Diosin min fasi sharacoinran,’ ” huacahuun. Jesús nan Diospan chashoan facu cahuanshara cuscara ahuun yorafo aqui ihuutiro afu fusi huanonfo

⁶Ascatan yorahuanrasi aton oi unuhuan ponoin achacoin cuscara yafi nai curushcain turuica nicatsa un nica yoiaifoan, “Nocon Ifon Diosin tsoan atiroma cuscan ahuamamishti huatiro. Nanfin nantififain nocon Niaifocoinquin. Manifoti anoa noco iquinan. ¡Aicho! Nocon Ifon Diosin fasi sharacoin non yoipacunon.”

⁷“Nocofunun ainfo fiaino ainfo unimacoin itisharatiro ahuun funu fu fianain. Nanscarifiai nocon Ifo Jesús nan chashoan cahuanshara cuscara natian ahuun yorafo afu imapacui. Ascan ahuun yorafo man itisharafo afu ipashcaquin. Ainfoan ahuun funu unimamai nashitiro. Nashishon saya funa sharashtacoin patsashon sahuutiro afu fiananshquin. Nanscarifiai ahuun yorafoan itisharashon Upa Diosin aton chaca soashonon Jesús fu ipasharanonfo. Ascacun non unimanon. Tsoa futsancai mia cuscara sharamaran non nocon Ifo huanon,” ishon yoiafo. Diospan yorafoan Jesushuunshon futsafo shara huamisi. Ascan Diosin ato sahuuti sharashtacoin sahuumana Jesús fu ipasharanonfo.

⁹Ascatan Diospan oinmati nan afu ica ua yoia, —Un mia yoiai cuscan cunuhuu isca huaquin, “Uhuun Facun Jesús chashoan facu cuscara natian nantifi ahuun yorafo ichanain afu ipashcaquin. Ascan ohuu. Uhuun Facu ahuun yorafo pimai minrifi ato futan pitiro afu ipashquin,” ishon Upa Diosin nannori yoi fasi unimatiro. Nannori Upa Diosin ahuun tsain. Ahuun tsain man icoinra huatiroran, —ishon ua yoia.

¹⁰Ua yoiaino un anaman fuopacua, —Min sharacoinran, —ishon yoishquin. Ascafiashon ua yoia, —Asca huayamahuu. Ua anori yoiyamahuu. Unrifi nan mi futan Jesús icoinra huafo cuscarari. Jesús mato yoia cuscan man cachiquiri huamisima. Un matofu ahuun oinmatiri. Nan fusti non fuoshopacutiro yoishquin, “Min fasi shara. Min uhuun Iforan,” ishon min nan fusti yoitiro. Diospan tsain yoimisifoan yoiafo cuscan unrifi un mia yoia nanscasi huaquin non Jesushuunoa non yoinon, —ua huaa. Cristo afanan mai ano oshquiai cuscan yoia

¹¹Ascatan uhuun namapan ointsa ua oinmana cuscan afanan un mato tapimai man tapinon. Upa Diosin nai muran icanoa un oian. Fupoti fupumua pushu muran non ointiro. Nanscara Upa Diosin icari un cayacafi oian. Nanno caballo oshopa un oian. Nan caballo camaqui tsaoaton ahuun anu ichapa. Ahuun anu rafuhuunoa mato yoinon. Yoia cuscan acoinmisi. Ascan ahuun anu futsan Iconmisi. Nanton iconcoin yora chacafo onaintimai. Nan Diosin tsain nicacasmamisifo ato potashquin omitsiscapanacafo muran.

¹²Ahuun furo chi uruai cuscara rafu. Chi uruaino faquishfiacun yoran oinsharatatiro. Nanscarifiai nocon Ifoan yorafoti aton nomuran shinain cuscan onancoian. Niaifo maiti sharashtacoin ichapa maia. Ahuun fumananqui anu cunua. Arus fusti nan anu onan.

¹³Sahuuti chainipa sahuua. Nan sahuuti imiqui pocoa. Ahuun anu futsari Diospan Tsainran.

¹⁴Ahuun yorafo nai ariashu caballofo oshopa camaqui aton Ifo cachiori focani. Ahuun ranushumua cuscarafo. Aton sahuutifo yufan oshopa sahuuafo. Na sahuuti oshopa rama patsamua cuscarafo.

¹⁵Ahuun tsain nopu cunocoin cuscara. Ahuun tsainmansi manifoti yoitimamisifo ato onaintimai. Manifoti ato iquina ratofomain yoitimamisiqui ato curushcai onaintimaquin finacoin. Ahuun tsain nicacasmamisifocun nan Diosin ahuamamishti huatiro fasi atoqui sinacoin. Ascan Jesushuunshon ato onaintimai omitsiscapanacafo muran ato potashquin.

¹⁶Jesús ahuun anu futsan ahuun sahuuti chainipa mananquirinoa yafi maiquirinoahuun cunua isca huaa, NIAIFOFO MANIFOTI ATON NIAIFOCOIN ANUFAIN IFOAFO MANIFOTITON ATON IFOCOINRAN ishon cunua. Jesús nan yoina pofu cuscara finoncoinyaino chii urumanhuan muran potani

¹⁷Ascantari un oian Diosin oinmati afu nai muran ica futsan fari tsacaino nishon oi ashcafinin puiyafo noyaiton cuna, —Fucahuun. Upan Diosin mato pimapai. Niaifocoinfo non ranushumua aton niaifocoinfo non aton niaifo patasharifo non nocofunufo mutsisipacoin non caballofo non caballo catu camaqui tsaoafo non nantifi Diosin tsain nicacasmamisifoti niaifofo non yora ahuamari nantifi Diosin ato namashquin. Ascacufin puiyafoan aton nami pi mayanshquincaniran, —ishon nan oinmatinin puiyafo yoia.

¹⁹Ascatan un afanan nocon Ifo Jesús ahuun noicasmamisifo nan yoina pofu cuscara yafi manifoti aton niaifofo uhuun namapan ointsa un ato oian. Man ichananfoan Jesús ahuun caballo camaqui tsaocun ahuun yorafoya rutupaicani.

²⁰Aton rututamarocon Jesús ato achia chi muran ato potashquin. Nan yoina pofu cuscara yafi nan fuparamitsamisiton, —Unfin Diosin tsain mato yoimisiquin, —ishon yoifiashu chanimisi. Nanton yoina pofu cuscarahuunoa tsoan atiroma cuscan Satanashuunshon huamisi. Ascan nantifi cunua yorafo nan yoina pofu cuscara ahuun anu atoqui nua. Nanfoan yoimisi isca huaquin, —Min uhuun dios. Un mia noiran, —ishon yoimisifo. Ascarafofin nan yoina pofu cuscaraqui. Ascan nan paramitsamisiton tsoan atiroma cuscan ahuamamishti acai cuscan man oianfo. Ascaquin ato paracoian. Nan rafu nan yoina pofu cuscara yafi nan paramitsamisi niyoa Jesús ato chi urumanhuan muran pota.

²¹Nan rafutan yora tushuafo Jesús ahuun caballo camaqui tsaoashon ahuun tsainman nopu cunocoin cuscarahuunshon ato rutumana nai futsuafo. Naafoanno puiyafo atoqui ichanancashon aton caya piqui mayafo.