Read Sharanahua Apocalipsis 20 Bible Online

Apocalipsis 20 - Sharanahua bible

Apocalipsis 20

¹Ascatan Diospan oinmati Diosin icariashu fotoaiton un oian. Shafi cuscara tsoma. Nan yoshin chacafo quininhuan faquish muran icafoqui atoqui fupoti fupoa. Nanno Diosin oinmati fupoti ahuun shafi cuscara yafi cuno pono uhuapa cuscara tsoma.

²Tsomashon nan famanhuan cuscara achia. Diosin mai oni huataima nan rononhuan iyopaoni. Paramitsamisicoin. Naanfin yoshin chacacoin Satanás. Achishon cuno pononun nusha.

³Ascashon quininhuan faquish muran pota. Potatan aqui fupocoian amuran mil fari inon afanan caifoti paranonma. Nan mil fari anaitiano cainmayoi ahuutishotama afanan mai ano cahuancacayonon.

⁴Ascatan niaifoan tsaotifo Upa Diosin icanoa un oian. Jesús ahuun yorafo nan tsaotifo camaqui tsaoafo. Jesús yonoano a futan futsafo yonoshquin. Ascashon nannori un oian nan Jesús icoinra huaa futsafo. Nanfo niyoano nan yoina pofu cuscara yafi ahuuna ointsa rami huati nanfoan ifoanmisima. —Minfin uhuun Ifo. Un mia noiran, —ishoncai yoimisifoma. Aton anu aton mucu iyamarai aton fumananqui cunumisifoma. Ascatamarocon yoimisifo isca huaquin, —Jesús fustifin nocon Ifoquin, —huamisifo. Diospan tsain fustisi tanamisifo. Ascan nan yoina pofu cuscara atoqui sinaquin ato tushtumana. Nai futsufiafo Diosin ato funimani. Funishon Jesús futan mai ano mil fari yorafoti iquina.

⁵Nanfo funi yoi. Ascan nan mil fari anaitiano futsanfori funimashquin.

⁶Shinancapon uhuun yoramishtichin un mato yoiai cuscan. Nocorifi Upa Diosin noco funimaqui tau huashquin. Nocon catoan ahuun yorafo non inon. Upa Diosin yafi Criston noco yonomapaiyai cuscan non futsafohuunoa non Upa Dios cufimisi. Non Jesushuunoashu omitsiscafiamisishaquin naashu non omitsiscapanacafo muran canacama. Ascatamarocon non Cristo icanoshon a futan futsafo iquishquin. Ascashu Jesús cuscara shara icashu non fasi unimacoinshquin.

⁷Ascatan nan mil fari anaitiano Satanás quininhuan faquish murannoa afanan cainmayoshquin nan manifoti anoafo parayonon. Ascatan Dios nicacasmafo manifoti ano ato ichanan huai Diospan yorafo rutumashquin. Ichananfoanno fasi ichaparasi. Nan Dios nicacasmafo tsoan tanan huatiroma. Aton anuquin Gog yafi Magog man huamisifo.

⁹Manifoti cunua ato ichanan huashquin Diospan yorafo icano ato cufuacufoanifo ato rutushquin. Ascafiacun Upan Diosin ahuun yorafo fasi noiquin ato numashqui. Nan yorafo Satanás ichanan huaa nai muranshon ato camaqui chi urumanhuan potai nai futsunonfo.

¹⁰Ascatan nan yoshin chaca Satanás nanton yorafo fuparapaimitsamisicoin Upan Diosin chi urumanhuan muran pota. Nanno omitsiscapanaca. Nannori nan yoina pofu cuscara yafi a futan yonopaoni, —Unfin mato Dioshuunoa yoimisiquin, —ishon yoifiamisishaquin Satanashuunoa ato yoimisi. Fasi paramitsamisicoin. Nan rafu non fusti chi urumanhuan muran omitsiscapashquin. Isin muuquin unupacunacafoma. Jesús icoinra huafoma ato onaintimashquiai cuscan

¹¹Ascatan tsaoti oshopa uhuapacoin un oian. Nanno Upa Diosin tsaoan. Ahuunoashu nantifi mai anoafo non nai murannoari cuyoi futsui. Ascashu nantifi yorafo nai futsui. Diosiqui onupaifiai tsoan onutiroma.

¹²Ascatan un oian nan niaifofo non yora ahuamafori naacanashu Upa Diosin tsaoan ano niafo. Nanno niafoanno Upa Diosin ahuun librofo fupua. Libro futsari fupua. Nan libro ahuun anu nipamisifo aton anu cunua. Nan naafoan amisi cuscan librofo muran nantifi Upa Diosin man cunua. Ascan nan chaca huapaonifo cunupacua cuscan ato ismashon iconcoincun ato onaintimacoinshquiran ishon ismatiro.

¹³Nan asafo yafi mai anoashu naamisifo nan omitsiscapanacafo muranri nantifi nan naamisifo Upa Diosin ahuun ointaifi fuafo. Nan chaca huafo cuscan atoti Upa Diosin onaintimapacua.

¹⁴Nantififain nan Diosin tsain nicacasmamisifo Upa Diosin ato chi urumanhuan muran pota. Man naafiafoan natian ato chi urumanhuan muran pota. Nannoashu omitsiscapanacaforan ishon ato anupacua.

¹⁵Ascan nan libro ahuun anu nipamisi. Tsoa ahuun anu nan libro muran Upa Diosin cunumisima nanfo chi urumanhuan muran pota.