Read Sharanahua Apocalipsis 5 Bible Online

Apocalipsis 5 - Sharanahua bible

Apocalipsis 5

¹Ascatan afanan un oian cuscan un mato tapimai. Nocon Ifo Diosin ahuun tsaoti camaqui tsaoshon ahuun mucu mumiori papel ocuma rafu cunua sufishon tsoma. Ascashon siete tashna huatinin tashna huaa.

²Ascashon un oian Diosin oinmati mutsisipacoin nan afu nai muran ica. Nantori oi ashcafinin cunaquin isca huaa, —Na cunu non oinpai. Ascan chaca huamisima fustiton na tashna huatifo fuputiro na cunu non oinon. ¿Ascan tsoan chaca huamisimamun na cunu ahuun tashna huatifo noco fupushona non oinon? —ishon oi ashcafinin yoia.

³Ascafia nan nai murannoafo futan mai anoafo non Diosin oinmatifo afu ifiashocai tsoashtacai cunu fupushotiroma amuran oinonfo.

⁴Ascacun uaiyanan un yoia, —¡Ohuashta! Chaca huamisimacai tsoan fuchiama na cunu noco fupushonon amuran non oinon, —ishon un shinan. Ascacun un fasi uairia.

⁵Ascaiton nan veinte cuatro icoinra huafo aton cushumisi futsan ua yoiquin isca huaa, —Uaiyamahuu. Oinpon. Nocon Ifo nia. Cristo nanfin nocon niaifocoinquin. Rato yoinacai nan masharo uhuapa cuscara mutsisipacoinma. Nanscarifiai Cristo Israelifoan aton niaifo mutsisipacoin. Nanton ahuamamishti huatiro. Tsoa futsacai a cuscarama. Ascacun anu futsamisifo isca huaquin, “Judápan funafo nan masharo curush cuscaracoinforan,” huamisifo. Ascacufin nocon yorafoan aton niaifo David ipaoniquin. Ascan nan David ahuun funa natian nuno Upa Dios fu ica. Ascacun nanton nan siete tashna huamua noco fupushotiro nan cunu non oinon. Ascacun afanan uaiyamahuu, —ua huaa.

⁶Ascatan nannori chashoan cahuashara fustifia ahuun masho siete nantirifi ahuun furo un oian. Rutuafo ointsafia Diospan tsaoti ano nia ica. Nannorifi nan rafu non rafuri Diosin onihua yafi nan veinte cuatro icoinra huafo cushumisifoan tarati huayacunafo. Tsoa futsacai a cuscarama. Nanton ahuamamishti huatiro. Diosin Furun manifoti ano nichian ahuun Yoshin Sharahuunshon nantifi yorafo onancoinon.

⁷Ascan Upa Diosin nan cunu ahuun mucu mumiori tsomacun nan Jesús chashoanun facu cuscaraton man fia.

⁸Fishon nan rafu non rafuri Diosin onihuani yafi nan veinte cuatro icoinra huafo cushumisifoan fuoshopacufoan manuti guitarra cuscarafo yafi tutsofo nanfoan tsomafo. Nan tutsofo oro faca facaitsa. Nanfo muran fiin otano ahuun coin tipoi ininsharayacoin. Nanscarifiai Diospan yorafoan a cufiaiton Upa Dios nan icarishon ato nicamisi.

⁹Ascano nantianri nanfo fanainti funapan fanainquin iscafo,“Min chaca huayamafiamisicun mia rutunifo. Ascashu nantifi yorafo manifoti min noco nashocai min imi foniSatanás afanan nocon ifo itama Upa Diosin ahuun yorafo non inon.Ascacufin mirus fusti nan cunu Upa Diosin tsoma min fitiroquin. Ascashon ahuun tashna huamuafo min noco fupushotiro amuran cunua cuscan noco tapimashquin.Mihuunshon mia icoinra huafoti Diospan yorafo itirofo.Ascano nanfoanri futsafo min tsain shara ato tapimanano min ato amapaiyai cuscan anonfo. Ascacun non maifoti anoafoan niaifo patashari iishquiran,” icashu fanaincafo.

¹¹Ascatan un oianri Diosin oinmatifo afu nai muran icafo ichaparasicoin tsoancai ato tanan huatiroma. Nanfo fanaincaifoan oinfain un ato nica. Diosin tsaoti ano tarati huayacunafo nan Diosin onihuani rafu non rafuri non nan Jesús icoinra huafo cushumisifo veinte cuatro naqui huayacunafo. Ascashu nanfo ya osiashu Diosin oinmatifo fu fanaincaifoan un nica.

¹²Fasi oi ashcafinin fanaincani iscafo,“Diospan facu Jesús chashoan cahuashara cuscara sharashtacoin man rutunifo. Ascafia natian nantifi manifoti ato iquifain nantifi nai murannoafoti yafi mai anoafori ahuuna iquin.Naantofin nantifi tapicoianquin ahuun curushhuunshon ahuamamishti huatiro. Ascacun nantifiton min sharacoinran mia huapanonfo.Mirus fustifin min nocon Ifo iquicain. Ascacun ¡Aicho! Min nocon Ifo ishara fustipacunacaran,” icashu fanaincani.

¹³Ascatafin un nica nantifi nai murannoafo fanaincaino mai anoafori fanaincaino unuhuan anoafori fanaincani iscafo,“Upa Diosin ahuun tsaoti ano tsaoa. Furun Jesús chashoan facu cuscara sharashta nan rafu nocon Ifo isharafustipacumisifo.Ascacun nantifiton man sharacoinran ato huafain man fusti nocon Ifocoin ahuamamishti man huatiroran, ishon yoipacunonfo,” icashu fanaincani.

¹⁴Ascatan nan rafu non rafuri Diosin onihuanifoan yoiquin isca huafo, —¡Aicho! Nanscasi ipanon. Amen, —icaifoanno nan veinte cuatro Jesús icoinra huafo cushumisifo nan Dios yafi Furun nanman fuopacufoannafo. Nanfoanrifi Upa Dios yafi Jesushuunoa yoisharafo.