Read Shekhawati मत्ती 14 Bible Online

मत्ती 14 - Shekhawati bible

मत्ती 14

¹जद राजा हेरोद गलिल को राजा हो जणा बो ईसु क बारां म सुण्यो।

²अर बो आपका दासाऊँ बोल्यो, “के ओ बो बतिस्मो देबाळो यहून्ना ह? ओ मरेड़ाऊँ ओज्यु जिंदो होगो दिखै। इ बजेऊँ बिकै मांयनै चमत्कारी सक्‍ति काम करै ह।”

³क्युं क हेरोद आपका भाई पिळीपुस क जिंदा होतासोता बिकी लूगाईऊँ ब्या कर लिओ हो इ ताँई यहून्ना हेरोदनै ओळमो दिओ। जणा हेरोदिआस क खया म आर बिनै कोठड़ी म गिरवा दिओ।

⁵अर बो यहून्नानै मारबो चावै हो, पण बो लोगाऊँ डरतो हो क्युं क बे यहून्नानै परमेसर की खेबाळो मानता हा।

⁶पण जद हेरोद राजा को जलम दिन आयो जणा हेरोदिआस की बेटी दरबार म नाचर राजा हेरोदनै बोळो राजी कर दिओ।

⁷अर बो बिऊँ सोगन खार बोल्यो, “माँग जोक्यु बी तू माँगसी बो म तनै देस्युँ।”

⁸अर बा आपकी माँ का खेबा म आर बोली, “मनै बतिस्मो देबाळा यहून्ना को सीर थाळी म धर दिओ जावै।”

⁹आ बात सुणर राजा बोळो दुखी होयो पण बो दियड़ी आपकी जबान अर म्हेमाना क सामै बोलेड़ी बात की बजेऊँ बिकी माँगनै पूरी करबा ताँई हुकम दे दिओ।

¹⁰बो आपका आदम्यानै काळ-कोठड़ी क मांयनै भेज्यो जिऊँ क बे यहून्ना का सीरनै का'टर ल्यावै।

¹¹अर यहून्ना को सीर का'टर थाळी म धर ल्यायो गयो अर बि छोरीनै दिओ गयो अर बा छोरी आपकी माँनै लेज्यार दे दिनी।

¹²अर यहून्ना का चेला आर बाकी लासनै लेज्यार गाड दिआ। अर ईसु कनै जार ओ समचार दिओ।

¹³जद ईसुनै ओ समचार लाग्यो जणा बे न्याव म चढर उजाड़ म चलेग्या। जणा मिनख आपकी नगर्याऊँ निकळर बाकै गेल होलिआ।

¹⁴अर जद ईसु न्यावऊँ किनारै प उतर्या जणा बे भीड़नै सामै खड़ी देखी। बानै बि भीड़ प तरस आयो अर बठै जत्ता बी रोगला हा ईसु बानै निरोगो कर्या।

¹⁵अर जद दिन ढळगो जणा चेला ईसु कनै आर खेबा लाग्या, “आपा उजाड़ म हां अर बोळो मोड़ो बी होगो ह इ ताँई थे इ भीड़नै बिदा करो जिऊँ क अ कनै का गाँवा म जार खाबा ताँई मोल लेर खा सकीं।”

¹⁶पण ईसु बोल्यो, “आनै कठैई जाबा की जुर्त कोनी, थेई आनै खाबा ताँई द्‍यो।”

¹⁷बे खेबा लाग्या, “म्हारै कनै दो मछी अर पाच रोट्या क सिवाय क्युंई कोनी ह।”

¹⁸ईसु ओडायो, “बानै मेरै कनै ल्याओ।”

¹⁹अर बे भीड़ का मिनखानै ओडाया, “थे घास प बेठ ज्याओ।” बिकै पाछै बे बा पाच रोट्यानै अर दो मछ्यानै लेर ईस्बर नगरी क कानि देख्या अर परमेसरनै धनेवाद देर बा रोट्या का अर मछ्या का टुकड़ा कर आपका चेलानै देता गया अर चेला लोगानै देता गया।

²⁰सगळा मिनख धा'पर खा लिआ। बिकै पाछै बी बे बचेड़ा टुकड़ाऊँ बारा चोल्या भर'र उठाया।

²¹बठै लूगाया अर टाबरानै छोडर खाबाळा म मोट्यार-मोट्यार की गिणती पाच झार ही।

²²बा बाता क पाछै ईसु आपका चेलानै बोल्यो, “थे न्याव म बेठर दरिआव क परलै नाकै चालो म आ मिनखानै बिदा कर आऊँ हूँ।”

²³अर बे मिनखानै बिदा कर डूँगर प अरदास करबा ताँई चलेग्या। बो मोड़ै ताँई एकलोई हो।

²⁴अर बाका चेला न्याव म बेठर किनाराऊँ कोसा दूर चलेग्या अर न्याव लेहराऊँ झोला खाबा लागी। क्युं क सामै की भाळ ही।

²⁵भागपाट्या ईसु पाणी प चालतो होयो बाकन गयो।

²⁶चेला बानै पाणी प चालता देख्या जणा डरग्या अर आपसरी म खेबा लाग्या, “ओ तो भूत ह!” अर आ खेर बे सगळा डर क मारै चिलाटी घालबा लाग्या।

²⁷ईसु तावळोसो बाऊँ बोल्यो, “हिमत राखो म हूँ! थे मना डरो।”

²⁸पतरस बाकी इ बातानै सुणर बोल्यो, “परबु ज थे हो तो मनै बी इ पाणी प चालर थारै कनै आबा ताँई हुकम द्‍यो।”

²⁹ईसु बिनै ओडायो, “आज्या।” अर पतरस न्यावऊँ उतर ईसु कानि चाल पड़्यो।

³⁰पण जद बिको ध्यान लेहरा कानि गयो जणा बो डरगो अर डूबबा लाग्यो। जणा बो जोरऊँ बोल्यो, “परबु मनै बचाओ।”

³¹ईसु तावळासा हात बढार बिनै पकड़ लिआ अर बिऊँ बोल्या, “हे थोड़ो बिस्वास राखबाळा तू भेम क्युं कर्यो?”

³²बिकै पाछै बे न्याव प आगा अर भाळ थमगी।

³³अर न्याव म जत्ता बी मिनख हा बे सगळा बाकी जे-जैकार करता होया बानै खेबा लाग्या, “थे सचमई परमेसर का बेटा हो।”

³⁴बे दरिआव पार कर गनेसरत नगरी का किनारा प पुग्या।

³⁵जणा बठै का मिनख ईसुनै पिछाण्गा अर बाकै आबा की खबर आस-पास की झघा म फेला दिनी। जिऊँ लोग सगळा रोगलानै बठै ले आया।

³⁶अर बे ईसुऊँ अरदास करै हा क बो बानै आपका गाबा की कोर क हात अड़ाबा दे अर जत्ता बी बिकै हात अड़ाया बे निरोगा होगा।