Read Shekhawati मत्ती 18 Bible Online

मत्ती 18 - Shekhawati bible

मत्ती 18

¹बि टेमई चेला ईसु कनै आर खया, “जद परमेसर थानै राजा बणासी बि टेम म्हारै मऊँ सऊँ बडो कूण होसी?”

²जणा ईसु एक टाबरियानै कनै बुलार म्हारै बिचमै खड़्यो कर्यो।

³अर बोल्यो, “म थारूँ सची खेऊँ हूँ ज थे थारी सोचनै बदलर इ नान्या की जंय्यां कोनी बणो जणा ताँई थे परमेसर का राज म कोनी बड़ सकोगा।

⁴इ ताँई जखो बी इ नान्या की जंय्यां नरमाईऊँ जीवन जीवै ह बोई ईस्बर नगरी राज म सऊँ बडो होसी।

⁵अर जखो इ टाबर की जंय्यां का टाबरानै मेरी बजेऊँ अपणावै ह बो परमेसर की नजर्या म मनै अपणावै ह।

⁶“पण मेर प बिस्वास करबाळानै पाप म गेरबा को ज कोई कारण बणै ह। जणा बि ताँई चोखो ह क बिकै नाड़ म घरट घालर समदर क मांयनै गेर दिओ जावै।

⁷हाय ह जगत का मिनखा प जखा मेर प बिस्वास करबाळा ताँई आखळी बणै ह। आतो हो कोनी सकै क मेर प बिस्वास करबाळा मिनखानै बिस्वास म कमजोर करबाळा मिनख नइ मिलै। पण अंय्यां करबाळा प हाय पड़सी।

⁸इ ताँई ज तेरो हात नहिस पग तनै पाप म गेरै जणा बानै काट फेक। क्युं क हात-पग होतासोता बी कदैई नइ बुत्तबाळी आग म बळबाऊँ तो लुलो-लंगड़ो होर जीवन म बड़बो चोखो ह।

⁹ज तेरी आँख तनै पाप म गेरै जणा बिनै फोड़ दे, क्युं क दो आँख्या होतासोता नरक की आग म पड़बाऊँ तो काणो होर जीवन म बड़बो चोखो ह।

¹⁰“सुणो थे मेरो खयो मानबाळानै निचो मना जाणो क्युं क ईस्बर नगरी दुत थारो लेखो-जोखो मेरा परम-पितानै देवै ह।[18]

¹²म थानै बुजूँ हूँ ज खिकन सो लल्डी हो अर बामैऊँ एक लल्डी गुमज्या जणा बो बा निन्याणमनै डूँगर म छोडर बि लल्डीनै ढुंढबा कोनी ज्यासी के? बो पक्कोई ज्यासी।

¹³म थारूँ सची खेऊँ हूँ जद बा लल्डी बिनै लाध्यावै जणा बो बा निन्याणमऊँ बेत्ती बि लाधेड़ी लल्डीऊँ राजी होसी।

¹⁴अंय्यांई थारो परम-पिता जखो ईस्बर नगरी म ह। बो बी कोनी चावै क आ अणभोळ मिनखा मऊँ एक बी नास होवै।

¹⁵“ज तेरो बिस्वासी भाई तेरै सागै[19] बुरो करै जणा तू बिनै एकला म लेज्यार बिनै बिकी गळती बता, अर जद बो थारी बात सुणर बिनै मानले जणा तू बिनै नास होबाऊँ बचा लिओ ह।

¹⁶पण ज बो तेरी बात कोनी मानै जणा तू एक नहिस दो जणानै सागै लेर बिकन जा जिऊँ सास्तर म मंड्या गेल दो नहिस बिऊँ बेत्ती गुवा की गुवाईऊँ बिपै आरोप सिद होज्या।

¹⁷अर ज बो बाकी बात बी कोनी मानै जणा बिस्वासी मंडळी का मिनखानै बिकै बारां म बता। अर बो ज बिस्वासी मंडळी का मिनखा की बात बी कोनी मानै तो थे बिकै सागै बंय्यां को बरताव करो जंय्यां की चुंगी लेबाळा अर परमेसरनै नइ ध्यारबाळा क सागै कर्यो जावै ह।

¹⁸म थानै सची खेऊँ हूँ जोक्यु तू धरती प बंद करसी बिनै परमेसर ईस्बर नगरी म बंद कर देसी अर जोक्यु तू धरती प खोलसी बिनै परमेसर ईस्बर नगरी म बी खोल देसी।

¹⁹अर म थारूँ सची खेऊँ हूँ ज दो मिनख इ धरती प एक मन होर मेरा परम-पिताऊँ जखो ईस्बर नगरी म ह बिऊँ जोक्यु माँगसी जणा बो देसी।

²⁰क्युं क जठै दो नहिस तीन मेरै नामनै लेबा ताँई भेळा होसी जणा म बठै बाकै सागै होस्युं।”

²¹पतरस ईसु कनै जार बाऊँ बुजबा लाग्यो, “ओ परबु, ज मेरो पाड़ोसी भाईड़ो मेरो बुरो करै जणा म बिनै कत्ती बार माफ करूं? म बिनै सात बार माफ करूं के?”

²²ईसु बिनै खयो, “सात बारई नइ, पण सात का सत्तर गुणा बार माफ करजे।

²³ईस्बर नगरी का राज की बराबरी बि राजा क सागै करी जा सकै जखो आपका दासाऊँ लेखो-जोखो लेबा की सोची।

²⁴अर जद बो बा दासाऊँ लेखो-जोखो लेर्यो हो जणा एक मिनख बिकै सामै ल्याओ गयो जिकै बो दस हझार चाँदी का सीक्का[20] माँगतो हो।

²⁵पण बि मिनख क कनै राजानै चुकाबा ताँई कोडोई कोनी हो, इ ताँई बो राजा सिपाईड़ानै हुकम दिओ, ‘इ मिनखनै इकी लूगाई अर टाबर-टिकरा क सागै बेचर मेरो हिसाब पूरो करद्‍यो।’

²⁶आ सुणर बो मिनख राजा क पगा म पड़र अरदास कर खेबा लाग्यो, ‘हे मेरा मालिक थे थ्यावस राखो म थारी पाई-पाई चुका देस्युँ।’

²⁷राजानै बिपै तरस आयो इ ताँई बे बिनै छोड दिओ। अर बिको करजो बी माफ कर दिओ।

²⁸पण जद बो मिनख बठैऊँ जार्यो हो जणा आपका सागैहाळा एक दासऊँ मिल्यो जिकै बो सो दिनार[21] माँग्या करतो हो, बो बिनै पकड़र खयो, ‘मेरा रिपीआ चुका।’

²⁹जणा बो दास बिकै पगा म पड़र बोल्यो, ‘थे थ्यावस राख्यो म थारी पाई-पाई चुका देस्युँ।’

³⁰पण बो बिकी एक बी कोनी सुणी अर बिनै लेज्यार काळ-कोठड़ी म गेर दिओ। अर बिऊँ खयो, ‘जद ताँई तू मेरी पाई-पाई नइ चुका दे अठैई सिड़सी।’

³¹बिनै अंय्यां करता देख दुसरा दास बोळा दुखी होया अर बठै जोक्यु बी होयो हो बिकै बारां म राजानै खे सुणाई।

³²जणा राजा बि पेलड़ा दासनै आपकै कनै बुलार बिऊँ खयो, ‘हे कुटिचर मिनख जद तू मेरूँ अरदास करी जणा म तनै अर तेरो सगळो करजो माफ कर दिओ हो।

³³इ ताँई जंय्यां म तेर प दया करी ही बंय्यांई तनै बी तेरा सागैहाळा दास प दया करबो चाए हो।’

³⁴अर बो राजा झाळ्या म भर'र बि मिनखनै सिपाईड़ा क हाता सूप दिओ अर खयो, ‘जद ताँई ओ पाई-पाई नइ चुका दे इनै केद राखो।’

³⁵इ ताँई ज थे बी थारा पाड़ोसी भाईड़ानै मनऊँ माफ कोनी करस्यो जणा मेरो परम-पिता जखो ईस्बर नगरी म रेह्‍वै ह बो बी थारै सागै बंय्यांई करसी।”