Read Shekhawati मत्ती 19 Bible Online

मत्ती 19 - Shekhawati bible

मत्ती 19

¹ईसु अ बाता खेर गलिलऊँ चलेग्या अर यरदन नदि क पार यहूदि भौम म आगा।

²जणा बोळीसारी भीड़ बाकै गेल होलिनी, अर बे रोगलानै निरोगा कर्या।

³जणा फरिसी ईसुनै बिचासबा ताँई बाऊँ बुज्या क, “नेम-कायदो कोई मिनखनै कोई बी बजेऊँ तलाकनामो देबा ताँई खेवै ह के?”

⁴ईसु बानै बोल्यो, “थे ओ कोनी बाच्या के? बानै बणाबाळो सरूआतऊँई बानै नर अर नारी कर बणायो ह।

⁵जणाई तो मिनख आपका माँ-बापऊँ न्यारो होर बी आपकी लूगाई क सागै रेह्‍वै ह। अर बे एक जीव होवै ह।

⁶जणा बे इब दो कोनी, पण एक जीव ह। इ ताँई जिनै परमेसर जोड़्यो ह, बिनै मिनख न्यारो नइ करै।”

⁷बे ईसुनै बोल्या, “जणा मूसा क्याले अंय्यां हुकम दिओ ह, क तलाकनामो देर बिनै छोड द्‍यो।”

⁸ईसु बानै बोल्यो, “मूसा मिनखा का मन की कल्डाईनै देखता बाकी लूगाईनै छोडबा ताँई खयो हो, पण सरूआत म अंय्यां कोनी हो।

⁹अर म थानै खेऊँ हूँ ज कोई लूगाई कुकरमी कोनी अर बिको मोट्यार बिनै छोडर दुसरीनै ब्याले ह जणा बो कुकरम करै ह।”

¹⁰आ बात सुणर चेला ईसुऊँ बोल्या, “ज आ बात साची ह, जणा चोखो तो ओ ह क मोट्यार ब्या नइ करै।”

¹¹ईसु बानै बोल्यो, “हर कोई इ सीख प कोनी चाल सकै, पण बेई मिनख चाल सकै जखानै परमेसर अंय्यां करबा की सक्‍ति दिनी ह।

¹²क्युं क कई तो अंय्यां का हीं जखा माँ का पेटऊँ नामरद होवीं हीं, अर कई अंय्यां का हीं जिनै लोगई नामरद बणा देवीं हीं। अर कई बे हीं जखा ईस्बर नगरी राज ताँई खुदई ब्या कोनी करै। जखो बी आ बचनानै लेबो चावै ह बो लेले।”

¹³बि टेमई मिनख आप-आपका टाबरानै ईसु कनै लेर आया जिऊँ बे बाका माथा प हात धर'र आसिरबाद देर अरदास करै पण चेला बानै दकाल्या।

¹⁴पण ईसु ओडायो, “टाबरानै आबा द्‍यो आनै मना मत करो क्युं क ईस्बर नगरी को राज अंय्यां का कोई ह।”

¹⁵अर बे टाबरा क माथा प हात धर'र बठैऊँ चलेग्या।

¹⁶एक मिनख ईसु कनै आर बोल्यो, “हे गरूजी अजर-अमर जीवन पाबा ताँई म कूणसो भलो काम करूं?”

¹⁷ईसु बिऊँ बोल्यो, “भलो कूण ह, इकै बारां म मेरूँ क्युं बुजै ह? पण भलो तो एकई ह अर ज तू अजर-अमर को जीवन चावै ह तो परमेसर का हुकमानै मान।”

¹⁸बो बुज्यो, “कूणसा हुकम?” ईसु बोल्यो, “हत्या मना करजे, कुकरम मना करजे, चोरी मना करजे, झूठी गुवाई मना दिजे,

¹⁹माँ-बाप को मान करजे अर जंय्यां तू खुदऊँ परेम करै ह बंय्यांई तेरा पड़ोसीऊँ परेम करजे।”

²⁰बो मोट्यार बोल्यो, “म तो आ सगळी बातानै मानू हूँ इब मेर म कूणसी कमी ह?”

²¹ईसु बोल्यो, “ज तू सिद होबो चावै ह जणा जार तेरी जमीन-जायजादा बेचर गरीबा म बाट दे इकै साटा को धन तनै ईस्बर नगरी म मिलज्यासी अर आर मेरै गेल होले।”

²²अंय्यां सुणर बिको मुंडो उतरगो अर बो दुखी होर बठैऊँ चलेगो। क्युं क बिकन अणाप-सणाप जायजाद ही।

²³जणा ईसु चेलानै खेबा लाग्यो, “म थानै सची-सची खेऊँ हूँ, क पिसाळा मिनख को ईस्बर नगरी का राज म जाबो बोळो ओखो ह।

²⁴पिसाळा मिनख को परमेसर का राज म बड़बाऊँ तो सूँई का नाकाऊँ ऊँट को निकळबो सोरो ह।”

²⁵अंय्यां सुणर चेला ताजूब करता होया बोल्या, “जणा कूण बचायो ज्यासी?”

²⁶ईसु बाकै कानि देखर बोल्यो, “आ मिनखाऊँ अणहोती बात ह, पण परमेसर सक्यु कर सकै ह।”

²⁷पतरस इ बातनै सुणर बोल्यो, “म्हें सक्यु तज'र तेरै गेल होलिआ हां म्हानै काँई मिलसी?”

²⁸ईसु बानै खयो, “म थानै सची-सची खेऊँ हूँ, नया जुग म जद मिनख को बेटो मेमाभर्या सिंघासन प बेठसी जणा थे बी जखा मेरै गेल होलिआ हो बारा सिंघासना प बेठर इजरायल का बारा गोता को न्याय करस्यो।

²⁹अर जखो बी मेरै ताँई आपका घरबार, सागे भाई-भाणा, माँ-बापानै, टाबरानै अर जमीन-जायजादनै तज्यो ह बिनै सो गुणा मिलसी। अर बो अजर-अमर जीवन जिसी।

³⁰पण बोळा हीं जखा आगै हीं बे पिछै होसी अर जखा पिछै हीं बे आगै होसी।