Read Shekhawati मत्ती 2 Bible Online

मत्ती 2 - Shekhawati bible

मत्ती 2

¹हेरोद राजा क राज करबा का दिना म यहूदिआ क बेतलम म ईसु को जलम होयो जणा अगुणी दिसाऊँ क्युंक ज्योतसी जखा चाँद-तारा को ज्ञान राखता हा यरूसलेम म आया।

²बे बुज्या, “यहूदि मिनखा को राजा होबा ताँई जलम्यो बो टाबरियो कठै ह? बिको तारो अगुणी दिसा म उग्यो जणा म्हें बि तारानै देख्या। म्हें बि टाबर की भगती करबा आया हा।”

³इ बात का समचार जद हेरोद राजानै लाग्या जणा बो अर यरूसलेम का बोळा मिनख घबरागा।

⁴जणा बो सगळा परधान याजक अर सास्तरानै सीखाबाळानै भेळा कर बाऊँ बुजबा लाग्यो, “मसी को जलम कठै होणो चाए?”

⁵बे बिऊँ बोल्या, “यहूदिआ क बेतलम म” क्युं क परमेसर की खेबाळो अंय्यां मांड्यो ह:

⁶“हे यहूदिआ दिसावर की बेतलम नगरी का मिनखो, थारी नगरी दुसरी नगर्याऊँ ख्याई कम कोनी; क्युं क इमैऊँ एक मिनख राजा बणसी, जखो इजरायल म रेह्बाळा मेरा मिनखा की मुख्याई करसी।”

⁷जणा राजा हेरोद ज्योतस्याँनै छानैसीक बुलार बुजबा लाग्यो क तारो सऊँ पेली की टेम चमक्यो।

⁸अर बो बानै अंय्यां ओडार बेतलम भेज्यो क, “बि टाबर क बारां म पाछा आर मनै ठिक-ठिक खबर दिज्यो जिऊँ क म बिकै धोक खार आऊँ।”

⁹बे राजा की बात सुणर चलेगा अर जखो तारो बानै अगुणी दिसा म दिख्यो हो। बो बाकै आगै-आगै चाल्यो अर जठै टाबर हो बि झघा जार रूकगो।

¹⁰जद बे बि तारानै देख्या जणा बोळा राजी होया।

¹¹बे घर म जार बि टाबरनै बिकी माँ मरीयम कनै देख्या, अर बि टाबर क आगै धोक खाई। अर आप-आपका झोळानै खोलर बिकै सोनो, लोबान अर धूप की भेंट चढाई।

¹²जद ज्योतसी सोर्या हा जणा सपना म परमेसर बानै चेतायो क, हेरोद कनै मना जायो, जणा बे दुसरा गेलाऊँ आपकै देस चलेग्या।

¹³ज्योतस्याँ क चल्या जाबा क पाछै परबु को एक ईस्बर नगरी दुत युसूफनै सपना म दरसाव देर ओडायो, “उठ अर टाबर अर बिकी माँनै लेर मिसर देस म भागज्या अर जद ताँई म तेरूँ नइ बोलुँ जद ताँई बठैई रेह्जे; क्युं क राजा हेरोद इ टाबरनै ढुंढर्यो ह। बो इनै मारबो चावै ह।”

¹⁴जणा बो रातनैई उठर टाबर अर बिकी माँनै लेर मिसर देस कानि चाल पड़्यो।

¹⁵अर जद ताँई हेरोद राजा कोनी मर्यो बे बठैई रिह्या। जिऊँ क बो बचन जखो परमेसर की खेबाळो बोल्यो हो पूरो होवै क, “म मेरा बेटानै मिसरऊँ बुलायो हूँ।”

¹⁶जद राजा हेरोद आ देख्यो क ज्योतसी मनै बावळो बणाग्या हीं जणा बो लाल-तातो होगो अर लोगानै भेजर ज्योतस्याँ क बताएड़ा टेम म बेतलम अर बिका आस-पास का सगळा टाबरानै जखा दो बरस अर बिऊँ छोटा हा बानै मरवा गेर्या।

¹⁷जणा जखा बचन यरमिआ परमेसर की खेबाळो खयो हो पूरा होया:

¹⁸“राहेल की नगरी रामा म बार-घोड़ो होर्यो ह; बा आपका टाबरा ताँई रोरी ह, अर चुप कोनी होबो चावै, क्युं क बिका टाबरिया इब इ दुनिया म कोनी रिह्या।”

¹⁹राजा हेरोद क मरबा क पाछै परबु को ईस्बर नगरी दुत मिसर म युसूफनै सपना म दरसाव दिओ,

²⁰अर बोल्यो, “उठ टाबर अर बिकी माँनै लेर इजरायल देस म चल्योजा, क्युं क जखा टाबर का पिराण लेबो चावै हा बे मरगा हीं।”

²¹जणा युसूफ टाबर अर बिकी माँनै सागै लेर इजरायल देस म आगो।

²²पण आ सुणर क अरखिलाउस आपका बाप हेरोद की झघा प यहूदिआ दिसावर प राज करबा लाग्यो ह, बठै जाबाऊँ डर्यो। अर ओज्यु सपना म परमेसर क खया गेल गलिल दिसावर म चलेगो।

²³अर नासरत नाम की नगरी म जा बस्यो, जणा बो बचन पूरो होयो, जखो परमेसर की खेबाळो बोल्यो हो: “बो नासरी खुवासी।”