Read Shekhawati मत्ती 22 Bible Online

मत्ती 22 - Shekhawati bible

मत्ती 22

²“ईस्बर नगरी को राज बि राजा की जंय्यां ह। जखो आपका बेटा का ब्या की रोटी की त्यारी करी।

³अर बो आपका दासानै भेज्यो क बे बा मिनखानै जानै नूतो दिओ गयो हो बानै जिमबा ताँई बुलार ल्यावीं। पण बे कोनी आया।

⁴बो राजा ओज्यु आपका दासानै आ ओडार भेज्यो क, ‘बाकन जार खेवो क पेसारो[22] त्यार ह, इ ताँई आओ अर जिमो।’

⁵जद जार बे दास बानै खया जणा बे बाकी बाता प गोर कोनी दिआ। अर आप-आपका खेत म अर काम-धंधा प चलेग्या।

⁶अर कई मिनख तो बा दासा क सागै मारा पिटी कर बाकी जान लेली।

⁷अर जद राजानै इ बात को बेरो चाल्यो जणा बो झाळ्या म भरगो अर आपका सिपाईड़ानै भेजर बा कुटिचर मिनखानै मरवा दिओ अर बाकी नगरी म आग लगवा दिनी।

⁸जणा राजा दासाऊँ बोल्यो, ‘पेसारो तो त्यार ह पण जिमबाळाई कुटिचर निकळ्या।’

⁹इ ताँई बो आपका दासानै बोल्यो, ‘थे गळी-कुचळ्या म जायो अर जत्ताबी मिनख थानै बठै मिलै बानै जिमबा ताँई बुलार ल्याओ।’

¹⁰बे दास गया अर बानै जत्ता बी भला-बुरा मिनख मिल्या बा सगळानै लेर आया अर बाऊँ तम्मू भरगो।

¹¹राजा बानै देखबा ताँई मांयनै आयो जणा बो बठै एक मिनखनै देख्यो जखो बे गाबा कोनी पेर राख्यो हो जखा ब्या म आबाळा म्हेमानानै सिमा'र दिआ गया हा,

¹²जणा राजा बिनै बोल्यो, ‘तू ब्या हाळा गाबा[23] पेर्या बिनाई मांयनै क्याले आगो।’ पण बो मिनख क्युंई कोनी बोल्यो।

¹³बिनै चुपचालो देखर राजा आपका दासानै ओडायो, ‘इका हात पगानै बांदके बारनै अँधेरा म फेक द्‍यो जठै ओ दांत पिससी अर बार घालसी।’”

¹⁴जणा ईसु बोल्यो, “इ निती-कथानै खेबा को मतबल ओ ह, क परमेसर बोळानै बुलाया ह पण टाळेड़ा क्युंकई ह।”

¹⁵फरिसी भेळा होर बतळाबा लाग्या, “ईसुनै कंय्यांसिक बिकिई बात म फसायो जावै।”

¹⁶जणा बे हेरोद का गुट का क्युंक मिनखा क सागै आपका चेलानै ईसु कनै भेज्या। अर बे ईसुनै कह्या, “गरूजी म्हें जाणा हां थे सचा हो अर परमेसर आपणाऊँ काँई चावै बिनै खराईऊँ बताओ हो। म्हें आबी जाणा हां थे मुंडो देखर टिको कोनी काडो अर नइ खिकी परवा करो हो।

¹⁷इ ताँई थे म्हानै बताओ कैसरनै चुंगी देणी चाए क नइ?”

¹⁸बो बाकी चाल भापगो अर बाऊँ बोल्यो, “कपट्यो थे मनै क्युं बिचासो हो?

¹⁹थे मनै एक सीक्को दिखाओ। जिनै थे चुंगी म दिआ करो हो” जणा बे बिनै एक दिनार दि।

²⁰अर ईसु बाऊँ बुज्यो, “इपै किको चितर अर किको आंक ह?”

²¹बे बोल्या, “रोम का समराट को” जणा ईसु बोल्यो, “जखो समराट को ह बो समराटनै द्‍यो अर जखो परमेसर को ह बो परमेसरनै द्‍यो।”

²²आ सुणर बे ताजूब म पड़गा अर बठैऊँ चलेग्या।

²³जनाड़ैई सदुकी बी ईसु कनै आया। बे मरेड़ा मऊँ ओज्यु जी उठबानै कोनी मानता हा। बे ईसुनै बुज्या,

²⁴“गरूजी मूसा ओडायो ह, जिको भाईड़ो बिना आस ओलादई मरज्यावै जणा बिको भाईड़ो बिकी लूगाईनै ब्याले। अर आपका भाईड़ा का वंसनै आगै बढावै।

²⁵म्हारै अठै सात भाईड़ा हा बा मऊँ बडोड़ा को ब्या होयो अर क्युंक दिना क पाछै बो बिना आस ओलादई मरगो। जणा बिको छोटक्यो भाईड़ो बिकी लूगाईनै ब्याली।

²⁶जणा बो दुसरो अर इकै पाछै तीसरो बी बिना आस ओलादई मरगो। अंय्यांई बा सात्यु भाईड़ा क सागै होयो।

²⁷अर आखीर म बा लूगाई बी मरगी।

²⁸जणा थे बताओ जद मिनख मरेड़ा मऊँ ओज्यु जी उठसी जणा बि लूगाई को मोट्यार बा सात्यु भाईड़ा मऊँ कूणसो होसी। क्युं क बे सात्युई बिनै ब्याली ही।”

²⁹ईसु बाऊँ बोल्यो, “थे गळत हो। थे नइ तो सास्तरानै जाणो अर नइ परमेसर की सक्‍तिनै।

³⁰सच तो ओ ह क मरेड़ा मऊँ ओज्यु जी उठबा क पाछै बा लूगाई बा मऊँ कोईसा किई लूगाई कोनी होसी। क्युं क ओज्यु जी उठबा क पाछै लूगाई-मोट्यारा म ब्या कोनी होवै पण बे ईस्बर नगरी दुता की जंय्यां होज्यासी।

³¹जठै ताँई मरेड़ा मऊँ ओज्यु जी उठबा को सुवाल ह, जणा के थे ओ कोनी बाच्यो? परमेसर खयो ह,

³²‘म अब्राहम को परमेसर इसाक को परमेसर अर याकूब को परमेसर हूँ।’ बो मर्या खप्या को कोनी पण जीवता को परमेसर ह।”

³³बे ईसु की इ सीखनै सुणर ताजूब म पड़गा।

³⁴जद फरिसी सुण्या की ईसु सदुकीयानै चोखो जुबाब देर बाको मुंडो बंद कर दिओ ह। जणा बे एक सागै भेळा होया।

³⁵अर बामैऊँ एक यहूदि सास्तरी ईसुनै अळजाबा ताँई बुज्यो,

³⁶“गरूजी नेम-कायदा म सऊँ बडो हुकम कूणसो ह?”

³⁷ईसु बिऊँ बोल्यो, “तू तेरा परबु परमेसरऊँ सगळा हिया, सगळा पिराण अर सगळी बुदीऊँ परेम कर।

³⁸ओई सऊँ बडो अर पेलो हुकम ह।

³⁹अर दुसरो हुकम बी इ झिसोई ह थारा पड़ोसीऊँ जंय्यां तू खुदऊँ परेम करै ह बंय्यांई परेम करजे।

⁴⁰नेम-कायदा अर परमेसर की खेबाळा की पोथ्या आ दो हुकमा पई टिकरी ह।”

⁴¹जद फरिसी भेळा हा, जणाई ईसु बाऊँ एक सुवाल बुज्यो,

⁴²“मसी किको बेटो ह थे बिकै बारां म काँई सोचो हो?” बे बोल्या “दाऊद को बेटो ह।”

⁴³जणा बो बाऊँ बोल्यो, “दाऊद पबितर आत्माऊँ भर'र बिनै परबु क्युं खेवै ह अर ओ मांडेड़ो बी ह;

⁴⁴“परबु मेरा परबुऊँ खेवै ह तू मेरै दायणै हात बेठ्यो रेह जद ताँई म तेरा दुस्मनानै तेरै पगा तळै नइ कर द्‍युँ।

⁴⁵“जद दाऊद बिनै परबु बोलै ह जणा बो बिको बेटो कंय्यां हो सकै ह?”

⁴⁶ईसु की बातानै सुणर बाको मुंडो बंद होगो अर बि दिन क पाछै बामैऊँ कोईसाकी ईसुऊँ ओज्यु सुवाल बुजबा की हिमत कोनी होई।