Read Shekhawati मत्ती 23 Bible Online

मत्ती 23 - Shekhawati bible

मत्ती 23

¹जणा ईसु चेला अर भीड़ऊँ बोल्यो,

²“परमेसर का नेम-कायदानै सीखाबाळा मूसा क पाछै इब सास्तरी अर फरिसी बिनै समजावीं हीं।

³इ ताँई बे जखो बी ओडावै बिनै मानज्यो अर बंय्यांई करज्यो। पण बे जखो करीं हीं बो मना करज्यो। क्युं क बे जखो बोलीं हीं बे खुद कोनी करीं।

⁴बे लोगा प बोळा नेम-कायदा लादीं हीं जानै मानबो मुसकील ह। पण बे बा नियमाऊँ एकनैई मानबा म कोईनैई आँगळी को सारोई कोनी देवै ह।

⁵बे जोक्यु बी करै ह बे मिनखानै दिखाबा ताँई करीं हीं। हात अर माथा प बांदबाळा ताबिजानै जिमै धरमसास्तर की पोथ्या धरी जावै ह, क्युं बेत्तीई चोड़ी करवावीं। अर आपका चोळानै बेत्तीई लामो करवावीं हीं। जिऊँ मिनख बानै धरमी जाणी।

⁶बे जिमणार अर अरदास करबाळी झघा म सऊँ चोखी झघा म बेठणो चावीं हीं।

⁷अर बे चावीं हीं क बजारा म मिनख बानै ईज्जत देर नमस्कार करै अर गरूजी[24] खेर बुलावीं।

⁸“थे जखा मेरा चेला हो खुदनै गरूजी मना खुवायो क्युं क थारो गरूजी एक ह अर बो म हूँ। थे सगळा भाई-भाण हो।

⁹थे धरती प कोईनैई बाप खेर मान मना दिज्यो क्युं क थारा सगळा को आत्मिक परम-पिता ईस्बर नगरी म रेह्बाळो परमेसर ह।

¹⁰अर नइ थे खुदनै सीख देबाळा खुवाज्यो क्युं क थानै सीख देबाळो एक ह अर बो मसी ह।

¹¹थारै मऊँ जखो बी बडो होबो चावै बो दास बणै।

¹²अर जखो बी बडो बणबो चासी बिनै छोटो कर्यो ज्यासी अर जखो बी छोटो बणसी बो बडो कर्यो ज्यासी।

¹³“हे कपट राखबाळो धरमसास्तर्यो अर फरिसीयो! थार प धिक्कार ह। थे लोगा का ईस्बर नगरी राज म जाबाळा गेलानै रोको हो। थे नइ तो खुद बि गेलै जाओ अर नइ लोगानै बि गेलै जाबा द्‍यो।[25]

¹⁵“हे कपट राखबाळा धरमसास्तर्यो अर फरिसीयो! थार प धिक्कार ह। थे कोईनै चेलो बणाबा ताँई बिकै हात धोर गेल होज्याओ हो अर जद बो यहूदि धरम पंथ म रळज्यावै ह। जणा थे बिनै थारूँ बेत्ती नरक म झोक द्‍यो हो।

¹⁶“यहूदि मिनखा का सरदारो थार प बी धिक्कार ह। थे बा आँदा मिनखा की जंय्यां हो जखा दुसरानै गेलो दिखाबा की कोसिस करीं हीं। जखा खेवो हो, ‘ज कोई मनदर की सोगन खावै बिनै बा सोगन कोनी लागै। पण ज कोई मनदर म रखेड़ा सोना की सोगन खावै ह बिनै बा सोगन लागसी।’

¹⁷अरै आँदो, बडो काँई ह? मनदर म धरेड़ो सोनो नहिस बडो अरदास घर जखो सोनानै पबितर बणावै ह?

¹⁸अर थे बोलो हो क, ‘ज कोई बेदी की सोगन खावै बिनै बा सोगन कोनी लागै पण बिपै रखेड़ा चढावा की सोगन लागसी।’

¹⁹अरै आँदो, आमै बडो काँई ह, चढाईड़ो चढावो नहिस बा बेदी जखी बिनै पबितर बणावै ह?

²⁰इ ताँई जखो बेदी की सोगन खावै ह बो बिपै चढाईड़ा चढावा की बी खावै ह।

²¹अर जखा मनदर की सोगन खावै ह बो मनदर अर बिमै रेह्बाळा परमेसर की बी सोगन खावै ह।

²²अर जखा ईस्बर नगरी की सोगन खावै ह, बे सिंघासन अर बिपै बेठबाळा परमेसर की सोगन खावै ह।

²³“हे कपट राखबाळा सास्तर्यो अर फरिसीयो! थार प धिक्कार ह। थे पोदिना, जीरा, अर सूंप को दसवो हिस्सो परमेसरनै द्‍यो हो। पण खास नेम-कायदानै मानबो टाळ द्‍यो जंय्यां क न्याय, दया अर बिस्वास, चोखो तो ओ होतो क थे बाकै सागै आनै बी मानता।

²⁴ओ आँदा सरदारो थे मछरनै तो छाणो हो पण ऊँटनै गिट ज्याओ हो।

²⁵“सास्तर्यो अर फरिसीयो! थार प धिक्कार ह, थे लालची अर मतलबी हो। थे बि कचोळा अर थाळी की जंय्यां हो जखा मांयनैऊँ नइ पण बारनै-बारनैऊँ मांज्या जावीं हीं।

²⁶ओ आँदो फरिसीयो जंय्यां कचोळा अर थाळीनै पेली मांयनैऊँ मांज्यो जावै जणा बे बारनैऊँ बी साप होज्यावीं हीं। जणा पेली थे थारा लालच अर मतबलनै छोडो। जणा पाछै थे धरम का काम करबा जोगा होज्यास्यो।

²⁷“हे कपट्यो धिक्कार ह थार प, थे चुनाऊँ पोतेड़ी कबर की जंय्यां हो। बे बारनैऊँ तो सोवणी लागै ह पण बाकै मांयनै मुरदो सिडै़ ह।

²⁸अंय्यांई थे बारनैऊँ तो धरमी दिखो हो पण थारै मांयनै बुराई भरी ह।

²⁹“हे कपटी धरमसास्तर्यो अर फरिसीयो! थार प धिक्कार ह, थे परमेसर की खेबाळा की कबर बणाओ हो, अर धरमी मिनखा की समादिनै सजाओ हो।

³⁰अर खेवो हो, ‘ज म्हें म्हारा बडका की टेम होता जणा परमेसर की खेबाळानै मारबा ताँई बाका साती कोनी होता।’

³¹अंय्यां खेर थे खुदई थारै खिलाप गुवाई द्‍यो हो क परमेसर की खेबाळानै मारबाळा की ओलाद हो।

³²जणा इब थारै बडका की कसर पूरी करल्यो।

³³“हे सपोलो थे काँई सोचो हो, के थे नरकऊँ बच ज्यास्यो।

³⁴इ ताँई म थानै खेऊँ हूँ, म थारै कनै परमेसर की खेबाळानै, बुदीमानानै अर गरूजीआनै भेजस्युं। पण थे बामैऊँ कया क तो अरदास करबाळी झघा म बेत मारस्यो, कयानै सतास्यो, कयानै सुळी प चढास्यो, कयानै मार गेरस्यो अर नगरी-नगरी थे बाको पिछो करस्यो।

³⁵इ ताँई थे हाबिलऊँ लेर बराखिया का बेटा जकरयाह ताँई जिनै थे मनदर अर बेदी क बिचमै मार्या हा जत्ता बी धरमी मिनखा की हत्या इ धरती प होई ह। बाकी सजा भोगस्यो।

³⁶म थानै सची बोलुँ हूँ अ सगळी बाता की सजा इ पिडी का मिनख भोगसी।

³⁷“ओ यरूसलेम का मिनखो थे परमेसर की खेबाळानै मारगेर्या अर जिनै परमेसर थारै कनै भेज्या बानै बी थे भाठा मार'र मारगेर्या हो। जंय्यां मुरगी आपका चुजानै पांखड़ा तळै भेळो करै ह बंय्यांई परमेसर बी कत्ती बार भेळो करबो चायो पण थे ओ कोनी चाया।

³⁸इ ताँई थारो बडो अरदास घर तज दिओ ज्यासी अर बो खाली होज्यासी।

³⁹म थानै सची बोलुँ हूँ थे इबऊँ मनै जद ताँई कोनी देखस्यो जद ताँई थे थारा मुंडाऊँ अंय्यां नइ खेदेस्यो क बो धने ह जखो परबु क नामऊँ आवै ह।”