Read Shekhawati मत्ती 24 Bible Online

मत्ती 24 - Shekhawati bible

मत्ती 24

¹जद ईसु मनदरऊँ बारनै जार्यो हो जणा चेला बाकन आर बोल्या, “देखो ओ बडो अरदास घर कतो सोवणो ह।”

²ईसु बानै बोल्यो, “थे इ हेलीनै खड़ी देखो हो? म थानै सची बोलुँ हूँ अठै एक भाठो बी कोनी रेह्सी। सगळा भाठा ढा दिआ जासी।”

³जद ईसु जेतून की डूँगरी प बेठ्यो हो जणा चेला एकला म आर बाऊँ बोल्या, “म्हानै बता अ बाता कद घटसी। तेरै आबा अर इ दुनिया का अंत को काँई सेलाणी होसी?”

⁴ईसु बानै बोल्यो, “थे समळर रेहज्यो थानै कोई छळ नइ ले।

⁵म थानै अंय्यां इ ताँई बोलुँ हूँ क्युं क मेरै नामऊँ बोळा आसी अर खेसी, ‘म मसी हूँ।’ अंय्यां बोलर बे बोळा मिनखानै धोको देसी।

⁶थे जद राड़ अर बिकी अफवा सुणो जणा मना डरज्यो। क्युं क आ बाता को होबो ते ह। पण बा घड़ी नास की कोनी होसी।

⁷मिनख-मिनख प अर राज-राज प चढाई करसी। अर हर कठैई भूचाळ आसी अर काळ पड़सी।

⁸पण अ सगळी बाता तो पिड़ा की सरूआतई ह।

⁹बा दिना म थानै सजा दिलाबा ताँई बे पकड़ासी अर मार गेरसी। क्युं क थे मेर प बिस्वास करो हो। इ ताँई सगळी दुनिया थारूँ नफरत करसी।

¹⁰बा दिना म बोळा मिनख बिस्वास करबो छोड देसी। एक दुसरानै धोकाऊँ पकड़ासी अर एक दुसराऊँ नफरत करसी।

¹¹बोळा झूठा परमेसर की खेबाळा आसी अर लोगानै भटकासी।

¹²बुराई बढज्यासी अर बोळा मिनखा मऊँ प्यार-परेम जातो रेह्सी।

¹³पण जखा आखरी ताँई सबर करसी बे बचाया ज्यासी।

¹⁴परमेसर का राज का चोखा समचार को हेलो पूरा जगत म पाड़्यो ज्यासी। जिऊँ जगत का सगळा मिनख परमेसर को बचन सुणै। जणा पाछै जार इ धरती को अंत होसी।

¹⁵“इ ताँई थे उजाड़बाळी सूगली चिजानै जठै नइ होणी चाए ही बठै देखो जिकै बारां म परमेसर की खेबाळो दानिअल बतायो हो। बाचबाळो आ बातानै हळकी नइ ले। [26]

¹⁶जणा जखा यहूदिआ म होवै, बानै डूँगरा म भाग ज्याणो चाए।

¹⁷अर जखा मिनख छात प होवै बे घर क मांय आपकी चिज लेबा नइ जावै।

¹⁸अर जखा खेत म होवै बे गरम गाबा लेबा ताँई ओटा नइ आवै।

¹⁹अ दिन बा लूगाया ताँई जखी आसऊँ होसी अर दुद प्याबाळी टाबरा की माँ ताँई बोळी पिड़ा का होसी।

²⁰थे अरदास कर्या करो क थानै अरामहाळा दिन नहिस स्याळा का दिना म नइ भागणो पड़ै।

²¹बा दिना म अंय्यां को कळेस होसी जखो नइ इ सरस्टि की सरूआतऊँ लेर इब ताँई कदै होयो अर नइ कदै होसी।

²²ज परमेसर बा दिनानै कम नइ करतो जणा कोईबी कोनी बचतो। पण बिका टाळेड़ा मिनखा की बजेऊँ परमेसर बा दिनानै कम कर दिओ ह।

²³बा दिना म थानै कोई खेवै, ‘देखो मसी अठै ह! नहिस बठै ह!’ जणा बाको बिस्वास मना करज्यो।

²⁴क्युं क झूठा मसी अर झूठा परमेसर की खेबाळा आसी, बे सेलाणी-चमत्कार अर ताजूब का काम दिखासी। अर ज होयो तो बे टाळेड़ा मिनखानै बी छळबा की कोसिस करसी।

²⁵पण थे सुणो म थानै अ सगळी बाता होबाऊँ पेल्याई बता दिनी ह।

²⁶इ ताँई ज कोई थानै खेवै क, ‘सुणो बो उजाड़ म ह’ जणा थे बठै मना जायो। अर ज कोई खेवै, ‘सुणो बो कोठा म लुखर्यो ह’ जणा बाको बिस्वास मना करज्यो।

²⁷जंय्यां अकास म बिजळी अगुणी दिसाऊँ लेर पाछुणी दिसा ताँई चमकै ह। अर सगळा मिनख बिनै देखै ह, बंय्यांई जद मिनख को बेटो आसी, जणा बिनै सगळा देखसी।

²⁸जठै क्युं मरेड़ो पड़्यो रेह्‍वै ह बठै गिरज कांवळा भेळा होवै ह।

²⁹“बा दिना म, बि कळेस क पाछै सूरज उजाळानै खो देसी अर चाँद बी कोनी चमकसी। अर अकास मऊँ तारा बी तळै पड़ मरसी। अर अकास की सक्‍तिया हलाई जासी जिऊँ बे आपकी झघा छोड देसी।

³⁰बि टेम अकास म मिनख का बेटा की आबा की सेलाणी दिखसी, जणा धरती का सगळा कूणबा का मिनख छाती पिटसी अर मिनख का बेटानै मेमा अर सक्‍ति क सागै बादळा म आतो देखसी।

³¹नरसिंगो फुक्यो जासी अर बो आपका ईस्बर नगरी दुतानै धरती प च्यारूमेर भेजसी। अर बे सगळी धरती पऊँ टाळेड़ा मिनखानै भेळा करसी।

³²“थे अंजीर का दरख्तऊँ सीखो जद बिकी डाळ्यां नरम होवै अर बिकै कुपळ फूटबा लागै ह। जणा थे बिनै देखर जाणज्याओ हो क उंदयाळो आबाळो ह।

³³अंय्यांई जद थे अ बातानै होता देखो जणा जाणज्याज्यो क मेरै ओज्यु आबा को टेम सांकड़ैई ह।

³⁴म थानै सची खेऊँ हूँ, जद ताँई अ बाता कोनी बितसी इ पिडी को नास कोनी होसी।

³⁵अकास अर धरती टळ ज्यासी पण मेरी बाता कोनी टळै।

³⁶“बि दिन अर बि घड़ी क बारां म कोईबी कोनी जाणै। नइ तो ईस्बर नगरी दुत अर नइ बेटो पण परम-पिताई जाणै ह।

³⁷जंय्यां नूह का टेम म होयो हो। बंय्यांई मिनख का बेटा क ओज्यु आबा की टेम होसी।

³⁸क्युं क जळ-परलै क पेली जद ताँई नूह झाज म कोनी चढ्यो हो बि घड़ी ताँई लोग खार्या-पीर्या हा अर ब्याया जार्या हा।

³⁹अर बानै बेरोई कोनी पड़्यो क कद जळ-परलै आर बानै भालेगो अंय्यांई मिनख का बेटा क ओज्यु आबा की टेम होसी।

⁴⁰बि टेम दो जणा खेत म होसी बामैऊँ जिको मेर प बिस्वास होसी बिनै सागै ले लिओ जासी दुसरानै छोड दिओ जासी।

⁴¹बंय्यांई दो लूगाई चाकी म दाणा पिसती रेह्सी बामैऊँ एकनै जिको मेर प बिस्वास ह बिनै सागै ले लिओ जासी अर दुसरीनै छोड दिओ जासी।

⁴²इ ताँई थे चेता म रेह्ओ क्युं क थे कोनी जाणो क थारो परबु कद आसी।

⁴³ज घर का मालिकनै ओ बेरो होतो की चोर की टेम आसी जणा बो चोरनै घर म आबाई कोनी देतो।

⁴⁴इ ताँई थे समळर रेहज्यो क्युं क मिनख को बेटो बि टेम आसी जि टेम क बारां म थे बिचारई कोनी कर सको।

⁴⁵“बो बिस्वास जोगो अर स्याणो दास कूण ह? जिनै बिको मालिक नोकर-चाकरा प मुखियो बणायो। जिऊँ बो बानै टेमुटेम रोटी-टुक देवै।

⁴⁶भागहाळो ह बो दास जखो आपका मालिक क पाछो आबा प बिनै बिका कह्या गेल करतो लाधै।

⁴⁷म थानै सची बोलुँ हूँ, बो मालिक बिनै आपकी सगळी जायजाद प मुनिम बणा देसी।

⁴⁸पण जखो कुटिचर दास होवै ह। बो मन म आ सोचर क मेरा मालिकनै तो हाल आबा म टेम ह।

⁴⁹अर नोकर-चाकरानै मारबा-कुटबा लाग्यो अर दारूकुट्या क सागै खाबा-पीबा लाग्यो।

⁵⁰जणा बिको मालिक अंय्यां क दिन आसी जि दिन अर जि घड़ी क बारां म बो सोच्योई कोनी।

⁵¹बो आर बिनै भेंकर सजा देसी अर बिको भाग कपट्या क सागै गिणसी जठै रोबो अर दांत पिसणो पड़सी।