Read Shekhawati मत्ती 25 Bible Online

मत्ती 25 - Shekhawati bible

मत्ती 25

¹“बि टेम ईस्बर नगरी को राज अंय्यां होसी मानो दस कुंआरी छोर्या आपको दिओ लेर बिंदऊँ मिलबा ताँई चाली।

²आमै पाच तो स्याणी अर पाच नासमज ही।

³नासमज छोर्या दिओ तो ले लिनी पण सागै तेल कोनी ली।

⁴पण स्याणी छोर्या आपका दिआ क सागै कुप्या म तेल बी भर लिनी।

⁵जद बिंदनै आबा म मोड़ो होयो जणा बे सगळी उंगबा लागी अर सोगी।

⁶आदी रात क रोळो माच्यो बिंद आर्यो ह बारनै चालर बिऊँ मिलो

⁷जणा बे छोर्या खड़ी होर आप-आपका दिआनै समाळी।

⁸अर जखी नासमज ही बे स्याणी छोर्याऊँ बोली, ‘थारा तेल मऊँ म्हानै बी द्‍यो। क्युं क म्हारो दिओ बुत्तबाळो ह।’

⁹पण बे बोली, ‘म्हारै कनै अत्तो तेल कोनी जिऊँ थानै अर म्हानै पूरो पड़ै, इ ताँई थे जार बेचबाळाऊँ मोल लेल्यो।’

¹⁰जद बे मोल लेबा ताँई जारी ही अत्ता मई बिंद आगो। अर जखी छोर्या त्यार ही बानै बिकै सागै ब्या हाळा कोठा म भेजर कुआड़ ढक दिआ गया।

¹¹जणा पाछै बे नासमज छोर्या बी आर खेबा लागी, ‘मालिक म्हारै ताँई कुआड़ खोलो।’

¹²पण बिंद बोल्यो , ‘म थानै सची बोलुँ हूँ, म थानै कोनी जाणू।’

¹³इ ताँई थे चेता म रेहज्यो क्युं क थे नइ तो बि दिन क बारां म अर नइ बि घड़ी क बारां म जाणो हो।

¹⁴“ईस्बर नगरी को राज बि मिनख की जंय्यां ह। जखो दिसावर जाबाऊँ पेली आपका दासानै बुलार बानै क्युंक पिसो-टक्को दिओ।

¹⁵बो बानै बाकी उजमा गेल पिसा दिआ। एकनै चाँदी हाळा सीक्काऊँ भरेड़ी पाच थेली, दुसरानै दो अर तीसरानै एक देर दिसावर चलेगो।

¹⁶अर जिनै पाच थेली मिली ही बो बाऊँ पाच ओर कमाली।

¹⁷अर जिनै दो मिली ही बो बाऊँ दो ओर कमाली।

¹⁸पण जिनै एक मिली ही बो बिनै जमीन म खाडो खोदर गाड दिओ।

¹⁹बोळा दिना क पाछै बाको मालिक आयो। अर बाऊँ हिसाब-किताब माँगबा लाग्यो।

²⁰जणा जिनै पाच थेली मिली ही बो ओर पाच थेल्या क सागै आयो अर खयो, ‘मालिक म थारी पाच थेल्याऊँ ओर पाच थेल्या कमाली।’

²¹बिकी इ बातनै सुणर मालिक खयो, ‘स्याबास तू बिस्वास जोगो अर चोखो दास ह। तू थोड़ा म बिस्वास राख्यो इ ताँई म तनै ओर बोळी चिजा प अधिकार देस्युँ। आर मेरै सागै खुसी मना।’

²²बिकै पाछै दो थेली हाळो आर खयो, ‘मालिक थे मनै दो थेली दिआ हा। जिऊँ म दो ओर कमाली।’

²³मालिक बिनै बी बोल्यो, ‘स्याबास तू बी बिस्वास जोगो अर चोखो दास ह। तू बी थोड़ा म बिस्वास राख्यो इ ताँई म तनै बी बोळी चिजा प अधिकार देस्युँ। आर मेरै सागै खुसी मना।’

²⁴बिकै पाछै एक थेली हाळो दास आयो अर खयो, ‘मालिक थे बोळा निरदई हो। थे जठै कोनी बोओ बठैऊँ काटो हो, अर जठै कोनी बिखेर्यो बठैऊँ सोरो हो।

²⁵इ ताँई म डरगो अर इ धननै लेज्यार जमीन म गाड दिओ। ओ ल्यो थारो धन।’

²⁶बो मालिक बिऊँ खयो, ‘तू आळसी अर ख्याई जोगो कोनी, तू मनै जाणता बुजता बी क, म जठै कोनी बोऊँ बठैऊँ काटूँ हूँ जठै कोनी बिखेरूँ बठैऊँ सोरूँ हूँ।

²⁷इ ताँई तनै अंय्यां करबो चाए हो क मेरा धननै साऊकारनै ब्याजुणा दे देतो। जिऊँ म आर बाऊँ ब्याज समेत ओटो ले लेतो।

²⁸इकै कनैऊँ आ थेली लेल्यो अर जिकै कनै दस थेल्या ह बिनै देद्‍यो।

²⁹क्युं क जिकनै ह बिनै ओर दिओ जासी, अर जिकै कनै कोनी बिऊँ जोक्यु बिकन ह बो बी ले लिओ जासी।

³⁰इ ताँई इ दासनै जखो ख्याई जोगो कोनी बारनै काडो अर अँधेरा म पटक्याओ। जठै मिनख बार घाली अर दांत पिसै ह।’

³¹“मिनख को बेटो जद ओज्यु आसी। जणा बो आपकी मेमा अर ईस्बर नगरी दुता क सागै आसी। बो एक राजा की जंय्यां आपका मेमाभर्या सिंघासन प बेठसी।

³²जणा बिकै सामै धरती का सगळा मिनख आसी। अर बो बानै अंय्यां एक दुसराऊँ न्यारा करसी जंय्यां गुवाळ्यो बकर्याऊँ लल्ड्यानै न्यारो करै ह।

³³बो धरमी मिनखानै दाया नाकै अर अधरम्यानै बाया नाकै राखसी। जंय्यां क गुवाळ्यो लल्ड्यानै अर बकर्यानै न्यारै-न्यारै राखै ह।

³⁴जणा बो राजा आपकै दाया कानि खड़्या मिनखाऊँ बोलसी, ‘मेरा परम-पिताऊँ आसिरबाद लियड़ा मिनखो थे आओ अर बा आसिरबादानै लेल्यो जखा इ सरस्टि की सरूआतऊँ थारै ताँई ह।

³⁵क्युं क जद म भूखो हो जणा थे मनै खाबा ताँई दिआ अर जद म तिसायो हो जणा थे मनै पीबा ताँई दिआ, जद म अणजाण हो जणा थे मनै थारै घर म बासो दिआ।

³⁶जद म उघाड़ो हो जणा पेरबा ताँई गाबा दिआ। अर जद म रोगलो हो जणा मेरी खेचळ करी अर जद म केद हो जणा मेरूँ मिलबा आया।’

³⁷जणा धरमी मिनख बुजसी, ‘मालिक म्हें थानै कद भूखो देखर खाबा ताँई दिआ अर कद थानै तिसायो देखर पीबा ताँई दिआ?

³⁸अर कद म्हें थानै अणजाण देखर म्हारै घरा म बासो दिआ? कद थानै उघाड़ो देखर पेरबा ताँई गाबा दिआ?

³⁹थे कद रोगला हा अर केद म हा जखो म्हें थारूँ मिलबा आया?’

⁴⁰जणा बो राजा खेसी, ‘म थारूँ सची बोलर्यो हूँ, जोक्यु बी थे थारा भोळा-ढाळा भाई-भाणा ताँई कर्या हो बो थे मेर ताँई कर्या हो।’

⁴¹बाकै पाछै बो राजा आपकै बाया हात खड़्या मिनखाऊँ खेसी, ‘हाय ह थार प। थे मेरै कनैऊँ चल्या जाओ। अर जखी कदैई नइ बुत्तबाळी आग सेतान अर बिका दुता ताँई बाळ राखी ह बिमै पड़ मरो।

⁴²क्युं क जद म भूखो हो जणा थे मनै खाबा ताँई कोनी दिओ। अर जद म तिसायो हो जणा पीबा ताँई कोनी दिआ।

⁴³अर जद म अणजाण हो जणा थे मनै थारै घरा म बासो कोनी दिआ। जद म उघाड़ो हो जणा पेरबा ताँई गाबा कोनी दिआ। अर जद म रोगलो अर केद म हो जणा थे मेरी समाळ कोनी करी।’

⁴⁴जणा बे बुजसी, ‘परबु थे कद तो भूखा, अर कद तिसाया, अर कद अणजाण, अर कद थानै गाबा की जुर्त ही, अर कद थे रोगला हा अर कद थे केद म हा जखो म्हें थारी तिथ कोनी ली?’

⁴⁵म थारूँ सची खेऊँ हूँ, जद कदै बी थे मेरा भोळा-ढाळा मिनखा मऊँ एक को बी भलो कोनी कर्या इको मतबल ओई ह क थे मरै ताँई क्युंई कोनी कर्या।

⁴⁶जणा बे मिनख कदैई नइ खतम होबाळी सजा पासी अर धरमी मिनख अजर-अमर जीवन पासी।”