Read Shekhawati मत्ती 27 Bible Online

मत्ती 27 - Shekhawati bible

मत्ती 27

¹दिन उगताई परधान याजक अर यहूदि नेता एक मत होया क ईसुनै कंय्यांसिक मोत की सजा दिवाई जावै।

²अर बे ईसु का हातानै बांदके रोमी राजपाल पीळातुस कनै लेग्या। अर बिकै हाता म बिनै सूप दिआ।

³ईसुनै धोकाऊँ पकड़बाळो यहूदा जद आ सुण्यो क ईसुनै दोसी गिण्यो गयो ह। जणा बो पछतायो अर परधान याजक अर यहूदि नेता कनै चाँदी हाळा तीस सीक्का लेर ओटो गयो।

⁴अर खयो, “म निरदोस मिनखनै धोकाऊँ पकड़ार पाप कर्यो हूँ।” अंय्यां सुणर बे बोल्या, “म्हानै इऊँ काँई लेणो ओ तो तेरो मामलो ह।”

⁵अंय्यां सुणर यहूदा बा चाँदी का सीक्कानै मनदर क मांयनै फेकर चलेगो अर जार खुद क फासी लगाली।

⁶जणा परधान याजक बा सीक्कानै उठार खया, “आ सीक्काऊँ एक मिनखनै मारबा ताँई मोल लेयड़ो ह। अर आपणो बिधी-बिधान आनै मनदर की दान पेटी म धरबा की इजाजत कोनी देवै।”

⁷इ ताँई बे आपसरी म फेसलो कर आ सीक्काऊँ एक खुमार को खेत मोल लिआ जिऊँ यरूसलेम म आबाळा पराया मिनखा क मरबा क पाछै बानै गाड सकै।

⁸इ ताँई बो खेत आज ताँई “लोय को खेत” खुवावै ह।

⁹अर अंय्यां परमेसर का खेबाळा यरमिआ को मांडेड़ो बो आंक बी पूरो होयो; “बे चाँदी का तीस सीक्का लिआ, आ बा रकम ह जखी बि खातर इजरायल का मिनख देबा ताँई त्यार होया।

¹⁰अर जंय्यां परबु मनै हुकम दिओ हो बे बंय्यांई बि रकमऊँ खुमार को खेत मोल लिआ।”

¹¹ईसुनै बे राजपाल पीळातुस क सामै लेग्या अर बो बिऊँ बुज्यो, “के तू यहूदिआ को राजा ह?” ईसु बोल्यो, “हाँ म हूँ जंय्यां थे बोल्या हो।”

¹²अर जद परधान याजक अर यहूदि नेता बिपै बोळी बाता को दोस लगावा हा बि टेम ईसु क्युंई कोनी बोल्यो।

¹³जणा पीळातुस बोल्यो, “तू सुणै हनै अ तेर प कत्ता दोस लगार्या हीं?”

¹⁴पण ईसु पीळातुसनै क्युंई जुबाब कोनी दिओ। आ देखर बिनै बिपै ताजूब होयो।

¹⁵फसै का त्युंहार प पीळातुस रीत गेल एक केदिनै जिनै लोग चाता बिनै बा ताँई छोड देतो हो।

¹⁶बि टेम बरअबा[28] नाम को एक केदि बठै हो जिनै सगळा जाणता हा।

¹⁷अर बठै भीड़ भेळी होगी जणा पीळातुस बाऊँ बुज्यो, “थे काँई चाओ हो क म थारै ताँई किनै छोडूँ बरअबानै नहिस ईसुनै जिनै थारै मऊँ क्युंक मसी बतावै ह?”

¹⁸बो ओ सुवाल इ ताँई बुज्यो, क्युं क बो जाणतो हो यहूदि अधिकारी जळता-बळता ईसुनै पकड़ाया ह।

¹⁹अर जद पीळातुस न्यायहाळा सिंघासन प बेठ्यो हो जणा बिकी लूगाई बिकन एक संदेसो भेज्यो। जिमै मंडर्यो हो क, “सुआरैसिक म सूपना म इ मिनख की बजेऊँ बोळो दुख पाई हूँ। जणा इ धरमी मिनख क सागै क्युंई बुरो मना करज्यो।”

²⁰पण परधान याजक अर यहूदि नेता जनतानै उकसाया क म्हारै ताँई बरअबानै छोड दे अर ईसुनै मार।

²¹जणा राजपाल पीळातुस बाऊँ बुज्यो, “थे आ दोन्या मऊँ कूणसानै छुटाबो चाओ हो?” बे बोल्या, “बरअबानै!”

²²जणा पीळातुस बाऊँ बुज्यो, “म इ ईसु को जखो मसी खुवावै ह काँई करूं?” बे सगळा बोल्या, “इनै सुळी प चढा द्‍यो।”

²³पीळातुस बुज्यो, “क्युं ओ लाय काँई बुरो कर्यो ह?” पण बे ओर बी जोरऊँ बोल्या, “इनै सुळी प चढावो।”

²⁴पीळातुस आ देखर सोच्यो इब क्युंई कोनी हो सकै ज म भीड़ क खिलाप जास्युं तो दंगो हो सकै ह। इ ताँई बो पाणी लेर भीड़ क सामै हात धोर खयो, “इ मिनख की मोत म मेरो कोई लेणदेण कोनी आ थारी करनी ह।”

²⁵जणा बे सगळा बोल्या, “इका जिमेबार म्हें अर म्हारा टाबर-टिकर हीं।”

²⁶जणा पीळातुस बा ताँई बरअबानै तो दिओ छोड अर ईसु क बेत पड़वार सुळी प चढाबा को हुकम दे दिओ।

²⁷सिपाईड़ा ईसुनै राजपाल पीळातुस क गड का आँगणा म लेग्या। अर बिकै च्यारूमेर सिपाईड़ा की सगळी पलटण भेळी होगी।

²⁸बे बिका गाबा उतार बिनै उजळा लाल रंग को गाबो पिराया।

²⁹जणा बे बिका सीर प काटाहाळी डाळ्यां को मुकट बणार धर दिओ। अर बिका दाया हात म कामड़ी[29] पकड़ा दिनी अर बिकै आगै गोडा टे'कर हसताई खया, “यहूदिआ का राजा नमस्कार।”

³⁰बे बिपै थूकर्या अर बा कामड़ी लेर बिकै सीर प मार्या।

³¹अर बे बिको मजाक उडार बिका बो गाबो तो लिआ काड, अर पाछा बिकाई गाबा पिरार, बिनै सुळी प चढाबा ताँई चाल पड़्या।

³²अर जद बे बारनै निकळर क्युंक दूर गया जणा बानै कुरेन को रेह्बाळो समोन नाम को एक मिनख मिल्यो। अर बिनै धमकार खया, “ईसु की सुळी उठार चाल।”

³³अर जद बे गुलगुता जिको मतबल खोपड़ी की झघा ह पुग्या।

³⁴जणा बे ईसुनै पित मिलेड़ी अँगूरी पिलाबा ताँई दिआ। पण ईसु बिनै चाख्यो जणा कोनी पीयो।

³⁵इकै पाछै बे ईसुनै सुळी प चढा दिओ, अर ईसु का गाबा प परची गेर'र आपसरी म बाट लिआ।

³⁶अर बे बठैई बेठगा अर पेरो देबा लागगा।

³⁷बे बिको दोस पतर सुळी प चिपका दिओ जिपै मंडर्यो हो “ओ यहूदि मिनखा को राजा ईसु ह।”

³⁸बि टेमई ईसु क सागै दो डाकू बी सुळी प चढाया गया हा एकनै तो ईसु क दाया नाकै अर दुसरानै बाया नाकै।

³⁹आबाळा जाबाळा नाड़ हला-हलार ईसु की बुराई करा हा।

⁴⁰अर खेर्या हा, “मनदरनै ढाबाळा अर तीन दिना म ओज्यु बणाबाळा खुदनै बचा, परमेसर का बेटा सुळीऊँ तळै उतर्या।”

⁴¹अंय्यांई बोलर परधान याजक, सास्तरानै सीखाबाळा अर यहूदि नेता क सागै मिलर बिको तमासो करर्या हा। अर खेर्या हा,

⁴²“दुसरानै बचाबाळा पेल्या खुदनै तो बचा! ज तू यहूदिआ को राजा ह जणा सुळी पऊँ तळै उतर्या। जणा म्हें तेर प बिस्वास करस्यां।

⁴³ओ बोळो परमेसर प बिस्वास कर्या करतो हो। ओ खेतो हो क म परमेसर को बेटो हूँ जणा ज परमेसर चावै तो इनै बचावै।”

⁴⁴अर बे डाकू बी जखा बिकै सागै सुळी प चढाया गया हा बिको तमासो करर्या हा।

⁴⁵दोपारा बारा बजेऊँ लेर तीन बजै ताँई सगळा देस म अँधेरो छायो रिह्यो।

⁴⁶अर करीब तीन बजैसीक ईसु जोरकी उवाज म चिलाटी घाली, “इलोई, इलोई, लमा सबकतनी?” जिको मतबल ह, “हे मेरा परमेसर तू मनै क्युं तज दिओ?”

⁴⁷अर जखा मिनख बठै खड़्या हा बे अंय्यां सुणर खेबा लाग्या, “ओ परमेसर की खेबाळा एलिआनै बुलातो दिखै ह।”

⁴⁸जणा एक मिनख तावळोसो भागर चुखानै खाटी अँगूरी म भेर लाठी प टां'गर ल्यायो अर ईसुनै चुसबा ताँई दिओ।

⁴⁹अर कई मिनख खया, “डटो आपा देखस्यां इनै एलिआ बचाबा आवै ह क कोनी।”

⁵⁰अर ईसु जोरऊँ चिलाटी मार'र पिराण तज दिओ।

⁵¹अर बि टेमई मनदर को परदो उपरऊँ लेर निचै ताँई पा'टर दो भाग होगो। धरती हालगी अर ढाड बी तिड़कगी।

⁵²अर अठै ताँई क क्युंक कबरा बी खुलगी अर परमेसर का बोळा मरेड़ा मिनख ओज्यु जीगा।

⁵³बे कबराऊँ निकळर ईसु क जीबा क पाछै पबितर यरूसलेम म जार बोळानै दिख्या।

⁵⁴रोमी सेना को सुबेदार अर ईसु क पेरो देबाळा मिनख भूचाळ अर जखो बठै घट्यो हो बिनै देखर डरग्या। अर खया, “ओ सचमई परमेसर को बेटो हो।”

⁵⁵बठै घणीसारी लूगाया बी ही बे ईसुनै परैऊँई खड़ी-खड़ी देखै ही बे बिकी सेवा करबा ताँई गलिलऊँ बिकै गेल आई ही।

⁵⁶बा लूगाया म मरीयम मगदलिनी, याकूब अर युसूफ की माँ मरीयम अर याकूब अर यहून्ना की माँ ही।

⁵⁷जद दिन आथगो जणा अरमतिया नगरऊँ युसूफ नाम को एक पिसाळो मिनख आयो। ओ ईसु को चेलो हो।

⁵⁸ओ पीळातुस कनै गयो अर बाऊँ ईसु की लास माँगी। जणा पीळातुस हुकम दिओ इनै लास दे दि जाय।

⁵⁹युसूफ लासनै लिओ अर बिनै एकदम साप गाबा म लपेट्यो,

⁶⁰बिकी लासनै बि कबर म धर्यो जिनै बो ताजाई ढाडनै खोदर बणवायो हो अर कबर का मुंडानै बडासारका गोळ भाठाऊँ ढकर चलेगो।

⁶¹मरीयम मगदलिनी अर दुसरी मरीयम आर बि कबर क सामै बेठगी।

⁶²सकरवार क आगलै दिन जखो यहूदि मिनखा को अरामहाळो दिन हो बि दिन परधान याजक अर फरिसी पीळातुस कनै गया।

⁶³अर खया, “म्हराज, म्हानै याद ह जद बो धोकेबाज जीताजी हो जणा खेतो हो क मेरी मोत क पाछै म तीसरै दिन ओज्यु जिंदो होज्यास्युं।

⁶⁴इ ताँई थे हुकम द्‍यो क तीन दिना ताँई कबर की पेरेदारी करी जाय। क्युं क कदै अंय्यां नइ होज्या क बिका चेला बिकी लास चुरा लेज्यावै अर मिनखाऊँ खेबा लागीं क बो मरेड़ा मऊँ जीगो ह। अर ओ काम बिका पेलड़ा कामाऊँ बी बुरो होसी।”

⁶⁵जणा पीळातुस खयो, “थे पेरो लगाबा ताँई सिपाईड़ा लेज्याओ अर जंय्यां थे चाओ हो बंय्यांई पेरो द्‍यो।”

⁶⁶जणा बे जार कबर प लगाईड़ा भाठा प छाप लगा दिनी अर पेरो देबा ताँई सिपाईड़ानै बठैई बिठा दिआ जिऊँ बे बिकी निगा राख सकै।