Read Shekhawati मत्ती 28 Bible Online

मत्ती 28 - Shekhawati bible

मत्ती 28

¹अरामहाळा दिन क पाछै सपता का पेला दिन दितबारनै, सुआरै मरीयम मगदलिनी अर बा दुसरी मरीयम बी ईसुनै कबर म देखबा ताँई गई।

²अर चाणचुकई एक जोरको भूचाळ आयो अर बि टेमई ईस्बर नगरी दुत धरती प आयो बो कबर प जार बिका मुंडापै लागेड़ा भाठानै हटार बिपै बेठगो।

³बिको मुंडो अकास की बिजळी जंय्यां भळका मारै हो अर बिका गाबा बी बरफ जंय्यां धोळा धप हा।

⁴बे सिपाईड़ा जखा पेरो देर्या हा बे डर क मारै धुजबा लाग्या अर मरेड़ा समान होगा।

⁵जणा बो ईस्बर नगरी दुत जखो बठै बेठ्यो हो बा लूगायानै ओडायो, “डरो मना म जाणू हूँ क थे ईसुनै ढुंढो हो जिनै सुळी प चढायो गयो हो।

⁶बो अठै कोनी। परमेसर बिनै ओज्यु जिंदो कर दिओ ह। जंय्यां क बो थारूँ बोल्या करतो हो। आओ अर देखो जठै बिकी लास धरेड़ी ही।

⁷जणा इब तावळिसी जार बिका चेलानै ओ समचार सुणाओ क बो मरेड़ा मऊँ जी उठ्यो ह। अर बो थारै अगाऊ गलिल जासी, अर थे बिनै बठैई देखस्यो, म जखो थानै खयो हूँ बिपै गोर करो।”

⁸बे लूगाया तावळिसी कबरऊँ निकळी बे डररी अर राजी बी होरी ही अर चेलानै ओ समचार देबा ताँई भागरी ही।

⁹जणा चाणचुकई ईसु बानै मिल्यो अर खेयो, “नमस्कार” अर बे बिकै पगा म धोक खार बाकै पगानै पकड़ लिनी।

¹⁰जणा ईसु बाऊँ बोल्यो, “डरो मना थे मेरा भाई-भाणाऊँ बोलो क गलिल जाबा ताँई रवानगी करो अर बे मनै बठैई देखसी।”

¹¹जद बे लूगाया गेला मई ही, जणा बे सिपाईड़ा जखा पेरो देर्या हा नगरी म गया। अर जोक्यु बठै होयो बिकै बारां म परधान याजकानै खे सुणाया।

¹²बे परधान याजक यहूदि नेता क सागै मिलर साजिस घड़ी। अर बा सिपाईड़ानै घणासारा पिसा देर,

¹³बाऊँ खया, “थे लोगानै खिज्यो क रातनै जद म्हें सोर्या हा जणा ईसु का चेला आर बिकी लासनै चुरा लेग्या।

¹⁴अर ज थारी आ बात राजपाल ताँई जासी जणा म्हें बिनै समजा देस्यां। थे बेफिकर रह्यो, म्हें थारो बाळई बाको कोनी होबा देवां।”

¹⁵पेरेदार पिसा लेर बंय्यांई कर्या जंय्यां बाऊँ खयो गयो हो। अर इ बातनै यहूदि मिनख आज ताँई मानै।

¹⁶ग्यारा चेला गलिल की बि डूँगरी प गया जठै जाबा ताँई ईसु बानै खयो हो।

¹⁷अर जद बे बिनै बठै देख्या जणा बे बिकै आगै धोक खाई। पण कया क हिया म सक बी हो।

¹⁸जणा ईसु बाकन आर खेयो, “ईस्बर नगरी अर धरती को सगळो अधिकार मनै दिओ गयो ह।

¹⁹इ ताँई थे जाओ अर धरती का सगळा कूणबा का मिनखानै मेरा चेला बणाओ अर परम-पिता, बेटा अर पबितर आत्मा क नाम म बतिस्मो द्‍यो।

²⁰म थानै जखो हुकम दिओ हूँ बे सगळी बाता बानै मानबो सीखाओ। अर याद राखज्यो इ दुनिया की अंत घड़ी ताँई सदाई म थारै सागै रेहस्युं।”