Read Shekhawati मत्ती 5 Bible Online

मत्ती 5 - Shekhawati bible

मत्ती 5

¹जद ईसु बि भीड़नै देख्यो जणा डूँगर क उपर चढगो अर आपका चेलानै सीख देबा ताँई बठै बेठगो। बे बिकी सुणबा ताँई बिकन आया।

²जणा ईसु बानै सीख देबा लाग्यो,

³“भागहाळा ह बे मिनख जखा आत्मा का भूखा हीं; क्युं क ईस्बर नगरी को राजपाट बाकोई ह!

⁴भागहाळा ह बे जखा रोवै ह; क्युं क परमेसर बानै स्यांती देसी!

⁵भागहाळा ह बे जखा सूदा हीं; बे धरती का हकदार होसी!

⁶भागहाळा ह बे जखा धरम का काम करबा ताँई भूखा हीं; परमेसर बाकी इंछ्या पूरी करसी!

⁷भागहाळा ह बे जखा दयालु ह; क्युं क बापै दया करी ज्यासी!

⁸भागहाळा ह बे जाको मन परमेसर की नजर्या म पबितर ह; बे परमेसरनै देखसी!

⁹भागहाळा ह बे जखा मेळमिलाप करावै ह; बे परमेसर का टाबर खुवासी!

¹⁰भागहाळा ह बे जखा धारमिक्‍ता की बजेऊँ सताया जावै ह, क्युं क ईस्बर नगरी को राजपाट बाकोई ह!

¹¹भागहाळा हो थे जखा मनै मानबा की बजेऊँ मिनख थानै सतावै ह, थारी बेजती करै अर झूठ बोलर हर बाता म थानै बुरा बतावीं हीं।

¹²जणा थे राजी होज्यो क्युं क ईस्बर नगरी म थानै इको फळ मिलसी। क्युं क बे तो परमेसर की खेबाळानै बी जखा थारूँ पेली हा बानै बी अंय्यांई सताया हा।

¹³“थे धरती का सगळा मिनखा ताँई लुण हो; पण जद लुण मऊँ सुवाद चल्योजा जणा बिनै ओज्यु चरचरो कोनी बणायो जा सकै। अर नइ बो कोई काम आवै। पण बिनै फेक दिओ जावै ह, जिऊँ बो लोगा क पगा तळै मसळ्यो जावै ह।

¹⁴थे जगत का मिनखा ताँई च्यानणा हो। अर जखी नगरी डूँगर प ह बा कोनी लुख सकै।

¹⁵मिनख दिओ जळार कुंडा तळै कोनी म्हेलीं पण आळ्या म म्हेलीं हीं जिऊँ घर म आबा-जाबाळा मिनखानै च्यानणो दिख सकै।

¹⁶थारा चोखा काम बि दिआ क च्यानणा की जंय्यां चमकणा चाए जिऊँ दुसरा मिनख भला कामानै थारै जरिए देख सकै अर थारा परम-पिता की जखो ईस्बर नगरी म ह बिकी बडाई करै।

¹⁷“थे ओ मना सोचो क म नेम-कायदा नहिस परमेसर की खेबाळा की मांडेड़ी पोथ्यानै नास करबा आयो हूँ। म बानै नास करबा कोनी आयो पण बानै पूरो करबा आयो हूँ।

¹⁸म थारूँ सची बोलुँ हूँ अकास अर धरती टळ सकै ह पण नेम-कायदा म मंडेड़ो आंक पूरो होया बिना कोनी रेह्‍वै।

¹⁹इ ताँई जखो बी मिनख आ छोटाऊँ छोटा आदेसा मऊँ एकनैई कोनी मानै अर बो बंय्यांई दुसरा मिनखानै बी करबा की सीख देवै बो ईस्बर नगरी म छोटाऊँ बी छोटो खुवासी। पण जखो मिनख बा बातानै मानै ह अर दुसरा मिनखानै बी मानबा ताँई सीखावै ह बो ईस्बर नगरी राज म बडो खुवासी।

²⁰म थारूँ साची बोलुँ हूँ ज थारा नेकी का काम सास्तरी अर फरिसीया की नेकिऊँ बेसी कोनी ह जणा थे ईस्बर नगरी का राज म कदैई कोनी जा सकोगा।

²¹“थे सुण्या हो, क आपणा बडकानै ओडायो गयो हो, ‘हत्या मना करज्यो’ अर ज कोई हत्या करसी बिको न्याय होसी।

²²पण म थारूँ खेऊँ हूँ क ज कोई मिनख कोई पाड़ोसी भाईड़ा प झाळ काडै बिको न्याय होसी। अर ज कोई मिनख कोईकी बेजती करै बिको न्याय पंचायत करसी; अर ज कोई मिनख कोईनै बावळो खेवै बिनै परमेसर नरक की आग म गेरसी।

²³इ ताँई जद बेदी प चढावो चढाती टेम तनै याद आवै क तेरा पाड़ोसी भाई का मन म तेरै खिलाप कुटळाई ह।

²⁴जणा तू तेरा बि चढावानै बेदी क आगै धर'र पेल्या तेरा पाड़ोसी भाईऊँ मेळमिलाप करले अर बिकै पाछै तू तेरा चढावानै चढाजे।

²⁵अर ज कोई तनै कचेरी म लेज्यावै जणा तू बिकै सागै गेला मई सुळजेटो कर लिए कदै अंय्यां नइ होज्या क बो तनै पंचा क सामै पेस करै अर पंच सिपाईड़ानै सूपै अर सिपाईड़ा तनै काळ-कोठड़ी म पटकै।

²⁶म तनै सची बोलुँ हूँ ज तू एक बार बी काळ-कोठड़ी म चलेगो जणा जद ताँई तू पाई-पाई नइ चुका दे जद ताँई तू बठैऊँ कोनी छुट सकै।

²⁷“थे जाणो हो थानै ओडायो गयो हो क थे कुकरम मना करज्यो।”

²⁸पण म थारूँ अंय्यां बोलुँ हूँ क ज कोई मिनख पराई लूगाईनै बुरी नजर्याऊँ देखै ह जणा बो आपका हिया म बि लूगाईऊँ कुकरम कर लिआ।

²⁹इ ताँई ज तेरी दाइणी आँख तनै पाप करावै जणा तू बिनै फोड़ दे; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक म जाबाऊँ बच जावै।

³⁰अर ज तेरो दाइणो हात तनै पाप करावै जणा बिनै काट फेक; क्युं क तेरै ताँई ओई भलो ह क तेरी काया को एक अंग नास होज्या पण तेरी सगळी काया नरक की आग म जाबाऊँ बच जावै।

³¹“थानै अंय्यां बी ओडायो गयो हो; क ज कोई आपकी लूगाईनै छोडबो चावै, जणा बिनै आपकी लूगाईनै तलाकनामो देणो चाए।

³²पण सुणो, ज कोई मिनख आपकी लूगाईनै कुकरम क अलावा कोई ओर बजेऊँ छोडै ह अर बा लूगाई दुसरा मोट्यार क सागै रेह्‍वै जणा बिको कुकरमी होबा को जिमेबार बिको पेलड़ो मोट्यार ह अर बि छोडेड़ी लूगाईऊँ ब्या करबाळो बी कुकरम करै।

³³“थे आ बी जाणो हो क आपणा बडकानै ओडायो गयो हो क थे सोगन मना तोड़ज्यो पण बिनै परबु का नाम म पूरो करज्यो।

³⁴पण म थानै खेऊँ हूँ क थे कदैई सोगन मना खाज्यो; नइ तो ईस्बर नगरी की क्युं क ओ परमेसर को सिंघासन ह।

³⁵अर नइ इ धरती की क्युं क आ परबु क पगा की चोकी ह। अर नइ यरूसलेम नगरी की क्युं क इको राजा परमेसर ह।

³⁶थे थारा सीर की सोगन बी मना खाज्यो क्युं क थे थारा बाळा मऊँ एक बी बाळ नइ तो धोळो अर नइ काळो कर सको हो।

³⁷पण थारी बात ‘हाँ’ की ‘हाँ’ अर ‘ना’ की ‘ना’ हो। क्युं क जखो मिनख इकै अलावा क्युं बोलै ह जणा बो सेतान कानिऊँ ह।

³⁸“थे जाणो हो थानै ओडायो गयो हो क, ‘आँख क बदलै आँख अर दांत क बदलै दांत।’

³⁹पण म थारूँ खेऊँ हूँ थे थारै सागै बुराई करबाळा क सागै बुराई मना करज्यो। पण ज कोई थारै दाया गाल प थपड़ मारै जणा बिकै कानि दुसरो गाल बी आगै कर दिज्यो।

⁴⁰अर ज कोई मिनख न्याय ताँई तेर प मुकदमो चलार तेरो कुर्तीयो लेबो चावै जणा बिनै तेरो कोट बी दे दिजे।

⁴¹अर जखो मिनख जबरदस्ती आपको समान तनै पकड़ा'र एक कोस पैदल लेज्यावै जणा बिकै सागै दो कोस चल्यो जाए।

⁴²अर ज कोई मिनख तेरूँ क्युं माँगै जणा बिनै दिजे। अर ज कोई मिनख तेरूँ उधारो लेबो चावै जणा बिनै बी मना मत करजे।

⁴³“थारूँ ओ बी ओडायो गयो हो क, ‘थे थारा पड़ोसीऊँ परेम करज्यो अर थारा दुस्मनाऊँ नफरत करिओ।’

⁴⁴पण म थानै खेऊँ हूँ क थे थारा दुस्मनाऊँ परेम करज्यो। अर जखो थानै सतावै, बा ताँई बी अरदास करज्यो।

⁴⁵जिऊँ थे ईस्बर नगरी म रेह्बाळा थारा परम-पिता की ओलाद बण सको। क्युं क परमेसर भला अर बुरा दोन्यु जंय्यां का मिनखा प सूरज को च्यानणो करै ह। अर धरमी अर पापी दोन्यु प म्हें बरसावै ह।

⁴⁶अंय्यां म इ ताँई खेऊँ हूँ क्युं क ज थे थारूँ प्यार-परेम करबाळा क सागैई परेम करस्यो जणा थानै बिको काँई फळ मिलसी। अंय्यां तो चुंगी लेबाळा[6] बी कोनी करै के?

⁴⁷अर ज थे थारा भाई-भाणा किई आवभगत करो हो जणा इमै काँई गुण-एसान? अंय्यां तो परमेसरनै नइ ध्यारबाळा मिनख बी कोनी करै के?

⁴⁸इ ताँई थानै सिद बणबो चाए, जंय्यां की ईस्बर नगरी म रेह्बाळो थारो परम-पिता सिद ह।