Read Shekhawati मत्ती 8 Bible Online

मत्ती 8 - Shekhawati bible

मत्ती 8

¹इकै पाछै जद ईसु डूँगरऊँ तळै उतर्यो जणा मिनखा की भीड़ बाकै गेल होलिनी।

²बामै एक कोढी बी हो। बो ईसु कनै आयो अर बाकै पगा म धोक खार बोल्यो, “म्हराज, ज थे चाओ तो मेरो कोढ धो सको हो।”

³आ सुणर ईसु बिपै हात धर बिऊँ खयो, “म चाऊँ हूँ क तेरो कोढ धुपज्या!” अर जदकी जदई बिको कोढ धुपगो।

⁴पण ईसु बिनै ओडायो, “इ बात क बारां म खिनई मना खिजे। पण याजक क कनै जार खुदनै दिखा अर मूसा की रीत गेल भेंट चढा जिऊँ मिनखानै तेरै निरोगो होबा को सबूत मिलै।”

⁵अर जद ईसु कफरनूम नगरी आयो, जणा रोमी सुबेदार जखो सो सिपाईड़ा प हो, ईसु कनै आर अरदास करबा लाग्यो,

⁶“म्हराज मेरो एक दास घर क मांयनै रोगलो पड़्यो ह। बिकै हवा भेगी इ बजेऊँ बिनै पिड़ा होरी ह।”

⁷जणा ईसु बिऊँ खयो, “म बठै आर बिनै निरोगो करस्युं।”

⁸जणा बो सुबेदार ईसुऊँ बोल्यो, “म्हराज म इ जोगो कोनी क थे मेरै घरा पधारो। थे तो अठैऊँई आदेस करद्‍यो जणा मेरो दास निरोगो होज्यासी।

⁹क्युं क म खुद दुसरा क तळै काम करबाळो आदमी हूँ अर मेरै तळै बी सिपाईड़ा काम करीं हीं, अर जद म बामैऊँ एकनै ओडाऊँ क, ‘तू जा ’ जणा बो चल्यो जावै अर दुसरानै ओडाऊँ क, ‘आ’ जणा बो आज्यावै ह। अर जद म मेरा दासऊँ खेऊँ हूँ क, ‘अंय्यां कर’ जणा बो बंय्यांई करै ह।”

¹⁰आ सुणर ईसुनै बि मिनख प ताजूब होयो अर बि भीड़ऊँ बोल्यो जखी बाकै गेल आरी ही, “म थानै सची खेऊँ हूँ इ जंय्यांको पक्को बिस्वास तो म इजरायल का मिनखा म बी कोनी देख्यो।

¹¹म थानै बताऊँ हूँ क, बोळा मिनख अगुणी अर पाछुणी दिसाऊँ आसी अर बे ईस्बर नगरी राज म अब्राहम, इसाक अर याकूब क सागै जिमबा बेठसी।

¹²पण जखी पिडीनै राज मिलबाळो हो बिनै अँधेरा म गेर दिओ ज्यासी जठै रोबो अर दांत पिसबो होसी।”

¹³इकै पाछै ईसु बि सुबेदारनै ओडायो, “चल्योजा जंय्यां को तेरो बिस्वास ह बंय्यांई तेरै सागै होसी।” जणा बि टेमई बिको दास निरोगो होगो।

¹⁴जद ईसु पतरस क घरा गयो बठै पतरस की सासू बुखार म पड़ी ही।

¹⁵जणा ईसु बिकै हात अड़ायो अर बा निरोगी होगी। अर बा खड़ी होर बाकी सेवा-पाणी करबा लागी।

¹⁶जद दिन आथगो जणा लोग बा मिनखानै जामै फेंट होईड़ी ही बाकन लेर आया। ईसु बा ओपरी बलायानै हुकम देतो अर बे बाको हुकम मानर बाकै मांयनैऊँ निकळ ज्याती। अर बे बा सगळा मिनखानै निरोगो कर्या जखा रोगला हा।

¹⁷अंय्यां इ ताँई होयो क्युं क यसाया परमेसर की खेबाळो जखो खयो हो बो पूरो होवै: बे आपणा रोगानै खुद प लेर अर आपणी बिमार्यानै सेण कर दूर कर दिनी।

¹⁸जद ईसु आपकै च्यारूमेर भीड़ देखी जणा बे आपका चेलानै दरिआव क परलै-पार जाबा को हुकम दिओ।

¹⁹बि टेम क एक यहूदि जिनै सास्तर को ज्ञान हो, बो ईसु कनै आर बोल्यो, “म्हराज थे जठै बी जास्यो म बी थारै गेल जास्युं।”

²⁰बे बिकी इ बातनै सुणर बिऊँ बोल्यो, “गादड़ा की घुर अर अकास म उडबाळा पंछ्या का घुरस्ळा होवीं पण मिनख का बेटा को तो सीर लुखाबा को बी ठिकाणो कोनी।”

²¹अर ईसु को एक चेलो बाऊँ खयो, “ओ म्हराज मनै पेली जाबा दे की म मेरा बापनै गाड्याऊँ।”

²²पण ईसु बिनै ओडायो, “मेरै गेल होले क्युं क परमेसर बा मिनखानै जाकै कनै जुग-जुग को जीवन कोनी बानै मरेड़ो समजै ह बा मरेड़ा मिनखानै बाका मरेड़ानै गाडबा दे।”

²³बिकै पाछै बे एक न्याव म जार बेठगा। बाकै सागै बाका चेला बी हा।

²⁴जद बे न्याव क मांयनै हा बि टेम क दरिआव क मांयनै जोरको तौफान आयो अर न्याव म पाणी भरबा लाग्यो पण ईसु सोर्यो हो।

²⁵जणा बे ईसु कनै गया अर बानै जगार बाऊँ बोल्या, “परबु म्हानै बचाओ। क्युं क आपा मरबाळा हां!”

²⁶जणा ईसु बाऊँ बोल्या, “हे कम बिस्वास राखबाळो! थे अंय्यां क्युं डरो हो?” बिकै पाछै बे भाळनै अर दरिआवनै दकाल्या जिऊँ सक्यु स्यांत होगो।

²⁷बे मिनख ताजूब म पड़गा, अर आपसरी म बतळाबा लाग्या, “ओ कूण ह? जिकी बाता तौफान अर दरिआव बी मानै ह!”

²⁸बिकै पाछै ईसु गदरेनिया दिसावर म पुग्या, ओ दिसावर दरिआव क परलै नाकै हो। जणा बठै दो मिनख बानै मिल्या जखा मूसाणा मऊँ निकळर आर्या हा बाकै फेंट होईड़ी ही। बे अंय्यां का खतरनाक मिनख हा की बाकै बजेऊँ बि गेलै कोईबी कोनी जातो हो।

²⁹बे जोरऊँ बोल्या, “हे परमेसर का बेटा, थारो म्हारो काँई लेणदेण? के थे थारा टेमऊँ पेल्याई म्हानै नास करबा आया हो?”

³⁰अर बठैई क्युंक दूर एक सूल्डा को रेवड़ चरै हो।

³¹इ ताँई बे ओपरी बलाय बाऊँ अरदास कर बोली, “ज थे म्हानै आमऊँ काडो हो जणा बा सूल्डा का रेवड़ म भेज द्‍यो।”

³²जणा ईसु बानै ओडायो, “जाओ!” जणा बे बा मिनखाऊँ निकळर बा सूल्डा का रेवड़ म रळगी। इकै बजेऊँ बे सूल्डा ढळानऊँ गुड़ता गुड़ता दरिआव क मांयनै जा पड़्या अर मरगा।

³³अर सूल्डानै चराबाळा नगरी म जार जोक्यु बठै होयो हो बिकै बारां म अर जखा मिनखा म फेंट होईड़ी ही बाकै सागै काँई होयो बिकै बारां म खे सुणायो।

³⁴आ सुणर बि नगरी का मिनख ईसु कनै आगा अर बाऊँ अरदास करबा लाग्या क बो अठैऊँ चल्यो जावै।