Read Shekhawati मरकुस 11 Bible Online

मरकुस 11 - Shekhawati bible

मरकुस 11

¹जद बे यरूसलेम क सांकड़ै जेतून डूँगर की ढाळ प बसेड़ी बेतफगे अर बेतनिया नगरी क कनै आया जणा ईसु आपका चेला मऊँ दो जणानै अंय्यां बोलर अगाऊ भेज्यो,

²“थे आगला गाँव म जाओ। थानै बि गाँव म एक गधेड़ी को बच्यो बांदेड़ो मिलसी जिनै इब ताँई कोई काम म कोनी लिओ ह बिनै खोलर ल्याओ।

³अर थानै कोई बुजै थे ओ काँई करो हो? थे बानै बोलज्यो ‘ओ परबुनै चाए ह’ अर बे थारै सागै बिनै भेज देसी।”

⁴बे जार बि गधेड़ी का बच्यानै गळिआरा म कुआड़ा क भंदेड़ो देखर बिनै खोलबा लाग्या

⁵बठै खड़्या मिनखा मऊँ कई मिनख बानै बोल्या, “थे काँई करो हो, इनै क्याले खोलर्या हो?”

⁶जंय्यां ईसु बानै आदेस दिआ हा, बंय्यांई बे बा मिनखानै बोल्या अर बे बाकी बात सुणर बानै गधेड़ी का बच्यानै लेज्याबा दिओ।

⁷बे गधेड़ी का बच्यानै ईसु कनै लेग्या, अर बिपै आपका गाबा गेर्या अर ईसु बिपै बेठगो।

⁸जद ईसु बि बच्या प बेठर जार्यो हो जणा लोग गेला म आपका गाबा बिछाबा लाग्या अर कई लोग खेताऊँ हरी-भरी डाळ्यां का'टर आवभगत करबा ताँई बिछा दि।

⁹अर जत्ताबी मिनख ईसु क आगै-पिछै हा बे जोर-जोरऊँ जे-जैकार कर बोलर्या हा,“परबु की मेमा हो, ओ परबु क नामऊँ आर्यो ह इनै परमेसर आसिरबाद दे।

¹⁰म्हारा बडका दाऊद को राज आर्यो ह इनै परमेसर आसिरबाद दे। ओ म्हान ह ईस्बर नगरी म परबु की मेमा हो!”

¹¹ईसु यरूसलेम पुग्यो अर बठै मनदर म गयो अर बठै बो च्यारूमेर की सगळी चिजानै देख्यो अर मोड़ो होगो जणा बो आपका चेला क सागै बेतनिया गयो।

¹²आगला दिन जद बे बेतनिया मऊँ चाल पड़्या जणा ईसुनै भूख लागी।

¹³ईसु दूरऊँ एक अंजीर को पेड़ देख्यो जखो हर्यो-भर्यो हो बो बिकन गयो जिऊँ बिका फळ खा सकै। पण बि पेड़ म पत्तानै छोडर क्युंई कोनी हो। क्युं क बा अंजीर का फळा की रुत कोनी ही।

¹⁴ईसु बि पेड़ऊँ बोल्यो, “इबऊँ तेरो फळ कोई कदैई कोनी खासी।” अर इ बातनै ईसु का चेला सुणर्या हा।

¹⁵जद बे यरूसलेम आया, जणा ईसु मनदर म गयो अर बठै जत्ताबी बेचबाळा अर खरीदबाळा हा बानै बठैऊँ बारनै काडबा लाग्यो। रिपीआ को लेणदेण करबाळा का पाटियानै बगा दिओ अर कबूतर बेचबाळा का पाटियानै उंदो कर दिओ।

¹⁶अर मनदर मऊँ कोईनैई क्युंई कोनी लेज्याबा दिओ।

¹⁷इकै पाछै बो बानै सीख देतो होयो बाऊँ बोल्यो, “पबितर सास्तर म मंडर्यो ह,‘मेरो मनदर धरती का सगळा कूणबा का मिनखा ताँई अरदास को घर होसी।’ पण थे इ घरनै डाकूआ की खोळ बणा दि।”

¹⁸अर जद परधान याजक अर धरमसास्तरी ईसु की इ बातनै सुणी बे ईसुनै मारबा को गेलो ढुंढबा लाग्या। पण भीड़ ईसु क परबचना म रमर बिकै सागै ही इ बजेऊँ बे ईसुनै मारबाऊँ डरै हा।

¹⁹अर दिन आथगो जणा बे यरूसलेम नगरीऊँ बारनै चलेग्या।

²⁰आगला दिन जद ईसु आपका चेला क सागै जार्यो हो जद बे बि अंजीर का पेड़नै पत्ताऊँ लेर जड़ ताँई सूकेड़ो देख्यो

²¹अर पतरसनै ईसु की बोलेड़ी बात याद आई बो ईसुनै बोल्यो, “ओ गरूजी देखो जि पेड़नै थे दूरसिस दिआ हा बो सूकग्यो ह!”

²²ईसु बाऊँ बोल्यो, “परमेसर म बिस्वास राखो

²³म थानै सची-सची खेऊँ हूँ ज कोई इ डूँगरऊँ ओडावै क ‘तू अठैऊँ हटर समदर क मांयनै डूबज्या’ अर बि मिनख क हिया म इ बात प जमाई भेम नइ होवै पण इकै बदला म पूरो बिस्वास होवै जणा जंय्यां बो आपका मुंडाऊँ बोल्यो बि ताँई बंय्यांई होज्यासी।

²⁴जणाई म थानै खेऊँ हूँ थे अरदास म ओ बिस्वास कर माँग्या करो क थे जोक्यु बी माँगर्या हो बो थानै मिलगो ह जणा बो थानै मिल ज्यासी।

²⁵अर जद थे अरदास करबा लागो जदई थे बा मिनखानै माफ करो जखा थारो बुरो कर्यो ह जिऊँ थारो परम-पिता जखो ईस्बर नगरी म ह बो थारा पाप माफ करसी।

²⁶(अर थे बिनै माफ कोनी करो जणा थारो बाप जखो ईस्बर नगरी म ह बो बी थारा पाप माफ कोनी करसी।”)[20]

²⁷बे ओज्यु यरूसलेम म आया। ईसु मनदर म घूमर्यो हो जद परधान याजक, सास्तरानै सीखाबाळा अर यहूदि नेता ईसु कनै आया।

²⁸अर बे ईसुनै बोलबा लाग्या, “तू अ काम किका हकऊँ करै ह अर ओ हक तनै कूण दिओ ह?”

²⁹ईसु बाऊँ बोल्यो, “म बी थानै एक सुवाल बुजूँ ज थे मनै इ सुवाल को जुबाब देद्‍यो जणा म बी थानै बता देस्युँ क म ओ काम किका हकऊँ करूं हूँ?

³⁰थे बताओ यहून्नानै पाणी को बतिस्मो देबा को हक परमेसरऊँ मिल्यो क मिनखाऊँ?”

³¹बे ईसु की इ बातनै सुणर आपसरी म बतळाबा लाग्या, बे बोल्या, “ज आपा खेवां बिनै परमेसरऊँ हक मिल्यो ह जणा ईसु आपानै खेसी क, ‘थे बिपै बिस्वास क्युं कोनी कर्या।’

³²अर आपा खेवां, बिनै मिनखाऊँ हक मिल्यो हो जणा अ लोग आपणा प झाळ काडसी, क्युं क अ लोग यहून्नानै परमेसर की खेबाळो मानी हीं।”

³³इ बजेऊँ बे ईसुनै बोल्या, “म्हें कोनी जाणा क बिनै ओ हक कठैऊँ मिल्यो हो?” ईसु बाकी इ बातनै सुणर बाऊँ बोल्यो, “म बी थानै कोनी बताऊँ क म किका हकऊँ ओ काम करूं हूँ।”