Read Shekhawati मरकुस 15 Bible Online

मरकुस 15 - Shekhawati bible

मरकुस 15

¹दिन उगताई परधान याजक अर यहूदि नेता, सास्तरी अर सगळा महासभा का पंच ईसुनै बांदके पीळातुस[28] कनै लेज्यार हाजिर कर्यो।

²पीळातुस ईसुऊँ बुज्यो, “तू यहूदिआ को राजा ह के?” ईसु बिनै खयो, “तू खुदई तो बोलै ह।”

³परधान याजक ईसु प बोळी बाता को दोस लगार्या हा।

⁴पीळातुस ईसुनै ओज्यु बोल्यो, “तू बोल-बाल्यो कंय्यां खड़्यो ह अ सगळा तो तेर प दोस लगाबा लागर्या हीं।”

⁵पण ईसु बिनै जुबाब कोनी दिओ ईसुनै बोल-बाल्यो देखर पीळातुसनै ताजूब होयो।

⁶फसै हाळा त्युंहार प पीळातुस रीत गेल एक केदिनै जिनै लोग चाता बिनै बा ताँई छोड देतो हो।

⁷बि टेम बरअबा नाम को एक मिनख बगावत्या क सागै केद म हो क्युं क बो एक बगावत म एक मिनखनै मार गेर्यो हो।

⁸जद लोग पीळातुस क कनै जार बिऊँ कह्या जंय्यां तू म्हारै ताँई करतो आयो ह बंय्यांई कर।

⁹जणा पीळातुस बाऊँ खयो, “के थे चाओ हो के म थारै ताँई यहूदिआ का राजानै छोड द्‍युँ?”

¹⁰पीळातुस अंय्यां इ बजेऊँ बोल्यो क्युं क बो जाणतो हो क अ परधान याजक जळता-बळता इनै पकड़ाया हीं।

¹¹पण परधान याजक बरअबानै पीळातुसऊँ छुटाबा ताँई भीड़नै पेल्याऊँ उकसा राख्यो हो।

¹²पीळातुस बाऊँ ओज्यु बुज्यो, “थे जिनै यहूदिआ को राजा खेओ हो बिको म काँई करूं थे बताओ थे काँई चाओ हो?”

¹³बे कू'कर बोल्या, “इनै सुळी प चढा द्‍यो!”

¹⁴पीळातुस बाऊँ बोल्यो, “म इनै क्युं सुळी प चढाऊँ ओ लाई कूणसी बुराई करी ह।” पण बे मिनख बुर्यां करबा लाग्या, “इनै सुळी प चढा द्‍यो।”

¹⁵पीळातुस भीड़नै राजी करबा ताँई बरअबानै छोड दिओ अर ईसु क कोड़ा मरवाया जिकै पाछै सुळी प चढाबा को हुकम दिओ।

¹⁶सिपाईड़ा ईसुनै राजपाल क गड का आँगणा म लेग्या। अर बे सगळी पलटणनै भेळी करली।

¹⁷बे ईसुनै बैंगणी रंग को गाबो पिरार बिकाळा सीर प काटा को मुकट गूंथर धर दिओ।

¹⁸बे ईसु को तमासो बणाबा ताँई जे-जैकार करबा लाग्या अर बे बोल्या, “ओ यहूदिआ का राजा तेरी जे हो।”

¹⁹बे ईसु क सीर प डंडा मार'र, बिपै थूकर, गोडा टे'कर बिनै नमस्कार कर्या।

²⁰बे ईसु को मजाक उडार बिको बैंगणी गाबो तो लिआ काड, अर पाछा बिकाई गाबा पिरार, बिनै सुळी प चढाबा ताँई बारनै लेग्या।

²¹सिकन्दर अर रूफुस को बाप जिको नाम समोन हो, ओ कुरेन गाँव[29] को हो इनै गाँवऊँ आतो देख बे सिपाईड़ा बिनै जोरामादी ईसु की सुळीनै लेज्याबा ताँई बोल्या

²²बे ईसुनै गुलगुता नाम की झघा प लेग्या जिको मतबल खोपड़ी की झघा ह।

²³बे ईसुनै मिर नाम की दवाई मिलेड़ी अँगूरी पिलाबा लाग्या पण ईसु कोनी पीओ।

²⁴इकै पाछै बे ईसुनै सुळी प चढा दिओ, ईसु का गाबा लेबा ताँई बे परची गेरी अर आपसरी म बानै बाट लिआ।

²⁵जद बे ईसुनै सुळी प चढाया जणा दिनग्या का नो बजर्या हा।

²⁶अर बठै बिको दोस पतर हो जिपै मंडर्यो हो, “यहूदिआ को राजा।”

²⁷ईसु क सागै दो डाकू बी सुळी चढाया गया एक ईसु क दाया नाकै अर दुसरो बाया नाकै लटकायो गयो।

²⁸[अर पबितर सास्तर क मांयनै जखा बचन मंडेड़ा हा बे पूरा होया क, ईसु अपराद्‍या क सागै लटकायो जासी।][30]

²⁹अर गेला मऊँ जाबाळा आपका सीरानै हला-हलार ईसु की बुराई कर ईसुनै खेर्या हा, “मनदरनै तोड़बाळा अर तीन दिन म ओज्यु बणाबाळा

³⁰सुळी पऊँ तळै उतर्या अर खुदनै बचाले ”

³¹अर अंय्यांई परधान याजक अर सास्तरानै सीखाबाळा बी ईसु को मजाक उड़ार्या हा। अर बे आपसरी म बतळाबा लाग्या, “ओ दुसरा मिनखानै बचायो पण खुदनै कोनी बचा सक्यो।”

³²अर बे ईसुनै खेवै हा, “ओ इजरायल का राजा मसी सुळीऊँ तळै उतर क दिखा जणा म्हें बिस्वास कर लेस्यां” अर जखा डाकू ईसु क सागै सुळी चढाया गया हा बे बी ईसु को मजाक उड़ार्या अर बिकी बेजती करर्या हा।

³³दोपारा बारा बजताई सगळा देस क मांयनै अँधेरो छायो अर करीब तीन बजै ताँई अँधकार छायो रिह्यो।

³⁴ईसु तीन बजै जोरऊँ बार घालर खयो “इलोई, इलोई, लमा सबकतनी।” जिको मतबल ह,“ओ मेरा परमेसर ओ मेरा परमेसर तू मनै क्याले छोड दिओ?”

³⁵अर जखा मिनख बठै खड़्या हा बे ईसुनै अंय्यां बोलता सुण्या जणा बे खया, “सुणो, ओ एलिआनै बुलार्यो ह।”

³⁶एक मिनख भागर चुखानै खाटो उठायड़ा अँगूरा का रस म डूबार लाठी प टां'गर ल्याओ अर ईसुनै पीबा ताँई दिओ अर खयो, “आपा देखस्यां इनै उतारबा ताँई एलिआ आवै क कोनी।”

³⁷जणा ईसु जोरऊँ बार घालर पिराण तज दिआ।

³⁸अर मनदर को परदो उपरऊँ लेर तळै ताँई पा'टर दो टुकड़ा होगो।

³⁹एक सुबेदार ईसु क सामै खड़्यो हो, ओ ईसु की बातानै सुण्यो अर देख्यो क ईसु कंय्यां आपका पिराण तज्या। अर बो बोलबा लाग्यो, “ओ मिनख सचमई परमेसर को बेटो हो।”

⁴⁰बठै लूगाया बी ही बे ईसुनै दूरऊँ खड़ी-खड़ी देखै ही बा लूगाया म मरीयम मगदलिनी, छोटक्यो याकूब अर युसूफ की माँ मरीयम अर सलोमी ही।

⁴¹ईसु जद गलिल क मांयनै हो जणा बि बठै अ लूगाया ईसु क गेल चालबाळी ही अर अ ईसु की सेवा करती ही। अर बठै ओर बी कई लूगाया ही जखी ईसु क सागै यरूसलेम ताँई आई ही।

⁴²दिन आथगो हो अर ओ अरामहाळा दिनऊँ पेलड़ो दिन हो जिनै त्यारी करबाळो दिन बी बोलै ह।

⁴³इ बजेऊँ अरमतिया को युसूफ आयो। ओ मिनख यहूदि म्हापंचायत को मान्यो-थान्यो हो अर परमेसर का राजनै उडिकै हो। ओ ठाडी छाती कर पीळातुस कनै गयो अर बिऊँ ईसु की लास माँगी।

⁴⁴पीळातुसनै ताजूब होयो क ईसु अत्तो तावळो कंय्यां मरग्यो। अर बो सुबेदारनै आपकै कनै बुलायो अर बिऊँ बुज्यो, “बिनै मर्या बोळी देर होगी के?”

⁴⁵अर पीळातुस सुबेदारऊँ समचार लेर ईसु की लासनै युसूफनै लेज्याबा को हुकम दे दिओ।

⁴⁶युसूफ मखमल को चादरो खरीद्‍यो अर लासनै सुळीऊँ उतार बि चादरा म बिनै लपेटर ढाड क मांय खोदेड़ी कबर म धर दिओ। अर कबर का मुंडा प बडोसारो भाठो लगा दिओ।

⁴⁷मरीयम मगदलिनी अर युसूफ की माँ मरीयम देखै ही क बो ईसु की लासनै कठै धरर्यो ह।