Read Shekhawati मरकुस 16 Bible Online

मरकुस 16 - Shekhawati bible

मरकुस 16

¹अरामहाळा दिन क पाछै मरीयम मगदलिनी, सलोमी अर याकूब की माँ मरीयम ईसु की लास को अभिसेक करबा ताँई सुगंद आबाळी चिज मोल ली

²अर बे सपता का पेला दिन दितबारनै, सुआरै सूरज निकळताई कबर प गई।

³बे आपसरी म खेबा लागी, “कबर क मुंडा आगै का भाठानै कूण सरकासी?”

⁴अर बे सामै देखी जणा भाठो तो सरकेड़ो हो। बो भाठो बोळो बडो हो।

⁵बे बेगीसी कबर क मांयनै जार देखी क एक मोट्यार धोळा गाबा पेर्या दाया नाकै बेठ्यो हो अर बे बिनै देखर उकचुक होगी।

⁶अर बो मोट्यार बानै खयो, “थे डरो मना थे जि ईसु नासरीनै ढुंढो हो, जिनै सुळी प चढायो गयो हो बो अठै कोनी ह बो मरग्यो हो पण इब जी उठ्यो ज बिस्वास नइ होवै जणा बि झघानै देखल्यो जठै बे बिकी लासनै धर्या हा।

⁷थे अठैऊँ जाओ अर ईसु का चेलानै अर पतरसनै ओ समचार द्‍यो क बो थारै अगाऊ गलिल जासी जंय्यां बो थानै पेल्याई बोल्यो हो। बो थानै बठैई मिलसी।”

⁸अर बे डरगी अर ताजूब करतीई कबरऊँ भागर निकळी, अर बे कोईनैई क्युंई कोनी बतायो क्युं क बे सचमई डरगी ही।[31]

⁹ईसु जिंदो होबा क पाछै सपता का पेला दिन दितबारनै, मरीयम मगदलिनी जिमैऊँ ईसु सात ओपरी बलाय काडी ही बिनै दिख्यो।

¹⁰बा जार ईसु का सात्यानै जखा बोळा दुखी हा अर रोवा हा बानै ओ समचार दिओ।

¹¹अर बे बिकी इ बातनै सुणर क बो ओज्यु जिंदो होगो ह अर बिनै दिख्यो ह बे बिकी बाता प बिस्वास कोनी कर्या।

¹²इकै पाछै दुसरा रूप म ईसु चेला मऊँ दोनै दिख्यो जखा यरूसलेमऊँ आपका गाँव जार्या हा।

¹³बे पाछा आर ओरानै इ बात को समचार दिओ पण बे बाको बी बिस्वास कोनी कर्यो।

¹⁴इकै पाछै रोटी खाबा की टेम ईसु बा ग्यारा चेलानै बी दिख्यो। ईसु बाका भेम अर हिया की कल्डाई प बानै दकाल्यो। क्युं क बे ईसु क जिंदो होबा को समचार देबाळा की बाता प बिस्वास कोनी कर्या।

¹⁵जणा पाछै ईसु बानै ओडायो, “थे सगळा जगत म जार चोखा समचार को हेलो द्‍यो।

¹⁶अर जखो बी थारी बाता प बिस्वास करसी अर बतिस्मो लेसी बिको छुटकारो होसी अर जखो बिस्वास कोनी करसी बो पापी रेह्सी अर सजा भोगसी।

¹⁷मेर प बिस्वास करबाळा म अ सेलाणी होसी क बे मेरा नामऊँ ओपरी बलायानै भगासी अर बे नई-नई भासा बोलसी।

¹⁸ज बे आपका हाताऊँ साँप बी पकड़ै अर झेर बी पीज्यावै जणा बी बाकै क्युंई कोनी होसी, अर बे रोगला प हात धरसी जणा बे ठिक होज्यासी।”

¹⁹अ सारी बाता बोलबा क पाछै ईसु ईस्बर नगरी म उठा लिओ गयो अर परमेसर क दाया नाकै जार बेठगो।

²⁰अर बिका चेला झघा-झघा जार परबु को परबचन दिओ। बाकै सागै परबु काम करर्यो हो। अर बो चमत्कारी सेलाणीऊँ बचनानै सच करर्यो।