Read Shekhawati मरकुस 2 Bible Online

मरकुस 2 - Shekhawati bible

मरकुस 2

¹क्युंक दिना क पाछै ओज्यु ईसु कफरनूम म आयो। अर मिनखानै इ बात को बेरो चाल्यो क बो घरा ह।

²अर बि घर क मांयनै अर बारनै अत्ता मिनख भेळा होया क बठै तिल धरबा की बी झघा कोनी री। अर ईसु मिनखानै परबचन देर्यो हो।

³अत्ती बारामई बठै च्यार मिनख एक भाळ भेयड़ा मिनखनै उठार ल्याया।

⁴पण घणीसारी भीड़ की बजेऊँ बे बिनै ईसु कनै कोनी लेज्या सक्या। जणा बे अंय्यां कर्या क बे बि कोठा की छात प चढगा अर जठै ईसु हो बठैऊँ बि छातनै हटाया अर बे बिनै खाटली प सुवार रस्सा क बळ ईसु कनै लटका दिओ

⁵ईसु बाकाळा बिस्वासनै देखर बि हवा भेयड़ा मिनखऊँ बोल्यो, “बेटा तेरा पाप धुपगा।”

⁶बि बठै सास्तरानै सीखाबाळा बी बेठ्या हा। बे आप-आपका हिया म सोचबा लाग्या,

⁷“ओ मिनख अंय्यां की बात क्युं बोलै ह। ओ तो परमेसर की बुराई करै ह, परमेसर क अलावा किकी मजाल क बो पापनै धो सकै?”

⁸ईसु आपकी आत्मा म जाणगो क बे आपका हिया म काँई सोचर्या हीं। अर बो बाऊँ बोल्यो, “थे थारा हिया म ओ काँई सोचर्या हो।

⁹सोरो काँई ह, इ हवा भेयड़ानै ओ खेबो क तेरा पाप धुपगा। नहिस ओ ओडाबो क खड़्यो हो अर तेरी खाटली उठार चाल पड़।

¹⁰पण म थानै सची बोलुँ हूँ क, मिनख का बेटानै इ धरती प पाप धोबा को हक ह।” अर ईसु हवा भेयड़ा मिनखनै बोल्यो,

¹¹“म तनै बोलुँ हूँ खड़्यो होर तेरी गुद्ड़ी लेर तेरै घरा चल्यो जा।”

¹²अर बो खड़्यो होर तावळोसो आपहाळी खाटलीनै उठार सगळा की आँख्या क आगैई चलेगो। अंय्यां को काम देखर बाकै ताजूब होयो अर बे आ बोलर परमेसर की जे-जैकार करी क, “म्हें अंय्यां को कार कदैई कोनी देख्या।”

¹³ईसु ओज्यु गलिल दरिआव क किनारै गयो अर भीड़ बी बिकै गेल आरी ही जणा ईसु बानै सीख देबा लाग्यो।

¹⁴अर चालता-चालता ईसु हलफई का बेटा लेवीनै चुंगी चोकी प बेठ्यो देखर, बिनै बोल्यो, “मेरै गेल आ।” अर बो खड़्यो होर बिकै गेल होगो।

¹⁵इकै पाछै ईसु लेवी क घरा जार जिमबा लाग्यो। अर बठै बिकै अर बिका चेला क सागै चुंगी लेबाळा अर पापी बी जिमर्या हा क्युं क अंय्यां का घणकराक बिकै गेल आग्या हा।

¹⁶आ देखर फरिसी अर सास्तरानै सीखाबाळा बिका चेलाऊँ बोल्या, “ईसु चुंगी लेबाळा अर पापी मिनखा क सागै खावै पिवै ह!”

¹⁷बाकी बाता सुणर ईसु बाऊँ बोल्यो, “निरोगा मिनखानै बेद की जुर्त कोनी होवै। रोगलानैई बेद की जुर्त पड़ै ह। म धरम्या ताँई कोनी आयो पण पाप्या अर अछूता ताँई आयो हूँ।”

¹⁸एक बर अंय्यां होयो क, यहून्ना अर फरिसीया का चेला ईसु कनै आया। अर बा दिना म अंय्यां होतो हो क, यहून्ना अर फरिसीया का चेला बरत करता हा जणा बे ईसुनै बुजबा लाग्या, “यहून्ना अर फरिसीया का चेला तो बरत करीं हीं, पण तेरा चेला बरत क्युं कोनी करै?”

¹⁹ईसु बोल्यो, “कदै अंय्यां होयो हो के बिंद सागै अर बरात भूखी रेह्‍वै? जद ताँई बराती बिंद क सागै ह बे बरत कोनी करीं।

²⁰पण अंय्यां का दिन बी आबाळा हीं जद बनड़ो बाऊँ न्यारो कर्यो जासी बे दिन बा ताँई बरत करबाळा होसी।

²¹“कोईबी पुराणा गाबा प नया सुती गाबा की कारी कोनी लगावै, अर कोई लगा बी ले जणा धोबा क पाछै बा नई कारी भेळी होर बि गाबल्यानै दुणो पाड़ गेरै।

²²अंय्यांई नई अँगूरी पुराणी बखाल[5] (खल्लड़) म कोनी भरी जावै क्युं क ज्युँ-ज्युँ बा उठै जणा बा अँगूरी पुराणी बखालनै पाड़गेरै अर दाखरस अर बखाल (खल्लड़) दोन्युई खराब हो जावै। इ ताँई नयो दाखरस नई बखाल (खल्लड़) मई भर्यो जावै ह।”

²³अंय्यां होयो क, ईसु अर बिका चेला यहूदिआ का अरामहाळा दिन खेत मऊँ जार्या हा अर चेला चालता-चालता बाळी तोड़बा लाग्या।

²⁴फरिसी बानै अंय्यां करता देखर ईसुऊँ बोल्या, “देख थारा चेला जखो काम अरामहाळा दिन बरजेड़ो ह बो काम क्युं करीं हीं?”

²⁵ईसु बाऊँ बोल्यो, “थे ओ कोनी बाच्या क, जनाड़ै दाऊद अर बिकाळा सिरी भूखा हा अर बानै रोट्या की जुर्त पड़ी जणा बो के कर्यो?

²⁶बो कंय्यां म्हायाजक अबियातार क टेम म परमेसर का घर म गयो। अर भेंट चढाईड़ी रोट्या खाई अर आपका साती-संग्यानै बी खुवाई, जानै याजक क अलावा कोईनै बी खाबा की इजाजत कोनी ही।”

²⁷अर ईसु बाऊँ बोल्यो, “अरामहाळो दिन मिनखा क भला ताँई बणायो गयो ह मिनख अरामहाळा दिन ताँई कोनी बणायो गयो।

²⁸इ ताँई मिनख को बेटो अरामहाळा दिन को बी परबु ह।”