Read Shekhawati मरकुस 3 Bible Online

मरकुस 3 - Shekhawati bible

मरकुस 3

¹ईसु ओज्यु यहूदिआ का अरदास करबाळी झघा म गयो बठै एक मिनख हो जखो टुंडो हो।

²क्युंक मिनख ईसु प दोस लगाबा की ताक म बेठ्या हा। बे देखबो चावा हा क ईसु बि मिनखनै अरामहाळा दिन निरोगो करै क कोनी करै।

³ईसु टुंडा मिनखऊँ बोल्यो, “मिनखा क मांय खड़्यो हो।”

⁴अर ईसु बाऊँ बुजबा लाग्यो, “चोखो काँई ह? अरामहाळा दिन भलो करबो क बुरो करबो? कोईनै बचाबो क मारबो?” पण बाकी बोलती बंद होगी।

⁵ईसु झाळ्या म भर'र च्यारूमेर देख्यो अर बाका हियानै काठो देखर बो बोळो दुखी होयो। अर ईसु टुंडा मिनखनै बोल्यो, “तेरा हातनै सिदो करले।” अर बो आपका हातनै सिदो कर लिओ। अर बिको हात ओज्यु ठिक होगो।

⁶इकै पाछै फरिसी बठैऊँ चलेग्या अर हेरोद का गुट का मिनखा क सागै एको कर साजिस घड़ी क, ईसुनै कंय्यांसिक मारां।

⁷ईसु आपका चेला क सागै गलिल दरिआव क कनै गयो अर घणीसारी भीड़ बिकै गेल होगी

⁸जिमै गलिल, यहूदिआ, यरूसलेम, इदुमिया अर यरदन नदि क परलै नाकै का अर सूर-सैदा क कनै का मिनख हा। अर बे ईसु का कारनामानै जखा बो कर्या करतो हो बानै सुणर बिकै गेल आया हा।

⁹भीड़ बिनै चिथ नइ सकै इ बजेऊँ ईसु आपका चेलानै बोल्यो, “मेरै ताँई एक छोटीसी न्याव को जोगाड़ लगाओ।”

¹⁰ईसु बोळासारा मिनखानै निरोगो कर्यो हो इ ताँई घणासारा रोगला बिकै हात अड़ाबानै बिपै पड़र्या हा।

¹¹जखा मिनखा म सूगली ओपरी बलाय होती बे बिनै देखताई बिकै पगा म धोक खाता अर सूगली ओपरी बलाय चिलाटी घालर बोलती, “तू परमेसर को बेटो ह।”

¹²पण बो बानै जोर देर चेतायो, “थे मनै परगट मना करो।”

¹³ईसु डूँगरी प चढगो अर बो जिनै चावै हो बानै आपकै कनै बुलायो, अर बे बिकन गया।

¹⁴बा मऊँ बो बारानै टाळर बानै आपका भेजेड़ा चेला[6] बणायो। ईसु बानै इ ताँई टाळ्यो क बे बिकै सागै-सागै चालीं। अर बानै बो चोखो समचार सुणाबा ताँई भेज सकै।

¹⁵अर बे ओपरी बलायनै भगाबा को हक बी राख सकीं।

¹⁶जाका नाम अंय्यां हा, समोन जिको नाम बो पतरस काड्यो

¹⁷जब्दि को बेटो याकूब अर याकूब को भाई यहून्ना जिको नाम बो बूनरगीस काड्यो जिको मतबल “गाज को बेटो” होवै ह।

¹⁸अंदरिआस, फलिपूस, बरतुल्मै, मत्ती, थोमा, हलफई, हलफई को बेटो याकूब, तद्दे अर देस भगत समोन

¹⁹अर यहूदा इस्करोती ओ बोई ह जखो ईसुनै धोकाऊँ पकड़ायो हो।

²⁰जद बो घरा गयो अर बठै ओज्यु घणीसारी भीड़ भेळी होगी इ बजेऊँ ईसु अर बिकाळा चेलानै रोटी खाबा को बी ओसाण कोनी हो।

²¹जणा ईसु का घरका सुण्या क ईसु बठै आएड़ो ह जणा बे बिनै लेबा ताँई आया। क्युं क लोग ईसु क बारां म खेता हा इको चित ठिकाणै कोनी।

²²यरूसलेमऊँ आएड़ा धरमसास्तरी खेता हा क, “ईसु क मांयनै भूता को नाथ बालजबुल रळर्यो ह।” क्युं क ईसु बिकी सक्‍तिऊँ ओपरी बलायनै काडै ह।

²³ईसु बानै बुलार मिसाल देर खेबा लाग्यो क, “सेताननै सेतान कंय्यां काड सकै।

²⁴ज कोई राजपाट म फूट पड़ज्या जणा बो राजपाट कंय्यां चाल सकै ह।

²⁵अर घरका क मांयनै फूट पड़ज्या जणा बो घर कंय्यां बस्यो रेह सकै ह।

²⁶ज अंय्यांई सेतान खुद म फूट गेर खुद क सामै खड़्यो होज्या जणा बिको राज कंय्यां बण्यो रेह सकै ह? आ ढंगा तो बो तबा होज्यासी।

²⁷ज कोई तगड़ा मिनख का घरनै लूटबो चावै जणा पेल्या बी तगड़ा मिनखनै बांदणो पड़सी जणा पाछैई बिको घर लूट्यो जा सकै ह।

²⁸म थानै सची-सची खेऊँ हूँ क, मिनखा का सगळा पाप अठै ताँई परमेसर की बुराई करेड़ी बी माफ हो सकै ह

²⁹पण जखो पबितर आत्मा की बुराई करै बिको पाप कदैई कोनी माफ कर्यो जा सकै। अर जखो अंय्यां को पाप करै बो जुग-जुग को पापी हो जावै।”

³⁰ईसु आ बात इ ताँई बोल्यो क्युं क बठै खड़्या मिनख बोलर्या हा क इमै सूगली ओपरी बलाय रळरी ह।

³¹ईसु की माँ अर भाई बठै आया, अर बारनैई खड़्या होर बिनै बुलावो भेज्यो

³²ईसु क च्यारूमेर भीड़ ही बे ईसुनै बोल्या, “तेरी माँ, भाणा अर तेरा भाईड़ा तनै बारनै बुलावै ह।”

³³ईसु बाऊँ बोल्यो, “मेरी माँ अर भाई कूण ह?”

³⁴ईसु आपकै च्यारूमेर बेठ्या मिनखानै देखर बोल्यो, “देखो अ मेरी माँ अर मेरा भाई हीं।

³⁵जखो परमेसर क कह्या गेल चालै बोई मेरो सागे भाई-भाण अर माँ ह।”