Read Shekhawati मरकुस 4 Bible Online

मरकुस 4 - Shekhawati bible

मरकुस 4

¹दरिआव क किनारै ईसु ओज्यु सीख देबा लाग्यो। अर बिकै च्यारूमेर घणीसारी भीड़ भेळी होगी। इ बजेऊँ बो दरिआव म खड़ी न्याव क मांयनै बेठगो अर लोग दरिआव किनारै खड़्या होगा।

²ईसु बानै सीख देबाळी मिसाल म कई बाता सीखातो हो, अर बो बानै अंय्यां सीखायो क,

³“सुणो, एक बार की बात ह एक किसान हो अर बो बीज बोबा ताँई गयो।

⁴अर जद बो बीज बोबा लाग्यो, जणा क्युंक बीज गेला क सारै पड़्या अर चिड़कल्या बानै चूगलेगी।

⁵अर क्युंक बीज कांकरा म पड़्या अर बानै चाए जत्ती माटी कोनी मिली जि बजेऊँ बे तावळाई निपज्या।

⁶पण सूरज उगताई तावड़ीऊँ बळगा क्युं क बे जड़ कोनी पकड़्या।

⁷अर क्युंक झाड़्या म जार पड़्या अर झाड़ी बाकै सागै बढर बानै दाब दिनी। जिऊँ बे कोनी फळ्या।

⁸अर क्युंक बीज उपळी माटी म पड़्या अर उपज्या जिऊँ खूब पणप्या, अर बाऊँ तीसुणा साठुणा अर सो गुणा पैदावार होई।”

⁹अर ईसु बानै बोल्यो, “जिकै कान ह बो बानै खोलल्यो।”

¹⁰जद ईसु एकलो हो जणा बिका कनै का मिनख बा बारा चेला क सागै बिऊँ मिसाल क बारां म बुजबा लाग्या

¹¹ईसु बानै खेबा लाग्यो, “थानै तो परमेसर का राज को भेद खोलेड़ो ह पण दुसरा मिनखा ताँई तो सगळी बाता मिसाल देरई बोली ज्यावै ह।”

¹²जणाई तो,“देखता-देखता बानै कोनी सुजै अर सुणता-सुणता कोनी समळै अर जणाई तो बे आपका हियानै कुगेलाऊँ कोनी बदलै अर परमेसर बानै माफ कोनी करै।”

¹³ईसु बाऊँ बोल्यो, “आ मिसाल थारै पलै कोनी पड़ी जणा बाकी की मिसाला कंय्यां पलै पड़सी?

¹⁴किसान जखो उगावै ह बो तो परमेसर को बचन ह।

¹⁵जखा बीज गेला क मांयनै पड़्या अ बे लोग ह जखा बचन सुणै ह पण सेतान आर बि बचननै चुरा लेज्यावै ह।

¹⁶जखा बीज कांकरा म पड़्या अ बे लोग ह जखा बचननै सुणी हीं अर बिनै राजी-पेटाऊँ मानी बी हीं

¹⁷पण बो बचन बाकै हिया म जड़ कोनी पकड़ै जि बजेऊँ जद बापै दुख अर सताव आवै जणा बाको बिस्वास मर जावै ह।

¹⁸जखा बीज झाड़्या क मांयनै बोया गया अ बे लोग ह जखा बचन सुणी।

¹⁹पण जीबा को घ्यार, मो-माया को लालच अर मन की बुरी बाता बाका हिया मई बचननै दबा देवै ह, इ ताँई बे बीज फळै कोनी।

²⁰अर जखा बीज उपळी माटी म बोया गया अ बे लोग हीं जखा बचन सुणर बिनै मानी हीं अर बिकै गेल फळीं, जिऊँ बे तीसुणा, साठुणा, सोगुणा अर सो गुणाऊँ बी घणो फळ ल्यावीं।”

²¹ईसु बाऊँ बोल्यो, “कोईनै दिओ जळार बिनै खाट अर कुंडा तळै म्हेलता देख्या हा के? पण बिनै आळ्या म म्हेलीं हीं जिऊँ बो सगळा कोठा म च्यानणो दे।

²²जोक्यु बी ओला म ह बो चोड़ा म ल्यायो जासी अर जोक्यु ढकेड़ो ह बिनै खोल्यो ज्यासी।

²³जिकै कान ह बो बानै खोलल्यो।”

²⁴बो बाऊँ बोल्यो गोर कर सुणज्यो, “जंय्यां थे लोगा क सागै करो हो बंय्यांई परमेसर थारै सागै करसी अर बिऊँ बी बेसी करसी।

²⁵जिकनै ह बिनै ओर दिओ जासी, अर जिकै कनै कोनी बिऊँ जोक्यु बिकन ह बो बी ले लिओ जासी।”

²⁶ईसु बोल्यो, “परमेसर को राज माटी म बीज बोवणिया मिनख की जंय्यां ह।

²⁷अर बो तो रातनै सोतो अर दिन म जागतो। अर कद बा बीजा म कुपळ आई अर कद बे बढ्या बिनै तो कोई बात की खबरई कोनी पड़ी।

²⁸माटी खुदई उपजावै पेल्या कुपळ आवै जिकै पाछै बाळी अर बाळ्या म खूब दाणा।

²⁹अर जद दाणा पक जावै ह जणा बो बेगोसो दांतळी लेर काटबा लागज्या क्युं क लावणी को टेम आ जावै ह।”

³⁰ईसु ओज्यु बोल्यो, “आपा परमेसर का राजनै किऊँ परगट कर सकां हां, अर बिनै किकी मिसाल देर समजा सकां हां?

³¹ओ राई क दाणा की जंय्यां को ह जिनै माटी म बोयो जावै अर ओ दाणो सगळा बीजा मऊँ छोटो होवै।

³²पण जद इनै बोयो जावै जणा ओ दाणो उगबा क पाछै धरती का सगळा बोजा मऊँ बडो होज्यावै ह। इकी डाळ्यां अत्ती बडी होवै क अकास का पंछी बापै घुरस्ळो घालै।”

³³अंय्यां की मिसाल देर बो बानै बचन सुणाया करतो हो, अर बो बानै बाकी बुदी गेलई सीखातो हो।

³⁴बिना मिसाल देर क्युंई कोनी सीखातो हो पण जद बो आपका चेला क सागै एकलो होतो जणा बो बानै सगळी बाता को भेद समजाया करतो हो।

³⁵जनाड़ै आथण्या ईसु चेलानै बोल्यो, “आओ ल्यो आपा दरिआव क परलै-पार चालां।”

³⁶इ बजेऊँ बे भीड़नै बठैई छोडर ईसु जि न्याव म बेठ्यो हो बि न्याव मई बिनै लेर रवाना होया। बठै ओर बी न्याव ही।

³⁷बाकै रवाना होबा क पाछै जोरऊँ तौफान चालबा लाग्यो। अर दरिआव म झाल उठबा लागी अर न्याव क पछाड़ा मारबा लागी अर न्याव म पाणी भरबा लाग्यो।

³⁸पण ईसु न्याव क गेलड़ै नाकै सुत्यो हो। चेला बिनै जगाया अर बिऊँ बोल्या, “ओ गरूजी थानै क्युंई परवा कोनी के? म्हें डूबबाळा हां।”

³⁹ईसु खड़्यो होर तौफाननै दकाल्यो अर झालनै ओडायो, “थमज्या” अर तौफान थमग्यो अर बठै सक्यु स्यांत होगो।

⁴⁰अर ईसु बाऊँ बोल्यो, “थे क्याले डरो हो? थानै हालबी बिस्वास कोनी के?”

⁴¹बे डरग्या अर आपसरी म बुजबा लाग्या, “ओ कूण ह? जिको खयो हवा अर पाणी बी मानै ह।”