Read Shekhawati मरकुस 5 Bible Online

मरकुस 5 - Shekhawati bible

मरकुस 5

¹बे दरिआव क परलै नाकै गिरासेनिया नाम का परदेस म गया,

²ईसु जद न्याव मऊँ उतर्यो जणा बठै एक मिनख मूसाणा मऊँ ईसु कनै आयो बिकै मांयनै नुगरी ओपरी बलाय ही

³बो मूसाणा क मांयनै रेह्तो हो बिनै कोईबी साँकळाऊँ कोनी बांद सक्यो।

⁴क्युं क बिनै बोळी बार साँकळाऊँ बांद्‍या हा पण बो साँकळानै तोड़ देतो अर बानै पिस गेरतो, बिनै कोईबी बस म कोनी कर सक्यो।

⁵बो मूसाणा अर डूँगरा म चिलाटी घालतो भटकतो, अर खुदनै भाठाऊँ मारतो हो।

⁶बो ईसुनै परैऊँ देखर बिकन भागर गयो अर बिकै धोक खाई

⁷अर बार घालतो बोल्यो, “ओ ईसु परमपिता परमेसर का बेटा थारो म्हारो काँई लेणदेण? ज मनै दिन घाल्या तो, थानै परमेसर की सोगन लागै।”

⁸(क्युं क ईसु बिनै खयो हो, “हे नुगरी इकै मांयनैऊँ निकळज्या।”)

⁹अर ईसु बिनै बुज्यो, “तेरो नाम काँई ह?” बो ईसुऊँ बोल्यो, “मेरो नाम पलटण ह क्युं क म्हें घणीसारी हां।”

¹⁰अर बो ईसुऊँ हात जो'ड़र अरदास करबा लाग्यो, “म्हानै देस निकाळो मना दे।”

¹¹अर बि टेम बठै डूँगर प सूल्डा को रेवड़ चरै हो।

¹²जणा बा पलटण ईसुऊँ अरदास कर बोली, “म्हानै तू बामै जाबा दे जिऊँ म्हें बामै रळज्यावां।”

¹³जणा बो बानै हुकम दिओ अर बे सूगली ओपरी बलाय बि मिनख मऊँ निकळर बा सूल्डा क मांयनै जा रळी। सूल्डा करीब दो झार हा। बे सूल्डा डूँगर क उपरऊँई गुळगची खार दरिआव क मांयनै जार पड़्या अर डूबर मरगा।

¹⁴सूल्डानै चराबाळा भागर नगरी अर बिकै सारली ढाणी-ढ़फाण्या म जार ओ समचार सगळानै खे सुणायो। बठै जखो होयो हो बिनै देखबा ताँई लोग भेळा होगा।

¹⁵बे ईसु कनै आर देख्या जणा बो मिनख जिमै बे नुगरी-आत्मा ही बो पूरा गाबा पेर्या अर सतूना म बेठ्यो हो। अर बे बिनै देखर डरग्या।

¹⁶अर बि घटनानै देखबाळा बा मिनखानै बताबा लाग्या क जिकै मांयनै नुगरी-आत्मा ही बिकै सागै अर सूल्डा क सागै काँई होयो?

¹⁷लोग ईसुऊँ अरदास करबा लाग्या क, “तू अठैऊँ चल्यो जा।”

¹⁸जणा ईसु न्याव म चढबा लाग्यो जणा बो मिनख जिमै पेल्या नुगरी-आत्मा ही ईसुऊँ अरदास करबा लाग्यो, “मनै बी तेरै सागै लेचाल।”

¹⁹पण ईसु बिनै नट्यो अर बिनै बोल्यो, “तेरा घरा जा अर तेरा मिनखानै अ सगळी बाता बता जखो परबु तेरै ताँई कर्यो ह। अर बानै अंय्यां बी बता क परबु कंय्यांसिक तेर प दया करी ह।”

²⁰अर बो मिनख चलेगो अर दस नगर्या म जार बठै का मिनखानै बताबा लाग्यो क ईसु बि ताँई कतो बडो चमत्कार कर्यो ह। इ काम की बजेऊँ मिनखानै ताजूब होयो।

²¹ईसु ओज्यु दरिआव पार कर किनारै प हो जदई बिकै च्यारूमेर घणीसारी भीड़ भेळी होगी।

²²जणा यहूदि अरदास घर का अधिकारी मऊँ याईर नाम को कोई मिनख हो, बो बठै आयो अर बो ईसुनै देख्यो अर बिकै पगा पड़र

²³अरदास करतो बोल्यो, “मेरी नानी छोरी मरबाळी ह, म तेरूँ हात जोड़ खेऊँ हूँ मेरै सागै चालर तेरो हात बिपै धरदे जिऊँ बा बच जावै।”

²⁴जणा ईसु बिकै सागै चाल पड़्यो अर घणीसारी भीड़ बी बिकै गेल होली। अर लोग बिपै टूटर पड़ै हा।

²⁵बामै एक लूगाई ही जिकी बारा बरसाऊँ न्याह्णी कोनी थमरी ही।

²⁶बा सगळा जतन कर देखली अर भात-भात का बेदा की दवाई लेर देखली पण भापड़ी क क्युंई अराम कोनी हो। अर जोक्यु बिकन पुण-पावलो हो बो बी इ बिमारी की दवा-दारू म बोया बेठी ही। पण बिकी दसा घणी खराब होगी।

²⁷जद बा ईसु क बारां म सुण्यो जणा बा भीड़ क मांयनैऊँ ईसु क गेल आई, क्युं क बा आपका हिया म ध्यार राखी ही, “ज म ईसु का कुर्ता की कोर क हात अड़ा द्‍युँ जणा म निरोगी होज्यास्युं।” अर जंय्यांई बा बिका गाबा क हात अड़ायो।

²⁸

²⁹बिको हात्युहात लोय भेबो बंद होगो अर बा आपकी काया म जाणगी क म निरोगी होगी हूँ।

³⁰अर जदकी जद ईसुनै बी लाग्यो क बिकै मांयनैऊँ सक्‍ति निकळी ह। ईसु गेलनै मुड़र बुजबा लाग्यो, “मेरा गाबा क कूण हात अड़ायो ह?”

³¹जणा ईसु का चेला बिनै बोल्या, “तू देखर्यो ह क भीड़ तनै च्यारूमेरूँ दबाया जारी ह। अर तू बुजै ह क थारै कूण हात अड़ायो?”

³²पण ईसु च्यारूमेर देख्तो रिह्यो क अंय्यां को काम कूण कर्यो ह।

³³बा लूगाई जाणती ही क बिकै सागै काँई होयो ह? बा डरती-डरती आई अर ईसु क पगा म पड़र सगळी बाता सची-सची बता दि।

³⁴अर ईसु बिऊँ बोल्यो, “बेटी तू तेरा बिस्वास की बजेऊँ निरोगी करी गई ह, सुकऊँ चली जा अर बिमारीऊँ बची रेह।”

³⁵बो अंय्यां बोलई रिह्यो हो अत्ता मई यहूदि अरदास घर का अधिकारी क घराऊँ लोग आया अर बे याईरऊँ बोल्या, “इब गरूजीनै दिन मना घालो क्युं क थारी छोरी तो चलती री।”

³⁶ईसु बाकी बातानै सुण्यो अर याईरऊँ बोल्यो, “डरै मना बस तू तो बिस्वास राख।”

³⁷अर ईसु बठै सगळानै छोड आपकै सागै पतरस, याकूब अर याकूब का भाई यहून्नानै लेर

³⁸याईर क घरा गयो। अर बठै देख्यो क लोग जोर-जोरऊँ बार-घोड़ो मचा राख्यो ह।

³⁹बो मांयनै गयो अर बाऊँ बोल्यो, “थे क्युं बार-तोबा मचार्या हो? छोरी तो मरी कोनी पण सुती ह।”

⁴⁰बिकी इ बातनै सुणर लोग बिको तमासो करबा लाग्या। पण ईसु मिनखानै बारनै का'डर छोरी का माँ-बाप अर आपका चेलानै सागै लेर बठै गयो जि कोठा म छोरी ही।

⁴¹ईसु छोरी को हात पकड़्यो अर बोल्यो, “तलीता कूमी! (इको मतबल ह नानी छोरी) म तनै बोलुँ हूँ खड़ी होज्या।”

⁴²अर बा नानी छोरी तावळिसी खड़ी होगी अर अठिनै-बठिनै चालबा-फिरबा लागी। (बा छोरी बारा बरस की ही) बे बिनै देखर ताजूब म पड़गा।

⁴³ईसु क सागै जखा हा बानै बो चेतार ओडायो क इ बात क बारां म कोईनैई मना खिज्यो अर बो बोल्यो, “इ छोरीनै खाबा ताँई क्युं द्‍यो।”