Read Shekhawati मरकुस 6 Bible Online

मरकुस 6 - Shekhawati bible

मरकुस 6

¹इकै पाछै ईसु बि झघानै छोडर आपकी नगरी क मांयनै गयो। बिका चेला बी बिकै सागै हा।

²यहूदिआ का अरामहाळा दिन ईसु यहूदिआ का अरदास घर म गयो अर बठै परबचन सीखाबा लाग्यो। ईसु को परबचन सुणर लोग ताजूब म पड़गा। बे बोलबा लाग्या, “इकै कनै अ बाता कठैऊँ आई। अर इनै ओ कूणसो ज्ञान देयड़ो ह, अर ओ बडा-बडा चमत्कार कंय्यां करै ह?

³के ओ बोई खाती कोनी? जखो मरीयम को बेटो अर याकूब, युसूफ, यहूदा अर समोन को भाई ह। इकी भाणा आपणै सारैई कोनी रेह्‍वै के?” इ बजेऊँ बे लोग ईसु की कोनी सुणी।

⁴ईसु बाऊँ बोल्यो, “परमेसर की खेबाळानै बिकी खुदकी भौम, रिस्तेदार अर परवारनै छोडर सगळी झघा मान मिलै ह।”

⁵अर बो बठै क्युंई चमत्कार कोनी कर सक्यो। पण क्युंक बिमारा प हात धर'र बानै ठिक कर्यो।

⁶बाका भेम की बजेऊँ ईसुनै बापै ताजूब होयो अर बो कनै का गाँवा म जातो अर सीखातो हो।

⁷ईसु आपका बारा चेलानै आपकै कनै बुलायो। अर बो बानै दो-दो जणानै बारनै भेजबा लाग्यो अर बो बानै सूगली ओपरी बलायानै काडबा को अधिकार दिओ।

⁸अर बानै हुकम दिओ, “थे थारी लाठीनै छोडर क्युंबी सागै मना लिओ नइ रोटी, नइ झोळी अर नइ बटूआ म रिपीआ

⁹थे लीतरा तो पेरल्यो पण दुसरो कुर्तो सागै मना लिओ।

¹⁰जिकै बी घरा थे जाओ बठैई बासो लेता रिह्यो जद ताँई थे बि नगरी म रेह्ओ।

¹¹अर कोई गाँव अर नगरी म थारी आवभगत नइ होवै जणा थे बि नगरी अर गाँवऊँ बारनै चल्या जाओ अर बाकै खिलाप बानै चेताबा ताँई थे थारै पगा की धूळ बी बठैई झाड़ दिज्यो।”[7]

¹²अर बे बठैऊँ जार पापऊँ तौबा करबा को हेलो पाड़्यो।

¹³अर बे घणीसारी ओपरी बलाय निकाळी अर घणासारा रोगलानै जेतून का तेलऊँ अभिसेक कर निरोगा कर्या।

¹⁴राजा हेरोद[8] ईसु क बारां म सुण्यो, क्युं क ईसु की बाता सगळी झघा फेलगी ही। कई मिनख बोलता हा क, “पाणी को बतिस्मो देबाळो यहून्ना मरेड़ा मऊँ ओज्यु जिंदो होगो। इ बजेऊँ बिकै मांयनै चमत्कारी सक्‍ति काम करै ह।”

¹⁵पण कई बोलता हा क, “बो एलिआ[9] ह।” अर कई बोलता हा क, “ओ कोई पुराणा टेम को परमेसर की खेबाळा की जंय्यां को एक ह।”

¹⁶पण हेरोद बिकै बारां म सुण्यो जणा बो बोल्यो, “ओ तो यहून्ना ह जिको सीर म कटवा दिओ हो, ओ ओज्यु जिंदो होगो।”

¹⁷हेरोदिआस क खया म आर हेरोद राजा खुदका सिपाईड़ानै भेजर यहून्नानै बांदके कोठड़ी म गिरवा दिओ। क्युं क हेरोद आपका भाई पिळीपुस क जिंदा होतासोता बिकी लूगाई हेरोदिआसऊँ ब्या कर लिआ हो।

¹⁸इ बजेऊँ यहून्ना हेरोदनै ओळमो दिओ क, “तू जखो अंय्यां को काम कर्यो ह ओ ठिक कोनी ह। तू तेरा भाई की लूगाईनै ब्याली ह।”

¹⁹इ बजेऊँ हेरोदिआ यहून्नाऊँ बेर राखबा लागी। अर चाती ही क यहून्ना मार्यो जावै। पण बा बिनै मार कोनी सकी।

²⁰क्युं क हेरोद राजा यहून्नाऊँ डरतो हो। अर जाणतो हो क यहून्ना एक परमेसर को खरो अर धरमी मिनख ह। इ बजेऊँ बो बिकी रूखाळी करतो हो। अर हेरोद यहून्ना की बातानै सुणर बोळो घबरातो हो। इकै पाछै बी बिनै यहून्ना की बाता चोखी लागती ही।

²¹कुदरती हेरोदिआस क हात अंय्यां को मोको लाग्यो क एक दिन ओ हेरोद राजा खुदका जलमदिन प दरबारिआनै, सेनापत्यानै अर गलिल का मान्या-थान्या मिनखानै बुलायो।

²²बि दिन हेरोदिआस की छोरी (बेटी) बठै आई अर नाचर, जिमबा आया सगळा मिनखानै अर राजा हेरोदनै राजी कर दि। इ बजेऊँ राजा बिनै बोल्यो, “माँग तू काँई चावै ह जखो तू माँगसी म तनै देस्युँ।”

²³बो बचन देर बिनै बोल्यो, “तू माँग! ज तू मेरो आदो राजपाट बी माँगसी जणा म तनै दे देस्युँ।”

²⁴अर बा आपकी माँ क कनै गई अर बिऊँ बुजबा लागी, “मनै काँई माँगबो चाए?” बिकी माँ बिनै बोली, “पाणी को बतिस्मो देबाळा यहून्ना को सीर।”

²⁵अर बा तावळिसी भागर राजा क कनै गई अर बा राजाऊँ बोली, “मनै बतिस्मो देबाळा यहून्ना को सीर कटवार थाळी म धर'र इबकी स्यात दिओ जावै।”

²⁶इ बातनै सुणर राजा बोळो दुखी होयो। पण हेरोद राजा होबा की बजेऊँ आपकी जबान अर म्हेमाना की बजेऊँ बो आपकी बेटीनै मना कोनी कर सक्यो।

²⁷अर राजा एक जलादनै हुकम दिओ क बो यहून्ना को सीर का'टर ल्यावै।

²⁸अर बो जलाद कोठड़ी क मांयनै गयो अर यहून्ना को सीर का'टर बिनै थाळी म धर बि छोरीनै दिओ। अर बा छोरी बिनै आपकी माँनै देदि।

²⁹अर यहून्ना का चेला जद इ बात क बारां म सुण्या जणा बे बठै आर बिकी लासनै लेज्यार बिनै एक कबर क मांयनै धर दि।

³⁰भेजेड़ा चेला भेळा होर ईसु कनै आया। अर जोक्यु बे कर्या अर सीखाया हा बो बिनै सक्यु खे सुणायो।

³¹बाकन मिनखा को रेळो लागर्यो हो। अर बानै रोटी खाबा को बी ओसाण कोनी हो। इ बजेऊँ ईसु बानै ओडायो, “आओ ल्यो आपा कोई उजाड़ म जार अराम करल्याँ।”

³²बे न्याव म चढर उजाड़ म चलेग्या।

³³बानै जाता देख लोग बानै पिछाण्गा अर सगळी नगर्या का मिनख भेळा होर भागर बिकै अगाऊ बठै पुग्या।

³⁴जद ईसु न्यावऊँ किनारै प उतर्या जणा बे भीड़नै सामै खड़ी देखी। बानै बि भीड़ प तरस आयो क्युं क बे बि लल्डी की जंय्यां हा, जिको गुवाळ्यो कोनी होवै। अर ईसु बानै घणी सारकी बाता सीखाबा लाग्यो।

³⁵अर जद दिन आथबा लाग्यो जणा ईसु का चेला बिकन आर बोल्या, “आ तो उजाड़ ह अर मोड़ो बी बोळो होगो।

³⁶इ ताँई तू आ मिनखानै बिदा कर दे जिऊँ बे कनै का गाँव बसत्या म जार खुद ताँई रोटी मोल ले सकीं।”

³⁷बो बाऊँ बोल्यो, “थेई आनै खाबा ताँई द्‍यो।” बे बिऊँ बोल्या, “के म्हें दो सो दिनारा[10] की रोटी मोल लेर आवां अर बानै खुवावां?”

³⁸ईसु बाऊँ बोल्यो, “जाओ अर देखो थारै कनै कत्ती रोटी ह।” अर बे बेरोपाड़र बिनै बताया क म्हारै कनै पाच रोटी अर दो मछी ह।

³⁹अर बो बानै हुकम दिओ क सगळानै घास प पंगत म बिठा द्‍यो।

⁴⁰अर बे सो-सो की अर पचास-पचास की पंगता बणार बेठगा।

⁴¹ईसु पाच रोटी अर दो मछीनै हात म लिओ अर ईस्बर नगरी कानि देखर परमेसर को धनेवाद कर्यो, अर बिकै पाछै बो रोट्या ली अर रोट्या का टुक-टुक कर चेलानै देतो गयो, जिऊँ बे मिनखानै जिमा सकै अर बा दो मछ्यानै बी बा सगळा म बाट दि।

⁴²सगळा जणा खार धापगा।

⁴³बिकै पाछै बी रोट्या अर मछ्याऊँ भरेड़ा बारा चोल्या बचगा।

⁴⁴रोटी खाबाळा म पाच झार तो मोट्यार-मोट्यार हा।

⁴⁵ईसु चेलानै बोल्यो क, “तावळासा न्याव म चढ ज्याओ अर बेतसदा जखो दरिआव क परलै नाकै ह बठै मेरूँ अगाऊ पुगो अर म आनै बिदा कर आऊँ हूँ।”

⁴⁶बानै बिदा कर ईसु डूँगर प अरदास करबा चलेगो।

⁴⁷अर दिन आथगो, न्याव दरिआव क बिचमै ही, जद ईसु किनारा प एकलो हो।

⁴⁸अर ईसु देख्यो क चेला न्याव चलाता-चलाता सांस फुलगा हीं। क्युं क सामै की भाळ चालरी ही ईसु भागपाट्या दरिआव प चालतो होयो बाकन आयो अर बो बाऊँ अगाऊ जाबो चावै हो।

⁴⁹पण बे बिनै दरिआव प चालतो देखर बिचार्या, “ओ तो भूत ह” अर बे कूकबा लाग्या।

⁵⁰क्युं क बे सगळा बिनै देखर डरग्या। पण ईसु तावळोसो बाऊँ बाता कर्यो अर बोल्यो, “हिमत राखो, म हूँ, डरो मना।”

⁵¹अर बो बाकन न्याव प गयो अर भाळ थमगी अर बे ताजूब करबा लाग्या।

⁵²अर बाकै रोट्या क चमत्कार क बारां म बी कोनी पलै पड़ी क्युं क बाकी मती बंदरी ही।

⁵³अर बे दरिआव पार कर गनेसरत नगरी का किनारा प पुग्या अर बठैई न्यावनै बांद दि।

⁵⁴अर न्यावऊँ उतर ताँई लोग बिनै पिछाण्गा।

⁵⁵अर सारै की बसत्या म भागर गया अर बठैका मिनखानै बताया बे रोगलानै खाटल्या म घालर बिकन ल्याया।

⁵⁶ईसु जि गाँव, नगरी अर बसत्या म जातो हो लोग बठैई रोगलानै बजारा म ल्यार बिऊँ अरदास करता हा क बो बानै आपका गाबा की कोर क हात अड़ाबा दे अर जत्ता बी बिकै हात अड़ाता हा बे निरोगा होज्याता हा।