Read Shekhawati लूका 11 Bible Online

लूका 11 - Shekhawati bible

लूका 11

¹एक दिन अंय्यां होयो क ईसु एक झघा अरदास करर्यो हो। जद बो अरदास कर हट्योक जणा बिका चेला मऊँ एक बोल्यो, “परबु म्हानै बी आ अरदास करबो सीखाओ। जंय्यां की बतिस्मो देबाळो यहून्ना आपका चेलानै सीखायो हो।”

²बो बाऊँ बोल्यो, “जद थे अरदास करो जणा अंय्यां बोलज्यो:परम-पिता, थारो पबितर नाम उचो मान्यो जाय,थारो राज आवै।

³म्हारी रोजकी रोटी रोजकी म्हानै द्‍यो।

⁴म्हारा पापनै माफ करो, जंय्यां म्हें म्हारो बुरो करबाळानै माफ कर्या हा।अर म्हें बिचास्या नइ जावां इ बातऊँ बचाओ।”

⁵अर ईसु आपका चेलाऊँ बोल्यो, “मानल्यो थारै मऊँ कोईसा क एक भाईलो होवै, अर बिकन आदी रातनै जार बिनै बोलै, ‘ओ भाईला मनै तीन रोट्या दे।

⁶क्युं क मेरो एक भाईलो सफर मऊँ इबी-इबी मेरै कनै पुग्यो ह अर बिकै सामै परूसबा ताँई मेर कनै क्युंई कोनी।’

⁷अर मांयनैऊँ उवाज आवै, ‘मनै दुखी मना करै, म सक्यु ढक ढकार मेरा टाबरा क सागै बिछावणा म हूँ। अर इ टेम उठर तनै क्युंई कोनी दे सकूँ।’

⁸म थानै बोलुँ, थारो भाईलो होबा क नातै बो कोनी उठै अर क्युंई कोनी दे। पण थारै बेसरमा होर बार-बार माँगबा की बजेऊँ बोई उठर थानै थारी जुर्त गेल देसी।

⁹“अर इ ताँई म थारूँ बोलुँ हूँ, माँगो थानै मिलसी, ढुंढो थानै लाधसी, कुआड़ खुड़काओ जणा थारै ताँई खोल्यो जासी।

¹⁰क्युं क जखो माँगै ह बिनै मिलै। जखो ढुंढै बिनै लाधै। अर जखो खुड़कावै बि ताँई कुआड़ खोल्यो जावै।

¹¹थारै मऊँ अंय्यां को बाप कूण ह जिको बेटो मछी माँगै जणा बिनै साँप पकड़ा दे?

¹²अर ज बो अंडो माँगै जणा बिकै हात म बिछू धरदे।

¹³ज थे बुरा होर बी थारा टाबर टिकरानै चोखी चिज देबो जाणो हो। जणा थारो परम-पिता जखो ईस्बर नगरी म बिराजै ह आपका माँगबाळानै पबितर आत्मा क्युं कोनी देसी?”

¹⁴एक दिन ईसु एक मिनख मऊँ गुँगी ओपरी बलायनै काडी। जद बा बलाय निकळी जणा गुँगो मिनख बोलबा लाग्यो, अर आ देखर लोग ताजूब म पड़गा।

¹⁵पण बामैऊँ क्युंक बोल्या, “ओ तो भूता का नाथ बालजबुल की सक्‍तिऊँ आनै काडै ह।”

¹⁶दुसरा बिनै परखबो चावै हा इ ताँई बे ईसुऊँ माँग करी क, “तू म्हानै ईस्बर नगरी की कोई सेलाणी दिखा जिऊँ ओ बेरोपाट सकै क तू ईस्बर कानिऊँ भेजेड़ो ह।”

¹⁷ईसु जाणतो हो, की बे काँई सोचर्या हीं। जणा बो बाऊँ बोल्यो, “जि राज म फूट पड़ज्या बो राज खतम हो जावै ह। अर बंय्यांई जि घर म फूट होवै बो घर उजड़ जावै ह।

¹⁸अंय्यांई ज सेतान का राज म फूट पड़ज्या जणा बिको राज कंय्यां बण्यो रेह्सी? क्युं क थे मेरै बारां म बोलो हो क म ओपरी बलाया का सरदार बालजबुल की सक्‍तिऊँ बलायानै भगाऊँ।

¹⁹अर ज अंय्यां ह जणा थाकाळा चेला बी बालजबुल की सक्‍तिऊँ भगाता होगा? जणा इ बात ताँई बेई थानै गळत साबित करसी।

²⁰पण ज म परमेसर की सक्‍तिऊँ ओपरी बलायानै भगाऊँ हूँ, जणा इऊँ आ साबित होवै ह क परमेसर को राज थारै सांकड़ैई ह।

²¹जद तगड़ो मिनख राछ लेर आपका घर की रूखाळी करै। जणा बिको घरबार बच्यो रेह्‍वै ह।

²²पण जद सेरनै सवा सेर मिलज्या जणा बो बिपै हमलो कर बिनै हरार बिका सगळा राछ जापै बो भरोसो राखतो हो खोसर बिकी चिजानै ओरा म बाट दे ह।

²³जखो मेरै सागै कोनी बो मेरै खिलाप ह अर जखो मिनखानै मेरा चेला होबा ताँई भेळो कोनी करै बो बानै मेरूँ दूर लेज्यावै ह।

²⁴“जद कोई सूगली ओपरी बलाय मिनख मऊँ निकळै ह। जणा बा अराम ढुंढती उजाड़ म डोलै अर जद बिनै बठैबी अराम कोनी मिलै। जणा बा खेवै ह म मेरा पुराणीया घर म जिमैऊँ म आई हूँ पाछी चली जास्युं।

²⁵अर बा पाछी आवै जणा बो बिनै भार्यो-झाड़्यो अर जच्यो-जचायो लाधै।

²⁶जणा बा जार खुदऊँ बी सात बुरी ओपरी बलायानै आपकै सागै कर बिकै मांयनै बड़ जावै। अर बि आदमी की दसा पेलड़ीऊँ घणी बुरी होज्यावै।”

²⁷अ बाता सुणर भीड़ मऊँ एक लूगाई ईसुऊँ बोली, “तनै जलम देर दुद प्याबाळी माँ बडा भागहाळी ह।”

²⁸पण ईसु बोल्यो, “इऊँ बी बडा भागहाळा तो बे हीं जखा परमेसर का बचनानै सुणी अर बिपै चालीं हीं।”

²⁹ईसु क च्यारूमेर भीड़ भेळी होगी ही। जणा बो बोल्यो, “आ पिडी बोळी बुरी ह। जखो अ सेलाणी माँगै ह। पण योना की बातानै छोडर आनै ओर कोई सेलाण कोनी दिज्यासी।

³⁰जंय्यां निनवे का मिनखा ताँई योना सेलाण हो। बंय्यांई इ पिडी का मिनखा ताँई मिनख को बेटो सेलाण होसी।

³¹सिबा की राणी न्यायहाळै दिन इ पिडी प दोस मंढसी क्युं क बा धरती का इ कूणाऊँ बि कूणा म सुलेमान कनै ज्ञान लेबा गई ही पण अठै जखो ह बो सुलेमानऊँ बी बोळो बडो ह।

³²न्यायहाळा दिन निनवे का मिनख बी खड़्या होर इ पिडी का मिनखा प दोस मंढसी। क्युं क निनवे का मिनख योना को परचार सुणर पापऊँ तौबा कर लिआ हा। पण अठै जखो ह बो योनाऊँ बी बडो ह।

³³“दिआनै जळार कोईबी बिनै ओला म कोनी राखै। अर नइ कुंडा तळै म्हेलीं, पण बिनै उचासा आळ्या म म्हेलीं जिऊँ मांयनै आबाळानै च्यानणो दिखै।

³⁴अंय्यांई थारी काया को दिओ थारी आँख ह। इ ताँई जद ताँई थारी आँख्या सई ह, थारी काया म बी च्यानणो ह, अर जनाड़ै, अ खराब होज्या बि दिनऊँई थारी पूरी काया म अँधेरो होज्यासी।

³⁵इ ताँई चेता म रेह्ओ थारै मांय को च्यानणो अँधेरा म नइ बदल जावै।

³⁶ज थारी सगळी काया म च्यानणो ह। अर इका कोईसाई कूणा म अँधेरो कोनी जणा ओ थार प जळता दिआ की जंय्यां जगमगासी।”

³⁷ईसु आपकी सुणार चुप होयो, जणा एक फरिसी बिनै आपकै घरा रोटी खाबा ताँई नूत्यो। जणा बे बिकै घरा जार चोकी प रोटी खाबानै बेठगा।

³⁸पण आ देखर की ईसु रोटी खाबाऊँ पेली बाका सुद होबा का रिती-रिवाज गेल हात कोनी धोया बि फरिसीनै ताजूब होयो।

³⁹जणा ईसु बिऊँ बोल्यो, “थे फरिसी हो जखा थाळी कचोळानै बारनै-बारनैऊँ तो मांजो हो। पण बो मांयनैऊँ तो गंदो को गंदो रेह बंय्यांई हात धोया काँई जद थारै मांयनै लालच अर बुराई भरी पड़ी ह।

⁴⁰अरै बावळो, जखो बारला हिस्सानै बणायो बो मांयलानै कोनी बणावै के?

⁴¹पण जखो-क्युं मांयनै ह बिको दान कर द्‍यो, जिऊँ थारै ताँई सक्यु सुद होज्यासी।

⁴²पण ओ फरिसीयो, थार प हाय ह! थे पोदिनो, कड़ी-पत्ता अर भात-भात की सारी जड़ी-बुटी को दसवो हिस्सो तो परमेसरनै द्‍यो हो। पण परमेसर ताँई थारा प्यार-परेम अर न्यायनै टाळ द्‍यो हो। होणो तो अंय्यां चायो हो की थे दुसरी बातानै छोडर आ सगळी बातानै करता।

⁴³फरिसीयो थार प हाय ह! क्युं क थानै अरदास करबाळी झघा म उची झघा अर बजारा म लोग थारै सामै हात जोड़ै अंय्यां भावै।

⁴⁴धिक्कार ह थार प! क्युं क थे बा नइ दिखबाळी कबरा की जंय्यां हो जिपै लोग अणभोळ म चालीं हीं।”

⁴⁵एक सास्तरानै सीखाबाळो बोल्यो, “गरूजी अंय्यां खेर थे म्हारी बेजती करो हो।”

⁴⁶जणा ईसु बिनै टक्कोसो जुबाब दिओ, “ओ सास्तरानै सीखाबाळो थार प बी हाय ह। क्युं क थे मिनखा प अंय्यां का बोज लादो हो। जिनै उठाबो कलडो ह। अर थे बि बोजनै उठाबा ताँई बानै आँगळी को सारोई कोनी द्‍यो।

⁴⁷थार प हाय ह! थे बा परमेसर की खेबाळा मिनखा की कबर बणाओ जानै थारा बडका मारगेर्या।

⁴⁸अंय्यां कर थे आ दिखाओ हो क थे थारा बाप-दादा क गेल चालर्या हो। क्युं क बे तो बानै मार्या अर थे बाकी कबर बणाओ हो।

⁴⁹जणाई तो परमेसर को ज्ञान बोलै ह, ‘म बाकन परमेसर की खेबाळा अर बानै भेजस्युं जखा भेजेड़ा खुवावीं हीं।’ अर बे बामैऊँ क्युंकनै तो मार देसी अर क्युंकनै दिन घालसी।

⁵⁰इ सरस्टि की रचनाऊँ लेर जत्ता बी परमेसर की खेबाळा को लोय बहायो गयो। बा सगळा का लोय को हिसाब इ पिडी का मिनखाऊँ चुक्यो ज्यासी।

⁵¹म थानै बोलुँ हूँ, हाबिलऊँ लेर जकरयाह ताँई की मोत को हिसाब, जिनै मनदर अर बलिनै जळाबा की बेदी क बिचमै मार्यो गयो हो। बा सगळा ताँई इ पिडी का मिनखाऊँ लेखो लिओ जासी।

⁵²सास्तरानै सीखाबाळो हाय ह थार प! थे थारा हात म ज्ञान हाळा घर का ताळा की ताळी तो लेली। पण खुदबी कोनी बड़्या अर नइ दुसरानै बड़बा दिआ।”

⁵³अर जद ईसु बठैऊँ चलेगो जणा बे फरिसी अर सास्तरी बिऊँ बेर बांद लिआ अर बोळी बाता म बिऊँ उळजबा लागगा।

⁵⁴क्युं क बे हा जखा बिनै बिकिई बात म फसाबा की फिराक म हा।